الموقف السياسي الراهن والحقوق الأساسية -الاستاذ /محمود محمد طه

Quote: الأستاذ محمود: (..) قلت أنه الإسلام ما محتاج لنصرة هنا وهو بيرى أنه دا رأي صحيح، إن كان بيراه صحيح؟ أنا ما قلته برضو. أنا قلت (أنه الناس ديل ما بنصروا الإسلام) هم عايزين يطوعوا الإسلام ليتدخلوا بيه في البلد دا لمصلحة النظام القايم في مصر اللي هو سماه غالبهم على أمرهم.. دا الكلام الأنا قلته.. ماهم مغلوبين على أمرهم، متطوعين ليخدموا النظام القايم في مصر وما بدعوا للإسلام هنا.. بشوهوا الإسلام في تدخل سياسي.. ما عندهم الغرض دا وإن اعادوا ليكم الكرامة في الجامعة المصرية، الجماعة البكتبوا بالصورة النحن شفناها أنا أفتكر ما عندكم كرامة ولا في الماضي ولا الحاضر، لا يمكن أن يكون الكلام دا بعيد كرامة لإنسان.. إذا كان إنت من الجامعة الإسلامية أو يمكن أن يكونوا في طلبة هنا في الجامعة الإسلامية.. نحن وجهنا ليكم خطاب في كتاب الردة.. ناس بدرسوكم الدين والأخلاق، بشوهوا بصورة واضحة في النقل ليتهموا ناس آخرين.. عملتوا شنو إنتو الطلبة بالجامعة الإسلامية، اللي أعادوا ليكم الكرامة الناس البكتبوا بالصورة النحن بنتكلم عنها.. أنا ما أفتكر أنه الدين هسع بيدرس للدين ولا للإخلاق، بيُدرس للوظائف وإنت حريص على أن تتخرج لتكون عندك دبلومة لتشتغل.. إن بقى أعادوا ليك الكرامة في الناحية دي جايز لكن في الأخلاق وفي إعتبارات الدين ما بيعيدوها.. مسألة قُتلوا ناس بإسم الإسلام.. قُتلوا ناس بإسم التنظيم السياسي إستحلوا الإغتيال أغتيلوا، مع دا نحن إستنكرناه.. أنا أفتكر إنت جايز تكون طالب لسع أو ما عاصرت المسألة دي من أولها، نحن من حسن البنا مراعنها ومعاصرنها.. ما في حاجة فيها مناصرة للإسلام ولا إسلام.. من حسن البنا وإنت جايي تنظيم بستغل الإسلام إنبثاقاته موجودة الآن، فتنة عايزة مجهود كبير لتتغير.. أنا بفتكر أنه إنت لتتكلم عن مسائل الإسلام، بتكون عايز معرفة عميقة بالإسلام، موش كل داعية للإسلام داعي للإسلام، موش كل كلمة قيل فيها الإسلام كلمة حق أريد بيها حق.. الإسلام في البلد دا محتاج لي نُصرة، دا كلام لا يمكن أنا أن أقول غيره، لكن بنصروه الذين نصروه في أنفسهم أول، طبقوه وإستقاموا عليه.. بنصروه الإستقاموا موش القالوا.. الناس الإنت شايفهم ما هم مغلوبين على أمرهم في مصر.. ما عملوا حاجة ليُغلبوا فيها على أمرهم لكن عايزين يُثبتوا خدمتهم هنا لمصر لتمد ليهم إقامتهم هنا.. لأنه بعيشوا في بلد فيه حرية، الحرية دي عايزين يسيئوا إستعمالها هم ، ما رعوها حق رعايتها.. هم هناك ما عندهم حرية ولا جاهدوا لتكون عندهم حرية.. الأزهر ليه أكثر من الف سنة في مصر، أثر في مصر بشنو؟.. إنت أعتبر النقطة دي..