|
|
|
 Re: دفتر احوال ضابط الشرطة المناوب 2012 {توجد صور} (Re: Dr.Mohammed Ali Elmusharaf)
|
الاخ على جويلى أو الحاج على جويلى بإعتبار ما سيكون إن شاء الله طالما النية واصله ، بالتوفيق والقبول والعودة بالذنب المغفور .
ما تنسى صالح الدعوات للدفعة والماحجه يحج والحجه يدبل والماعرس يعرس يلحق روحو بعد ده وماتنسى أن تدعو للمتوفين بالرحمة والغفران وللمرضى بالشفاء ولمظاليم الشرطة برد حقوقهم ودعوة خاصه للبلتون الخامس (بلتون العينات على رأسهم عثمان محمد أحمد وعزالدين عبدالمحمود!!!).
على جويلى بتتذكر كل الزملاء فى البلتون الخامس ؟؟
* سوف أبدأ بذكر الاسماء الفى راسى وعليك أن تتم الباقى .
* على جويلى ، بشرى مبارك ، عبدالعظيم عبدالله جبارة ، صلاح شنكل ، أبراهيم محمد موسى ، مكرم أحمد البشير ، عزالدين عبدالمحمود ،عثمان محمد أحمد ، بريمة عمدة قسم الله ، عثمان سرالختم سكنجو، مكرم أحمد البشير ، فتح الرحمن عبدالقادر الامام أبوعاقلة الاحمر(كردقيلى )، فتح الرحمن محمد شاع الدين ، حسين فتح الرحمن ،خالد عبدالله شريف ، صلاح الحفيان ، عبدالواحد جابر صابون ، فيصل برير ، عادل بحيرى ،الشريف عطا المنان ،الطاهر عثمان جاد الله ،محمد عيسى أتيم ، ماركو ماسمو،المرحوم عبدالرحيم الطيب طه الشفيع (نسأل الله أن يرحمة ويغفر له وأرجو أن تكثر فى الدعاء له وأعلم أنه فى بالك خاصه أنه كان صديقك الحميم والقريب لك فى الكلية وبعدها الى أن توفاه الله ).
عبدالرحيم الفكى أبراهيم ،يحى الهادى .
على جويلى الباقى أظن تلاتة أو أربعة يلا شد حيلك وورينا ذاكرتك !!!.
| |
 
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: بشرى مبارك ود السقاى)
|
| Quote: المرحوم عبدالرحيم الطيب طه الشفيع (نسأل الله أن يرحمة ويغفر له وأرجو أن تكثر فى الدعاء له وأعلم أنه فى بالك خاصه أنه كان صديقك الحميم والقريب لك فى الكلية وبعدها الى أن توفاه الله ). |
الله يرحمه ويغفر له وللصديق العزيز الاخر مصطفى حمد نسال الله سبحانه وتعالى ان يعوضهما شبابهما فى الجنة ويجعلهم من اصحاب اليمين ..
الصديق بشرى
بخصوص الفصيلة الخامسة والله ماشاء الله عليك لديك زاكرة قوية جدا ..
علمت اخيرا بان الاخ العزيز حسين فتح الرحمن توفى فى حادث مرور
فى السعودية رحمة الله وجعله من اصحاب اليمين ..
بعد صعوبة شديدة تذكرت اثنين فقط .. الفاتح بشير
سراج الدين وسعادة اللواء الدكتور الطيب عبد الجليل..
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: على جويلى)
|
شكراً الاخ على جويلى والذاكرة ما شاء الله تبارك الله أنا البارح بالليل أتذكرت الدكتور الطيب عبدالجليل والاخ الطيب محمد خير الله والاخ جمال حسن محمد النو لكن والله الفاتح بشير محمد سراج الدين طار منى راسى نهائى !! تحياتى لهم جميعاً ماشاء الله يا على جويلى لما ترجع بالسلامة من الحج سوف تتذكر كل الدفعة ‘ن شاء الله .
نترحم على روح الاخ حسين فتح الرحمن ونسأل الله أن يسكنه الجنة ولم أسمع بالخبر من قبل له الرحمة .
