خبايا مشروع أبولو وخدعة الوصول للقمر

Quote: ومال الكواكب بتنجذب لبعضها بإبداء الرغبة الشخصية؟ إذا كان تخيلك للفضاء أي موقع خارج الغلاف الجوي للأرض فدا برضو فيهو جاذبية أيضاً، القمر دا بيلف حول الأرض كايس باركن؟ خليهو القمر، الأرض دي بتلف حول الشمس دايرة تعرفها ضكر ولا انتاية؟ خليها الأرض، النظام الشمسي كواكبو وين غير في الفضاء؟ البلمها شنو حول الشمس؟ تتدفأ؟ خليهو النظام الشمسي، المجرات دي كلها بيجمعها شنو في الكون الفسيح غير الجاذبية؟ غداء عمل؟

طبعاً مسترهوكس بي فهمو الفطير ده طاااااااخ ادا ليك النسبية العامة طلقة في الراس .. الغريبة قال عايز يناقش النسبية ومن المنلوج ده واضح انو ما عارف النسبية هي زاتها شنو
أو بالأصح قرا عنها وما وقعت ليهو ، أنا مجبور أشرح وأبسط (النسبية العامة) عشان البشر ده يستوعب.

الأرض (كمثال) ما بتولد جاذبية تتحكم بيها في القمر (مباشرة) زي ما انت فاهم ، الأرض بتعمل إنحناء في الفضاء المحيط بيها (الأقرب فالأقرب) ، والفضاء ده مكون من نسيج متداخل من الزمان والمكان (الزمكان Spacetime) ، الإنحناء البيحصل لهذا النسيج الكوني من كتلة الأرض هو السبب الرئيسي والتفسير الأصح والأوضح لجريان القمر حول الأرض ، كذلك الشمس بي كتلتها الضخمة ديك بتعمل إنحناء في الفضاء المحيط بيها وبالتالي بتتسبب في جريان الأرض وبقية الكواكب حوالينها .. وهكذا ..

أنيشتاين بيقول إنو الأجسام بتتحرك في خطوط مستقيمة (قدر الإمكان) Straightest Possible Line ، طيب بسبب الإنحناء القلناهو داك بيبقى المسار المستقيم عبارة عن مسار كروي Spherical Path يبقى لو افترضنا انو في مسارين مستقيمين حا يتلاقو في نقطة واحدة.
الخلاصة : نيوتن بيعتبر الجاذبية (قوة غامضة) زي ما فاهم إنت وأنيشتاين بيعتبرها (مجال) والفرق بيناتهم فرق السما من الواطه.

قوانين نيوتن دي ما تعول عليها كتير في الفضاء (عندها إستخدامات في الفضاء لكن ما بتنجح في كلو حاجة) ، كمثال القانون الثالث : لكل فعل رد فعل مساو له في المقدار ومضاد له في الإتجاه ، طيب لو أخدنا جريان الأرض حول الشمس ، اذا افترضنا لسبب أو لآخر أختفت الشمس ، الأرض ما حا يكون عندها أي ردة فعل إلا بعد 8 دقائق لأنو ببساطة أقصى سرعة كونية معروفة هي سرعة الضوء وبالتالي مافي شئ بيتفوق على الضوء في سرعتو أياً كان طبيعة هذا الشئ ، والضوء بياخد 8 دقائق عشان يوصل من الشمس الى الأرض ، يبقى وين رد الفعل المباشر؟ وطبيعتو شنو ؟؟ إذاً كلام نيوتن بتاع إنو الجاذبية قوة و آنية (بالتالي الأرض حتطلع من مسارها بمجرد إختفاء الشمس) ده كلام ما صحيح. صحيح نيوتن عالم كبير لكن حواء والدة وجلّ من لا يخطأ.

أخليك تذاكر انت والمشجعين بتاعنك والى لقاء آخر بإذن الله في الحقنة التالية .. جرعات ممتعة أتمناها لكم