(نقلا عن حريات): مخربو موقع الفكرة الجمهورية: قُصُر اللسان، فطالت الأيادي!!

Quote: حيث الأستاذ في افتتاحية جلسة الاحتفال بمقدم وفد معرض جامعة الجزيرة بمدني مدينة المهدية - الأحد 6 فبراير 1983 بسم الله الرحمن الرحيم تنتظم هذه الجلسة اليوم الأحد السادس من شهر فبراير عام 1983 الساعة الآن السادسة والنصف مساءا ونحن بمدينة المهدية .. هذه ليست جلسة عادية وإنما هي جلسة احتفال بمقدم وفدنا الكبير الذي شارك في معرض مدني في جامعة الجزيرة .. وهو معرض كان له وسيكون له أثر كبير جدا إنشاء الله في الحركة الجمهورية في مدينة مدني .. ومدينة مدني وثيقة الصلة بالدعوة الجمهورية بل هي في الحقيقة كانت ملجأ ومأوى للدعوة الجمهورية في الأربعينات .. عندما نشأت الدعوة الجمهورية في أواخر سنة 45 نشأت في المدن الثلاثة .. وكافحت في اتجاه مواجهة الأستعمار المواجهة الحاسمة ، الحازمة، الى ان نتج عنها سجن بعض اعضاءها .. وكان أمين صديق في الخرطوم وهو السكرتير العام وعندما وقفت الدعوة ، وقوف موقت ، في أواخر سنة 46 لأنه كان حصل السجن لبعض الأعضاء وأنا واحد منهم ، والدعوة مشت في كفاحها في استثمار وضعي أنا في السجن ، في أواخر سنة 46 وأوائل سنة 47 ، الى أن استقر الوضع في صورة كبيرة ، هادي وساير بالصورة الكنا عايزنها تكون في السجن في عدم الأنصياع لأوامر السجن - عدم الوقوف لمدير السجن .. المسألة الأسسناها على اعتبار أننا نحن سجناء ما عاديين - سجناء سياسيين ، والسجين السياسي في الحركة السياسية في وقتها كأنه بقول للحاكم العام يخرج من البلد ، فما بكون من المناسب أنو يقوم لصغار الموظفين من الإنجليز من ضباط السجن ومدير السجن .. المسألة دي استقرت والوضع رضى بيها ، وسارت الأمور هادئة معاي أنا في السجن ، وناس أمين وقفوا من المواجهة الصارمة الكانوا بواجهوا بيها سلطات الإستعمار في الوقت الماضي ، واستمرت الأمور لغاية سنة 48 حيث خرجت أنا في أواخر سنة 48 من السجن وأويت لرفاعة .. اعتكفت فيها تلاتة سنين .. في مدة الخمسة سنين دي كأنما الدعوة الجمهورية كانت نايمة .. في سنة 47 نقل أمين لمدني وكان هو السكرتير العام كما ذكرت فكأنما من الناحية العملية آوت ولجأت الدعوة لمدني وإن لم تكن تحركت في الوكت داك .. في أوائل الخمسينات انبعثت الدعوة من جديد .. امكن بالتحديد في اكتوبر سنة 51 .. وسارت الدعوة .. كانت في المحاضرات وكان في الندوات والأندية مفتوحة أمامنا الى أن أنشأنا أو أقمنا أول مؤتمر للدعوة كانت في مدني سنة 46 (لعل المقصود 56) .. أول مؤتمر للدعوة الجمهورية كان في مدني وكان عامر جدا في المدينة وفي دارنا .. وكنا مخططين لأن يكون المؤتمر البعدو مؤتمر خلوى ، كأنما الناس يمشو يعسكروا في خيم وفي عشش أيام ليتدارسوا الفكرة والغرض الأساسي فيها دعاة الفكرة موش الجمهور .. في سنة 48 (مقصود 58) جاء عهد عبود - في نوفمبر سنة 58 جاء عهد عبود فغير الصورة كثيرا .. وقبيل مجي عهد عبود كنا نحاضر في