دفتر احوال ضابط الشرطة المناوب

Quote: الباب البجيب الريح د. عادل الصادق المكي بعض الأزواج دائماً ما يهددون النسوان بالعرس فوقهن.. وبعض الزوجات دائماً ما يبدين عدم اكتراثهن.... عرس كان داير تعرس.... هو إنتَ منو دي البتعرسك غيري؟.... جي عرّس وحات الله تكون ريحتني من غسيل هدومك وسوات الجبنة نص الليل... كان في إحدى دول الخليج من سودانيي المهجر... راجل ومرا شغالين كدي.. داير أعرس... جي إنت البتعرسك منو؟...سافر الزوج للسودان... وخلى المرا وراهو في الغربة.... قال ياخد إجازة براهو... المرا ما اطمانت لي سفر راجلها براهو دا.... الفار لعب في عبها.... وقلبها أكلها... صاحبو في الغربة إتزوج وخلى مرتو عروس في السودان.... اتصل عليهو وقال ليهو تجيب لي المرا معاك وإنت جايي... يجي الراجل من السودان.. ومعاهو عروس صاحبو... ويدق الباب حق بيتو.. تفتح الباب مرتو... تتاوق تشوف معاهو عروس جديدة لنج..... المرا تقع من طولا وتغمر...الراجل يمسكها ويخمها جوا ... هاك يا بصل هاك يا كلونيا.... المرا تصحا.. تلقى العروس والراجل واقفين عن راسا تاني تغمر... برضو يصحوها... تصحى وتقوم تهرج وتجوط" تعرّس فوقي لي شنو؟... أنا مقصّرة بشنو؟... وحسي دي مرا دي؟... مادام أصلك داير تعرّس فوقي عرس ليك ويحيدن سمحة. "الراجل يضحك.. والعروس مسكينة واقفة مبهوطة... ولخبطوها وما عرفت هي عروس منو؟... يا الله يا امين الراجل سكَّتْ المرا...وقال لها" قولي بسم الله دي عروس عصام صاحبي جات معاي من السودان وحسي ح يجي يسوقها بيتهم..."... المرا تاني تغمر.... المرة دي من الفرحة...ويصحوها تقوم تشعبط في العروس وتسلم عليها.... " عروس عصام... حلااااتك يا يمة... وحات نضري عصام عينو نجيضة ونقاااااي ....صلاتي علي النبي". أحدهم برضو في الخليج.. المرا شغالة ليل نهار.. شي حنة وشي شيل حلاوة.. وشي مكياج عرايس... لمت لها قريشات ما جاتن شي..... تشيل القريشات بي صمتن... تديهن الراجل... الراجل يقول لها ماشي السودان عشان اشتري لي بيت... زيَّنا وزي باقي الناس العندها بيوت دي.... المرا تديهو القريشات وتوصف ليهو البيت عوضين ودانقة..ويوم السفر قدمتو لحدي الميطار.... الراجل جا السودان وشيل قريشات مرتك وعرس بهن... ويرجع وفي إيدو عروس... يدخل على مرتو ... والمرا تتخلع وتسعلو"دا شنو السويتو دا"... قال لها" والله يا خجيجة.... قدر ما كست لي بيت بالقريشات العندي دي ما لقيت... البيوت غالية شديد... ما بتتهبش". قالت ليهو"نان وقت لقيت البيوت غالية تعرس بي قريشاتي؟"... قال لها "والله قلت بدل ما أجيكي إيد ورا وإيد قدام.... تراني جبت ليك مرا"... قفل الباب:- السمحة أم ولدي الحسيسة الخدوما ما الصارة قدوما ست بيت فنجرية ماها مزمومة..