Quote: بس ياريت بدون تكفير وسوط العنج بتاع السلفيين والملحدين .. فهم كما أتضح ( وجهان لعملة واحدة ) .....:)
ما دا البقول فيو انا ذاااتي واثعين بين سندان الهوس الديني يمين .. ومطرقة الهوس اللاديني شمال وانا رااااقد شمال .. حيث القلب ؤ كدا لكن الهوس ياهو الهوس
في تقديري في تحالف سري بيناتم .. لانو وجودهم الموضوعي جدلي .. كل واحد محتاج للآخر كمبرر لوجوده
---------
انت يا عماد نبي؟ ياخي الخطاب بتاع اغلظ عليهم كان موجه للنبي .. سيد الاولين والآخرين ما تلفحوا ساكت!!
تواتر في الاثر، واحد جاء لأمير المؤمنين وقال ليو الليلة جيت انصحك .. واغلظ لك امير المؤمنين اتيمن قال ليو ما بسمع ليك .. لا انت احسن من هارون وموسى .. ولا انا اسوأ من فرعون
لكن كان ضايرت لينا تبارك دا في النار وبئس المصير يكون ما بطال .. صراحة انا-كانتهازي واعي- لاعب لصالح ورقي .. امكن تكون دي فرصة شامة تبقى رئيس حزب الخضر السوداني
يحكى انو عريبي من ضهارينا ديك في زمن الانقليز جاتو فرصة اتعين في وظيفة حكومية صغيرة -مجهرية عديييل كدا لا تكاد ترى بالعين المجردة- وحالتا بي واسطة .. اها قرقر راس الواسطة، باللهلهة اها يا سعاتك مافيها ترقية .. مافيها ترقية .. ما فيها ترقية .. حتى قال ليته سكت، لمن يوم قطع ليو ناااشف: ياخي الترقية دي ما بتجي الا بعد تفضى خانة! مرت الايام والعريبي سمع بالحاكم العام اتلحس .. طوالي على واسطتو .. اها يا سعاتك قالوا الحاكم العام مات!! بمساخة جد: اها ودايرنا نرقيك لحاكم عام طوالي كدي؟ لا يا سعادتك .. انا ما قلت كدي .. لكن ما تتجاردوا* .. امكن نطلع لا فوق!
عجل ليو حسابو ياخي .. خلينا نتجارد المافي شنو؟
* لغير الناطقين بها .. من جرد السبحة ؤ كدي
06-06-2013, 09:09 AM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
Quote: واثعين بين سندان الهوس الديني يمين .. ومطرقة الهوس اللاديني شمال وانا رااااقد شمال .. حيث القلب ؤ كدا لكن الهوس ياهو الهوس
خلاص دا الحنك الجديد ؟؟ طلعتنا مهووسين ؟؟ يا اخوي هل طاردنا زول في المنبر دا بسبب ارائو الدينية او الفلسفية ؛ زي ما فعل الناس بمحسن خالد ؟؟ هل فتحنا عشرات البوستات في الموضوع ؟؟ هل كفرنا زول ولا شتمنا زول بسبب رايو وفكرو ؟؟ اها اصلا ما في حاجة اسمها هوس لا ديني ؛ وقطع شك هذا لا ينطبق على شخصي .. لي ارائي الفلسفية اقولها متى ما جائت المناسبة ؛ ولا اتباهي بها ولا اخفيها واعترف لكل انسان بحق الضمير والعبادة والاعتقاد والتعبد والتبشير ؛ المافي شنو ؟؟
القضية يا قيقراوي لو ما قادر تشوفا ؛ انو وانتم (المؤمنون ) تحرمون محسن من حق اساسي هو حرية الضمير ؛ وتوصموه بالخرافة وانتم ترمنون بالخرافات ؛ وتمارسون هوسا (علمانيا/ اسلاميا) جديدا ما انزل الله به من سلطان.