مدني أكتر مما نحاضر هنا .. بل الحقيقة كأنما المحاضرات انحصرت في مدني وكنا بنحاضر ونحن على هينتنا لنزحف على تطوير التشريع .. كنا بنتكلم عن تطوير التشريع في الأندية وما كنا بنمس مسألة العبادات .. كنا بنتكلم عن العادات .. وكانت مدني متجاوبة تجاوب كبير جدا .. وعهد المحاضرات في مسألة تطوير التشريع هو العهد اللي جند ناس ابراهيم يوسف وزملاؤه .. ناس سعيد كانوا جندوا من أيام أمين معاهم في الأربعينات لكن لمن انبثقت الدعوة من جديد ظهروا ناس سعيد في المسرح في أواخر 51 وأوائل 52 .. الحركة درجت في مدني مدرج طيب جدا وكانت تجد الإقبال عليها من الطلبة ومن عامة الناس في أنديتها .. عندما جاء عهد عبود في نوفمبر سنة 58 الدعوة انحسرت بعض الشيء ، حلوا الأحزاب ، لكن برضو نشاطنا كان في مستويات معينة سائر .. لكن الدور قفلت .. في أوائل الستينات لعله في أواخر سنة 59 وأوائل سنة 60 حصل فصل الطلبة - ابراهيم يوسف وأحمد عبد الرحمن العجب ومحمد خير محيسي - من المعهد العلمي بحجة أنه هم تابعين ليهم رجل ما بصلي .. وهم وقفوا موقف صلب ففصلوا .. لمن فصلوا كأنما واجهنا موضوع تطوير شريعة الأحوال الشخصية - تطوير شريعة العبادات - بعدما كان كلامنا عن تطوير شريعة المعاملات .. وقامت المحاضرة الأولى في نادي الخريجين في الخرطوم وبعدين خرجت الصحف بكثير من التشويه زي ما هي العادة: محمود محمد طه يسقط العبادات - محمود محمد طه يسقط التكاليف - بالبنط الكبير نشرت .. وكان لا بد لينا من أن نواجه التصحيح لكن في الوكت دا بعض الفقهاء اتصلوا بنظام ناس عبود فقالوا ليهم أنو الكلام البقولو محمود محمد طه دا ما في الدين ، في الحقيقة فتنة ولا بد أنه تحدث منه حوادث تخل بالأمن ونحن نقترح أنو هذا العمل يوقف .. وفعلا ناس عبود أوقفوا محاضراتنا .. ومافي مجال في الصحف .. ما في مجال في الأندية .. ما واجهونا نحن بصورة فيما يخص تنظيمنا وفيما يخص ما نقول، لكن حيث ما نشر خبر محاضرة في أي نادي من الأندية نمشي نجد البوليس محيط بالنادي وأخرج الناس منو ووقف العمل .. الدعوة في الحالة دي لجأت لمدني ودا عهد ازدهار في الحقبة الماضية كبير جدا الحصل في مدني .. كنا بنعمل ندوات في المنازل - منزل سعيد بخاصة - وكانت بتجول بعض الأوكات في منزل جلال وفي غيره من المنازل ، لكن كان مركزيتها منزل سعيد .. وكان الموضوع مثير جدا والناس بيمشوا يكلموا التجار في السوق والموظفين في المكاتب بأنو راح تكون في ندوة هناك للكلام عن الصلاة .. ونحن واجهنا الموضوع بالصورة دي فمشت الحركة مشي طيب جدا واتمهد ليها الطريق في مدني وأصبحت الصداقة الإنتو شفتوها في مدني في الأيام الماضية نشأت في الحقبة ديك .. وكان فعلا في ناس متحمسين للدفاع عننا بصورة كبيرة جدا وكانوا بيدعوا وينشروا الوكت بتاع الندوة البتكون في بيت سعيد .. وبتجي أعداد يمكن أن تكون في الأندية الصغيرة - زي تمانين أو مية - يجلسوا في البروش وفي السراير وفي الكراسي ويستمعوا