|
|
 Re: الهلال يعود بتعادل سمين من فاشر السلاطين !! (Re: أشرف الرحال)
|
مزااااااااااااج رايق خلاني ارفع البوست دا
بمناسبة البكا دا كتب محمد عبد الماجد في عموده الراتب كلام ثقيل جنس تقالة منو
وإن طااااااال السفر | محمد عبدالماجد
دموع بـــــــــــــــــــــلة
الخميس 1 مايو 2014
* بكاء بلة جابر دا بكاء (بوفيه) ..وإلا كمان بكاء حاجة تانية؟.
* عينيا ما تبكي ..ما تبكي ..ما تبكي..ما تبكي.
* انتوا بلة جابر دا ما درسوه ...(اي دمعة حزن لا لا).
* وين العبارة دي.
* خليتوا العبارة دي ...وقعدتوا (تمطمطوا) لينا في عيونكم ..زي (الجوابات) الفارغة.
* بلة جابر دا ما سمع بي (عينيا ما تبكي).
* اصلو ما سمع بي ترباس.
* يا بلة ما تقعد تبكي فينا.
* هسع يا (بلة) لو سألوك ..البخيلك (تبكي) شنو؟.
* الجعري لزومو شنو؟.
* في حاجة نقصت في (البوفيه).
* قبل كدا قلنا ليكم (التقشف) وصل (العدس).
* العدس بقوا يجبوه البوفيه بدون (قدحة).
* طلب الفول ..بجيبوه بـ (عيشة واحدة).
* زيت ما فيه.
* القراصة ما فيها (خميرة).
* الشعيرية بدون (سكر).
* بكاء بلة جابر دا ما بكاء (تعادل).
* كمان نحن ما بنعرف بكاء (التعادل).
* بعدين ..في الاساس ...هو (التعادل) جديد عليكم.
* ليه بتكبي في عطبرة؟.
* الحصاحيصا ...مالك ما بكيت؟.
* شندي ..مالك ما بكيت؟.
* وإلا يمكن يا جماعة بلة جابر دا معذور في عطبرة ..هدف التعادل جاء في الدقيقة (98).
* هدف الدقيقة (98) دا زي خبر الغرق.
* موش مرات الساعة 12 ضهرا ..يقولوا ليك في زول غرق.
* والعجب لو كان الزول الغرق (ضيف).
* الناس كلها تقعد تبكي.
* الموت بالطريقة دي سخن.
* مامون ابوشيبة كتب عن الحكم وقال : ( يبدو انك كنت تعلم ان هدف التعادل سيأتي في الدقيقة 98 ولهذا احتسبت كل هذا الزمن وانهيت المباراة في الدقيقة 99).
* يعني الحكم طلع عارف.
* الحكم طلع عارف الهدف بجي في الدقيقة (98) ..عشان كدا قام رفع الزمن البدل الضائع (8) دقائق.
* شفتوا الحكم دا خطير كيف؟.
* دا ما حكم...دا سيف الدين مساوي عديل كدا.
* يكون الحكم نسق الموضوع دا مع الطاهر حماد.
* قال ليه تجيب قونك في الدقيقة (98) عشان ناس المريخ ديل ما يفكروا في اي هدف تاني.
* الجماعة قاعدين يفكروا في (الرجعة)...الطاهر حماد جاب هدفو.
* وبلة جابر قعد يبكي فينا.
* جعري بي اخلاص.
* طيب يا بلة جابر انت ليك (10) سنوات بتجرس كدا في (تعادل)..ناس ابراهومة بتاع (الرديف) يعمل شنو؟.
* يا بلة جابر كدا ما صاح.
* مامون ابوشيبة طلع اخطر من بلة جابر.
* تاني عارفين مامون ابوشيبة قال شنو؟.
* مامون ابوشيبة قال : ( يبدو انك كنت تعلم ان هدف التعادل سيأتي في الدقيقة 98 ولهذا احتسبت كل هذا الزمن وانهيت المباراة في الدقيقة 99).
* يا ابوشيبة دا حكم وإلا (نشرة جوية).
* بالغت يا ابوشيبة ..طلعت الحكم زي الارصاد الجوي.
