يوميات الثورة السودانية - الجزء الثالث

Quote: بمناسبة يوم المرأة العالمى ، استطلعت ( حريات ) عددا من امهات شهداء هبة سبتمبر ، اللائى ركزن على ضرورة الوقوف ضد الظلم والقصاص من المجرمين الذين قتلوا ابناءهم العزل بدم بارد ، فإلى افاداتهن . والدة الشهيد عصام محمد بخيت السيدة رجاء موسى : في يوم المرأة العالمى أناشد أمهات الشهداء والشهيات بالصمود..ويا نساء السودان السكات عن الظلم حيظلم الجميع. أقول لأ مهات الشهداء ان يصمدن والا يتوقفن عن المطالبة بحق القصاص لأجل شهداء الوطن ، والنظام يظن انه ممكن ان ينسينا دمنا وده رابع المستحيلات. لايمكن أنسى ولدى ولا الطريقة المات بيها، انا صابرة ولكنى ما ممكن أنسى ولدى ، في كل لحظة بتذكروا وكل ماطال الوقت كل مازادت نار وجعى لانه القتلوهو ما اتقدموا لى محكمة ولا اى شىء . بدعو كل النساء لان يتوحدوا ويتحركوا معنا لأخذ حقنا ..وبدعو بالتحديد النساء اللاتى لم يفقدن أولادهن للوقوف معنا لان السكات عن الظلم حيظلم الجميع وربنا يحفظ كل أبناء وبنات السودان . والدة الشهيد مصعب مصطفى السيدة عديلة محمد : يانساء السودان هل ضاع دم ولدى؟! في يوم المرأة العالمى بقول لى كل نساء السودان انهن يقيفوا معانا ..الناس بيسالونا الحصل شنو وعملتو شنو في القضية ، ونحن ماعندنا إجابة حتى لى روحنا لانه في تعتييم وبطء شديد ، عملنا الإعلان الشرعى والوكالة وأخذوا أقوالنا لكن لم نتقدم خطوة أخرى ، المحامين لم يقصروا ، لكن البلد مافيها حريات والحق بيموت..انا بخاطب كل النساء عشان هن أمهات وأخوات : الحيحصل شنو ؟ حيضيع دم ولدى؟ ! . والدة الشهيد شوقى الريح السيدة رجاء محمود أحمد : بناشد أي امرأة وأم للوقوف مع ولد السودان الشهيد شوقى. في اليوم ده بقول لى كل النساء انه انحنا ماعاوزين شيء غير المواساة والوقوف ضد الظلم عشان الحصل لى طفلى ما يحصل لى أطفال تانين، مافى زول ممكن يحس بى ألمى وانا بفقد طفلى ، رغم انه عمره عشرة سنين بس الا انه بيساعدنى وبيجى من المدرسة يجرى السوق يشتغل عشان يساعدنى ، انا مافى زول دق بابى قال لى انا داير اقيف معاك انا كل الدايراهو العدالة واخد الحق. بناشد كل الأمهات يقيفوا معانا لانه شوقى ولد كل السودان ولد المستقبل فخلونا نحمى مستقبل الأطفال التانين.