لو كنتم علمانيون حقيقيون؛ ما مفروض تقيفوا لي محسن خالد في حلقو ؛ ولا تؤذيهو الاذية الاذيتوهو ليهو ؛ سواء اتت هذه الاذية من بشرى الفاضل ؛ او محمد جمال ؛ او تبارك شيخ الدين .. ولن اتكلم عن حلفائكم المتخلفين عديل والمؤذين جدا زي صلاح ابو دية
Quote: في تقديري في تحالف سري بيناتم .. لانو وجودهم الموضوعي جدلي .. كل واحد محتاج للآخر كمبرر لوجوده
مبالغة غايتو .. يا اخي السلفيين ديل بيكرهو روحهم ذاتها .. بعدين اصلا ما في ظاهرة اسمها الهوس اللاديني .. ولو شابفها موجودة ؛ تعال جيبها لينا وحللها وشخصها وجيب نماذج ؛ الكلام الطلقيت دا ما بيخارج ..(وجه ضاحك)
اها ما زعمته انت وآمنة من اتفاق بيننا وبين السلفيين في قضية محسن ؛ لا اتفاق ولا بطيخ .. السلفيون - كما انتم - لا يحترمون محسن كأنسان وكمبدع وكمفكر - ؛ وانما يريدوا استخدامه في معاركهم ضد العلمانيين والليبراليين وعموم التقدميين .. انتو ايضا تستخدمونه - كتختة تنشين - في معركتكم ضد ما ترونه هوسا دينيا؛ وتصنفونه - بسرعة وعجالة - كسلفي وارهابي وانسان خطر ومجنون ومدعي ومتناقض الخ ؛ وهي صفات في الحقيقة متناقضة ؛ ولكنكم تشوتون من كل الاسلحة ؛ وأنا شخصيا احترم محسن كانسان؛ واحترم خياراته في الاعتقاد او اللا اعتقاد؛ واحترمه كمبدع؛ وارى في كتاباته الحالية ابداعا عظيما ؛ تماما كما ارى الابداع في كتابات ابن عربي وفي النص القرانى وفي الحديث القدسي والحديث العادي الخ ... واعامله برفق تقديرا للصداقة ولمشتركات كثيرة سابقة وحالية وربما مستقبلية ؛ ولا ازال اعشم فيه ان يقدم الكثير في مجال الادب والفكر ..
فإن كان هذا كله هوساً لا دينيا؛ فليكن ..
ارقد عافية ..
06-06-2013, 08:53 AM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
Quote: غايتو آمنة مختار دي لو عندها خط مباشر التجي تكلمنا :)
لكلكلك ..قايل كل الناس خفيفين ولفيفين زى نبيك محسن ....:)
صديقنا قيقراوي قال عندو ؛ وقال اي زول عندو وحيو الخاص .. ما قصر تب .. ليهو حق كان يتبع محسن .. بس ما علارف ليه صبأ
Quote: غايتو المضحكني فى الموضوع .. الأتفاق الواضح بين بين آراء عادل عبد العاطي وهشام آدم وشيخ عماد السلفي .. هههههههههههههههههههه
ما في اتفاق .. هشام ادم يهاجم محسن - وان بتهذيب- وأنا احاول أن أفهمه .. عماد موسى بيحاحي ويشرك لي محسن ؛ وعايزو يفك ليهو غبينتو في العلمانيين الاتفاق وين بالضبط ؟؟
Quote: إذنك معاك يا قيقا طبعا.. ما دام ظهرت بهناك .
والأسافير تصلح لنقاش كل شئ فى الهواء الطلق مثلها مثل كل وسائل الحوار .. لمن عنده الرغبة .. بس ياريت بدون تكفير وسوط العنج بتاع السلفيين والملحدين .. فهم كما أتضح ( وجهان لعملة واحدة ) .....:)
عليك الله وين سوط العنج بتاع الملحدين دا ؟؟ انتي ما شابفة اسواط العنج الشايلنها الناس على محسن : مرة معتوه ومرة مجنون ومرة ما عندو انتاج ومرة كان مجاهد في الجنوب ؟ وين الملحدين شالوا سوط عنج على زول ؟؟
الوجهان لنفس العملة - في رايي المتواضع - هم السلفيين والشفقانين من العلمانيين (وجه ضاحك)
Quote: صديقنا قيقراوي قال عندو ؛ وقال اي زول عندو وحيو الخاص .. ما قصر تب .. ليهو حق كان يتبع محسن .. بس ما علارف ليه صبأ
المافي شنو يا عادل الزلابية للجميع
انت برضو في قصة (صبأ) دي فاهما زي ما كنت فاهما انا من منظور غلط ياخي لمن مشيت قريت في الرابط الجبتو-مشكوراً- لقيت نفسي قاعد ساي! بعاين للحاجات من الزاوية الغلط .. لمن كنت بسمع في المسلسلات الينة (لقد صبأ وكفر بآلهتنا) كنت مفتكرا حاجة كعبة انا الغبيان!! وهو قول المشركين -بدليل آلهتنا- والصابئ هو (الموحد) .. اسي زولي فيهم ياتو؟ يا سلام ياخي .. وجدت في الرابط من الادب مع الآخر المتأخر تسامح مفقود من المسيحية مع الاسلام، ومن اليهودية مع المسيحية!
يحكى انو البابا كان في اجتماع مع مبارك .. ولمن جا طالع منو -غاضباً- شال الشهادة ... كااااملة: اشهد ان لا إله الا الله وان محمداً رسول الله
الجماعة هللوا وكبروا قالو: امك البابا اسلم .. قال ليهم: بل كفرت!!
