اتصل علي ذات الاخ (الممكون وصابر) قبل ساعة وهو يشكرني على نقل الموضوع على الاسفير لانه سيريح اناسا كثيرين يعانون ذات المشكلة في منطقته وفي ولايات اخر وكل واحد منهم متستر على ما يحصل عليه خوفا من ( خشامة) السودانيين و اعلمني بطريقة ساخرة ان واحدا من السودانيين الذين يقطنون بذات الوحدة السكنية اتصل عليه واخبره بان موضوعا مهما على سودانيزاونلاين حيث لا بد من الاطلاع عليه وحينها علم منه انه ايضا (ممكون وصابر) ويعاني ذات الاشياء التى يعاني منها صاحبي حيث لديه ايضا بنت واحدة طاشرية العمر و جميلة بمعايير (البلاك والهسبانك) وقال ان لها شلة من اولاد الجيران زملاء جيرة وفصل دراسة (مكاسيك وبلاك) وهم دوما يتعاركون فيما بينهم بسببها حيث كل واحد منهم يريد الظفر بها (قيرلفريند) وهذا الموضوع ايضا يزعجه جدا لدرجة ان فكر في الذهاب الى السودان مضحيا بكل اميريكا وما فيها فقال لي صاحبي الجديد : ( يا زول خت الرحمن في قلبك كمان لمن تمشي تمشي السودان محل الفقر والجوع والفساد زاتو السودان المرقك وجابك لامريكا بسبب الفقر والجوع بعد ما قلعوا منك وظيفتك في غضب الله وادوها واحد كوز معفن والله اخير ليك هنا يا اخوي مستور ساكن وماكل وشارب وشغال واولادك بقروا في مدارس محترمة وعلى الاقل هنا ما في زول بفضحك ولا في خشامة ولا مايقوما ولا يحزنون على الطلاق تمشي السودان الا تموت بالغبينة وانت جعان وفقران وعاطل وكمان اولاد الحرام هناك اكتر من هنا وما في قانون بردعن يا اخوي استهدى بالله اقعد حلحل امورك بروحك والزارعة الله في الحجر بتقوم)! قال لي صديقي الجديد :( عارف يا هباني اخوى الجايب لينا الكتلة سماحة بنياتنا المسمسمات ديل وبشعيراتن الطوال ديل ده البجنن كرانيف امريكا الصغار الزرق ديل جنهم والبنيات الشعرن سمح ولونن فاتح الله العن العرب من هنا للربع الخالي هسع لو كانن بنياتنا زرقا مكندكات وليهن طرريمات و شينات الشنة المره ديك كان حاشننا من المصايب والدعت ده لكن نقول شنو اهو المؤمن مصاب وانا على بالطلاق لا سياسي ولا جربت السياسة وبكره السياسة والسياسيين وجيت البلد دي لوتري لكن يا هباني اخوي حكاية الشويفع رشارد دي على اليمين خلتني افكر في اسباب بلاوينا الخلتنا ننقلع من نص حلالنا في السودان وانا على الحرام اولادى في حياتن شافوا الخرتوم مرتين لكن بديت هسع افكر في السياسة واقول يالله المرقنا من بلدنا شنو وجابنا للبلاوي دي غير اولاد الحرام المقنطرين في الخرتوم وحاكمننا بالزندية وانا على الطلاق مستعد اشيل سلاح اكاتل اولاد الحرام ديلك لانو ابدا ما السبب في بلاوينا الشويفع رشارد والزيو لانو نحن الجيناهم في بلدهم وكتر خيرهم احترمونا وعيشونا واحترمونا والشي البسووا فيهو ده شي عادي من ثقافتن لكن نحن الغلطانين وانا غلطان وسافى التراب واعتذر لكل السياسيين الكنت بكرههم ومن هسع عرفت معني السياسة لمن تدقك الامور في نص صنقورك وتدخل بيتك تبدا تفكر في الاسباب والحلول وصح تراهو السياسة داخلة في حياة الناس وبتاثر فيها للحد ده وكمان لمن تبقى القضية تهدد الشرف)! ايدته وشكرته على هذا الوعي المتاخر بالازمة السياسية في الوطن وقد جاء لاحقا مكتسبا بتجربة شخصية مريرة وهي تجربة كثير من السودانيين الذين ولجوا السياسة فقط عبر هذه البوابات الشخصية عندما استعادوا عقولهم وضمائرهم النائمة وقيموا الامور بعمق و قد عزوا ما هم فيه من هجرة معقدة الى عوالم بعيدة وغريبة وما يتعرضون فيها الى هذا النوع من المشاكل الخطرة عزوه الى تدهور الاحوال الاقتصاديةالطاردة بالوطن بسبب الذين يمسكون بزمام السلطة السياسية وانهم هم الذين اوصلوا المواطن الى هذه الظرفيات المؤلمة وهو بالفعل وعي وطني عميق لا يدركه الا الشفيفون الامينون مع انفسهم وبالتاكيد امثال هؤلاء سيكونون اكثر الناس مبدئية في التعامل مع السياسة من واقع مراراتهم الشخصية التي جربوها بسبب السياسةوالسياسيين الفاسدين والظالمين.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة