بالرغم من إنو التسجيل ده تحديداً كان مع بدايات مشاكل الصوت مع محمود عبد العزيز ربي يرحمو ويغفر ليهو إلا إنو العمل ده تحديييداً انا بشوف في الحوت تسلطن كما لم يتسلطن من قبل.. محمود البنعرفو نااادراً ما يتفاعل مع الأغنية وده تماشياً مع طبيعته الخجولة مش جمود منو .. خوف الوجع في الستجيل ده تحديييداً محمود غناها بي إحساس عاااالي شديييد ومن جوووة الجوووة .. العمل ده تحديييدا عمل شبه متكامل ظهر فيهو محمود في كااامل صحته وطلتو البهية البتشرح الصدر..محمود لا قبلها لا بعدها شوفتو ظهر بي الرووقة دي.. طريقة التفاعل مع الفرقة الموسيقية كانت فيها تناغم كبييير ومداعبات واضحة .. التعامل مع مقدم البرنامج الطيب عبد الماجد من خلال الأغنية كان في محلو .. خروج كلمات الأغنية من قلب محمود كانت قبل حنجرته .. طريقة مسك المايك مع التعبير حق الوش كان فيهو مصداقية عجيييبة .. نادراً ما يوصف محمود الاغنية بي تعبير حركي .. ونااادراً ما يبدل محمود من كلمات الاغنية بكلمات لحظية .. لمن قال عزة جاااية ومافي خوووف كان إحساس عاالي من الحوت.. لمن قال بي هيبة خايلة عليك تجر كان التسلطن بي صورة عجييبة .. لمن يقول ما تبقي زيي يي يي ييف..بتطلع من جووووة .. عيونك الساحرة يا محمود في الاغنية دي كانت بتتكلم ..
ياخ ربنا يرحمك يا سلطان .. وأعفي لي غلبني ازورك في قبرك واقرا ليك وادعو ليك وأسلم عليك لأنو ده شي فوق الاحتمال والقدرة ..
06-06-2013, 09:47 AM
Mubarak kunna
Mubarak kunna
تاريخ التسجيل: 11-14-2006
مجموع المشاركات: 499
عمر الفاروق ليك سلام والف تحية ولكل الحواتة بعدين الحوت دة قدر ما الواحد اتكلم فيهو زى البتنفخ ليك فى قربة مقدودة يعنى مهما قلت فيهو قول بلقى قولى ناقص كتييير ياخ الحوت العملها فينا ما هينة وانا لغاية هسع بعتبرو ما مات وما حصل مر على يوم انا ما سمعت الزول دة فى البيت فى العربية فى الشغل فى اى مكان لازم الحوت يكون حاضر معاى والحوت الاغانى الاتسلطن فيها كتيرة يعنى فعلا خوف الوجع دى جضمها جضم السنين والغيرها راااااقد هبطرش وحتة انو تنسى الحوت دى دة كلام ما ببقى ذاتو لانو انا متاكد اى زول حب الحوت مستحيل ينساهو ياخ كدى خلينا عليك الله هسع انا قاعد اكتب فى الكلام دة وحاسى بيهو كلو مشرتم لانو الاحساس البحسو مستحيل يتكتب عشان كدة كلامى بجى جايط لكن عليك الله اسمع الزول دة فى يا عمر وشوفو عذبها كيف
06-06-2013, 10:41 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
عارف يا ياسر الودعو ارتحلو غناها محمود في شريط يا مفرحة لمناسبة خاااصة جداً هبشتو في رووحو ومن دييك بقا ما بيغنيها ..هي طبعا بتاعت صديق متولي تقريبا .. لما رجع غناها تاني كان نساها وده السبب البيخليني اقول ليك السلطنة هنا ناقصة شويية لانو خلوهو يقراها من ورقة ..
06-06-2013, 05:38 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
الصادق يا اسماعين : صدقني ح تسمعا تامي اربعين مرة .. انا من يوم ما رحل من دنيانا وانا بسمعا واوفا بي احساس مختلف.. التسلطن في اتعلمنا من ريدا كان بي سبب ترديده لي اغنية لي واحد من اعز اصدقائه المرحوم الخالدي .. بس برضو دي من الاغاني اللي ظهر فيها الحوت بي مشاهده الاخيرة الظاهر فيها الاعياء عليهو ..
