|
|
 Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: عبدالعزيز عثمان)
|
سلامات يا عبدالعزيز
ياخي شكرا جزيلا على جميع بوستاتك، حكيك طاعم وجميل بحق
فجيعتك في مشروع الجزيرة ظااهرة في كل كتاباتك وفعلا مابيحسها الا زول شاف المشروع العملاق ايام شبابو
لسة بتذكر لمن كنت بقيف في الكنار واعاين للخضرة الممتدة مد البصر وتظهر في البعيد ميضنة جامع ود سلفاب
اسي بقيت اقيف واعاين لاراضي جرداء خالية من اي حاجة، ميضنة جامع ود سلفاب ذاتها العيون طششت وبقت مابتشوفها!!
حكاوي الجن والشياطين مافي اظرف منها بالذات بالليل ويكون بيتكم في طرف الحلة وعشان تصل البيت لازم تقطع براك طريق طويل ومليان شجر، بالجد الواحد اشتاق لدقة القلب الشديدة ديك واحساس الادرنالين المتدفق في الجسم
طيب، انت قلت توجد صور لكن ماختيت اي صورة، خليني انا اخت ليك فيديو عدييييل وانت وريني الفي الفيديو ده شنو لو ما جان
وياريت واحد من حرفاء الكمبيوتر يصلح رابط الفيديو ده
تحياتي لك ولضيوفك
https://www.facebook.com/#!/photo.php?v=172787986248520
| |
 
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: خالد عبدالوهاب)
|
ذات حنين ،الي حيث الشقاء
الرجل الذي زازي بين التغانت وابوعشرينات ،قضي الليل مسهدا يدمي جسده من الكرش من لسعات البعوض ،ليسقي بعض رباط اهلكه العطش ،الرجل الذي تشققت ارجله من خمج الطين،تيبست اياديه من مسك مويت القمح،،اكلت البلهارسيا كبده،عمشت الكسرة البائته علي ضهر الترع عينيه،عطلت كلاه المياه الاسنة،،وحرق قلبه ،الوجع والحسرات ،،يبست الارض واجدبت ،ساقته اقدار الله الي البعيد،،وهاهو ذا ،،يتتبع رحلة الالم الطويلة...
يا سادتي ،اكتب لكم ،انا العارف عن احوال تلكم الجهات ،المعجون باهاتها،،الخبير بانحائها،،نمرة ،نمرة،وحواشة حواشة...
لو وجدت الصبر والعون،لكتبت لكم ،ما ملاكم بالسهاد،فانا الغارق حتي المشاش في مدن الضوء،اجد نفسي هائما ،وسط تلك الدروب،نفسي اسية،،وقلبي مجروح،،اذ يتغشاني هنا،وسط ديزني لاند ،ذلك المتربص بي،، واذ اجدني انسل من هذا الحبور والبهاء، مزازيا بين تغنت وابعشرين، قاصدا ،من اجل قيلولة النهار،كمبو طويلة،الممتد بطول اراضينا وماسينا ...
يتواصل ،بمهلة تامة....
قلت ان كمبو طويلة هي القطاطي من القش ،والبيوت الطينية ،التي انحشرت بين ود اللحد،الرابض بين الكنار العظيم،،وقضبان السكة الحديد،اتخذها اهالينا واخواننا القادمين للعمل بالمشروع مساكن لهم، كانت منازل من شرف وكد،ما عرفت للراحة طعما،وللدعة من درب ، غالبا ما نقضي قيلولة الظهيرة ،فوق الكنار ، مستظلين باشجاره الظليلة،تصنع لنا حوايا البني كربو ،تخرجه لنا مع زوجها وعيالها،ويجتمع الكل بموجوده،تمتد امامنا اراضي المشروع،تنوح من الجدب والعطش،وهذه قصة اخري،وسط قصص اخر،ولكني الان ابدا ،لاقول..
سيتبع...
