|
Re: الندية المفرطة ... (Re: الجنيد حمد)
|
الدكاترة يالستة
ايام التطعيم وما ادراك ما التطعيم
بتجي عربية المحلية لافة بفوق الحلال وفيها مكرفون (بشخشخ) وبتلقى الزول التكلم فيه (عرقو يتخلت)
وشغال يكورك طعم طفلك ضد (السحائي الشلل السعال الديكي السل الملاريا الدفتيريا التتنس الدوسنتاريا ....الخ (امراض)
شخصياَ بمشي اتطعم عشان المصل بتاع السحائي خاتنو في حافظة زي بتاعة الداندرمة (جادي )
ما علينا زي ما قالت الفنانة ديك
الصباحية كدي والحروم مارقات يفزعن للويقود والفزع الصباحي بكون في الحالات الطارئة يعني امس العصير كان في موت
فجائي لزول كده. وفجائي دي يعني عمرو فوق للمائة وراقد في الاسبتالية كمين شهر اها نسبة لفروقات الوقت الحريم ما بكون مرقن
للفزع لانهن في حالة سكلي وكتيح رماد حينها
اها
اتلملن وهاك (ياقطيعة) اقصد ونسة ناس قدام ما جوا لسة ما ظنيت الخبر (وصلم)
اجي اجي ما هو ابراهيم كان قاعد ومشى يكلمهن من ساعة الموت ووووو
ثم
والله الليلة مجدي من الصباح ميرود
كر علي يا بت امي
سلامتو
هي مالو
يا حليلو والله
مسكين
وطوالي بخشن في التشخيص
ده لعب (الفلل) في السخانة النهار كلو يزوزي
هوي ها ده اكل المر
اها اديتوه شنو
والله قلت اوديه بعدين الاسبتالية لو لقيت عربية ماشة لقدام
اسبتالية شنو لو مشيتي بدوه كلوركين ساي والله
انا عندي حبوب كينين قاعدة كدي بديك ليهن حبتين بس ويقوم زي السلام عليكم
هوي ها الكينين بتطرشوا ساي اديهو الفانسدار اصلو حبوب الفانسدار دي سمحة شديد
عليك الله
اي والله
؟؟؟
لا دكتور ولا يحزنون في صاج الكسرة بشخصو حالة المريض وبعالجوه قبل ما يشوفوه
...................................
هوامش
سؤال جادي الدفتيريا دي شنو
الويقود - حطب القطن او قصب العيش او دفيس يستخدم في عواسة الكسرة والعصيدة والذي منو
الفزع - رحلة الذهاب والاياب لاحضار الويقود
الكلوركين - الفانسدار - الكينين ( حبوب هرونا بيهن هري)
|
|
|
|
|
|
|
|
|