للاعـزاء خريجي ابوكدوك المتوسطة .. تعالوا نعيش مع ذكريات التفوق والاساتيذ العظام

Quote: المكرم / عادل ابراهيم ليك التحية وكتير التقدير ,, سعيد أتابع البوست ده عن مدرستنا أبوكدوك المتوسطة وأبناء الدفعة الاعزاء ( دفعة 1986 ) البتمني ليهم جميعا التوفيق .. والأيام باعدت بين الناس ... للحقيقة برضوا بتفق معاك في تحية خاصة للمهندس حسن زمراوي البخجلنا باهتماموا وتواصلوا مع ولاد الدفعة ولحدي العيد ده اتكلمنا واتبادلنا المعائدة أكيد الأسماء الذكرتها من أساتذة وولاد الدفعة ليهم الكتير في الخاطر وفي البال أبوكدوك بكل صرامته وتقاليده الراسخة من طابور الصباح 7 ونص صباحا وكمان ما قبلوا واتشرفته أكون في الزمن داك من الفريق البكتب مع أستاذنا عثمان بيك جريدة المدرسة الصباحية ( إشراقة ) وتقديم بعض فقرات الإذاعة المدرسية قبل طابور الصباح الاكيد كنا بنستعد فيهوا لمقابلة الأستاذ القامة الطيب رحمه ........ وأجمل الطوابير دي كانت البتكون ما بعد الامتحان الشهري وتكريم المتفوقين لابوكدوك الكتير في الخاطر ولو أتواصل البوست وبتمني يشارك فيهوا ود دفعتي وصديقي العزيز أشرف حسين أبو الحسن _ وهو عضو هنا في سودانيز أون لاين _ أكيد حنتكلم كتير عن مدرستنا المميزة وأثره ومدي فخرنا بيها ............. وأكيد ود الدفعة ورئيس رابطة خريجي أبوكدوك حسن زمراوي ...................................................... الاكيد كان لينا هنا على مر السنين بوستات كتيرة في سيرة أبوكدوك المتوسطة ..... البتظل في الخاطر بكتير من الفخر والتقدير كتير التحايا يا عادل وأكيد التقدير ,,, ------------------------------------- * عبد الناصر الخطيب دفعة 1986 ( ثالثة أبو عبيدة )