تركت ارضي عطشي ،، فترت البابور الصينية الهادرة فوق صفحة ترعتها ان تبل حلقها ،ويممت حيث مستقر.
البلاد التي بناها اهلوها لم تبخل علينا ببهائها،،ولم تضن علينا بالنضار ،بعت حماري في سوق ام دفسوا،بعت البقرات ،قالوا لا مقام لهم وسط حوش ابي،اخذ مني عمي محمد ود علي السرج والخرج،اخر وسايل الترحال الخاصة بابي،،لم اعطه الفروة،تركتها في حرز ،من يدري.
نزلنا واد اخر ذا زرع وخضرة،كان مشرقا بالبهاء كانه تنزل من ملكوت، مالذي يجعل هذا الزرع اخضر ،وزرعنا ياكله الجدب ،نظرت وانا علي ظهر براقي،فرايت افقا ،هاشا ،ممتلئا حياة وحبور.
كانت الراحلة تطوي بنا ما بين الجنان،وكاننا في برزخ من رضوان،لا احسسنا بتعب،ولا مسنا لغوب،،ثم كاني لست في حلم وانا فيه،انا مدمن الاحلام المستحيلة،ابن الاهة والصبابة،ولكاني ادنو من ارضي،وي كانها هي،ها انا ابصر بتمام كمال بصري،انا الذي اكل عيني العمش،من شمس النهارات الحارقة ،والضعف الذي ادركهما من قراءة الالواح،وكتب خالي الصفراء القديمة ،في الخلوة المظلمة، جاهدا لتحضير ورد جن سليمان،الذي سيدله علي الكنز العظيم ،والذي يصبح كل يوم علي يقين انه صار غاب قوسين،،لقد كانت جديته كافية لتؤكد علي صدق يقينه.
كانت قراءة شواهد القبور الدارسة ابان سطوع الشمس من الاسباب الاخري لعمشي،اضف لذلك اكل الويكة وام شعيفه،والكسرة الماسخة التي حدثتكم عنها،مخلوطة بماء مملوء بالصارقيل والداغليب ،هما سبب عمشي وكساحي،ولكني الان عدت بصيرا اري لفراسخ.
رايت الكنار لم يعد هو ،قام مقامه نهر عظيم،انتصبت علي جانبيه اشجار بهية كانها مرسومة،وبانت قطوف من ارضي،رايت البرتقال والعنب والفراولة، عاد القطار يسير فوق سكته ،بدا جميلا وسريع،حتي صافرته كانت مملؤة بالحنين ،،ثم رايته،لوح لي،المقدم زروق،هو هو،لا يفتا يتغشاني منذ نزلت بهذه الارض البهية.
نواصل...انه المقدم زروق مرة اخري،الرجل الحافظ لسر الاسرار،واسلافنا الغابرين منذ ان رسا نوح بسفينته عند البحر في مشرع البنطون القائم حاليا ،الرجل لا يترك شاردة ولا واردة الا ذكرها،لم يهلك القدم ذاكرته،ولا ادرك عزيمته البلي،الارض ،الارض ،ينادي،هي صلاتكم الوسطي، ياجدي اصبحت عجوز عقور،عليكم اللعنة،الارض لا تعقر،الارض امراة تامة الخصب،،ولكن اين الرجال ،اين العزائم..
خرج من وسط الغيم،في كمال ساعة حبوري، جاء يناور بمكره القديم.
- حتي سرج ابوك لم تحتفظ به.
-اهديته لصديقه محمد ودعلي.
عليك اللعنة،،تريد ان تتخلص من كل شئ..
ثم صرخت فيه...
