|
|
 موسيقارنا العالمي عاصم الطيب قرشي في أبوظي يعزف مؤازراً صديقه دعوة للحضور والاستماع
|
موسيقارنا العالمي عاصم الطيب قرشي في أبوظي يعزف مؤازراً صديقه
دعوة للحضور والاستماع
يحل الموسيقار عاصم الطيب قرشي، المقيم حالياً في استراليا، و الحائز على جوائز عالمية في الموسيقى، في مدينة أبوظبي، في زيارة خاصة لدعم ومؤازرة صديقه الموسيقار أحمد حسن حمو، المريض بداء الفشل الكلوي، حيث من المنتظر أن يقدم محاضرة عن موسيقى الصلاة يوم الثلاثاء 10 ديسمبر، وأمسية موسيقية يوم الخميس 12 ديسمبر، وسوف يساهم الجمهور في هذا الغرض الخيري، برسم دخول طوعي هو أحد أو بعض مؤلفات الموسيقار عاصم الطيب في شكل سي دي.
الدعوة لكل المهتمين بالموسيقى في الإمارات لحضور هذين النشاطين بالنادي السوداني في مدينة أبوظبي.
|
|
 
|
|
|
|
|
|
|
 Re: موسيقارنا العالمي عاصم الطيب قرشي في أبوظي يعزف مؤازراً صديقه دعوة للحضور والاستماع (Re: saidahmed shami)
|
سيد أحمد شامي..
كيفك يا ملك ؟
الغريب جداً في الأمر ،، ضرب لي د. ناجي حسن قاسم..الموسيقي الجيتاريست من أستراليا...
طبعاً ياهو ناجي زااااااااااتو...المطوفش..ههههههههههه
قال لي: ممكن أكلم محمد حمو؟؟
قلت ليهو منو معاي؟
قال لي: أنا "دكتور" ناجي حسن قاسم..
فشنو...
قمت أول حاجة باركت ليهو الدكتوراه..
واجتهدت حبة في مساعدته على أن يتذكرني...
بعد تعب وملاواة شديدة ...وأنا صاحب ابو شريعة..وكنا بنغني سوا زمااااااان في التمانينات..
حتين اتذكرني...
المهم...
دكتور ناجي أبدى استعداد كبير للمساهمة بما تيسر في علاج موسيقارنا حمو..
وعايز يتواصل معاهو...
فإذا ما فيها إزعاج...حقو توفر ليهو ولغيرو..رقم يتواصلوا من خلالو مع الأستاذ حمو شفاه الله..
هذا...
والسلام ختام..
محمود العربي
__________
استبنة:
ممكن الزول يشارك بأغنية أغنيتين كدي؟
أكان بالعود ولا بمشاركة صديقي عاصم الطيب...
كلو واحد..
| |
|
|
|
|
|
|
|
|
Re: موسيقارنا العالمي عاصم الطيب قرشي في أبوظي يعزف مؤازراً صديقه دعوة للحضور والاستماع (Re: saidahmed shami)
|
أهااااااااااا...
دا الزيت..
وصلت دبي..
أخدت دوشتي كالعادة في مطارها الأخاذ..
أنهيت إجراءات الدخول..
شريحتي حلفت بدين أبوها ما تدخل معاي نهائي...
لقيت واحد سوداني شغال "فنادق" ..شافني دايش كدا..
قال لي كدي أشتري ليك شريحة من المحل داااااك..وتعال راجع
فعلاً..اشتريت شريحة du وجيت "صاد" بي وشي..
قال الفندق الحا أديك ليهو دا لذيذ وسعرو كويس مع الفطور بي 480 درهم...
قلت يا ولد..أوكي..أصلاً أنا فتراااااان...والمطار زاتو يهد الحيل..
وتووووشك تكسي (فتحة العداد بخمسة وعشرين وكدي)..المرض الــ...
قلت لبتاع التكسي: "أبغى أروح فندق اسمه...." قاطعني: Execuse me
يعني ما فاهم عربي ...وكمان لهجة سعودية؟..حلاة لق لق..
شبكتو ليكم إنجليزي من أمه..لامن اتضاير ود الـ...
المهم.. وصلت الفندق... أتمولصت تااااااب..
وأخدت لي نومة حوالي 5 ساعات أقل حاجة..
غياب تام عن أي حاجة..
لا تلفونات لا إنترنت ولا أي حاجة..
أها بعد داك الله هداني دخلت سودانيز السرور دا..
ألقى ليك تلفون الطيب والنهرة النهرني ليها..ههههه
يا زوووول.. حاجة ما تخلص..
