|
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين (Re: الصادق اسماعيل)
|
نعم التحية لابراهيم الشيخ، وهذه شهادة في حق الرجل كماعاصرت كزميل دراسة:
كان هذا اوائل الثمانينات، في اول مواجهة مابين الكيزان وبقية التنظيمات وهذه المواجهة هي اللي خلقت تنظيم التجمع، بل مادار في ذاك اليوم بمقهي النشاط الكان بطلو ابراهيم الشيخ، كان ياهو المناظر زي ما كنا بنقول زمااان ايام سينما "البلونايل" يطراها، تلك ايام، بالخير، اللتي سبقت احداث التجمع بشرق السودان بي سنين.
نعم كنتا كالعادة حايم في النشاط، ولكن من دون اركان اليوم داك.
الاتصار كانو بمحازاة جرايد النشاط بالقرب من شدرة دالي في النشاط، في شكل صف عسكري طويل بمحازاة الكيزان، ومن الجهة الاخري وامام كلية الاداب مباشرة كان تجمع الجبهة الديمقراطية ومؤتمر المستقلين والبقية.
الجبهة الافريقة كانت معسكرة امام شعبة الجغرافيا.
اها لما الطلاب الانصار بداو يسوو: " كتيبة النجومي تتقدم الي الامام خطوة"
اصحابي ابتدو يفرو من النشاط واحد ورا التاني باعذار مختلفة!!
الطريف جدا كان منظر الكيزان الكان ردهم علي خطوة الانصار كالاتي:
كتيبة الخرساء تتراجع الي الخلف خطوتين!!
عييييييك!
اها قبل الدقش ما يبدأ لقيت روحي بي خفة او من دون اي مناسبة او بي براة وسذاجة لا احسد عليها، حايم وسط الجيوش المجيشة دي من دون ادني مناسبة ياللعبط بحق!
اها لما الدقش بدا، بقيت يازول في الطريقة التخارجني!!
الطريف جدا الكوم بتاع التجمع كان اول كوم انفضا وبسرعة البرق، ليبقي ابراهيم بمفردو مع قلائل يقاتل في عدد من الكيزان الي ان تبقي بي مفردو محاط بي عدد منهم!
اها علي كده قمتا فازي شعل مخارجة وياللمصيبة باتجاه كلية المعمار سالك الطريق البين شعبة الجغرافيا والنشاط، وحينها انهمرت الحجارة من مئات الكيزان الجو من اطراف العاصمة من الجامعات الاخري، باتجاه طلاب الجبهة الافريقية الكانو زي 50، 60 نفر، وقد ابلو بلاءا مدهشا بحق وصمدو في مواقعم لمهارتم العالية في مداركة الاحجار بالعصي، والمنظر كان مدهش حقيقة!
نعم تلقي الواحد منهم وبمهارة عالية بفتت خمسة ستة طوبات بمفردو في ذات اللحظة او دفعة واحدة، لتتحول الي غبار كثيف حجب رؤية الكيزان!
اها وانا في هذه الحال جا البوليس من جهة المعمار، واذا بي اسابق الريح مع الكيزان واعضاء الجبهة الافريقية باتجاه داخليات البركس!
اها من اليوم داك نزل اسمي والي هذا التاريخ في سجلات امن الاتجاه الاسلامي ثم الجبهة الاسلامية ك:
معلومات حزب شيوعي!
عيييييييك!
نعم كنت مصنف كمعلومات حزب شيوعي، او عرفتا الكلام ده من اولاد اهلي الكيزان، لانو كيزان الجامعة باستمرار كانو بباروني محل ما امشي بالذات لما تكون هناك بوادر كركبة، لينتهي بنا المطاف انا والمباريني الي واحدة من مؤسساتم هم معظم الوكت، بالذات بنك التضامن الاسلامي، الكنتا بمشيهو كتير لي واحد من ال بشاشا من اقرباي!
ده السبب في زياراتي الاولي للسودان اوائل التسعينات جوازي السوداني حينها كانو بقلعو مني في المطار!!!
ابراهيم الشيخ معروف جدا للناس ديل من هو طالب، وانا واثق هم وقعو مع الزول الخطأ فعلا، وهو لن يساوم قط.
ماكنا بنعرف بعض ولكن كنا بنعرف فقط اشكال بعض من التردد علي النشاط ولو انو الزول مازول كلام زينا، وانما زول عملي شديد.
التحية للصنديد ابراهيم الشيخ والحرية لسجناء الضمير.
الصادق شلوم.
|
|
|
|
|
|
|
العنوان |
الكاتب |
Date |
تحية تقدير لإبراهيم الشيخ في محبسه .. بقلم: أ.د. الطيب زين العابدين | الصادق اسماعيل | 08-01-14, 04:46 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | Imad Khalifa | 08-01-14, 05:53 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | osama fadlalla | 08-01-14, 06:13 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | محمد أحمد الريح | 08-01-14, 08:13 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | الصادق اسماعيل | 08-01-14, 09:45 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | Bashasha | 08-01-14, 10:45 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | صلاح عباس فقير | 08-02-14, 03:42 AM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | سيف اليزل سعد عمر | 08-02-14, 06:54 AM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | محمد حيدر المشرف | 08-02-14, 10:53 AM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | nadus2000 | 08-02-14, 12:52 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | الصادق اسماعيل | 08-03-14, 10:16 PM |
Re: تحية تقدير لإبراهيم الشيخ في محبسه .. بقلم: أ.د. الطيب زين العابدين | محمدين محمد اسحق | 08-04-14, 11:13 AM |
|
|
|