دفتر احوال ضابط الشرطة المناوب

Quote: معلومه مهمه جدا : طيلة عمل طارق محمد أحمد فى الشرطة ومنذ أن كان طالبا لم تسجل دفاتر الشرطة اسمه مبلغا أبدا , لم يفتح بلاغ ضد أى شخص فى حياته أبدا ... وأذكر هنا طرفه حدثت عندما كان يقود البوكس بتاع الشرطة الأمنية فى اشارة المريديان وعندما فتحت له الأشاره تحرك وجاء بتاع تاكسى قاطع الأشاره وصدم البوكس وكسر الأبواب ونزل الراجل من التاكسى وقعد فى الرصيف واضعا يديه فى رأسه ونزل طارق وسأله يا ابن العم نعل ما جاتك عوجه ، فرد الرجل بأن العوجه فى انو التاكسى ده بياكلوا منو أولادى وأولاد صاحب التاكسى وأنا سواق فيهو سااااي وكان التاكسى اتكسر حته حته وكان فى عسكرى مرور وافق شاف الحادث كامل وقال بتاع التاكسى دا الغلطان قام طارق قال للراجل يا زول ما عندك مشكله ودى العربية بتاعتك دى ورشة ناس كمير فى المنطقة الصناعيه وقول ليهم انا مرسلنى ليكم طارق محمد احمد و ما تفتح معاهم موضوع التكلفة والتفت لى عسكرى المرور وقال ليهو انت يا ابن العم كتر خيرك معاك النقيب طارق محمد احمد وانا الراجل دة ما عايز منو حاجة و حأصلح عربيتى براى فما كان من العسكرى الا أن حياه وقال ليهو انت يا جنابو حقك انت حر فيهو لكن انا حقى ما بخليهو الراجل ده قطع الاشاره دى خضراء .. ورش الراجل بى مخالفه ...** حاجة ما بتتصدق :كانت ليله باردة جدا والوقت متأخر جدا وكنا راكبين فى البوكس متجهين لى بيت ناس طارق فى الحاج يوسف وعلى ما اعتقد كان معانا بدر الدين عطا وبابكر عبدالله ووليد أحمد مدنى وعثمان منصور ان لم تخنى الذاكره وقدام مبنى التصنيع الحربى فى كوبر قام طارق وقف العربية ونزل فجأة ووقف مع واحد كان سائق موتر ولافى وشو بى شال وبعد دقيقتين جا قالينا انزلو ارفعوا الموتر ده فى البوكس ونزلنا رفعنا الموتر فى صندوق البوكس وركب الراجل معانا لأنو البوكس كان دبل كابينه ولما وصلنا الحاج يوسف الراجل قال يا اخونا كتر خيركم انا وصلت نزلونى هنا ، وتاااانى نزلنا ( شيلك ختك شيلك ختك .. نزلنا الموتر ) وبعدها سألنا طارق الراجل ده منو ،،، قالينا والله ما بعرفو ،،، طيب مالك او مالو ،، واحد سايق موتر ماشى فى الشارع توقفو و تركبو و تركب موترو معانا انت يا زول جنيت ولا شنو قام قالينا يا أخونا حرام عليكم البرد شديد والراجل لابس ليه هدوم خفاف فضحكنا كثيرا على طارق ونحن لا ندرى أننا نضحك على أنفنسنا ...... **