,, دعني وشاني ،ملاتني بالحسرة والالام،ما ان اتكئ علي جذع اروم انجماما حتي تخرج لي بمواويلك القديمة، ماذا فعلت لي الارض غير ان ملاتني بالفقر والجوع،اهدر عمري اداور فوقها كعجوز خرف،يموت زرعنا عطشا،يموت مرضا،تعسل الذرة وتهلكها البودة،تكرمت طماطمنا،تاكل الدودة الغينية القطن،وفي اخر العام يطاردنا البنك ،تقبض علينا الشرطة يودعونا الحراسات مع عتاة المجرمين،ذات عام ادخلونا الحراسة وجدنا شابين اثنين،سال حسن ود دفع الله احدهما ما بالك ،قال الشاب قتلت ابي،كركرت بطن الامين وقام يريد الحمام،نادينا علي العسكري نريد الحمام ،قال مرتين في اليوم انقضت كلاهما،قلنا مصابين بالسكر،قال وهل انا طبيب ،تاكلون الحكومة ،يا مجرمين ،ضحك عم الطيب الثمانيني ،قال ياولدي وهل يكفي بولنا لانتاج الزرع، شهرين اثنين ما دخلت ارضنا ما..،،
مالك بي ايها المحتال الماكر،تريدني اتسول لقمة الكسرة ،هاتفا ارضي ارضي..
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: عبدالعزيز عثمان)
|
مزازاة ليالي عدة،،من اجل شربة ماء,,,,
كان العطش قد ادرك جوف ارواحنا،،كان قمحا قد شب عن الطوق ،بدا اول الامر فتيا اذ كنا قد بزلنا فيه سعيا عظيما،،وتعدناه بكل سبل الرعاية والتغذية،،فلما كاد ان يستوي علي سوقه،، اوان الحمل والبزار،،حدثت الطامة وبدا ابليس لعبته اللعينة.
المحزن ان وراء نمرة القمح مباشرة،،تربض نمرة 12 مزروعة قطنا،،كانت النمرتان من اخصب اراضي المشروع،،ولقد بذلنا فيهما من الجهد ما يفوق التصور،،ولن ينسي الانسان عزيمة خالي الطيب ودالعطايا التي ما عرفت الكلال لحظة،،ضحوة وضهرية،،ما تهاون ابدا في هزيمة القش المر عدو الزراعة اللدود،،ولا بابكر عبدالرحمن الذي ترافقه بقرة من نسل بقرة بني اسرائيل ،طيبة تسر الناظرين،،ولما صار الامل غاب قوسين،،حلبنا ما في الجيوب حلبا،،اذ الكارثة تقع ويبدا المكر،،العطش..
كان الكنار ممتلئا حتي اخره،،بدا الامر بان هناك عطش في القسم الشمالي،وانهم سيغلقون الترعة ليومين فقط،،صمتنا ،،جاء اليوم الثالث،لم يجئ الغفير،،بحثنا عنه،،قال لنا بانه قد اوقف عن العمل،،من المسؤول،،قال الامن،،اين يوجد ؟ قالوا في الري،،ذهبنا اليه،،قال المهندس لم يعطيه الاذن،،اتصلنا به تلفونيا،،الرقم مغلق،،اصبح الصباح،،بحثنا عنه في كل الفجاج،،وجدناهم يحتشدون حول حلة لحم يجغلب لحمها وعدنا خيرا..
مضت منذ ذلك اليوم ايام اربعة،،ياتي مسؤول الامن بعد الافطار،يفتح الماء،،ثم بعد صلاة العصر يغلقها،،في هذا الوقت،،تحدث تجاوزات،،ومكر،،ومناوشات،،وحرابات،،وقفل لبق،،وفتح نواكيس ،والترعة شريان ضعيف سدته الحشايش والاطماء،،والارض امتلات بالشقوق عطش مخيف،،والنبات غاب قوس وادني من الهلاك،،والناس في كرب وغضب،،انها الشربة الاهم،،ان ضاعت ضاع العام،،والجيوب خاوية،،والبنوك تنتظر الفشل لادخالك خلف القضبان.
لعشرة ايام ننام في الغيط،،ولم تبتل سرابة...
قال خالي الطيب،،،هذه الترعة لن تسقي لنا حتي العام القادم.انها معطوبة تماما..