أنت عارف الذكرنى الطيب شنو ؟؟؟ لاقيت واحد دكتور يحكى عن معاناته فى تبديل رخصه قيادة وهو دكتور عمل فى الغابات 20 سنه فى السودان و20 سنه فى بريطانيا وهو رجل فاضل جداً حكى لى قصه رخصته مع مدير شرطة نيالا صديقة فى السبعينات والذى عندما وجده فى كادقلى فى التمانينات وعزمه مدير الشرطة عشاء أبتدر التعارف بأن الدكتور جميل أكل منى أتنين جنية ونصف تمن الرخصه ما أدانى ليهو حتى اليوم !! وحكى أنه أعطاه الرخصه مره أخرى لكى يجددها فجددها له (بعامة ) وقال ليهو مافى دفاتر ملاكى وإنت ربما تحتاجها حسب وظيفتك !!! وأراد أن يستبدلها فحكى لى (فلم هندى عديل ) وأخيراً بعد 10 مشاوير و500 جنية رسوم حلف بالطلاق ما يمتحن وخلاها !!! فتذكرت اللواء الطيب عبدالجليل وقلت يا جماعة الطيب ما فى البلتون الخامس !!!!وقلت له سوف أعطييك مذكرة لدفعتنا إن شاء الله يعمله ليك بدون إمتحان وخبرتك ووظيفتك لا تحتاج الى إمتحان .
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Adil Hamza)
|
تعازي الحارة لأخى وصديقى عمر محمود شين فى وفاة شقيقه , سائلا الله ان يلزمه والأسرة الصبر الجميل وحسن
العزاء وأن يمن على الراحل العزيز بفيوض من رحمته ومغفرته ويجعله من اصحاب اليمين , انا لله وانا اليه راجعون .
يا ريت نلقى وسيلة اتصال بالأخ عمر شين لتقديم واجب العزاء .
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: فيصل عثمان الحسن)
|
أيامك يا ميز , من جخانين بحرى ديومها وتخومها الى لندن أونتاريو وروشستر , كندا وامريكا يا مفترى , العاجبنى فيك صمودك
ومقاومتك للشيخوخة رغم بلوغك اليوبيل الذهبى , القميص شديد وعجبنى بالحيل اكيد شدة من على سر الختم , عارفك بتكون جيت
بمنطلون جنز واحد وفنيلة ولو الأمور بيدك لحضرت لأمريكا بلبس الطلبة والباتا , اتوقعتكم تشدو لى سك , أقول لكم كما يقول
المثل الشعبى المشتهى الحنيطير يطير والمشتهى لوبا عفن يدفن , بلا لمة .
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
Quote: سوف يغادرنا في القريب العاجل اخونا علي جويلي
الي الاراضي المقدسة لادأء فريضة الحج اللهم تقبل منة واجعلة حجأ مبرورأ وذنبأ مغفورأ وسعيأ مشكورأ
وعودأ حميدأ مسرورأ ولا تنسانا اخي جويلي من صالح الدعوات... والعاقبة لكم جميعأ... |
اللهم تقبل منه واجعله حجا مبرورا وسعيا مشكورا وعودا حميدا
ماتنسى يا سيد جويلى اخوك باشدّ الحوجة لصالح الدعوات
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
| Quote: ماتنسى يا سيد جويلى اخوك باشدّ الحوجة لصالح الدعوات |
ابشر ياابو علوة على العين والراس ياحبيب ..
الصور جميلة جدا واجمل مافيها صديقى العزيز
مجدى الطيب طه الشفيع افثقدت الاتصال به من
زمن طويل .. لو امكن مدنا بتلفونه ياابوعلوة ..
التحايا والاشواق للاخ العزيز هشام يوسف ماشاالله
عليه مازال شباب ..
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: بشرى مبارك ود السقاى)
|
نواصل ما أنقطع من مسلسل قصة (سجمى ..... ده الكمسارى !!! لكن كدى شوفى السواق ) الكاتب بشرى مبارك
فى نهايات العام1979م وأعتقد فى ديسمبر كانت المقابلة النهائية لمدير عام الشرطة وكان وقتها الفريق شرطة عبدالله حسن سالم !! أتذكر جيداً الرائد تاج السر محمد حامد الباترا كان مسؤلاً من قياس الطول وبعد أن يقيس الطول ينادى طوله كذا وكذا !! فتدخل على مجموعة كبيرة من الضباط ومن كثرة الدبابير والزراير الخاصه (بالبوشيرتات ) الى يلبسونها ما تعرف الرتب شنو ؟؟ والله الدبابير كم !! بس تعرف أنهم رجال عجنتهم التجارب والخدمة الطويلة الممتازة !!لا توجد أسئلة محدده يتبارى أنشطهم وأسرعهم فى توجية سؤال لك بينما البقية مشغولين ببقيه نقاس عن طالب سابق أو تعليق !! أذكر سألونى عن إلياس الزبير باشا !! وكان قد توفى بحادث حركة فى الكدرو من بوكس فى خط الحلفاية نعرف سائقة فسألونى عن وفاته ففصلتها لهم بدقة حتى كدت أنا أقول لهم (ما كنت شغال كمسارى فى نفس الخط !! ولكنى تحفظت !!!) أعلنو بعد نهاية المعاينات التى أستمرت من الصباح الثامنة صباجاً حتى السادسة مساء لا أكل لا شراب !!! وطوالى من اليوم داك عرفنا الراجيينا !!وقالو لينا تحضروا الى مبانى هذه الكلية صباح الثلاثاء 23 يناير 1980م بعد أن أسبعدوا 5 من الطلبة تقريباً لم يندهوا أسماؤهم فى الكشف النهائى وكان منظر مؤلم للغاية فقد بكى معظمهم !! وأترككم الى ذلك اليوم أتمنى لكم الصحة والعافية .