ويكون في إنشاد ويكون في قرآن من المرحومين الشيخ السني خال سعيد ومن الفكي عبد الرحمن والد محمد - هو معانا هنا - كان بيقرأ القرآن وبيكون في الإنشاد وبكون في شرح لبعض أبيات الإنشاد وبكون في حديث عن الصلاة ، لأنو دا الغرض الأساسي .. استمر العمل دا والمدينة هنا مقفولة أمامنا .. حتى الندوات البننشر عنها هنا ، حاولنا بعض الوقت ، بجيها جمهور قليل جدا ، كأنو المدينة كبيرة وتقيلة ما بتتحرك زي ما بتتحرك مدينة مدني .. في وكت من الأوكات المحاضرات أفرج عنها وكانوا رجالات عهد عبود زملانا في كلية غردون وكانوا برضو متعاطفين وحيث وجدوا فرصة ليدونا مهلة من الوكت لنعمل فيهو في محاضرات عامة كان بنجد الفرصة دي .. وبرضو المحاضرات مشت في اتجاه التصحيح والإثارة القديمة بدت تهدأ وتطامن لغاية ما حولنا ثقل الدعوة من مدني الى العاصمة .. وكانت في بعض الأحيان في ندوات في بعض البيوت - العدد ما كبير - لكن كانت الحركة بدت تمشي .. في بعض الأوكات في محاضرات في الأندية لغاية ما جات ثورة اكتوبر سنة 64 .. اكتوبر 64 - جاء العهد الديمقراطي على حسب حالة الوكت هناك في الأيام ديك في الأحزاب الطائفية والأحزاب التقليدية المعروفة ، لكن كان في عهد أمكن أن نفتح فيه دور - في مدني وهنا وفي أتبرا وبورتسودان وكانت المحاضرات مستمرة لكن بطبيعة الحال ما كان عندها الأثر الكبير الكان ممكن أن ينتظر الإنسان أنو يحدثه .. لأنو الأحزاب بالصورة الأنتو عارفنها مصبوبة بقوالب معينة ما بتتجاوب مع الدعوات الجديدة .. وكانت هي متأكدة من جمهورها وماشة في اتجاه أن تقنن الدستور الأسلامي ، ونحن كنا نكتب ضده ونتكلم عن الصادق ونتكلم عن الهادي ونتكلم عن الطائفية وأنها هي أكبر من زيف الدين وأنو إذا وجدت الفرصة في السلطة الزمنية كما وجدت الفرصة في السلطة الروحية ، البلد دا ما بتقوم ليه قايمة وسميناهو الدستور الإسلامي المزيف .. افتكر كتير منكم مواكب الحركة الإبتدت فيما بعد عهد اكتوبر الى أن جاء عهد نميري .. في عهد نميري برضو الناس وجدوا فرصتهم .. لعله الناس البتكلموا عن أنو عهد نميري نحن أدانا الفرصة لنتكلم ما متابعين الأمور بالصورة الدقيقة .. نحن ما سجنا الا في عهدين - عهد الإستعمار وعهد نميري - ونحن بنأيد عهد نميري من موقف مبدئي ، لأنو نحن مارسنا وجربنا وعرفنا أنو العهود الماضية كلها ما فيها مصلحة للبلد .. الحقيقة بقى فيها مؤامرة ضد البلد بإحكام وتمرير الدستور الإسلامي المزيف .. وعندما جاء عهد نميري نحن أيدناه لأنو كأنما كان إنقاذ للبلد .. يمكنك أن تقول انقاذ للجمهوريين لأنو في الأثناء دا ظهرت محكمة الردة سنة 58 (المقصود 68) وعطل تنفيذ حكمها لأنو الأمر واضح أنو القانون البحكم البلد هو قانون مدني وما من حق واحد يكفر واحد فيهو .. لكن الناس الكانوا ساعيين للدستور الإسلامي كان في ذهنهم برضو تنفيذ محكمة الردة في الجمهوريين زي ما كانوا قبله حلوا الحزب الشيوعي لأنهم كانوا بضيقوا بكل معارضة جريئة وذكية .. المسألة دي تذكر لتكون رد للناس البفتكروا اننا نحن بنساند عهد نميري لأنو عهد نميري أدانا فرصة لنتحرك .. نحن ما حجبنا من الحركة في جميع الأوكات إلا في عهد الأستعمار عندما نشأ الحزب الجمهوري وواجهم وكان الحجاب سنتين – أو سنتين وبعض شهور لأنو السجن كان مرتين – لكن بعدو في جميع الحقب وجميع العهود ، الحركة الجمهورية كانت ماشة .. ببعض الضوابط وبعض الإحتجابات في المسرح العام ، زي ما قلنا في عهد عبود لمن منعنا في أول العهد من المحاضرات في الأندية لكن الندوات كانت قايمة .. والندوات كانت كبيرة بصورة يعني بعض الناس الكانوا بيرسلوهم ليرفعوا تقارير عنها ، حكوا ليهم أنو الندوات دي يمكن أن تكون في الأندية والعدد البيجي في البيوت زي العدد الممكن يجي في النادي الصغير ، لكن هم ما عندهم فرصة ليراقبوه ، فلو سمح للمحاضرات أن تبرز وتظهر في الأندية بيكون أحسن لمصلحة النظام ومصلحة الأمن لمراقبة الحركة الجمهورية .. فعادت المحاضرات مرة تانية .. لكن الشاهد أنو ما حجبنا من العمل العام والعمل اللي ممكن يكون في نطاق ضيق في جميع الحقب وجميع العهود .. لغاية ما جاء عهد نميري لما نحن أصدرنا كتاب "اسمهم الوهابية وليس اسمهم أنصار السنة" حصل أن سجنا الفترة القصيرة ديك .. الحركة لمن بدت تأوي للعاصمة فيما بعد عهد اكتوبر ، والمحاضرات تكون في الجهات كلها ، مدني كانت لا تزال هي المركز الكبير جدا من حيث الجمهور المجند للفكرة ومن حيث الأصدقاء والوجوه الجديدة البتدخل في الدعوة .. لغاية ما في الوكت الأخير بقت المركزية – مركز الثقل – هنا واتحول الحال ومدني لا تزال قايمة على عهدها في الوفاء بالصداقة للجمهوريين في عامة الشعب الا معارضات من ناس مغرضين وعندهم التزامات معينة وأصلهم لا يمكن أن يكونوا الا معارضين .. لكن الشعب في عمومه صديق .. الوكت اللي اتحركت الحركة هنا بثقلها كلو وبقى المركز هو مركز الثقل للدعوة ، شعرنا بأنو مدينة مدني زي اتقوقعت .. المجتمع الجمهوري زي اتقوقع ، ما أصبح منفتح لجدة التزام أعضاء جدد ، مع أنو المجتمع الجمهوري في مدني قمة وفارض وجوده ومحترم جدا .. لكن لأسباب كتيرة تتعلق في أغلب الأحيان ، تتعلق بغرابة الدعوة وبعدم الطمأنينة ليها وبتشويها والمقاومة الواجداها ووصمها بأنها ما إسلام وأنو الجمهوريين حكمت المحكمة الشرعية بردتهم .. المسائل الزي دي كلها خلت الناس البلتزموا مواربين ومتشككين ومترددين وما وجدوا اليقين البيهو يكون حسم موقفهم في أن يلتزموا .. وكان اهتمامنا بمدني دايما كبير .. حصل بطبيعة الحال من باب اهتمامنا بمدني المعرض اللي تم في يونيو من عام 74 في نادي الخريجين وكان الوكت داك المدينة برضها مقبلة علينا اقبال كبير .. الناس البعارضو أثاروا الشعب البصلي في المساجد وحرضوه وأغروه وضللوه في الحقيقة لغاية ما حصل حريق معرضنا في يوم الجمعة 21 يونيو عام 74 .. المسألة دي قضيتو بالمناسبة لا تزال لغاية الآن ما وجدت جلسة حاسمة وواضحة من الوكت