--------
يا آمنة مشكلة الاسافير زي ما قال عنها حبيبنا محسن:
ولنا في تحوُّل الدنيا بشساعتها إلى عالم إنترنت يمكن ولوجه من أي مكان، بحيث لو قلت كلمةً أو كتبت مقالةً، أو فعلت شيئاً، أنت نفسك لا تعرف المدى الذي تبلغه فعائلك وأقوالك، ولا نوعية أو كمية العقليات التي اطلعت على ما تفعل أو تقول، وهذا في حدِّ ذاته مما يحاذره اللبيب ويتنبّه له المتيقظ لا الغافل، ممّا بلغته الدنيا اليوم من اتساع، ومن هَدْمٍ لجُدُرِهَا في بعضها بعضاً، لأجل خلق جيرة واحدة متسعة.
وخت في بالك انو الاسافير العايرة دي فيها زي ناس حيدر الشين ديل .. بلفحوا ويختفو محفضتك .. ؤ(بحطرموا) رغبتك .. اللسة انتا ذاتك ما كلموك بيها!! مشيت اورط دينا خالد- ما مريم زخيرة ؤ كدا- في بوست الدرويشة .. وكتبت (الدرويشة بت خالد) لاحظ عزيزي القارئ انو الطاقية مش ستاتي .. صاحبك ختفا ودرعا لمحسن .. ما تتأمل .. بل تألم!!
06-06-2013, 09:47 AM
تبارك شيخ الدين جبريل تبارك شيخ الدين جبريل
تاريخ التسجيل: 12-04-2006
مجموع المشاركات: 13936
Quote: لا يا سعادتك .. انا ما قلت كدي .. لكن ما تتجاردوا* .. امكن نطلع لا فوق!
وانت إلاّ انا اتكامل ابو لهب حتين تطلع لا فوق؟
بعدين شامة دي مش احتمال تطلع غواصة؟
بالمناسبة يا عادل انا موقفي من محسن موقف دفاع عن الحريات التي يتغول عليها وموقف إنساني بخصوص صحته النفسية ... يعني ما فيهو إتفاق أو اختلاف مع محسن ... فهو لم يأت بما يستحق الإتفاق أو الإختلاف معه ... قول ليهو يشبة بتاعة فنلتك؟
... المهم ....
06-06-2013, 11:58 AM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
Quote: بالمناسبة يا عادل انا موقفي من محسن موقف دفاع عن الحريات التي يتغول عليها وموقف إنساني بخصوص صحته النفسية ... يعني ما فيهو إتفاق أو اختلاف مع محسن ... فهو لم يأت بما يستحق الإتفاق أو الإختلاف معه ... قول ليهو يشبة بتاعة فنلتك؟
اعتقد موقفك في بدء القضية كان متوازن جدا .. كنتا رافض لاطروحات محسن لكن مع حقو في التعبير .. اي تعد من محسن على الحريات مرفوض لكن وين هو التعدى ؟؟ كون بيقول الماسونية وحلفاء الشيطان الخ .. يا اخي دا كلام من لب المنهج الديني ومحسن لم يحدد به احدا ولم يقل لشخص بعينه انت كافر او عابد شيطان الخ ؛ انتو شلتو كلامو العام درعتوهو في نفسكم ؛ يعمل ليكم شنو ؟؟ هذا لا يعني عدم نقاش كلامه العام لكن بدون شخصنة او عنف .
اما حرصك على صحتو النفسية اظنو زي حرص بشرى الفاضل : تقول عنو مجنون ومعتوه وتقول لي حريص ؟؟ طيب لو ما كنت حريص كنتا عملت شنو يا تبارك ؛ لوووول كبير .. الله لا يورينا عدم حرصك كان كدا .
Quote: اما حرصك على صحتو النفسية اظنو زي حرص بشرى الفاضل : تقول عنو مجنون ومعتوه وتقول لي حريص ؟؟ طيب لو ما كنت حريص كنتا عملت شنو يا تبارك ؛ لوووول كبير .. الله لا يورينا عدم حرصك كان كدا .
قبل شوية عبيت لي مشكلة مع زميل مصري .. وما اديتو فرصة يتسدى .. طردتو من المكتب
طلع برة في الممر ماشي وجايي يكورك : عالم مقانين .. بتجيبوا المقانين ديل من وين!؟
قلت ليو اسي عليك الله المجنون منو فينا .. انا القاعد هااادي في مكتبي .. ول انت البتكورك دا!!
