حقيقة الإمام البخاري

Quote: القرآن نص على تكريم الإنسان وتسخير الكون ليهو، وحث على العقل و العلم والتدبر والنظر في تاريخ الحياة والبشر، ودي قيم متقدمة جدا بالنسبة للمجتمع النزلت فيهو الرسالة، وتمهيد لوصول البشر لعصر التكنولوجيا والتقدم العلمي الهائل البخليهم يشوفوا عجائب صنع الخالق وعصر الكمبيوتر والمركبات الفضائية، وقفل باب النبوة، لكن الحصل بعد انتقال الرسول صلى الله عليه وسلم كان مصيبة كبرى، وبدل ما العرب يرتقوا بأنفسهم لمستوى الإسلام الجاهم نزلوا الإسلام لمستواهم، سالت الدماء أنهارا، إذا كان الإسلام جاء لفضح تحريف الأديان السابقة وتصحيحها فقوى الشيطان نجحت مرة تانية في أنها تحرف الإسلام بطريقة أشد خبثا من طريقة تحريف نصوص الكتب السماوية! ستمائة ألف حديث يطلعوا منها كم ألف حديث صحيح، يعني كان في وباء من الكذب انتشر في الزمن داك ولاشنو؟ المهم خلاصة الحكاية دي إنها بقت جرثومة نخرت في الحضارة وقتلت فيها بذور الإبداع، وكانت النتيجة الطبيعية بعد ده هزيمتها في الأندلس وهزيمة تركيا في أوربا، الحصل في الأندلس ماخلى زول يقيف ويقول نحن الغلط فينا شنو؟ الأتراك ظهر فيهم أتاتورك، والمصيبة لحدي هسع ناس عاوزة ترجع لي ورا! لولا هذا التحريف كان مفروض تحرير الرقيق يجي من الإسلام والمساواة بين المرأة والرجل والمساواة بين جميع البشر ونبذ العنصرية، كان مفروض حرية الفكر تصبح من الثوابت، وكان التقدم العلمي حيكون نتيجة طبيعية، لكن الحاصل هو الشايفنو نحن هسع! تصحيح الغلط الحصل ده بيكون بمراجعة كل التاريخ والثقافة ونقدها نقد بناء عشان نعرف المصيبة دي بدت كيف، وعشان ده يتم مسألة عبادة الأسلاف وتقديسهم دي لازم تنتهي، القدسية لله والعصمة لرسوله، وبعد داك كلو اجتهادات بشر قابلة للخطأ والصواب وحالنا النحن فيهو ده نتيجة طبيعية للأخطاء الشنيعة الارتكبوها القبلنا! لو انت عندك غيرة حقيقية على دينك مفروض تساهم في عمل زي ده بدل التشكيك والاتهام، لأنو لو حاجة زي دي ما حصلت فتأكد إنو إذا كانت البلد واقفة على كراع واحدة بسبب واحدة ارتدت بكرة حيكونوا المرتدين بالملايين وإذا انت ما حاسي بي كدة ابقى أصحى الانترنت غيرت العالم والناس شايفة الحاصل شنو! أنا لما اتكلمت عن سلمان رشدي في واحدة من مدخلاتي السابقة كان بسبب موقف حصل لي ، واحد أوربي أجدادو كانوا مسلمين، سألني عن سلمان رشدي، أكذب عليهو في سببيل الله زي ما بعملوا بعض الناس ولاشنو؟ طبعا لا! ولما أشوف لي واحد دقنو طولها متر وعلامة الصلاة في وشو ولابس ليهو جلابية قصيرة يجي الناس واقفين صف طويل عشان يركبو الترام يقوم هو يتخطاهم كلهم ويركب أول واحد بدون أي خجل، بلقى نفسي أنا في مواجهة المصيبة دي وجها لوجه، لما أشوف العربات تفرمل في الشارع ويتعطل المرور عشان يخلي وزينة تعبر الطريق بصغارها وأتذكر منظر الأطفال في بلد مسلم يتسلو بقتل القطط ومافي زول بقول ليهم لأ بسأل نفسي نحنا الحصل لينا شنو(نفس البلد بعدها بسنوات أهلو قاموا يقتلو في بعضهم الببعض بعشرات الألوف)! يامنتصر ياخوي أصحى وصحي الجنبك!