ثم ان النبات لم يهن علي،،المني الزبول الموجع،،احزنني الهلاك الوشيك،،نادينا علي المسؤولين،،لم يلتفت احد،،صرخنا بكينا،،ولم يبين احد ولم يهتمو حتي لو حرق كل المشروع...
في تلك الليلة قررت امرا،،كانت ليلة قمراء،،كانت حلة طويلة ممتلئه بالسواعد الفتية،،جئيت بهم،،كان علينا ان نصنع مجري عميق من الترعة،،ليس هناك غير ذلك،،لقد عبثوا بفنية الري ونظامه،،خربوا انسياب الماء،،ولن استطيع السقيا الا بشق المجري،،وكان...
قبل الضحي امتلات حواشتي بالماء،،وانا فوق ظهر الترعة جاؤوا،،المفتش والمدير والمهندس والامن،،،حسبتهم جاؤا لمعالجة المشكلة جزريا،،،لقد كنت مخطئا،،لقد جاؤا للومنا علي سقاية ارضنا التي اكلها العطش،،كانوا بائسين وخائرين،،،لم التفت،،ازلت لبقة من الطين سقطت في المجري...
دمعت عيناي قهرا،،فلقد تيقنت بانها مؤامرة تستعصي علي ابليس..
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: عبدالعزيز عثمان)
|
يالله ياعزيز
لايعرف هذا الالم الا من عاشه
اعلم تماما شدة القهر والالم
الذي ينتابك وانت تري محصولك
يتهاوي بين يديك وتيبست
اعواده حتي لم
تعد قادرة علي الوقوف
من العطش
قاتله الله شعور مؤسف
وانت الذي تعبت وسهرت
الليالي ومع ذلك وبكل
عدم مبالاة لاتجد مياه وان
وجدت وكان هناك محصول
سيكون للحكومة اكثر منك
تحت مسمي :التكلفة :!
ولاادري ماهو دور الحكومة
اللهم الا استخراج تصديق
الحصاد ووقوف رجل الامن
بجانب الدقاقة وكان الحكومة
سهرت الليالي معك وانت تسقي
ام قطعت الشمس الحارقة معك
وانت تكدب او تسمد او تحمل
ضرمبة الرش في ظهرك حتي
كاد ان ينحني من التعب لا
لم تفعل كل ذلك ولكن لها
من المحصول نصفة او اكثر
من غير وجه حق بل هي جباية
محمية بالقانون والان اصبح الامر
اكثر تعقيدا اصبح المزارع يمضي
علي ورقة تهدده بنزع حواشته ان
لم يلتزم بما يريدون اهناك هوان
اكثر من ذلك ياعزيز هل يمكن
ان يفعل الجان مافعلوه بالمشروع؟
عزيز عارف الوجع في الجوف
شديد كما قال هلاوي ولكن
اكتب واكتب عسي ولعل ان
تنفس عنك مافي صدرك
تسلم ياحبيب
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: سليمان القرشي)
|
دعونا نرسم لوحة ونبكي علي الفجاج التي ضربتها العفاريت والشيطانين،،ولخبتتها لخبتتة عجيبة،،ثم نعود لنتتبع من اين جاؤوا،،واوصافهم...
بطراك ياام سماح بطرا الخدار الزاهي
بطرا السنبل الهاش ديمه بي عوافي
بطره مسورك المبزول لكل حي ماشي
بريد ماعونك الممدود لكل زول غاشي
ياحليل التقاوي العامرة بي جلاسا
وياحليل النسيم طيب بطيبة ناسا
ويا حليل الصريف ابيض كطيبة ناسا
متين يالضوء اخوي تنحله يبقي خلاسا
وما بكاني ذي ترعا بقت يابسات
وما ووجعني ذي دورا بقن خاويات
شوف عيني المكاتب رافعا للرايات
شكر الله سعيا انرجي للجايات
القطن
حليلو الابيض العبروهو بالميزان
حليلو الفنجري الراقي وعظيم الشان
يوم جات الوفود طافتبو بالفدان
ياما عززت اهلك بالجود والاحسان
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: Osman Musa)
|
مها ،،اسعدتنا طلتك،،وامك دي مرة صالحة ،،لولاها لطفشكم اولاد بسم الله لام صفقا عراض..وكان رحتو في خبر كان...