ليس القائل باعقل من المقولة عنه تبارك هو النصيح يعني!؟
----------
مصاقرة سودانيز دي افسدت اخلاقنا .. لصقت للراجل عدد واحد (بطل قلة ادبك دي)!! والله صحي
06-07-2013, 01:13 AM
AMNA MUKHTAR AMNA MUKHTAR
تاريخ التسجيل: 07-31-2005
مجموع المشاركات: 13702
والله صدقت يا قيقا ، سودانيز دى أفسدت أخلاقنا وأسلوبنا.. اليشوفناهنا ..ما يشوفنا بره .
بقى أى زول يقابلني أول مرة يقول لى ما قايل شكلك وأسلوبك لطيف وظريف كدا :) قالوا بيتيخلوني واحدة ضخمة مشلخة شايكلة مفراكة قرقرقر
،،،،،،،،،،،
كتب عادل : ما في اتفاق .. هشام ادم يهاجم محسن - وان بتهذيب- وأنا احاول أن أفهمه .. عماد موسى بيحاحي ويشرك لي محسن ؛ وعايزو يفك ليهو غبينتو في العلمانيين
الإتفاق يتجلي فى هذه السطور يا عادل :
كتب هشام آدم : (*) هل يعرف الناس أنَّ "اليقين" درجةٌ عاليةٌ من المعرفة، وأنَّ المعرفة لا تقوم إلَّا بالوسائل المادية المعروفة ؟
وفى الرد على ما كتبه قيقراوي ( عقلك -مهبط وحيك الخاص ).
كتب شيخ عماد :
( عقلك مهبط وحيك؟ إنت يا زول ما نصيح؟ هو عقلك يقدر يعرف البيحصل بيك بكرة؟ هذه مشكلة كثير من الناس ما بيعرفو حدود عقولهم ربنا خلق العقل وأمره بالتدبر والتفكير والبحث والتنقيب ياها ديك أرض الله الواسعة دي مجالات عقلك: التنقيب/الزراعة/الكمبيوتر/علوم الفضاء..لذلك الإسلام لايناقض العلم ولايصادمه بل العلم سبب من أسباب معرفة الله الواحد بس العقل دا يا ود الناس محدود..ما بيقدر يعرف الغيب..ولا عذاب القبر..ولا البيحصل يوم القيامة ولا القضاء ولا القدر..إلخ دا ما مجال العقل شنّ دخّل العق مع الوحي؟ العقل مع الوحي مثل العين مع الضوء..لا تنظر العين إلا إذا وقع عليها الضوء والضوء في مقام الوحي..والعين في مقام العلم...)
وكتبت أنت ردا على نفس كلام قيقراوي : ( ما عارف بي ارائك دي زعلان من محسن خالد ليه ؟؟ هو قال ما يأتي به نتيجه تفكيرو واعمالو لعقلو ؛ وقال برضو ابليس خشا محطة عقلو واخترقا وعمل عليهو تشويش : المشكلة وين هنا ؟؟ والخرافة وتسويقا وين ؟؟ آرائك اعلاه خارجة تماما عن خط الاسلام المدرسي ؛ ولا تختلف في شطحها عن جديد محسن ؛ فخليك في الخط معانا اذا كان هذا رأيك !)
فهل يا ترى ..ما ملاحظ وجه شبه بين آرائكم أنتم الثلاثة فى الرد على وعلي قيقراوي ؟
أنتم هنا ماديون جدا ، وتلغون دور الروح تماما .. وكل ما لايمكن إخضاعه للفحص المادي فى نظركم لا يعتد به .. بل الأمر أخطر من ذلك ، فأنتم تريدون أن توجهوا عمل العقل الإنساني (بالعافية ) إلى وجهة محددة وبطريقة محددة كالعقل الإلكتروني .. وهذا أمر مستحيل ، فالعقل الإنساني يحوي كنزا من القدرات غير المستقلة والأسرار غير المكتشفة .. وهنالك تجارب علمية عديدة أثبتت ذلك كما تعلمون .
_____________________
من جانب آخر : هجومكم وسـخريتكم من تدين العلمانيين يخدم نفس الطرح السلفي الذي يربط قسرا بين العلمانية والإلحاد .
وهذا خطأ كبييير يضر ضررا بالغا بسياسة (إصلاح الخطأ في العمل بين الجماهير)..
فأنتم طالما كنتم تقولون أن العلمانية ليست مرادفا للإلحاد ..إذا لما تكتب مثل هذا الكلام : ( القضية يا قيقراوي لو ما قادر تشوفا ؛ انو وانتم (المؤمنون ) تحرمون محسن من حق اساسي هو حرية الضمير ؛ وتوصموه بالخرافة وانتم ترمنون بالخرافات ؛ وتمارسون هوسا (علمانيا/ اسلاميا) جديدا ما انزل الله به من سلطان)
وألا يشابه كلامك هذا كلام محسن فى بوسته (مثار هذه العكة ) الذي يتبرأ فيه من العلمانية ويعلن فيه عودته إلى منهج الإسلام وشرعته !!
