|
Re: الأستاذمحمودمحمدطه وحكاية النبتة الطيبة أعلى جبل التاكا بكسلا (Re: منصوري)
|
قال الأستاذ محمود..... الزكاة ليست الكلمة الأخيرة قد تلقاه صلاي، وصوام، وحجاج، لكن شوفه في المال، .. دا المحك الصادق، ودا الاختلاف هنا. هنا نحن شريعتنا في الزكاة ذات المقادير، ما هي الكلمة الأخيرة العايزهاالاسلام، النقطة دي، أحب أن تكون اضحة، الزكاة ذات المقادير ما هي الكلمة الأخيرة العايزها الاسلام، الاّ لأنه أضطر لتقريرها لملابسة الزمن، والمجتمع البشري في القرن السابع .. بعدين نبينا بلغ تبليغ دقيق، وجيد، في الأمر دا. قال:- ((الصدقة اوساخ الناس)). الصدقة هي الزكاة – والزكاة المعروفة بمقاديرها، قال: - ((الصدقة أوساخ الناس، وهي لاتجوز لمحمد، ولا لآل محمد .. كأنه عايز يقول أنو عندما تستطيع أنت أن تعف عن أن تحل مشكلتك بأوساخ الناس، وجب عليك أن تعف، لأنو العزة للمؤمن. فكأنما ما كانت مشروعة لتحل مشاكل المجتمع الماضي، في القرن السابع، الاّ لأنو ما كان في أفضل منها. هو قال، ما بتجوز لمحمد ولا لآل محمد. التبليغ هنا، انك عندما تستطيع أن تعف، يجب أن تعف، نحن هنا في المجتمع الحاضر، نعيش في مجتمع بشري، صارع في مدي الأربعة عشر قرن ليصل لتقرير حقيقة انسانية كبيرة، هي ما سميت بالاشتراكية .. الاشتراكية معناها أنو الفقير ليهو حق، موش صدقة. بايجاز: الاشتراكية تعني انك انت ليك حق، وأنا لي حق – موش انت ليك حق، وانا لي صدقة. دا معني تبليغه بأنو ينفر من الصدقة، ويسميها ((أوساخ الناس)) .. أوساخ الناس موش تشبيه، دي الحقيقة .. الواحد لو اتصورها فعلا، ينفر منها، يعني زي الانسان اللي جاب ليهو طش، وجاب موية في جردل أغتسل في الطش دا. ما ممكن أن تطيق نفسه أن يشرب موية بروده، خلي عن أن يشربها واحد غيره. هنا المال بيغسل النفس من الشح، زي ما غسلت الموية، الجسد من الأوضار اللي فيه. ولذلك في تقزز انساني فعلا منها، الاّ لمضطر .. فاذا كنت أنت تري أنو الدين بسوق الناس الي باحات الحرية والعزة، لا يمكن أن تفتكر أنو آخر ما عندو أن يحل مشاكل الناس بالصدقة. لكن دي شريعة مرحلية. الشريعة المرحلية هو عاوز يطورها - يعني يبلغ بيها مرحلة يكون للفقير حق، موش صدقة.
الاشتراكية والرأسمالية اذا كانت الاشتراكية جات في مجتمع القرن العشرين، بفضل الله، ثم بفضل الصراع المستمر بين الطبقات – المستغلين ضد المستغلين – لغاية ما أصبحت هسع الاشتراكية هي ما يتكلم بيه كل الناس، حتي الما بعنيها بدعيها، لأنو لو اتكلم عن الرأسمالية يصبح رجعي – يصبح محتقر بين الناس – ولا يمكن انو أي انسان مثقف، يقف في مجتمع يقول:- ((والله النظام الرأسمالي أحسن من النظام الاشتراكي)) .. ما بقولها حتي ولو بينكرها في حقيقة نفسه، ولو انتو بتتذكروا، بعد اكتوبر، كل أحزابنا – البتعني والما بتعني – قالت انها اشتراكية ديمقراطية .. لأنو الاشتراكية في الجو .. لأنو المجتمع البشري بالمعارضة المستمرة، وصل الي أن يكون للفقير حق، بالنزاع المستمر .. فهنا مسألة الاشتراكية، والديمقراطية، موش مسألة تقدير .. برضه – أقصد الاشتراكية والراسمالية – موش مسألة تقدير، ولا مسألة نختلف فيها أنا وياك. في زي مشاكل البشرية في التراث الهسع نحن بينداوله بين أيدينا، دراسة اقتصادية دقيقة لتعريف الاشتراكية، هي شنو، والراسمالية، هي شنو، حتي الواحد يستطيع أن يقول: التعريفات دي بقت علمية، وهذبت عباراتها، حتي أصبحت زي 2+2 تساوي 4، الناس اتفقوا عليها. قالوا:- النظام الراسمالي: هو أي نظام اقتصادي، يملّك أي وسيلة، من وسايل الانتاج للفرد الواحد، أو الأفراد القليلين .. دا تعريف - بايجاز. أي نظام اقتصادي، في أي بلد، اذا فيهو وسيلة الانتاج يملكها انسان واحد، أو شركة، دا نظام رأسمالي – يكون ما يكون عنو بعد داك من السماحة – لكنو هو نظام رأسمالي .. الاشتراكية برضو معرّفة تعريف دقيق: هي النظام اليقوم علي تمليك وسائل الانتاج للجماعة كلهم، محاولة استغلال موارد الثروة، ووسائل الثروة، لتنتج انتاجيات كبيرة، ثم النظام يعدل في التوزيع – تنمية الانتاج من موارد الانتاج وعدالة التوزيع دا نظام اشتراكي. وعدالة التوزيع معناها، أن يكون لكل انسان حق. الفقير والعاجز، والعجوز، في المجتمع الاشتراكي ليهو حق مكفول بالنظام، دا هو النظام الاشتراكي ..
|
|
|
|
|
|
|
العنوان |
الكاتب |
Date |
الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 05:32 AM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | بشير حسـن بشـير | 01-20-14, 05:44 AM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | Abureesh | 01-20-14, 05:47 AM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 05:51 AM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 08:54 AM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 09:00 AM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 05:05 PM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 05:12 PM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 05:16 PM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 05:25 PM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-20-14, 05:34 PM |
Re: الأستاذمحمودمحمدطه وحكاية النبتة الطيبة أعلى جبل التاكا بكسلا | منصوري | 01-21-14, 08:43 AM |
|
|
|