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
Quote: *** الصورة السابقة
عبدالرحيم محمد عبدالرحيم
هاجر عوض
صالحة عبدالماجد
محمد عبد الفتاح
عمر شين
يوسف حماد
خالد عبدالمنعم /بالزي الملكي
القسم الشمالي الخرطوم/ الباب الغربي على ما اعتقد
سنة 1987 ،،،،،،،،،،،،،،،،،(توثيق)
طارق والطيب
|
اجمل ايام العمر تلك الايام يا الطيب
ليتها تعود لاخبرها بما فعل بنا الزمن
ليتها تعود لاخبرها بمافعلت بنا الغربة اللعينة..
منحتنا بضعة دراهم..
واخذت منا الحياة
فصرنا اجسادا بلا ارواح
ومازلنا نحلم بغد افضل
وما اطوله حلم
تحياتى يا صديقى
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: فيصل عثمان الحسن)
|
الصديق القمندان بشرى مبارك لا يستطيع التداخل بعد الارشفة , ويبدو ان هناك خلل يستدعى تدخل الباشمهندس بكرى للعلاج
تم ارسال ايميل للباشمهندس بكرى بواسطة الأخ بشرى , ويرجى من من لديه وسيلة اتصال أسرع بالباشمهندس لمعالجة الخلل
ان يفعل , علما بأننا قد ادمنا هذا المنتدى وبالتأكيد القمندان بشرى على رأسنا حيث ان الرجل متابع لفترة ليست بالقصيرة لما يحدث
هنا وقد كان مشاركا من منازلهم الى ان تم له مراده ونال العضوية , أأمل ان تعالج مشكلته على عجل حتى يستطيع التواصل .
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Adil Hamza)
|
سلام يا سيد جويلى
و نتمنى لك حجا مبرورا و زنبا مغفورا ان شاءالله
| Quote: الصديق عادل حمزة حمدالله على السلامة .. فى انتظار انطباعاتك عن السودان عموما وبوليس السودان خصوصا |
الله يسلمك يا سيد جويلى
انطباعاتى عن السودان و الشرطة فكرت كثيرا فى تلخيصها و كتابتها خاصة و اننى قضيت اجازة طويلة 80 يوما و معظمها كان مع اصدقائي و دفعتى الذين ما زالو بالخدمة
السودان عموما حالتو صعبة خالص غلاء مبالغة .. لا تتناسب المرتبات مع اسعار الاحتياجات الضرورية .. و الله ما تعرف الناس دى عايشة كيف و متوسط دخل الموظفين الكبار لا يصل المليون جنيه بالقديم
التى لا تكفى مصارف عشرة ايام لاسرة متوسطة
اما ضباط الشرطة مرتاحين راحة تمام .. ساكنين كويس و راكبين عربات جديدة .. واضح انو الحكومة مهتمة بهم اكثر من الجهات الاخرى
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Adil Hamza)
|
| Quote: اما ضباط الشرطة مرتاحين راحة تمام .. ساكنين كويس و راكبين عربات جديدة .. واضح انو الحكومة مهتمة بهم اكثر من الجهات الاخرى |
شكرا للصديق عادل حمزة ..
ربنا يزيد ويبارك حقيقة مافى حكومة من قبل اهتمت ببوليس السودان كما فعلت الانقاذ
والغرض واضح ..
لذلك نجد هذه المسيرة الإحترافية تنتهي بحسرة التقاعد او الاحالة للصالح العام حيث التجاهل التام ..
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
سلام للجميع
يا سيد على حجا مبرورا وسعيا مشكورا، ودعواتك لينا.
الدفعه على سرالختم:
إتا يالنجيض خاتى إسمك فوق لصورة الفريق اول وقادل ومضرع فى البورد !! هسع الملكيه والاهالى الما بعرفوك وبعرفو السيد الفريق
يقولو الفريق اول على ول سرالختم ظاتو بكتب معانا!!
شوف صورتك ام ضبانتين ديك واندرعا وفك صورة الفريق اول.
محن!
سنيرنا احمد عثمان دا مش عندو باسورد هنا ؟
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Dr.Mohammed Ali Elmusharaf)
|
Quote:
جلطـــة نفيســــة
بينما كنت أجهز نفسى صباحاً للخروج من المنزل متجهاً إلى الصحيفة قالت لى زوجتى وهى تسألنى : ما مشيت لى حاجه نفيسه دى ؟
- مشيت ليها .. مش عشان أعزيهم فى وفاة حاج عبدالمنعم؟!
- وفاة شنو ؟ حاجة نفيسه جاتا جلطة وراقدة فى المستشفى !
- معقولة؟ المرة دى والله مسكينة .. راجلا حاج عبدالمنعم فراشو يا دوبك إترفع
- ما هو الفراش ده ما ذاااتو المصيبة !!
حاج عبدالمنعم تدرج كموظف بنك حتى صار مديراً لأحد الفروع قبل وصوله لسن المعاش قبل سنوات قليلة .. متزوج من (نفيسة) زميلته فى العمل قبل أكثر من ثلاثين عاماً أنجبا خلاها عدداً من البنين والبنات .. لم يكن لحاج عبدالمنعم مشاركات إجتماعية بل كان كائناً (بيتياً) ما أن يعود من عمله بالبنك و(يقرش عربيتو) فهو لا يغادر منزله إلا لأداء صلاة العشاء بمسجد الحى ، من صفاته أنه كان هادئ الطباع حسن الهندام خفيض الصوت يتحدث إليك همساً ، توفى بصورة مفاجأة قبل حوالى أسبوع .
- كيفن الفراش هو المصيبة .. ؟؟ ما فاهم
- طيب النحكى ليكا :
قالو ليكا تانى يوم للوفاة .. والبكاء حاااار .. والنسوان ديل يعملو ليك فى البدع ونفيسه دى تردح وتشيل وتوصف
- الليلة وين يا الحاج الصلاى ... خليتنى أنا والمعاى
- الليلو وين يا الأمين البأمنوهو الملايين
- وووووب يا المثالى المشيت خليتنى فى حالى
- وووووب يا الواضح أب كلامن ما فاضح
- الليلة وييينك يا الأرباب الماك كضاب
- الليلة وييينك يا الحنان الحافظ للقرآن
- ووووب وووب وووووووووووب !!
حاجه نفيسة تشيل وتردح والدموع دى ما تديك الدرب والنسوان المعاها شغالات ليها كورس قالو ما يشوفو ليكا إلا (مرا) طويلة وعريضة وقيافه .. التوب ما توب .. واللبس ما لبس .. والحنة ما حنة والدخان ما دخان .. تدخل ليك عليهن ومعاها تلاته بنات الشعر كيفن والبلوزات كيفن والإسكيرتات كيفن ومما دخلن يطقو ليكا السكلى .. وقعدوا يصرخو بى أعلى صوت لحدت ما وقفو ليكا بيت البكا على فد كراع ...
- أها وبعدين؟
- بعدين بعد ما أخدن بكيتن .. وكل واحدة شربت ليها كباية موية بارده مشن قعدن بعيد .. يتخجخجن ويبكن
والنسوان ديل كوووولهن سابو البكا وقعدن يعاينن ليهن !
- أها وبعدين ؟
- أها قالو أخت حاجه نفيسة الصغيره قالت لى ليها برااااحة فى أضانا : إنتى النسوان ديل من وين؟
قامت حاجه نفيسه ردت عليها قالت ليها : يعمينى قبال ده ما شفتهن !
- أها والحصل شنو؟
- الحصل إنو النسوان قالن لى حاجه نفيسة أمشى أسألى المرا دى وقولى ليها إنتى منو؟ قامت الحاجه مشت على المرا وقلدتا وقعدن يبكن زيييين وبعد ما قعدن فى الواطه ومسحن دموعن قامت الحاجه سألت ليك المرا قالت ليها : ما إتعرفنا على بعض يختى !!
- أها المرا قالت ليها شنو؟
- قالت ليها أنا إحسان زوجة المرحوم على سنة الله ورسولو وديل بناتو هادية وهديل !