"""""""""""""""""""""
والمحيرني أكتر شيخ عماد ...الشايف إنو محسن فعلا عاد لمنهج الإسلام وشرعته .. مع أن من الوضح أن طرح محسن الأخير متأثر كثيرا بديانة الصابئة المندائيين إضافة إلى شطحات أخرى خاصة به .. لا ندرى ما طبيعة الوحي الذى أوحى له بها ..علوي وللا سفلي ......:)
06-07-2013, 01:40 AM
هشام آدم هشام آدم
تاريخ التسجيل: 11-06-2005
مجموع المشاركات: 12249
Quote: اما حرصك على صحتو النفسية اظنو زي حرص بشرى الفاضل : تقول عنو مجنون ومعتوه وتقول لي حريص ؟؟
يا زول حرص شنو ومعتوه شنو ومجنون شنو؟
قلت ليك موقف إنساني من صحتو النفسية ... يعني في ضوابط ما بتخليني آخد راحتي في النقاش مع محسن ... والضوابط دي بتخصني انا ... ما "حرص" على محسن .. يا اخواننا محسن دا انا ما بعرفو ... وقدر ما قريت ليهو عشان اعرفو إبداعيًا ككاتب سوداني والسلام برضو ما عرفتو ولا بعرفو ... وانا نصيحة انو يمشي لى طبيب نفسي ما بتراجع عنها ... ولا عايزو يفهمها انها حاجة كيدية أو بتعني انو معتوه أو مجنون ... الزول دا عصبو مهدود ومحتاج لى علاج ونقاهة ... ووكت بيعرض ملابسات اهتزازو النفسي على الملأ ... نعرض ليهو النصيحة على الملأ ... راجع طبيب نفسي ... وأفضل انو يكون ماسوداني وما عندك بيهو سابق معرفة ...
الداير يقول انو الماسونيين ابناء الشياطين ما عندنا معاهو مشكلة ... لاكين البيتدرعنا بالإسم ويقول لينا عبدة الشيطان ويتوعدنا بحرب وملائكة وسجم رماد ... بنرشو ونرش حنانو ظاطو ...
عادل عليك الله انا ما قلت راي في "منهج" محسن في عضمو ... انا اتكلمت عن دلالاتو وتعريفو الغلط للعلمانية كمسألة مبدئية وبس ...
يحي وآدم وبشر وإنسان وH المسورات وهلم جرا ... دا حنك عاضي يا مان انا ما عندي ليهو مروّة ...
... المهم ....
06-07-2013, 03:53 AM
جدو جدو
تاريخ التسجيل: 03-19-2003
مجموع المشاركات: 731
Quote: بس العقل دا يا ود الناس محدود..ما بيقدر يعرف الغيب..ولا عذاب القبر..ولا البيحصل يوم القيامة ولا القضاء ولا القدر..إلخ دا ما مجال العقل
شايف أخونا عماد يتحدث عن عذاب القبر, بثقة, زي التقول يا دووبو طلع من قبر وجايينا بالخبر اليقين ... هههه
مع ذلك ... أعجبني قوله بمحدودية العقل, ولأن العقل هو النطاق الحيوي لأي معارف يمكن أن يصيبها الإنسان, فما يخرج عن إدراك العقل الإنساني له إجابة موضوعية, هي نفي العلم بالشئ. فإن سألتني مثلا عن عذاب يحل بالقبر, فسوف أتوالى فقط مع مدروك عقلي {المحدود} وأقول لك ... لا أعلم. بل وأظن أن عدم عملي هذا, أكثر تواضعا من يقين غائم خارج نطاق عرفانية العقل.
أما لجهة الصديق محسن وهو يستفيض في عوالمه الجديدة {الشديدة} فليته يتقيم أولا, أن إستدراكاته وفيوضه في عوالم الدين والنبوه, هي له وحسب, فنحن الآخرين, ما جانا نفس كتابه, ولا دهمتنا صحوة رسالية نبوية لنتواقع معه ظلفا بظافر. ثم ثانيا, تتفيأ إحداثيات العقل الثاقب ظلالا بعيدة آثره, كما كان وكما فعل سابق الأنبياء. وربما يجتاح محسن اليوم شعور غامر بصفوية علاقته الربانية, بل وتميزها بشكل إستثنائي. يقربه من مدارج الأنبياء ويصطفيه لدور مماثل. ومهما يتأجج العقل البشري ويستنضح ربانية ويتمرغ نبوة, فهو محكوم بسمات العصر وبمقاليد المعرفة وبمستوى التطور الإجتماعي والإقتصادي والعلمي للمجتمع البشري. وهي علاقة في ظني عكسية. لهذا إستطردت الأخيلة النبوية بين الأولين وفقدت حظها بين الآخرين. ولا أظن أن محسن سيغير قليلا أو كثيرا في هذه القوامة التاريخية.