داك القضية معلقة في تسويف وتأجيل وصورة ما بتعطي صورة مشرفة للقضاء عندنا .. نحن هسع رجعنا في اهتمامنا بمدني بعد المعرض الحرق أول معرض لينا كان دا .. ودا معرض قطع قامة كبيرة جدا والحمد لله ومشى بالدعوة خطوات كبيرة قد يكون ليهو ما بعدو أكتر مما نحن شايفين نتايجو في الوقت الحاضر .. الناس الأصدقاء قربوا أكتر .. الأصدقاء زادوا وقربهم كأنما احتشدوا على حدود الالتزام .. الأثر الكبير جدا ترك في جامعة الجزيرة .. ما افتكر المدينة اتأثرت بالصورة اللي يمكن للإنسان أن يطمئن ليها .. المدينة اتأثرت لكن ما بالصورة اللي يمكن للأنسان أن يطمئن بيها .. المدينة برضها ماها خفيفة – مدينة ثقيلة وعايزة عمل متصل لتتحرك ولتواكب الدعوة .. لكن من حسن التوفيق أنو الدعوة جات في منعطف أصبح قريب للناس وأصبح في الميدان مافي غيرها ، دا يمكن أن يعين الناس على أن يشدو الشعب – شعب مدني الى الالتزام بالعمل المتكرر .. الناس جاهزين ، الفكرة بقت قريبة .. نحن بنفتكر أنو بكتابنا "عقيدة المسلمين اليوم" قربنا الدعوة من أن تحدث ثورة ثقافية .. والثورة الثقافية كما هي معروف عندنا التقاء الفكر بالواقع .. وفي كتاب "عقيدة المسلمين اليوم" الفكر لاقى الواقع .. الواقع تصوير جيد جدا وصادق وموثق لفساد العقيدة ، والفكرة – من قمة الفكرة الجمهورية في تصحيح فساد العقيدة - التقوا في الكتاب دا .. نحنا قلنا أننا مشينا بمسألة المنهاج مشي كبير واسع في أنو أنجبت الدعوة قمم – قمم أدناها ما بيواجه من المعارضين .. ودا السبب الألجأ المعارضة للتهريج وللتشويه وللشغب وللعنف لأنو ما بتستطيع أن تواجه الفكرة الجمهورية .. دا قلناه هنا قبل أسبوعين وأننا نحن الآن بعد ما رفعنا الموضوع – موضوع الفرد والتزام المنهاج الى قمة أخرجت كتاب "عقيدة المسلمين اليوم" نرجع لنشوف المجتمع ، لأنه المجتمع هو الوالد الشرعي للفرد .. المجتمع الصالح الحر هو الوالد الشرعي للفرد الصالح الحر ، إذا وجد الفرد المنهاج .. وما بيكون المجتمع الصالح بيكون كأنما هو المسرح البيلعبوا فيه الأفراد أدوارهم في ترقية أنفسهم وتطويرهم الروحي الا اذا قام على الدين .. رجعنا هسع في الفترة الأخيرة لندرس مسألة المجتمع في مستويات الديمقراطية والإشتراكية والمساواة الإجتماعية – مساواة الرجال والرجال والنساء والنساء – الصورة القايمة هي دراسة لفساد الوضع الحاضر وللسطحية الغريبة جدا الأنسان ما ينتظرها تكون كدا بالشكل دا للوهلة الأولانية – السطحية بتاعة كارل ماركس وبتاعة النظم الديمقراطية الليبرالية .. كارل ماركس في اشتراكيته سطحيته كبيرة جدا .. النظم الديمقراطية الليبرالية سطحيتها كبيرة جدا .. العيوب فيها هسع بترصد في دراساتنا ليكون دا تصوير للواقع أو اعداد للبناء التحتي النحن عايزين منه نتطلع الى المقام الجديد في البناء الفوقي اللي هو تصحيح أفكار العالم الإجتماعية ، فيما يخص السياسة وفيما يخص الإقتصاد وفيما يخص الأجتماع .. في ثلاث لجان كونت لتدرس