06-06-2013, 05:55 PM
الصادق اسماعيل
الصادق اسماعيل
تاريخ التسجيل: 01-14-2005
مجموع المشاركات: 8620
Quote: الصادق يا اسماعين : صدقني ح تسمعا تامي اربعين مرة .. انا من يوم ما رحل من دنيانا وانا بسمعا واوفا بي احساس مختلف.. التسلطن في اتعلمنا من ريدا كان بي سبب ترديده لي اغنية لي واحد من اعز اصدقائه المرحوم الخالدي .. بس برضو دي من الاغاني اللي ظهر فيها الحوت بي مشاهده الاخيرة الظاهر فيها الاعياء عليهو ..
صدق يا عمر
هسه انا سجلتها في سي دي وواضح حاسمعها اربعمائة مرة
يا خي ربنا يديك العافية، ما تسمع كلام حميدة (الحاسد) انكت لينا درر زي دي خلينا نستمتمع (ربنا يرحم محود ويحسن ليهو)
06-06-2013, 08:28 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
أمجد يا زين : الكلام عن الحوت ما بينتهي وشوفني انا الجمبك ده بكتب عن هذا الكائن الخرافي منن اول ايام انضمامي للمنبر من سنة 2003 تقريباً ولحدي اسة كل ما أفتح بوست بيكون بي إحساس جديد وروح جديدة وكأني اول مرة اتكلم عنو.. بالنسبة لي موضوع السلطنة البقصدو قد تكون فكرتي ما وضحت بي الحاجة البقصدها انا أو خليني اقول إنو كتبتها بي إحساسي وفهمي ليمحمود طيب الله ثراه.. سلطنة الاغاني والصوت دي كللل اغاني محمود غناها بي طريقة عجيييبة وغرييبة ماف زول غناها زيو.. لكن في العمل ده تحديييدا انا شايف محمود كان مختلف عن محمود البعرفو سواء في الحفلات أو في التسجيلات التلفزيونية التانية أو حتتتى في اللقاء ده مع اغاني تانية .. طريقة إنفعال محمود وتعبيرات وشو وحركة يدينو وحركة المايك وطريقة الابتسامة وحتتتى طريقة قعدتو في الكرسي ومرة يجي لي قدام ومرة يرجع يتكي ضهرو وارتياحه وهو بيسند رقبتو لي ورا او بالجمبة ..طريقة ضربة رجله والجــــزمة في الأرض مجموعة ..الإبتسامة ..رصة السنون.. لون العيون ..حاجات كده ما صوت ولا كلمات اغنية بس لأ .. حاجات كتيييرة متداخلة ومتشابكة انا ما قادر إمكن اوصلها ليكم لكن أكاد أجزم إنو الصادق اسماعيل تحدييدا فهمني وحس نفففس الحاجات الانا حسييتا دي عشان كده سجل الاغنية دي سي دي وسمعها كتييير ولسسة ح يسمعها..
تسلم يا راقي..
تخريمة :
يا حميدة عاد كلامي ده أقولوا وين ؟ جريدة فنون وهيثم كابو عامل فيها إنو اصصصلاً محمود ده قرا معاهو مننن الروضة
06-06-2013, 08:39 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: ياخ ربنا يرحمك يا سلطان .. وأعفي لي غلبني ازورك في قبرك واقرا ليك وادعو ليك وأسلم عليك لأنو ده شي فوق الاحتمال والقدرة ..
دى اقل حاجة كان ممكن تعملها ليه ما دام تحبه بهذا القدر ..
------------- الحوت يا فاروق ما كان زولا سااى ..ولا كان فنانا عاادى لا ادرى مدى علاقتك به ولكنك تعلم انه رائعا ..نادرا .. مبدعا اصيلا فى علاقاته .. فى ادائه .. فى حبه للناس .. الا رحم الله محمود عبدالعزيز .. بمقداركرمه وجوده واحسانه للاخرين ..