فالأحرى إذن, هو خلق عالم بشري يتعايش في سلام وود, ويتكفل بإزكاء نعمة العقل لأجل سعادة ورفاه البشرية في قيدهم الحاضر, وحينما يرحلون فلهم رب يتكفل بشأنهم الغائب.
شايف أخونا عماد يتحدث عن عذاب القبر, بثقة, زي التقول يا دووبو طلع من قبر وجايينا بالخبر اليقين ... هههه
مع ذلك ... أعجبني قوله بمحدودية العقل, ولأن العقل هو النطاق الحيوي لأي معارف يمكن أن يصيبها الإنسان, فما يخرج عن إدراك العقل الإنساني له إجابة موضوعية, هي نفي العلم بالشئ. فإن سألتني مثلا عن عذاب يحل بالقبر, فسوف أتوالى فقط مع مدروك عقلي {المحدود} وأقول لك ... لا أعلم. بل وأظن أن عدم عملي هذا, أكثر تواضعا من يقين غائم خارج نطاق عرفانية العقل.
ما عشان الوثوقية البقراها دي -وانا زول انتهازي والعهدة على الملا هشام بن ادم*- قلنا نستفيد من (سلطة) حليفو شيخ عماد دي يدخل لينا طبارك الذي بيده الفرشة دا النار امكن نتسنم القيادة ؤ كدا ... المافي شنو!؟
--------
* اقرأ عم الجماعة .. اولاد شيث :)
شكلي ح افتح بوست بمداخلتك دي صديقتاذنا حيدر قاسم .. ايضاً
لكن خليني اثبت على ما جاء في المقتبس
لمن نتكلم عن العفل ..بنتكلم بموضوعية ولا نشركة مع الله سبحانه .. نعطيه حقه، ونحن مستدركين ومستصحبين لعلله **.
كتب المستشار محمد سعيد عشماوي:
وإذا وقع من العقل خطأ، أو حدث منه اضطراب فذلك أمر طبيعي لا ينال منه. ذلك منهاج العقل في العمل، يقوم على مبدأ المحاولة والخطأ (Trail and Error 'Method)، وهو منهاج اكتشف العلماءفي علوم مختلفة انه يكاد يكون اسلوب عمل الحياة ذاتها في مجالات كثيرة. في حركة العقل وسعيهلفض اقنعة الحقيقة، وكشف استار الواقع، فانه لا يرى ولا يمكن ان يرى ان الزراعة والامراض والافات وشتى ضروب الحياة محكومة بالملائكة والابالسة (الشياطين)، كما قال ابو حامد الغزالي وكما يرى الاعتقاد السلفي. انما يقوم البحث العلمي على اساس ان آيات الله وآلاء الخالق تتبدى في قوانين وتتحلى في قواعد، يصل اليها الانسان تباعاً، كشفاً كشف. ومتى ما تيسر الوصول إلى كشف فمؤدى ذلك أن الله قد أذن به. وفي ذلك يقول الصوفية "التيسير علامة الإذن“. والوضع الامثل ان تضاف الي العملية الطبيعية عملية لدُنية (من لدن الله) هي المعرفة المقدسة (Divine Knowledge) لو المعرفية (Gnosticism) فتكامل هذين العلمين يرهف الحقيقة الانسانية، عقلية ومشاعر، ذاتية وكلية، فتدرك مكانها من الكونية وموضعها من الحيوية، ومن ثم تعمل في توافق (Harmony) مع الكون كله. مع كل عنصر من عناصره،......
** عدد د. عشماوي علل وامراض العقل بنفسه ص 116 (العقل في الاسلام)
06-08-2013, 04:16 AM
النذير حجازي النذير حجازي
تاريخ التسجيل: 05-10-2006
مجموع المشاركات: 7159
Quote: ما عارف بي ارائك دي زعلان من محسن خالد ليه ؟؟ هو قال ما يأتي به نتيجه تفكيرو واعمالو لعقلو ؛ وقال برضو ابليس خشا محطة عقلو واخترقا وعمل عليهو تشويش : المشكلة وين هنا ؟؟ والخرافة وتسويقا وين ؟؟ آرائك اعلاه خارجة تماما عن خط الاسلام المدرسي ؛ ولا تختلف في شطحها عن جديد محسن ؛ فخليك في الخط معانا اذا كان هذا رأيك !