كل لجنة موضوع من المواضيع واللجان الثلاثية كل واحدة عندها زي باحث متخصص في أن يجيب ليها بعض البحوث في موضوعها وهي ماشة .. البيوت برضو وضعت بصورة تدرس المسائل التلاتة دي لكن بدينا بالمسألة الديمقراطية .. البيوت بتدرس في جلساتها الصباحية الديمقراطية – وضعها الحاضر شنو ، وتصحيحها شنو .. واللجان بتدرس، كل لجنة بتدرس قضيتها في الديمقراطية والإشتراكية والمساواة الأجتماعية ووضع المرأة بخاصة في المجتمع الغربي ، وفي مجتمع عبر التاريخ ، وكيف أن هذا الوضع وضع مخلول ورديء وإن كانوا هم ما شاعرين بيهو .. وفي تبجح بأنه المرأة في الغرب نالت حريتها لكن الصورة بتكشف غير دا .. بل الحقيقة أنه الصورة بتمشي لأن توري أنه الوضع الحاضر هو وضع علماني وليس علمي .. عندما يقول كارل ماركس عن الاشتراكية العلمية ، ما هي علمية ، هي علمانية .. والعلمانية بتدرس امور الحياة الدنيا وتقيف عند حاجز الموت .. أهو دا بطبيعة الحال ما دام انقطعت من مواصلة الصورة بأنه الحياتين طرفين من بعض وأنه الدنيا مطية الآخرة وأنو اقتضى موضوع وقوفهم بجاي لحاجز الموت أن ينكروا الاله وان يقطعوا علاقة الإنسان بالغيب ، كان في فشل كبير جدا في نظريتهم وفي تطبيقهم .. كأنما الغرب الماشي في اتجاه الحضارة الغربية مشى بالطريق المقفول .. وأصبح واضح مما انتهت الحرب العالمية التانية أنه الطريق الماشة فيه الحضارة الغربية طريق مقفول وأنه الحضارة الغربية أفلست في أن تفي للإنسان بحاجة معدته وجسده وقلبه وعقله .. وأنها وكدت على الحياة الدنيا والحياة الدنيا واضح عندنا في الدين أنه ما يقوم عليها ماهو علمي ، هو علماني .. واتكلم عنه القرآن (وعد الله لا يخلف الله وعده ولكن أكثر الناس لا يعلمون * يعلمون ظاهرا من الحياة الدنيا وهم عن الآخرة هم غافلون) .. فالقرآن باستعمال الألفاظ في قمة عبر على أنه علم وما هو علم (ولكن أكثر الناس لا يعلمون * يعلمون ظاهرا من الحياة الدنيا وهم عن الآخرة هم غافلون) وفجات مسألة العلمانية والعلمية .. العلمية ما يقدمه الدين .. ونحن هسع بمنهاجنا الماشين فيه بأظهار الفكرة الجمهورية بوضع الإنسان في مركز الدائرة وكل المناشط الأخرى تلف حوله .. كأنما الإنسان هو الغاية من كل النظم وبخاصة المجتمع ، بتبرز الفرقة الكبيرة جدا بين فهمنا وفهمن ، وعلمنا وعلمن .. وأنو المدنية الغربية الحاضرة بتكنولوجيتها الهائلة فاقدة الروح .. بتنفخ فيها الروح الفكرة الجمهورية ، إنشاء الله ،بصورة بتكون ظاهرة جدا في اخراج كتب في مستوى "عقيدة المسلمين اليوم" في تبيين فساد ما عليه الناس وتصحيح هذا الفساد بغرض احداث الثورة الثقافية ، زي ما بنقول بالتقاء الفكر بالواقع .. العمل دا نحن ماشين فيه وبتبرز نتايجه انشاء الله قريب .. كلمنا أسماء أنها تنقل الصورة اللي جرت في الأيام الأخيرة قبال المعرض لناس مدني ليشتغلوا بيها هم بيوتهم ، في جلساتها الصباحية في خلال الأسبوع دا .. يوم الخميس بيجونا هنا ، بيجي منهم جمهور