الموقف السياسي الراهن والحقوق الأساسية -الاستاذ /محمود محمد طه

Quote: الأستاذ محمود: أنه مثل الكلام دا هو النحن بنخشاه على المثقفين خاصة.. ما معنى الكلام دا إذا حللته في الآخر.. أنه مادام النفوذ دا راح يموت موت طبيعي.. سيبو.. يجوز ياخد حقنة مقوية من سيبك ليه ويعيش سنين تانية.. أنا أفتكر أنه الإنسان الما جاد أو الإنسان الجاهل هو الإنسان البقلل خطر خصمه، حقو بعد ما يموت تتأكد أنه مات.. موش لأنه ماش على الموت تربع إيديك وتقعد ليموت.. الأوضاع السلبية دي هي النحن بنشوفها في الشباب المثقف.. الحقيقة بنتكلم بمرارة وبنحرق دمنا ليتنبهوا الناس شوية ويسيبوا السلبية دي.. أهو شوف هسع دا إفتتح النقاش ليقول شنو.. سيبوا الخطر يموت براهو!، إنت هسع بتسيب رزقك يجيك براهو؟ تكدح كل الكدح وتجتهد كل الإجتهاد ويمكن المبلغ بعد ما يقرب ليك ان ما وضعتو في جيبك ولمسته مرتين ما تسيبه، لكن هنا معليش.. أنا أفتكر أنه مثل الأوضاع دي لازم تتغير عند الشباب السوداني.. شوف.. الشعب، القاعدة مُضللة تضليل تام.. إذا كان المثقفين ما يعملوا- زي ما قلت ليكم ما يعملوا مجهود وتأثير أكبر من نسبتهم، حتى يكون تأثير المثقف يوازي مية من العامة، ما ممكن الكفة ترجح لمصلحة الوعي.. لأنه في ناس مكتلين وجاهزين وبتحركوا بالإشارة ليعملوا الأشياء دي أكثر من الناس الواعين، حتى نحن في كلامنا دا ما بنستطيع أن نصل ليهم هناك لنقوله.. لكن بنركز على- نحن عندنا الكيف إذا إرتفع بكون أكبر من الكم.. الكيف معناهو أنه الناس البفهموا هم البأثروا على مجريات الأشياء لكن على أن يتنبهوا ويكونوا حساسين ويكونوا إيجابيين موش سلبيين. الكلام القيل عن أنه جمال عبد الناصر نفوذه ماشي في تنازل وماشي في تراجع دا كلام علمي وكلام واضح وحقيقة هو، لكن دا موش معناه أنك إنت تسكت عن الفوذ المصري القايم هنا، جايز جداً نظام مصر لمن يتغوض من هناك ينبعث نظام شبيه ليه هنا بمساندة المصريين لإنقلاب جديد.. أنا على أي حال ما بستطيع أن أقبل الكلام دا من السيد إطلاقاً، أنا أرجوا أنه يوزنه في نفسه قبل ما يقوله وخاصة دي كانت- أنا أفتكر دا كان سوء إستهلال للمناقشة، كان حقو يخلي لمن الناس يفتروا شوية قبل ما يبتدي.