توضيح حول المخالفات المرورية لسفارة السودان بلندن!!!

Quote: طيب أنا بقصد انو المخالفات التي تمت وسوف تتم إلى أن ما يشاء الله هي عربات الدبلوماسيين فقط وليس عربات الاستعمال الرسمي للسفارة والسفارة لن تدفع حتى نصل لصيغة اتفاق مع السلطات البريطانية.

بعدين وكت إنتوا ما وصلتوا لصيغة إتفاق وغير معترفين بالمخالفات دي من أساسو، طيب ليه جبت لينا
سيرة تحمل السائق للمخالفة ما أهو إنتوا في النهاية ما حتدفعوا الإ في حالات محددة زي ما كتبت أعلاه!!

Quote: بخصوص سياسة السفارة الصارمة مع سائقي عربات السفارة الرسمية فدي عشان ما يستغلوا الوضع ويمشوا يوقفوا العربات في أي محل في الشارع العام. عشان كده أي مخالفه منو يتحمل مسئوليتها

دا برضوا كلام دا ما حيفيدنا بشئ لأنوا أنتوا عندكم رآي في المخالفات ..
حتى ولو كان الأمر مختلف فحجتك بعدم الدفع لأنها مسؤولية السائق حجة واهية لأنوا العربية في النهاية
مسجلة بأسم البعثة السودانية بغض النظر إن كانت للإستعمال الرسمي للسفارة أو للدبلوماسيين وأسرهم.
كلامي واضح شديد بأنوا دي مسؤولية السفارة هي مفترض تدفع بعدين تخصموا القروش من الموظف بتاعكم.

Quote: طيب تفتكر الدبلوماسي صدقوا ليهو بالعربية عشان يوقفها في البيت؟ مش عشان يمشي بيها الشغل؟ ولدواعي أمنية يصعب شرحها لازم عربية الدبلوماسي تكون أمام السفارة وتحت المراقبة.

سؤالك دا خارج سياق نقاشي معاك وما عندوا أي معنى! الدواعي الأمنية دي الطلبها منك منوا؟
بعدين قليل من التواضع! كل مرة حاشر لينا قصة يصعب شرحها ومضطر للشرح :) التعالي والترفع
دا ما جديد علينا اكان من موظفي وزارة الخارجية السودانية ولا من حكومتك في السودان الا من رحم ربي..
عموماً كتر خيرك كتير لأنك إحترمتني وكلفت نفسك عناء الرد على زول من العامة ودا بيدل على انك زول فيك
خير .. كل سنة إنت طيب