علي كل حال ،يبدو انو انصار البلد مسكونه قد تغلبو علينا،،،ولكني اجزم بانه في ما يتعلق بمشروع الجزيرة ،فان الجماعة الذين اؤكل اليهم امر تخريبها،،ينتمون لفصيلة الجن الخاصة،،،كلكي،،،وذي التقول ملكي،،والله اعلم...
عودي،،فجرابك لابد ملان...
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: عبدالعزيز عثمان)
|
خالد عبدالوهاب،،،تحاياي،،،شكرا علي الطلة،،ثم يبدو ان النصيبة التي بالفديو قد تمكن من حماية نفسها،،،مش قلنا ليكم ،حتي انهم تسللوا لداخل بوستاتنا....
في لمح البصر ضربت الداهية الدهية،،عصب المشروع الحي ،لم يعد هناك من شئ،،ابتلعت الشياطين كل شي،،تحدثنا عن مهلكة الاليات،،اختفاء الجملونات،السكة حديد،،ثم السرايات...
لعب فصيل اخر ،فعل فعلته في الري،،الابحاث،التجارب،الخدمات،المحالج،الحشري،الفبارك،وحتي مبني الادارة بركات ،صارت موحشة اسية...
لم يبقي غير الدمع...
وذات يوم كتبت،،اما الجزيرة فلا بواك لها..
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: عبدالعزيز عثمان)
|
في منطقتنا تكثير حكاوي السحاحير ، وبل ويقال إن فلانا مصاحب له سحاري
وكثيرا من يحذرنا أهلنا وكبارنا من الذهاب إلى النيل حيث مسكنهم في قاع النهر خشية ملاقاتهم وأخذنا
وعندها سنقلب نحن إلى سحاحير.
في مرة من المرات وفي تسعينات القرن الماضي كنت أساعد أحد الاصدقاء في عمل ما في بيتهم
وفي العادة بعد الانتهاء أداء العمل نذهب إلى النيل للسباحة ، في ذلك اليوم انهينا شغلنا قبل منتصف النهار
بقليل وانسرقنا إلى النيل، كانت الدنيا قايلة والهواء ساكنا ولا يوجد على طول ضفة النيل أحد سوانا ( أنا وصديقي )
سبحنا وأخنا كفاينا ، وبعدها تؤضيت لأصلى الظهر وما أن اقمت الصلاة فإذا بنعيل ( عُصار كما نسميه ) قادما من
البر ناحية النهر وفجأ أسمع صياح صاحبي ( التوم ، التوم التوم ، ) قطعت صلاتي مذعورا والتفت ناحية النيل فرأيت
كما الأيدي تنزل من النعيل على الماء وتغطس ،
سألت صاحبي شفت شنو يا ( م ، ) فلم يرد ، المهم ومن دبنا داك مشينا على البيوت تركته في بيتهم ومشت على أهلي
وفي صباح اليوم التاني رجعت إلى بيتهم كالعادة وكأني ما عارف أي حاجة وفجأة سألتي والدته ، أنتو يالتوم أمس
مشيتو البحر واللاقاكم شنو ، قالت لي ( م ) أمس جاتو حمى والليل كله يهضرب أظنه شاف ليه سحار.