- وده الجاب لى حاجه نفيسة الصدمة وجاب ليها الجلطة ؟
- لا لا .. حاجه نفيسة كانت متأكده من المرحوم عشان أصلو ما كان بيطلع من البيت .. طوااالى قالت للمرا قومى أمشى من هنا قبل ما نجيب ليكى البوليس يا مرا يا محتاله .. الحاج ده من بيتو ما بيطلع إلا يمشى يصلى العشاء فى الجامع ويقعد ليهو ساعة ساعتين فى حلقة (التلاوة) !
- أها وقالت ليها شنو؟
- قالت ليها ما أنا ذاااتى (حلقة التلاوة) دى ذااااتا
|
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: على جويلى)
|
| Quote: تعرف يادكتور مشرف صبغة الكمندانات دى تكون بسبب حلقات التلاوة !!! |
تحياتي سيد علي
بناعتن دي يا سيد علي الا تلاوة نهارية ذي بتاعت مسجد وزارة الداخلية ما شايف الناس دي عمت ماااابتشوف الصور
قبل كم سنة مشيت السودان ومشيت الرئاسة سمعت واحد بيوعظ في مسجد الرئاسة بالمكرفون سالت دفعتي انت الليلة الجمعة الخطبة شنو قال لي ده امام المسجد يوميا بعد صلاة الظهر شغال ردم قلت ليه الناس دي دحين ما شغالة قال لي دي مكنة الزوغة لو واحد زاغ من الشغل يقول انا كنت في درس الجامع
محبتي
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: على جويلى)
|
| Quote: فى حصان جارى بكتب معانا فى البورد ده برضو |
يَدْعُـونَ عَنْتَرَ والرِّماحُ كأَنَّهـا أشْطَـانُ بِئْـرٍ في لَبانِ الأَدْهَـمِ
ابيات من معلقة عنتر والادهم هو اسم حصانه .. كنا نحفظها عن ظهر قلب
كانت مقررة علينا فى الشهادة السودانية .. ارجعتنا سنين عددا ياابوعلوة ..
شكرا ياحبيب على تلفون مجدى الطيب ..
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: على جويلى)
|
الاخوان الكرام والزملاء جميعاً تحياتى وأخص بالذكر الاخ فيصل عثمان وأشكره على ما كتبه بخصوص حل مشكلتى ، ولكن أتضح لى أن مشكلتى أن كمبيوترى ده والنت رفضوا عديييل فى الايام الفاتت الدخول على حوش بكرى !! غايتو الليلة بعد محاولات عديدة وشديدة قدرت أدخل .
أتمنى أن نتواصل مع الحجاج ومع العائديين من الاجازات (80 يوم ) والله قربت تجاور فى الرئاسة !!تكون ما خلييت ليك سمك (عايم !!!) وقالوا عوضية أصبحت موضوعة قديمة زى (حنان بلوبلو فى الغناء !!!) .
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Adil Hamza)
|
الى الذين ريحو ضابط الشرطة على حساب المواطن الغلبان (خاصه جبايات المرور ) نهديهم هذا المسدار :
راحة الشرطة على حساب الفقير بتشفّق
زى الشاف الرهاب ولى مويتو قاعد يدفّق
حليل (الباترا ) داك فى زمنو قاعد يصفق
ما شاف بعدو الحصل غرييب فى الشرطة فيها مفشّق
لكم أن تتخيلو لو عاصر الباترا عهد مدير عام الشرطة الحالى الفريق شرطة هاشم عثمان ماذا كان سوف يقول علماً بأنه لم يشاهده فى (الميدان الاحمر أو التدريب أو التخريخ مرتين !!!!) عجائب!! كان صفق وكان غنى عديييييل !!!!
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
5:12am Oct 3
آإآبــدآإعآإت آلشيخَ آلمطلق
إجابات مقنعه جدا جدا
اتصلت امرأۃ على الشيخ عبدآِللَّـہٌْ المطلق وسألته سؤالاً وبعد ما أجاب على السؤال قالت له: يا شيخ أدع لي الله أن يرزقني الشيخ محمد العريفي زوجاً لي.
...رد عليــــَِـَِ♡̷̴̬̩̃̊ـَِـَِـــہاالشيخ المطلق وكما هو معروف عنه سرعة البديهه وقال
انت تريدين الشيخ العريفي لجماله ولا لعلمه؟:>
قالت له الأخت السائلة: لعلمه يا شيخ.