* عارف الدقيقة (98) المريخ بجيبوا فيه قون.
* عليكم الله هسع لو قالوا ليك المريخ بجيبوا فيه قون في الدقيقة (98) في زول بصدق.
* لو قالوا في قون بيسجل في الدقيقة (98) في شباك في القوز الفي حلتنا ما بصدق.
* تجوا انتوا يا مريخاب ..يا كبار ..يا ناس الخبرة ...يا ناس اتوفيستر ..يا العندكم (7) محترفين ..يجيبوا فيكم قون في الدقيقة (98).
* هسع لو جبتوا ليكم طوب واسمنت وسيخ في زول بصدق ان السيخ والطوب والاسمنت والسيخ دا بجيبوا فيه قون في الدقيقة (98).
* خلوهم ناس ضفر ..وبلة وفييرا وتراوري.
* تراوري جاب ليه قون بي (العدلة)..فرحان.
* الطاهر حماد ..قال ليه عشان تفهم حاجة ...انا القون بجيبوا بالقلبة.
* وعشان تفهم اكتر.
* بجيبوا في الدقيقة (98).
* على اليمن هدف الطاهر حماد دا ..اجمل هدف في الدوري الممتاز.
* ما في اجمل من كدا.
* تاني ..ابوشيبة قال شنو عن الهدف.
* ابوشيبة قال : ( يبدو انك كنت تعلم ان هدف التعادل سيأتي في الدقيقة 98 ولهذا احتسبت كل هذا الزمن وانهيت المباراة في الدقيقة 99).
* يا ابوشيبة دا حكم ..وإلا مفرمة ملوخية؟.
* دا حكم وإلا ساعاتي العارف اي حاجة.
* ظابط الزمن على هدف الطاهر حماد.
* لكن انتوا لو جيتوا للحق ...الزمن لو كان حسب الزمن البدل الضائع (6) دقائق ..الطاهر حماد ما كان سجل.
* لو الحكم حسب الزمن البدل الضائع (7) دقائق ..الطاهر حماد ما كان سجل.
* لو الحكم حسب الزمن البدل الضائع سبعة ونص ..برضو الطاهر حماد ما كان سجل.
* شفتوا (الصدفة) دي غريبة كيف؟.
* دي صدفة عجيبة.
* اشمعنا حسب الزمن البدل الضائع (8) دقائق.
* دا شوط تالت عديل كدا.
* ليه حق ابوشيبة يقول : ( يبدو انك كنت تعلم ان هدف التعادل سيأتي في الدقيقة 98 ولهذا احتسبت كل هذا الزمن وانهيت المباراة في الدقيقة 99).
* على كدا فيصل سيحة يوم الجمعة بجي يقول هدف الامل ما صحيح.
* تسلل واضح.
* ليه يا سيحة؟.
* عشان جاء في الدقيقة (98).
* الدقيقة (98) في عطبرة ما بجي فيها هدف.
* والمباراة ذاتها مفروض تكون انتهت.
* مباراة هي وإلّا حفلة.
* ناس النظام العام مفروض من الدقيقة (91) من عمر المباراة يدخلوا يشيلوا العدة.
* مفروض كدا.
* البلد دي كا فيها قانون.
* (8) دقائق.
* لكن اكرم الهادي سليم ..(الوقعة) الواحدة بضيع فيها (15) دقيقة.
* تقول بقع ليه في ترعة ..يقوم بعد تلت ساعة.
* النقالة تدخل وتطلع ..وعلاءالدين قالوا ليك (يشحن) موبايلو عديل كدا في توقف المباراة.
* موبايلو يبقى اربع خطوط.
* دا موبايل وإلا موقف استاد الخرطوم.
* وزعلانين عشان الحكم احتسب (8) دقائق.
* مفروض في عطبرة المباراة تنتهي من الدقيقة (94).
* مفروض كدا.
* (98) دقيقة ليه؟.
* زي حكاية الزول البتقول ليه ضربت ليك الساعة واحدة صباحا ..يقوم يقول ليك ..والساعة واحدة انا البرجيني ليها شنو؟.
* نحن من تسعة بنوم.
* تسعة وعشرة لو جيتنا ..ما بنقوم ليك إلا تجيب لينا خبر وفأة.
* هسع المباراة في عطبرة من الدقيقة (94) مفروض تكون انتهت.
* ناس عطبرة ما قاعدين يساهروا.
* قون الدقيقة (98)..قون حار ..والله ما في زول بيستحلمو.
* بلة جابر ليه حق يقعد (يجعر).
* يا موسى الزومة ...قلبو زي الحجر.
* دمعة ما نزلها.
* (الدمعة) دي طبعا بتريح بلة جابر.
* عشان كدا ...بلة جابر قعد يبكي ..عشان (الدمعة) دي.
* انتوا قالوا ليكم بلة جابر براهو القعد يبكي.
* نحن بعد نهاية المباراة ..طلعنا من البيوت من صوت (الجعري).
* قلنا المات منو؟.
* الحلة كلها فتحت (بكاء).
* يا جماعة الحاصل شنو؟.
* قالوا الامل عطبرة جاب ليه قون في الدقيقة (98)...خلى ليك بلة جابر متل (الفول) الما فيه زيت.
* الطاهر حماد ..جاب ليه قون ..لو قالوا ليك (ارسمو) ما بتقدر.
* لو جبت ليك (نجار) ما بتعملو.
* القون دا بي (كمان) ما بجي.
* ضفر (مصنقع)....ما عارف راجي شنو؟.
* وغاندي رايح بي هناك.
* وباسكال مصبغ شعرو.
* هسع علاقة القون بي صبغة شعر باسكال شنو؟.
* الشيء المحيرني ..ومفرتك (ضحكتي)...اكرم دا كان قاعد (21) يوم برة البلد.
* انتوا براكم قلتوا (ركبتو) حالجة.
* البخليكم توقفوه شنو؟.
* والله اكرم الهادي بي حالتو دي ..مفروض لي (صورة) ما توقوفه.
* تجوا توقوفه في عطبرة.
* انتوا ما بتعرفوا عطبرة.
* ناس عطبرة ديل الحضري عندهم فوقو رأي.
* تجي توقفوا ليهم اكرم الهادي سليم.
* اكرم يكون فاكر المباراة انتهت في الدقيقة (94).
* الدقيقة (98) دي بكون فاكرها (ندوة).
* ندوة مع (اطلاق الحريات) دي.
* ملحوظة : ندوة شنو يا زول؟.
هوامش
* الطاهر حماد قالوا ليه رأيك شنو؟.
* قال ليهم في شنو؟.
* قالوا ليه في بلة جابر.
* قال ليهم بلة جابر معذور ..لمن انا سجلت الهدف ...افتكر انو قالوا ليه (الرغيف) انتهى.
* عشان كدا قعد يبكي.
* موش مرات بتمشي الفرن نص الليل ..عشان تجيب ليك رغيف ..يقولوا ليك رغيف مافي.
* تجي تعمل ليكم عصير ليمون ..تشربو وتنوم على كدا.
* النهائي الاوربي اسباني خالص.
* اتلتيكو مدريد وريال مدريد.
* يعني في كونو اسباني ..النهائي (مدريدي) صر.
* نحن جماعتنا ديل نعمل ليهم شنو بطلعوا من دور الـ (64).
* تقول قاعدين ليهم في مدرسة.
* انا اول مرة اشوف لي جماعة بطلعوا من دور الـ (64)..وبسجلوا فيهم هدف في الدقيقة (98).
* انتوا مشكلتكم شنو مع الارقام الكبيرة دي؟.
* اوعكم ناس الهلال ديل يسافروا لينا عطبرة بالقطر.
* لو سافرتوا بي قطر ..اقنعوا من المباراة.
* يا جماعة ناس المريخ ديل في (قطر) في معسكر استمر شهر ..سجلوا ليهم (هدف) وحيد.
* هسع سافروا بـ (قطر) رجعوا بي نقطة.
* النقطة دي يودوها وين؟.
* من ثلاث جولات ..رجعوا بي (نقطة).
* نقطة.
* نقبل ليكم على الفاشر.
* يا ناس الهلال جهزوا (النقعة).