( هذه قصة حقيقية كنت أحد أطرافها )
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: حسين ديقول)
|
الأخ/ عبدالعزيز عثمان
تحياتي
فتحتم كوة مظلمة وعوالم مستورة، تحيط بها خيالات الخوف من المجهول، وينتابها عدد من ( الصادقين) و(الكاذبين)
ولكل منا تجاربه مع هؤلاء أو هؤلاء، بالرغم من تحذير ( العقلاء) من مغبة الإقتراب من هذه الدوائر الخطرة، وبحكم
التوجس المستديم كنت ولم أزل بعيدا عن هذه العوالم، لكن مررت بتجربة حقيقية مع أحدهم من البشر ممن يتعامل مع
هذا العالم المتعارف عليه ( بالسفلي)، إلتقيته في مناسبة إجتماعية بأم درمان، وقدموه لي بلفظة الشخ تسبق إسمه
علاوة على ( القفطان) الفاخر، وقد شعر (الشيخ) بأنني غير مهتم به وواضح إنني أجهل عالمه الخاص، فأراد أن يثير
إهتمامي فأخرج من جيبه عدد (3) ثمرة لالوبة، أي والله ثمرة لالوبة، وقال لي خذها، فأخذتها وقلبتها في يدي وقلت له
ثمرة لالوبة، فقال لي أغلق بها يدك، ففعلت وبدأ يتمتم بكلمات، وبدأت أقرأ سرا أية الكرسي، وعندما إنتهى من تمتمته
قال لي إفتح يدك، ففتحتها ولم تزل تمرات اللالوب الثلاثة كماهي، فكرر توجيهاته وكررت قراءتي لآية الكرسي، وكانت
النتيجة كما هي، فإنزعج (الشيخ) جدا، وطلب مني قبض يدي للمرة الثالثة والأخيرة، وتمتم وقرأت، ثم فتحت يدي فإذا بها
(ثلاث تمرات)، فإنشرح صدر الشيخ وقال لي أكلها، فأكلتها تمرات بدلا من ثمرات اللالوب، ولم أزل مستغربا كيف حدث ذلك؟
ولم تتح لي فرصة ثانية لملاقاة ذلك (الشيخ)، إذ توفي عليه رحمة الله.
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: محمد عثمان الحاج)
|
أنا يادووووب فهمت الحاصل!!
كنت محتار ياعزيز من إنك بتجيب الكتابة السمحة دي من وين؟؟
أتاري ما براك والجماعة الطيبين قاعدين يملوك من أعذب كلامهم وكمان مدينك أتراكشن من النوع الماخمج :)
حكاوي الجن والسحاحير جزء أصيل من موروثاتنا الكوشية القديمة، هسى بتلقى قصص كتيرة متداولة فيما بين القرى تتشابه في الحبكة وتختلف بس في المكان والزمان وأبطال القصة.. طبعاً من زمن كنت شافع شابكننا حكاوي عن السحار البطلع من النيل (الدقر) وعن السحارة الساكنة في القمح وعن أبوفانوس البضلل المسافرين بالليل في صحراء بيوضة. المهم في مرة من ذات المرات المسافر فيها لدنقلا شفت ليك الأنوار دي :) ، طبعاً رفضت الإستسلام لفكرة أبوفانوس دي ، وغالطت ليك الجماعة المعاي بإنو دي أنوار عربات تانية في الصحراء ،، لكن كانوا بيقولوا لي معقولة بس الانوار حقت العربية المتحركة ممكن تتوازى افقياً ورأسياً كما يحدث الأن من السيد أبوفانوس،، وقلت ليهم دي أنوار عربات كتيرة ما عربية واحدة يا جماعة والتضاريس الطالع نازل دي بتغش النظر،، لكن في النهاية أسقط في يدي وبهت الذي كفر ههههههه