قال لها: إذاً ال
شيخ صالح السدلان أعلم منه، سأدعو لك أن يرزقك الله إياه زوجاً
مقدم البرنامج ما قدر يمسك نفسه من الضحك
=)) » « =))
ھَہّھَہّھَہّھَہّھَہّھَہّھَہّھَ•ههههههههههههههههههه
أحد المتصلين سأل الشيخ المطلق قاله ياشيخ يجوز اكل لحم البطريق؟؟
قاله الشيخ اذا لقيته كله
=)) » « =))
هههههههههههههههههههههه
اتصل واحد على الشيخ وقال ياشيخ انا طلقت زوجتي وكنت في وقتها
في حالة غضب والحين كيف اراجعها ,,
قال الشيخ المطلق ( ياخي كل اللي يطلقون يطلقون وهم في حالة غضب , انت
قد شفت احد يطلق زوجته وهو جالس يآآخ |
قول انك عايزها
=)) » « =))
هههههههههههههههههههههه
في أحد البرامج أتصل عليه مستفتي وقال يا شيخ :
( انا ادخل بالجوال في دورة المياه ومخزن فيه القرآن الكريم )
هل يجوز ذلك ؟
جاوبه الشيخ المطلق لابأس !!:)
كرر السؤال فقال : لكن فيه القران مخزن ؟؟!!
قال الشيخ : يا أخى لا بأس هو محفوظ في ذاكرة الجهاز !:|
رد السائل بقوله : هذا القرآن يا شيخ هل يجوز أن يدخل دورة المياة !!!؟؟
قال الشيخ : أنت حافظ شي من القرآن؟
جاوب السائل : نعم يا شيخ حافظ الكثير
قال الشيخ :
خلاص اذا داير تدخل دورة ال مياه
خل مخك برا
Нªª˘°˘НªªНªª˘°˘Нªª˘˘=)) قوووويه
هههههههههههههههههههههه
أتصل واحد على الشيخ : وقاله أنا أبي آتزوج على زوجتي مع أنها مب مقصره
بـّّـّـــّـّّـّّـّـــّـّّس عشان أخذ أجرررر استر على بنت
قاله الشيخ : بدل ماتزعل الأولى عط فلوسك حق شاب يتزوج ويكون أخذت أجريين أجر سترت البنت والشاب
هههههههههههههههههههههه
اتصل واحد على الشيخ : وقال له ياشيخ لو كنت بأصلي في غابة ومر أسد قدامي اقطع صلاتي ولا أكملها
قال له الشيخ إذا بقيت على وضوؤك كملها
=
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: عاطف نورالهدى الطاهر)
|
كدا وبس
أردت توصيل الكهرباء لمنزلك فلابد أن تقوم بدفع قيمة أعمدة الكهرباء والأسلاك والعداد ومش كده وبس الحاجات دي كووولها تصبح ملك لشركة الكهرباء
• كثير من الفنانين يتغنون بأغاني الغير بأصواتهم الضعيفة ويغيرون في لحنها وموسيقاها ومش كده وبس كمان يخطئون في نطق مفرداتها .
• كثير من أفراد القوات النظامية يتحدثون بالموبايل وهم يقودون عرباتهم ومش كده وبس مرات كتيرة العربات بتكون بدون لوحات (المواتر ماتديك الدرب)
• إذا ذهبت مستشفياً إلى أى مستشفى حكومى طالبوك بالقطن والحقن والشاش مش كده وبس ممكن بعد إنقطاع الكهرباء الأخير في مستشفى الخرطوم بسبب نفاذ الجمرة يطالبوك تجيب معاك كهرباء .
• المتسولون في الشوارع أصبحوا يلحو في السؤال حتى بعد أن تقول لهم (الله كريم) مش كده وبس القصة بقت فيها (جرجير هدوم) ولياقه شديدة
• جارنا (صلاح) سطا على منزله لص أخذ كل الموبايلات بالمنزل والرسيفر والتحويشة مش كده وبس وكمان قام بضرب (صينية الفراخ) التى كانت بالثلاجة !
• معظم لاعبينا المعتزلين ليسو خبراء تدريب ويفقعون مرارتنا (المفقوعة أصلاً ) بتحليلاتهم الكروية مش كده وبس ممكن يقولوا ليك مفروض (ريكاردو) يقوم بتغيير اللاعب الفلاني !!
• معظم كليات الطب لدينا ذات أمكانات متواضعه .. لا معامل لا مكتبات لا شنو ما بعرف .. مش كده وبس بعضها لا يوجد بها مشرحة .. (طب نظري وكده) !
• أعطاه جده خمسة جنيهات وطلب منو يجيب ليهو رطل لبن ونص كيلو باسطة وكيس تمباك مش كده وبس وقال ليهو جيب معاك الباقي !
• وأنت في الحافلة تقرأ في جريدة يطل جارك في الكرسي برقبته ليقرأ معك في رزالة غريبة ومش كده وبس ممكن تجي تقلب الصفحة يقول ليك (دقيقة بالله) !