* الجماعة ديل في (النقعة) حالتهم بتبقى صعبة.
* يا بلة جابر ..لو عاوز تبكي لينا ..من هسع ما تمشي مع المريخ ديل الفاشر.
* لو قلبك بقى ما قوي ...(النقعة) دي صعبة عليكم.
* وناس الفاشر ..جنهم وجن الزول البقعد يبكي.
* اوعك تعمل كدا في الفاشر.
* .....
* عاجل : يا فاروق جبرة ..واحمد السيد ..شدوا حيلكم ..المريخ دا الى الان ما انتصر برة ..تقول بيلعب في رام الله.
مودتي
الرحـــال
|
|
 
|
|
|
|
|
| العنوان |
الكاتب |
Date |
 الهلال يعود بتعادل سمين من فاشر السلاطين !! | طارق حرسي | 04-16-14, 08:04 PM |
| Re: الهلال يعود بتعادل سمين من فاشر السلاطين !! | صديق الموج | 04-16-14, 11:49 PM |
| Re: الهلال يعود بتعادل سمين من فاشر السلاطين !! | almulaomar | 04-17-14, 08:12 AM |
| Re: الهلال يعود بتعادل سمين من فاشر السلاطين !! | حمزاوي | 04-17-14, 08:42 AM |
| Re: الهلال يعود بتعادل سمين من فاشر السلاطين !! | عبد الله شم | 04-17-14, 08:55 AM |
| Re: الهلال يعود بتعادل سمين من فاشر السلاطين !! | نور الدين عثمان | 04-17-14, 08:58 AM |
| Re: الهلال يعود بتعادل سمين من فاشر السلاطين !! | ياسر منصور عثمان | 04-17-14, 09:12 AM |
| Re: الهلال يعود بتعادل سمين من فاشر السلاطين !! | محمد البشرى الخضر | 04-19-14, 11:53 AM |
| Re: الهلال يعود بتعادل سمين من فاشر السلاطين !! | حيدر بشير | 04-19-14, 01:35 PM |
| Re: الهلال يعود بتعادل سمين من فاشر السلاطين !! | د. ياسر عبد القادر | 04-19-14, 08:25 PM |
| Re: الهلال يعود بتعادل سمين من فاشر السلاطين !! | طارق حرسي | 04-20-14, 09:20 PM |
| Re: الهلال يعود بتعادل سمين من فاشر السلاطين !! | طارق حرسي | 04-20-14, 09:30 PM |
| Re: الهلال يعود بتعادل سمين من فاشر السلاطين !! | طارق حرسي | 04-20-14, 09:41 PM |
| Re: الهلال يعود بتعادل سمين من فاشر السلاطين !! | طارق حرسي | 04-20-14, 09:47 PM |
| Re: الهلال يعود بتعادل سمين من فاشر السلاطين !! | aosman | 04-21-14, 10:19 AM |
| Re: المريخ يعود بتعادل من عطبرة اب سن يضحك على ابو سنين !! | أشرف الرحال | 04-30-14, 06:55 AM |
| Re: الهلال يعود بتعادل سمين من فاشر السلاطين !! | محمد مجيدو | 04-30-14, 08:38 AM |
| Re: الهلال يعود بتعادل سمين من فاشر السلاطين !! | أشرف الرحال | 04-30-14, 11:14 AM |
| Re: الهلال يعود بتعادل سمين من فاشر السلاطين !! | abas | 04-30-14, 03:05 PM |
| Re: الهلال يعود بتعادل سمين من فاشر السلاطين !! | أشرف الرحال | 04-30-14, 05:14 PM |
| Re: الهلال يعود بتعادل سمين من فاشر السلاطين !! | أشرف الرحال | 05-01-14, 07:03 AM |
| Re: الهلال يعود بتعادل سمين من فاشر السلاطين !! | أشرف الرحال | 05-01-14, 05:11 PM |
| Re: الهلال يعود بتعادل سمين من فاشر السلاطين !! | د. ياسر عبد القادر | 05-01-14, 11:54 PM |
|
| |
أشرف الرحال
فيس بوك
تويتر
انستقرام
يوتيوب
بنتيريست