أها بعد داك جات الإتصالات "تترى"..
البوردابي الأنيق ناصر (أبو ظبي)...
أول من التقيت في دبي العمدة مولانا أبو محمد فؤاد عبدالكريم أحمد الأمين "الما كيكي" ، الذي أعتذر له عن التأخير
غير المقصود...والله دوشة بس..وكمان جابت ليها "فواتح" وغشوات وتلفون رايح في عربية الزول...
يقيني أن مولانا عرف إنه الحاجة دي - والله خارجة تماماً عن إرادتي...
البركة في الشوفة يا مولانا... كان لقاءً جميلاً وجلسة ولا أحلى.. لك صادق الود والإحترام..
مشيت من دبي إلى عجمان صحبة الحبيب جنابو الطيب عثمان يوسف..
تمام كدا؟؟
ومن عجمان مشيت معاهو يوم الخميس أبو ظبي ...وحضرنا الحفلة من بداية الساوند تيست لحدي النهاية..
ومن هناك مشينا بيت الطيب حيث احتفت بي أسرته الرائعة حفظهم الله أيما احتفاء..
دي قصة تانية خالص توجد في بوست مجاور..
من البورداب كان حضوراً الأخ الخلوق ناصر الأمين..
والأخت الإعلامية عفاف أبو كشوة..
جميلين ياخ ناس أبوظبي..والله جد..
أرفع ليكم صورة صورتين كدي؟؟
حاااااضر..
| |
|
|
|
|
|
|
|
|
|
Re: موسيقارنا العالمي عاصم الطيب قرشي في أبوظي يعزف مؤازراً صديقه دعوة للحضور والاستماع (Re: مصطفى توفيق)
|
الاخ محمود مصطفي
باالجد كان لي شرف كبير ان التقيك و اتعرف علي شخصك الكريم و كنا جميعا نتمني ان تمكث بيننا لاطول وقت ممكن و لكن الجايات اكتر ان شاء الله
اعجبتني فيك البساطة و التلقائية و الروح الاجتماعية التي تمتلك ترياقها لازلةلوحشة اللقاء الاول و تجعل الناس جميعا تحس بانها تعرفك من عشرات السنين.
دا كلو و كمان غنااااااااااي ياخي. ما شاء الله عييننا عليك باااااردة
للاسف لم يتمكن بورداب ابوظبي من التواجد في الحفل بسبب المشغوليات ... و لم تكن انت ضيف بيننا بل نحن من كنا ضيوفا لديك
لك كل الود يا عزيزي
| |
|
|
|
|
|
|
|
|
|
Re: موسيقارنا العالمي عاصم الطيب قرشي في أبوظي يعزف مؤازراً صديقه دعوة للحضور والاستماع (Re: ناصر احمد الامين)
|
Quote: الاخ محمود مصطفي
باالجد كان لي شرف كبير ان التقيك و اتعرف علي شخصك الكريم و كنا جميعا نتمني ان تمكث بيننا لاطول وقت ممكن و لكن الجايات اكتر ان شاء الله |
هياااا ناصر الحبيب...إزيك يااااخ..
إنت إيييه ياابني؟؟
إييه الطعامة دي؟؟
شخص يأسرك بإبتسامة بشوشة..ويديك إحساس إنك at home
أمكث؟؟
ناصر يا أخوي النصيحة لله عاد..بلدكم دي ما بلد "مكثان"...
ومن إيقاع الحياة وإرتباطات العمل..قادر تماماً أتخيل إنه معظم البورداب معاهم مليون حق
إنهم ما يلقوا طريقة يحضروا الفعالية الجميلة..
لكن بصراحة فاتتهم ليلة لا تُنسى..صح؟؟
Quote:
للاسف لم يتمكن بورداب ابوظبي من التواجد في الحفل بسبب المشغوليات ... و لم تكن انت ضيف بيننا بل نحن من كنا ضيوفا لديك
لك كل الود يا عزيزي |
ديل حالتهم ناس أبوظبي...وناس دبي والعين وباقي الإمارات يقولوا شنو؟؟
الله يعينكم والله..
أنا فعلاً سعدت بلقائك يا زول يا جميل..
صادق الود والتقدير..
..
.
| |
|
|
|
|
|
|
| |
saidahmed shami
Mahmoud Mustafa Mahmoud
مصطفى توفيق
الطيب عثمان يوسف
أسامة العوض
خالد العبيد
أحمد التجاني ماهل
محمد الأمين موسى
بدر الدين الأمير
عباس محمود
ناصر احمد الامين
فيس بوك
تويتر
انستقرام
يوتيوب
بنتيريست