• إنعدم الضبط والربط .. ممكن البت تطلع من الصباح وتجي المساء مش كده وبس وكمان تجيب معاها العشاء لى ناس البيت !
• تحت قبة البرلمان تلاسن العضو المثير للجدل مع وزير الصحة ورفع صوته ومش كده وبس هجم عليه ولو ما حجزوهو كان عاوز يضاربو
• الأفكار الإعلانية لدينا قمة في الركاكة والسذاجة مش كده وبس كمان القصة جابت ليها
(صعايدة)
• بعض شباب الزمن ده يمحن عديل .. دخلت إلى صالون الحلاقة لأحلق فوجدت شاباُ أمامي يضع على وجهه ماسك من الكريمات .. مش كده وبس وكمان (بيواسوا) ليهو في حواجبينو بالموس !!
كسرة :
إثناء مروري بالقرب من أحد أقسام الشرطة لاحظت أن هنالك جندياً (مفلفل شعرو) ومش كده وبس كمان لابس ليهو بنطلون سيستم (لغير العارفين به ده إسم البنطلون الناصل)
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Dr.Mohammed Ali Elmusharaf)
|
Quote:
يا كمندان والله سلكك ما في السلك كدة كويس ياخي اخوك بعد الشمار واقف انتباه لي اسع
محبتي التي تعهد |
الدكتور الحنكوش ودالمشرف
ياجماعة ما اكتشفت ليكم معانا حناكيش هنا ونحن ماجايبين خبر ..ودالمشرف قرا فى كمبونى وامتحن شهادة لندن كمان..نحن ناس حلفا الثانوية ديل لينا الله وعيشت السوق..
ال الكلاكلة ال مع الاعتذار لسيد فيصل وكده..
اى زول قرا فى قناية الوســخ ولا ضنب النملة مايجى يعمل لينا مجنون هنا وود عاصمة وكده واى زول نشا فى الخرتوم فى بيت حكومة بررررضو ما يعمل مجنون وكده
استثاء حاص لكل من نشاء فى الاشلاق لما عانوه من مشّقة فى التعامل مع غنم الاشلاق وكده
انحن معترفين لما يقولوا على مستمعينا فى الاقاليم مراعاة فروق الوقت الكلام ده بيخصنى وكده واى زوووووول عنده اى عنكبة معاى يجى بى هنا عشان اصرف ليهو من كوتاتنا بتاعت حلفا ديك لمّن يامن
سلام خاص لى اولاد الخرتوم محل الريس بنوم والطيارة بتقوم
| |
|
|
|
|
|
|
|
|
 Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
Quote: الدكتور الحنكوش ودالمشرف
ياجماعة ما اكتشفت ليكم معانا حناكيش هنا ونحن ماجايبين خبر ..ودالمشرف قرا فى كمبونى وامتحن شهادة لندن كمان..نحن ناس حلفا الثانوية ديل لينا الله وعيشت السوق..
ال الكلاكلة ال مع الاعتذار لسيد فيصل وكده.. |
يا خي دي اشاعة ساكت شفت ليك في ذمتك حنكوش حائم في هولندا سنين عددا والان ابوظبي امال العمارات دي يسكن فيها يعني ..........
النقط دي عشان ما تجينا المشاكل
الله يجازيك بعد ده الواحد ما حايحوم في الدفتر ده الا ببودي قارد
| |
|
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: بشرى مبارك ود السقاى)
|
يا سيد بشرى ياخ يشهد الله الغربة هدت حيلنا وخلتنا أجساد بلا أرواح , فلا مناص من اللجؤ الى اليوتيوب
والغوص العميق للتنقيب عن الدرر التى اهدانا اياها جيل من العباقرة صنعوا الفرح بكل معانيه وقدموه
لنا فى باقات من الكلم المقفى واللحن الشجى لم ينال منها الزمن رغم تقادمه , هديتى موصولة لأستاذ الاجيال
سعادة اللواء عمر على حسن الذى ابى دفترنا ده بى الله واحد , وموصولة ايضا للقمندان النور يوسف شايفو عامل
كمين فى الفيس بك , يا اسامة الكرور وفارس موسى وعبده عوض وكل الاحباب كدى تعالوا ورونا انتو نوع المغنى ده
بنفع معاكم ولا أقوم أسع اجيب ليكم راجل المرأ حلو حلاة , بلاش موت معاكم , ويا سيد جويلى انت وبما انك ماشى الحج
بقوم أفتش مدحة ام قلة أجيبها .
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: فيصل عثمان الحسن)
|
Quote: استثاء حاص لكل من نشاء فى الاشلاق لما عانوه من مشّقة فى التعامل مع غنم الاشلاق وكده
|
مع إنى جيت الإشلاق كبير .. لكن برضو بعتبر نفسى ود إشلاق .. وود إشلاق حريف..
لذلك سأدافع عن تلك الفئه الراقيه من اولاد ( الناس) اولاد القبايل ، السودانين اولاد الضبط والربط
النضاف وقيافه ، الشداد ولضاض ، حصل شفتو ود إشلاق ######ان ولا ما قيافه؟
ألعب ناس فى الكوره .. شفوت .. وشطار .. وفنانين كمان.
اما فى العسكريه أتحدى اى واحد يقول لى إنهم ما اشطر الضباط واعلاهم كعبا اخلاقيا
وعشان (اولاد الارياف) ناس قريعتى راحت !! والحناكيش الجدد والقدام !!
اديكم امثال:
السيد الفريق اول معاش / محجوب حسن سعد ..المدير العام الاسبق الدفعه 35
اللواء شرطه /كمال محمد سليمان الشهير (بتمساح) الدفعه 44 قديم
العميد الراحل : حبيب أمباشى رحال
وتطول القائمه فى كل الدفع
حتى تصل المغوار ابراهيم الرشيد
تقولى الكرور وتقولى حلفا!!
واخيرا وليس اخرا اقول
هدم الطغاة (الإشلاقات) وما هدموا عشقنا
سنبقى رغم أنف .. جداد الخلا والحناكيش وغنم الحلال واولاد الاحياء الطرفيه من صحافه وخرتوم بليل
سنبقى نوارات المدن وملحها وشوكه فى عين الحسود.
لقيتونى كيف يا امين وصلاح وإبراهيم ؟
طبعا الماإتخرج من إشلاق ( الملازمين ) ما إتخرج.
ونغنى الإشلاق ولا حلفا ولا نيو يورك زاتا!!
يا سيد فيصل الغنيه السطه وفى السلك لكين تعمل شنو مع (القوازه)
ناس جينا الخرتوم نفتش حلاوه رغيف!!
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
Quote: ياعنتر ما أشوف واحد فيكم قاعد ينقز هنا المدحة دى حقت القمندان جويلى وممكن نستثنى
القمندان بشرى . |
شكرا جميلا حبيبنا فيصل على المدحة الطيبة ونحن بدورنا
نهديها للحبيب ابوعلوة وكل من نشأ وترعرع فى الاشلاقات
ونقول للحبيب فارس اضفنا الى قائمة الشرف البازخ العبد لله
من مواليد اشلاقات بوليس السكة حديد ..
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: Ali Sirelkhatim)
|
| Quote: فاز الزميل الحبيب السيد عباس فوراوي بجائزة الطيب صالح للابداع الروائي |
الف الف مبروك للسيد عباس فوراوي ودمت فخرأ دائمأ لشرطة السودان
ومزيدأ من التقدم والابداع...
توجة يوم امس الاخ جويلي الي الاراضي المقدسة رافقتك السلامة..
واحد حلفاوي عينوة امير للحجاج قال ليهم لو شديتوا حيلكم بنرجع قبل العيد:) اناقلت علي :)
| |
|
|
|
|
|
|
|
|
|
Re: دفتر احوال ضابط الشرطة المناوب 2012 {توجد صور} (Re: عاطف نورالهدى الطاهر)
|
ست عرقى عندها خرفان مربياهم وبتاكلهم مشك والبلح مخلفات العرقى واحد اشترى منها خروف للضحية الجماعة قالو ليهو الخروف ده ما بيجور تضحى بيهو لانه ضارب المشك والبلح بتاع العرقى صاحبنا راسو اتشطب وبقى ماعارف يعمل شنو وما عندو قروش يشترى خروف تانى
شافو واحد قريبى من حلفا قال لى مالك ياخينا مهموم كده حكى لي المشكلة بلدياتنا قال ليه بسيطة يا شيخ ادّى الخروف اربعين جلدة وضحّى بيهو المشكلة شنو يعنى
| |
|
|
|
|
|
|
|
| |
Adil Hamza
بشرى مبارك ود السقاى
على جويلى
Ali Sirelkhatim
الطيب عثمان يوسف
فارس موسى
عاطف نورالهدى الطاهر
الصادق عوض
أسامه الكرور
ياسر عبدالكريم محمد
فيس بوك
تويتر
انستقرام
يوتيوب
بنتيريست