الغريبة -من جهة شوفي- ما شايف موقفي الحالي دا اتى بأي جديد .. هو موقفي السابق نفسه بس محسن خالد تمادى .. وسبب الزعل انو [هو قال ما يأتي به نتيجه تفكيرو واعمالو لعقلو] .. طيب يحتفظ بيو لنفسو .. بالضبط دا القلتو ليو في بوست المراجعة هي المراجعة دي كيفنها .. يبقى نبي نفسو .. ما عدنا معاو اي ي ي شريعة .. يجي يعلنا لينا هنا .. بنكفر بيها الكترونياً طوالي* .. المافي شنو؟
Quote: سلامت يا محسن
Quote: والله الذي لا إله إلا هو، إنني هبة البارئ، أصغر إخوتي أبناء محمّد بن خالد بن عمر بن أحمد الحسين، وريث الأنبياء الأخير، الذي لا ينجب، المعروف بالباراسيليتس، أو المهدي المنتظر، النبي الطائر، والمأذون الأكبر في ملكوت الله، المُدّلَّل عند ربه، ومن يُدعى في الملأ الأعلى بـ(النبي المثقف) وأيضاً بـ(صاحب الزي الغريب) يعنون فنيلتي والبنطال، أحشر الناس إلى ربهم، فيتبعني كل من فيه خير، ولا يتبقى إلا شرار الناس تقوم عليهم الساعة. وإنه للحق من ربكم، فيا فتح الرحمن أحبك نعم، ولكن لا أغني عنك من الله شيئاً، انتظر فيمن ينتظر، ولا تتأخر في اللحاق بي حين ترى الآيات، فمن شمال السودان تخرج الرايات السوداء والخضراء والبرتقالية، والله أكبر ولله ما خلق. وربي الحق، وربي آبائي الأولين إنها الساعة، فانجوا بأنفسكم.
اشكرك يا محسن على الرد (وكيد الشامتين :) ) واشكرك مرة اخرى على الدعوة ..
وخليني لاول مرة اقول ليك رأي الصريح
انا مؤمن بالله وعلاقتي بيو عامرة، واعتقد انو صلتي بيو مباشرة ولا تحتاج وسيط بعد محمد بن عبد الله عليه صلوات الله .. وانقطاع الوحي واشهد انه ادى الرسالة، وبلغ الامانة بتمامها وتركنا على المحجة البيضاء .. ولن اشكك في شهادتي بانتظار ابن مريم الآخرى او غيره
ثم انو الصعب علي في دعوتك كلها تلبسها بالسلفية والنكوص بالزمن والانقلاب على منجزات البشرية، في عقيدتي انو البشرية -بفضل الله وحسن تدبيره- تخطت مرحلة الطفولة الحضارية .. ولن تنكص لبداوة وبدائتها تاني مرة ..
لست مهتم بالاقصى، وتحريره بقدر ما شايف انو اهم لي تحرير الخرطوم من الطاغوت يؤلمني الموت الاضافي في الجزيرة -جامعتك- اكتر من (اخبار) الموت في سوريا وفلسطين
غير مستعد او حتى مهيأ لحروب دينية عبثية، ولا جهاد مؤمنين بالله ذاته .. او حتى ما مؤمنين ذاتو! ما دخلي انا ياخي!!
ولسة بحلم بمساجد, وكنائس ودير تدعوا لمحبة الله، لا لكراهية البشر
انا غير مستعد لاتباع اي رسالة خارجة عن مبادئ السلام والمحبة والاخاء
فليتمجد الله في الاعالي .. وعلى الارض السلام وللناس المحبة
والمحبة والخوة في ي ي محلها يا محسن وكلٌ ملاقي ربه فرداً بعفيك من اي مسئولية .. اعفي لي انت
---------
ان شاء الله تكون ولدت كدا يا اسامة؟ :)
والله الذي لا إله الا هو لو ما كتبت غير المداخلة دي في رثاء المقبور (قيقراوي) لما احتجت لي مناااااح فهي كانت من القلب للقلب .. عبر كيبورد وشاشة نعم .. لكن بدون مراجعة افكار ولا تنميق كلام!
------------
* المافي شنو!. كلو بقى الكترونياً .. حتى العزاء في الاموات
قبل فترة قصيرة تفاجأت هنا بنبأ رحيل المقيم د.تاج السر الحسن، وتربطني بابن اخيه الشاعر الجميل حسن عثمان الحسن وشائج محبة، واواصر صداقة وزمالة بزنس (المدرسة) .. كتبت عزاء عام للسودان بل واسيا وافريقيا .. وخصصت عزاء لحسن عثمان يخصه تماماً واسرته .. على ان اكمله بالدرب .. او بالتلفون وذلك اضعف المؤاساة .. وانشغلت او انمحق الزمن وتقاصر دون المراد ..