كبير .. وبيكون في جلسة الخميس وفي جلسة الجمعة بنستعرض حصيلة بيوتنا هنا وحصيلة بيوتهم وحصيلة اللجان العندنا هنا في موضوع النظم الإجتماعية البتخلي المجتمع قايم على اسس تمكنه من أن يكون الوالد الشرعي لإنجاب الفرد الحر – الحر حرية مطلقة في ذلك – زي ما بيوجد عند الدين .. ومعروف عندكم أنه الأفكار العلمانية بتفتكر أنو الحرية الفردية المطلقة ما ممكنة إنما هي فوضى .. لكن الدين مركز عليها هي وانها هي مدار التكليف ، وأنو الفرد هو موضع نظر الله في الوجود ، وأنو هو ممثل الإطلاق وساير الى الإطلاق .. ونحن بنظم مجتمعنا بالصورة اللي تمكنه بعد ممارسته للمنهاج المرسوم في سنة النبي .. المجتمع بأعرافه ، بقوانينه ، وبتنفيذه ، يجعل الفرد متطور من غير أن تكون في عقبة أمامه من الأوضاع الدنيوية اللي بيحتاج ليها ليرتفق بيها للسير الى الله .. المسألة دي بتكون إنشاء الله .. نحن هسع محتفلين زي ما قلت بوفدنا الكبير جدا المشى وشارك في معرض مدني وفي ما سموه الاخوان برضو مؤتمر مدني .. الجلسة دي بتسمع انطباعات الاخوان والاخوات لتكون تسجيل ليمر على الأقاليم عسى أن يوضح ليهم ما فات عليهم بعسر الزمن اللي بيكونوا واجهوه في محلاتهم البعيدة وفي أعمالهم الشاغلاهم .. يمكن يجدو في انطباعات الاخوان والاخوات عن معرض مدني ما يعوضهم بعض الشيء ويعطيهم تصور لبعض الوقت .. الجلسة الآن مهيئة لتسمع الإنطباعات .. أفتكر بنسمع صورة عامة من أسماء ، هي كانت المشرفة على المعرض ، كما كانت مشرفة هنا على معرض الخرطوم – جامعة الخرطوم .. لكن اهتمامنا نحن بمعرض مدني أكبر من اهتمامنا بجامعة الخرطوم لأنه مجتمع مدني محتاج لأن يعطى عناية كبيرة جدا في أن ينفتح .. ناس سعيد يجدوا مكافأة قامتهم الكبيرة في استجابة الناس ليهم .. هي قامة مقنعة لكن في عقبات كانت ، وإنشاء الله تزول بخطواتنا المقبلة في تطويع جمهور مدني ليعتنق الفكر الديني المافي غيره ، لا في الدنيا ولا في الآخرة ولا في البرزخ ، ما في غير الدعوة دي .. وفي الأفق كلو ما في غيرها .. في الأفق الكوني كله مافي غيرها .. في العالم مافي غيرها – عالم علماني أو عالم مسلم ما في غيرها .. فالناس لابد أن يضحوا في سبيلها بالصورة الكافية عشان ما يبرزوا ملتزمين جدد ليها ينتفعوا بيها وينفعوا بيها .. ودايما نحن بنقول أنو ما في خوف من أنو الناس ما يجوا .. أصلا ما في ريبة أنه الناس بيجوا .. لكن - وبرضو الخوف في اتجاه الشرع يعني – الخوف الشرعي - وإلا فما في خوف بالمرة ، أنو الناس يجوا وما يلقوا النواة – الحصاة الفي المركز – قوية بالصورة اللي عندما الناس يجوا يلقوها .... ولذلك هم الناس فيما يقبل من أيام ما يكون أنو الناس بيجو .. يكون إذا أنو الناس إذا جوا بلقوا شنو من دعوتنا بلسان حالنا ولسان مقالنا .. ودا بيكون فيه توكيد للعمل والتزام لسجادة الصلاة وقيام التلت والإنفتاح على المجتمع بالخلق الإسلامي الرفيع البيعطي القيم العلمية الرفيعة .. نسمع أسماء ..