06-07-2013, 01:28 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
تبلدينا يا حبييب.. كلامك صاح دي كانت اقل حاجة ممكن اعملا..لكن غلبني صددق؟؟ ما عارف بس خوفت من الفكرة وردة الفعل الما مضمونة.. الحوت مااا غالي على ربو.. وفعلا كان زول متفرد في كلللو
06-08-2013, 06:38 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: وقبل التسجيل دا انا كنت شايف انو (اتسلطن) بالجد في اغاني واغاني في (اتعلمنا من ريدا)
يالصادق
اي غنية للخالدي محمود باديها باحساس مختلف .. لانو الخالدي هو فنان محمود الاول ... وبالمناسبة موت الخالدي كان ليه اثر كبير في اعتكاف محمود واعتزاله وزهده في الحياة
06-09-2013, 06:23 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
عارف يا وليد الخالدي ده فنان فنانين كتااار .. وانا بختلف مع الموصلي لما قال فنان الفنانين هو عثمان مصطفى لكن حسب ما سمعت من فنانين كتااار إنو فنان الفنانين واحد من إتنين خليل إسماعيل أو الخالدي.. الخالدي زول إحساسو عااااالي شديييد وبيغني بي من جووووة .. وده الكان قاسم مشترك أول بين الإتنين .. ياخ انا كل ما اسمع خصل شعرك بي صوت وطريقة الخالدي جسمي كللو بيرجف..
06-09-2013, 06:43 AM
وليد محمد المبارك
وليد محمد المبارك
تاريخ التسجيل: 12-04-2004
مجموع المشاركات: 26313
الكلام الحا احكيه ده سنة 90 - 91 محمود مارق من السجن في نفس اليوم .. سمعنا انو في حفلة لي محمود في الحارة الاولى الثورة جمب حديقة الحارة الاولى ... اتغالطنا .. محمود مسجون ياخ .. ياخ قالوا مرقوه .. في ناس قالوا عنده حفلة في حدائق 6 ابريل بالعصر في نفس اليم لصالح اصلاحية الجريف .. المهم الساعة 7 اتقاطرنا ومشنا الحفلة المزعومة .. وكلنا امل
اول ما وصلنا طلع محمود المسرح وانا كنت تحت المسرح طوالي .. لابس فنيلة مخططة خطوط عريضة ابيض باسود .. وبنطلون ابيض شيييييييييييين .. الفنينة شربانة وممطوطة بالجمبة .. ومحمود شكله مبهدل للدين
اول غنية غنها وكان اول مرة اسمعها منو والغنية ذاتها كان جديده عند سيدها ( محمد ميرغني ) الغنية كان حنيني اليك
والله يا عمر .. والله يا عمر .. والله يا عمر
حتى الان بتخيل في الناس مطرة وصبت
سكون رهيب .. وكاننا ما قاعدين في حفلة عرس
إنا لله .. وان اليه راجعون
الله يرحم محمود
06-09-2013, 06:52 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
بالله يا وليد تتذكر لمن مرة فتحو بوست هنا وقالوا فيهو محمود بشتن اغنية محمد ميرغني لمجرد إنهم سمعوها منو في تسجيل قناة الشروق في برنامج مع محمود ؟؟
بالجد انا إستغربت الناس ديل معقول ما سمعو محمود زمان كان بيغني الاغنية دي كيف؟؟ وما حضروا حفلة لي محمود وشافوا المشهد المهيييب لمن محمود كان بييبدا بي الاغنية دي ؟؟ الأغنية دي كانت واحدة من أسباب هيجة محمد ميرغني وحملته المنظمة في البداية لمحاربة محمود عبد العزيز رحمة الله تغشاه ..لكن بعد داك سبحان الله انقلب الاستاذ محمد ميرغني 180 درجة ..
06-09-2013, 08:20 AM
Faris Mohamed
Faris Mohamed
تاريخ التسجيل: 11-16-2009
مجموع المشاركات: 380
سبحان الله يا عمر ,, ما حصل شفت محمود الله يرحمه بدون نظرة الحزن اللي في عينيه دي ,, بدون إحساس الخجل الكبير الظاهر عليه بإستثناء لما يكون في المسرح ,, مؤخرا" إقتنعت إنه ممكن يكون في زول ما بيحب محمود لكن زول يستنكر على الناس إنها تحب محمود أو يقول عليه حاجات تانية ( غرزة وحواجب وغيره ) ما برد ليه ذاته :)
06-09-2013, 09:00 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
تعرف يا عمر أنا من الأبيّض فشنو لما نحب نتجدع على أصحابنا أولاد قلبا كنا بنقول ليهم ( لو ما نحن صفقنا لمحمود دا ما كان بقى فنان كبير كدا وإنتوا عرفتوه :) :) )
06-09-2013, 09:39 AM
أمير محمد ادريس
أمير محمد ادريس
تاريخ التسجيل: 01-17-2013
مجموع المشاركات: 1248
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة