دفتر احوال ضابط الشرطة المناوب

Quote: الأعزاء ... سلام للكل و اعفو لينا التأخر في الرد فاليوم ممحوق و الهم أكل الباقي منو كنت أظن ان فعل الكتابة يحرر الانسان من هم القيود و ويطلق مارد القدرة من قمقم الصمت الخنوع و أن كسر حاجز الصمت كاف لإيقاظ كل الضمائر النائمة و ينفض وسن الاستسلام عن الهمم ظننت انني بكتابة ما كتبت قد ارتاح و أهدأ ولكني أشعر بأني drained ومستنزفة بكل ما تحمل كلمة " استنزاف" من معنى.... تأملت لرؤية الشريط على قناة العربية، وشعرت بالمهانة من أول و جديد ... و جرحتني اسألة الزملاء و الجيران عن الفيديو و استهجانهم لما رأوا وأنهم لطالما ظنوا بأن "السودانيين شعب لطيف" وانا كمان ... كنت أظن أن الشعب السوداني "لطيف" بس طلع يا لطيف! عدت للمنزل منذ قليل، قلبت القنوات السودانية أبحث عن (موقف) ... أبحث (عن ردة فعل) حتى لو مستترة ولو خجولة .... لو في لون الطرح .. لو نظرة حزن ...ولقيت برنامج عن ازالة الشعر بالليزر على قناة النيل الأزرق وضرورة عدم نتف الشعر قبل الجلسة (لانو وجود البويصلات ضروري للجلسة) !! برنامج عن ازالة الشعر؟! و بالليزر؟ يالترف! ومسلسل صيني أو ياباني في تلفزيون (القومي) .. دليل واضح على انفتاحنا على الحضارات! قناة زول في آخر برنامج الحوار عن (ويكيليسك) ادتنا من وقتها دقيقتين تطالب فيها بمحسابة المخطأ ... كتر خيركم والله ... قلة الشيء ولا عدمو ... فتشت عناوين الأخبار في الصحف الالكترونية، لقيت الحال في حالو و الدولة ملصقة ورقة التوت المهترئة بصباع أمير و العويل في المنتديات في حالو، و الشارع في حالو .... يا اخوانا انا بالعربي الفصيح (بطني طامة) و أشعر بالرغبة في الانكفاء على نفسي و البكاء حتى يجف الدمع أرغب في الركض حتى نهاية العالم، حيث لا أحد بالفعل، عوض التواجد في مكان مع جموع هائلة من الـ (لا أحد) دارت حوارات اليوم عن حقوق الانسان و حقوق المرأة و العنف ضد المرأة ، ووجدت الحديث عن حقوق المرأة (دلع) في دولة يعد الحديث فيها عن حقوق الانسان ترف فكري، فـ (الانسان) كلو على بعضو ،، بشقيه المراة والرجل و بكافة مراحله العمرية مسحوق بودرة ... يذرى هنا و هناك و يخزن الباقي منه في برطمانات للاستخدام في وقت آخر ليبهر الطبخة التي يأكلها الكبار ..!! استبشرنا خير عندما دعت قياة الشرطة لمؤتمر صحفي، قلنا بس سمح الغنا في خشم سيدو ولكن، من خلى عاتو قلت سعادتو وتمخض المؤتمر الصحفي لقيادة الشرطة وولد فأرا ميتا و(شككت في توقيت ودوافع بث فيلم الفيديو) وكأنه التوقيت يفرق! يعني لو قبل شهرين معليش بس في اليوم العالمي لحقوق الانسان لأ !!! يا مثبت العقل و الدين انجدنا من الهراء الذي نُجبر على التعاطي معه! الفريق عادل العاجب زعلان انو نشر الفيديو حيجر (مزيد من الضغوط على البلاد) !! ولا كمان ازيدكم من الشعر بيت حيزيد من (والتشويش على العقوبات الحدية) كدي يا اخوانا نوصل العاجب لحد الباب، هل هناك حد شرعي بخمسين جلدة (أو) سجن سنتين؟ شرع الناس ديل شنو لانو قطع شك ما شرع الله الواحد وقطع شك قاطعينو من راسهم أو نجر (أخدر) on the spot اتأملوا معاي الدوغمائية الكامنة في التصريح ده بالله والكلام الدرر لعادل العاجب (الذي أكد): ( أن حصانة الشرطة إجرائية وليست موضوعية ولا تمنع من المحاسبة وتوقيع عقوبات مغلظة،ولم يستبعد وقوع أخطاء فردية.)يعني احنا نفض المولد ده يا اخوانا و الشيء الحاصل ده كلو (احتمال) يكون خطأ فردي من زول ما عندو حصانة .. تصفيق لو سمحتو في حتة ما عندو حصانة دي لانو اتقطعنا فيها شديد و ما قصرنا معاكم ... هاكم الباقي و انزلو في المحطة الجاية! و الزول ده ممكن ندقو دق العيش بس عليكم الله فضوها سيرة لانو (ما وقتو)!! وتاني حنتأكد انو (الجلد) حصل بطريقة كويسة – بغض النظر عن الإجراء القضائي الذي يسبق تطبيق الحد أو الجزاء ... يعني حتة التحقيق و التقصي و اثبات التهمة دي ما وارد اصو كلو كلو يراجعوها يعني (القاضي) الحكم بالحكم من الاساس طلع زي الشعرة من العجين وما حيتحاسب حتى على العرض الترويجي بتاع (ها تنجلدي ولا سجن سنتين؟) يا أخوانا ... الموضوع أكبر من كلام و كتابة، الموضوع لو ما استأصل سبب الأزمة ما حيتغير شيء، وباكر تاني بنتلجد واحدة تانية، بس المرة دي في الغرف المغلقة وبهدوء وبدون أن يشهد عذابها طائفة من المؤمنين ... غموتية ... وتاني بكرة حتجرد امراة سودانية من كرامتها بحجة إقامة الشرع و الحدود الشرعية بكرة ستخرج لنا باحات الشرطة نساء مشوهات وجدانيا، ناقمات على المجتمع معطلات غير صالحات لأي شيء سوى (كره) اليوم الخلاهم يبقو سودنيات في زمن الغفلة... لو ما لحقنا الشعب الفضل من السودان، بكرة حنتضارى من ضلنا ... الأزمة ما أزمة عسكر ولا نظام، الأزمة خشت الحوش و بقت في عضم (السوداني) نفسو ... في سقف كرامته وسقف ما يقبله من امتهان .... ومما رأيت، السقف لحق البلاط وبقى ارتفاع لحد عديل! ___________ يااخوانا شعوري بالقهر أكبر من أن تسوقه إبل الكلمات فأعذروني و اعفو لينا تاني ....