شوف العين !

Quote: نظرية البوري .. سلوك القطيع نظرية البوري دي من بنات عم أفكاري وبتوصف سلوك معين لكن ممكن ينسحب على تصرفات تانية كتيرة .. لمن تكون سايق وفي صف طويل بتاع عربات بسبب عربية في الغالب بتكون قافلة الشارع، بيعدي وكت ما قليل العربات بتكون ساكتة ومنتظرة بكل صبر وذوق لو واحد مستعجل أو أخلاقو ضيقة أو لأي سبب آخر قام تيييييييت ضرب بوري .. بعد شوية الجنبو حيضرب .. والوراهو والقدامو لغاية ما بعد ثواني ينقلب الشارع لحفلة بوريهات راقصة وما في زول بيقول لي روحو طيب ما أنا من قبيل ساكت ليه ما إنتبهت إلا بعد ما زول تاني ضرب البوري؟ بقيت وفي إطار دراسة متعمقة لسلوك السائقين/سلوك القطيع أول ما أجي ألقي الشارع واقف وصاني أقوم تييييت أديها بوري وااااحد بس .. وبعديها الحفلة تبدا ! طبعاً غني عن القول إنو مجتمعات بشرية بأكملها ماشة بي نظرية البوري دي !

ـــــــ
* دي برضو لاحظتها في صلاة الجماعة عندما يكون صوت الإمام غير واضح .. أها بعد الإمام يكبّر بتلقي واحد رفع صوتو الله أكبر وواحد تاني في الصف الثاني ... إلخ .. في النهاية الواحد بيلقى نفسو برضو كبّر بي صوت عالي .. رغم إنّو هنا مافي زحمة .. لكن ممكن تقولي في استعجال لانتهاء الصلاة رغم إنّو لو سبقتي الإمام عديل كدا ما ممكن تختصري وقت الصلاة لأنّو في النهاية يا تسلّمي بعدو يا صلاتك باطلة