ومن القصص الطريفة، يحكى عن واحد مغترب كضاب شديد، يعني زول بروفيشنال :) رجع السودان بعد غيبة، وركب ليك تكسي من المطار على بيته، ولسوء حظه طلع عمك العجوز سائق التكسي خبير أجنبي :) ،، وشبكو ليك قصص عجيبة عن الفقراء والجن ما تديك الدرب! طبعاً القصص دي إستفزت ليك المغترب وقال أحسن عمك دا نديه الفي النصيب عشان يعرف هو قاعد يتكلم مع منو!! المهم، قام قال ليه،، والله مصداقاً لكلامك دا يا عمنا أنا جدي شيخ معروف ويقال بولايته، وهو دائماً مضيوف، وفي أحدى المرات الحاضرها انا زاروه عدد من الشيوخ من قرية مجاورة ،، وعشان ما يكلفوا جدي طلبوا منه شاي ساادة ،، ولمن النسوان جهزوا الشاي جدي قال لي ياولد جيب الشاي، فقمت جبت ليك الكفتيرة وبديت أقسم في الكبابي لكن للأسف طلع الشاي معمول باللبن!! وطوالي جدي زعل زعل شديد وهرج ليك في النسوان قال ليهم نقول ليكم شاي سادة تعملوه بلبن?? وطلب مني أرجع الكفتيرة لكن الشيوخ الضيوف أبو وحلفوا طلق حرم إنوا أنا ما أرجع الكفتيرة فقمت قسمت ليهم الشاي باللبن،،،، فوالله ياعمنا وماك طالبني حليفة، شوف عيني دي الشيوخ ديل قالوا بسم بالله وفرد شربة شربوا ليك الشاي السادة وخلوا اللبن فيي محلوا :) .. فقام عمك بتاع التكسي قال ليهوا يا ولدي أنا والله بضكب من قبل ما الخواجات يطلعوا من البلد دي ، لكن كضبة زي حقتك دي ماقابلتني هههههههه
يأخي البوست دا ناقص زول مهم جداً، أتمنى حضوره وهو الزميل العزيز الأخ على عبدالوهاب عثمانتود لأنه ممكن يجيب حكاوي من بيت الكلاوي النوبية عن قصص الجن والسحاحير.
محبة وتحية كتيرة ليك ولضيوف البوست
| |
|
|
|
|
|
|
|
|
|
Re: ظهور جماعة من الشياطين والجن بمناطقنا،،تري بالعين ،وتسمع..ممكن صور . (Re: عبدالعزيز عثمان)
|
كنت هناك لثلاثين يوما،،بالجسد والروح هذه المرة،،كنت هناك ورايت العجب والعجيب ،،هذا وطن عجيب وغرائبي،،وعندي لكم حكايا مسلية،واخر مبكية ،،دخلت في تحدي،،قلت لهم،كلها اوهام،،لا يوجد جن يري ولا يحزنون،،ان كيد الشيطان كان ضعيفا،،،الشواطين التي دمرت وابتلعت مشروع الجزيرة ،منا،،من نسل ادم،،قال لي المىشوطنين،،اتريد ان تري الجن،،قلت نعم،،،قالوا وماذا تريد ،،قلت جنية،،خارقة الجمال،،قالو ولكنك تدفع اكتر،،قلت كم،،قالو عشرة مليون،،قلت ادفع لو رايت وتيقنت.....
ثم خطر ببالي خاطر،،ماذا لو جاؤا لي ببنت حواء،،هؤلاء الماكرين يفعلون كل شئ،،،قال صديقي ود بانقا،،الا تعرف علامات الجن قلت كيف،،قال الايدي والارجل مختلفة،،،ولكن هل يعجز هؤلاء ان ياتو ببنت حواء اراد لها الله ان تولد مختلفه ،،،انهم يصنعون لي شركا لبلع قروشي ،هؤلاء امكر مما يدركه الانسان،،ولكني عازم علي التحدي....
ويا ست البنات حافظة اية الكرسي....
ويا سيدي اب حراز ارح نشوف...
ويا للعجب...
| |
|
|
|
|
|
|
| |
عبدالعزيز عثمان
سليمان القرشي
عبدالحفيظ ابوسن
Osman Musa
حسين ديقول
حماد الطاهر عبدالله
ملهم كردفان
ابوحراز
Ahmed Alim
فيس بوك
تويتر
انستقرام
يوتيوب
بنتيريست