|
|
 Re: ما ظنيت انو محجوب شريف كتب البتاعة دي..! (Re: rani)
|
هاشم صديق : ما جاب المطر بنزين
ما جاب المطر بنزين..
و لا سوت خطب مولانا تاج الدين..
بلده طيبه و قوم آمنين..
ولا ارتاحت جيوب الناس..
في الطابونه و الكنتين..
قعدتو تبولو في ريسينا..
كم حولا فات في العد..
عدد عشرين..
خليتو البلد فقران..
سواد الأمه بات محتاج..
وجل الشعب صار مسكين..
ما شفنا يا مولانا يا بشبش..
إسم إسلامي إسلاميين..
ولا شفنا الصلاح أفعال..
ولا قامت شريعه ودين..
سويتو البنوك كعبه..
وهرولتو بين كافوري و البدعه..
وبين السفه و اللبعه..
جيتو نحاف تقول أطياف..
بقيتو كروش شحم و قروش..
و مافيكم إسم صالح و لا صالحين..
يا مولانا يا بشبش و تاج الدين..
نحنه اولاد بيوت الطين..
ما دخلنا بيوت البيتزا..
ولا عارفين شنو الهوت دوق..
ولا اتحنكشنا بالمصاصه..
إنتو المصيتو دم الشعب..
ما خليتو قطرة دم..
و إنتو السقتو بي حالو..
وطن للجوع و نار الهم..
و إنتو البعتو خير الأمه..
شرف الذمه لما خجل عديل..
من روحو حتي الدم..
و إنتو الجيتو بس لي اللم..
و كم في كم..
قهر الامه و التنكيل..
يا بشبش هو ده التأصيل?..
و جنس البيتزا موش إيطالي?..
ما جعلي و لا شايقي?..
و الهوت دوق موش نصراني?..
و إلا كمان صبح سوداني?..
ساي بالغش و بالمصاصه..
يا حصحاصه ده الإنجاز ..
و ده الإعجاز..
مما جيتو إتباع الشرف..
في السوق..
عكرتو البحر بالغم..
و كتلتو العباد بي الهم..
و سطرتو الظلم بالدم..
رقيتو الرمم لي فوق..
زرزرتو الرقاب بالطوق..
و لغيتو الخجل و الذوق..
يا بشبش أمير الدين..
نحنه اولاد بيوت الطين..
كنا عزاز و مستورين..
و شبعانين..
نعوس الكسره فوق الصاج..
و بينا العشره و النفاج..
لا هوت دوق و لا بيتزا..
ولا مصاصه..
شبعنا عشقنا اللقمه بالتقليه..
و القراصه بالدمعه و بالسمنه..
وسلطة روب كمان خاصه..
قبل ما تجونا ما كنا ناس فاجرين..
ولا كفار و عارفين الفروض..
والدين..
إنتو الجيتو كضابين و سفاحين..
وسراقين..
نشفتو البلد و الريق..
وتجار دين لاشوف سبحه..
لا إبريق..
ما زدتو البلد إنجاز و لا ميزه..
غير مصاصه أو بيتزا..
كل شيتا عكس روحو..
و نكر سيده..
شمس بتجينا بي وشيها..
بقت بتجينا بي(……..)..
كل شيتا صبح بالعكس..
عقل الباقي صابو المس..
لا خدر زرع أو قش..
لا نجض التمر للحش..
كل شيتا صبح بالعكس..
وطن كامل أذاهو القص..
حتي الضل دخل القش..
سمع أضاني كورك كش..
كل شيتا صبح بي الغش..
العولاق صبح عملاق..
و الرمه صبح قمه..
ديك الوادي صار والي..
(الباطل) صبح راجل كمان كاتل..
و المهبوش قدل منكوش..
ده بس زمن الكضب مفروش..
و بيع شرف البنات بي قروش..
وصوت النخوه صار مقروش..
يا مولانا يا بشبش أمير الدين..
ما جاب المطر بنزين..
و ما شفناك عداله و دين..
حريقنا وقد حسابنا ولد..
مرقنا نأدب الباطلين..
جوه السلطه رقاصين و هراشين..
وبره نعام يوم الزره ما فيكم..
إسم راجل..
و ما بتموتو مستورين.
|
|
  
|
|
|
|
|
| العنوان |
الكاتب |
Date |
 ما ظنيت انو محجوب شريف كتب البتاعة دي..! | سيف النصر محي الدين | 04-08-14, 09:43 PM |
| Re: ما ظنيت انو محجوب شريف كتب البتاعة دي..! | Abureesh | 04-08-14, 11:02 PM |
| Re: ما ظنيت انو محجوب شريف كتب البتاعة دي..! | rani | 04-08-14, 11:27 PM |
| Re: ما ظنيت انو محجوب شريف كتب البتاعة دي..! | Abureesh | 04-08-14, 11:55 PM |
| Re: ما ظنيت انو محجوب شريف كتب البتاعة دي..! | سيف النصر محي الدين | 04-09-14, 00:41 AM |
| Re: ما ظنيت انو محجوب شريف كتب البتاعة دي..! | سيف النصر محي الدين | 04-09-14, 00:42 AM |
| Re: ما ظنيت انو محجوب شريف كتب البتاعة دي..! | عثمان عبد الوهاب العامري | 04-10-14, 08:15 AM |
| Re: ما ظنيت انو محجوب شريف كتب البتاعة دي..! | rani | 04-24-14, 06:15 AM |
| Re: ما ظنيت انو محجوب شريف كتب البتاعة دي..! | rani | 04-24-14, 06:19 AM |
| Re: ما ظنيت انو محجوب شريف كتب البتاعة دي..! | rani | 04-24-14, 06:35 AM |
| Re: ما ظنيت انو محجوب شريف كتب البتاعة دي..! | rani | 04-24-14, 06:39 AM |
| Re: ما ظنيت انو محجوب شريف كتب البتاعة دي..! | rani | 04-24-14, 06:53 AM |
|
| |
rani
فيس بوك
تويتر
انستقرام
يوتيوب
بنتيريست