الاسبوع الفات جاني شمار عن طريق صديقنا المشترك خالد الامين .. قال ليو: فتح الرحمن عزاني إلكترونياً في د. تاج السر!!
المافي شنو يا حسن .. وانت بتقرأ؟
عد الى كهفك يا صديق انت من زمن بشيلوا الفاتحة بالدرب؟
يا النذير وين حمار الوادي طيب!؟ (اسي يا محسن لو شرحت لينا حافظة المفهوم الناسف لأي عشم دي: (لمن حمار الوادي يهنق) ما كان احسن من الورجغات الدينية دي في ذمتك؟ يا زول كلو زول يبقى عشرة على (خرافاتو) .. دا ما زمن زول يجمع خرافاتو مع رفيقو .. خرافة +خرافة بتساوي خرافتين خرافة وخرافة وخرافة بتعمل غابة من الخرافات .. وبتضيع الحقيقة كلو كلو!!
يا جدو لكن رواية قيقاراوي اظبط .. حبات السبحة كل واحدة بتقعد بالضبط محل سابقتها بعد تتر لا فوق!
--------------- لماذا اختار الله اللون الأخضر للجنة؟ -------------- يعني ناس حزب الخضر ديل كلهم في الجنة ؟؟ وما عبدة شيطان ولا حاجة ؛ كما تقول الاشاعات ؟ غايتو جنس غايتو . العلمانية هي الحل .
عادل سلامات ما شايف قيقا فى طريقه لكتابة "زهرة الغرق" خاصته ؟
ود ليكما الاتنين
06-11-2013, 03:01 PM
AMNA MUKHTAR AMNA MUKHTAR
تاريخ التسجيل: 07-31-2005
مجموع المشاركات: 13702
--------------- لماذا اختار الله اللون الأخضر للجنة؟ --------------
يعني ناس حزب الخضر ديل كلهم في الجنة ؟؟ وما عبدة شيطان ولا حاجة ؛ كما تقول الاشاعات ؟
غايتو جنس غايتو .
العلمانية هي الحل .
بل العلمانية هي الاصل
حزب الخضر حزب سياسي، ولا يقدم اي وعود للآخرة .. حدنا مع الناس قبورها .. الخلاص مسألة شخصية .. وكل زول عقلو في راسو بعرف خلاصو
(زولكم) -بحكم انكم نشرتو ليو، ودي تحسب ليكم لا عليكم- ملخبط زي محسن واااحد .. وفاكي ليو كلام عاير ساي!! كلامو جبتو عشان انفيو .. لا اثبتو في ذمتك اسي المتن هل هو اجابة على السؤال (بغض النظر عن الركاكة في صياغتو!)!؟ شخصياً ما عارف الجابرو على التلفيق دا اساساً شنو وناسي -وربما لا يدري- انو راية الرسول (ص) كانت سوداء (العقاب) .. وراية الامام علي في (صفين) .. وراية العباسيين اها نتبع منو فيكم؟ بعدين اللون الاخضر ما لون اساسي اصلاً .. ومافي ازدواجية قراية ولا يحزنون (في تكفير عاطف خيري شايف زي الناس دفنت دقن ؤ كدا!) المهم يا زول .. وعلى قول تبارك المهم -الوصف للقول بس- مش اتفقنا على الا نتفق؟ اذا اتفقنا خير .. واذا ما اتفقنا بنكون اتجاوزنا البروتوكول وشرعنا في التنفيذ
النجيضة:
العلمانية هي الاصل حدنا مع الجماهير -في عصر الجماهير، حيث القيادة من الخلف- حدنا القبر الخلاص في الآخرة مهارات فردية
وشجرة وشجرة بساوي شجرتين شجرة وشجرة وشجرة ... بتعمل غاااابة
في نواحي العام 1998م فجرت الاعلامية الجريئة (هالة سرحان) في برنامجها "هالة شوو" على قنوات الـART عدة نقاشات وجدل لم يسلم منه شخصها ذاتها! اجمل ما اذكره من الايام ديك عبارتها الصاعقة -يا زول كان داير تقرأ صادمة ذاتو ما في مشكلة!- في حلقة (الفياغرا) تعقيباً على (خبر) من نواحي بلاد اونكل سام بهناك .. واحدة ادعت انو النسوان عملن مظاهرات عديل كدا(!) .. حولاااا! المهم يا زول، الزولة دي طااااخ رزعتا ليها -(تبر تبر) جيابة الخبر- ولينا نحنا ديل ذاااتنا في ي ي ي وشنا: عشنا وشفنا النسوان بتشتيكي!!
ما عارف مأخذك شنو يا عادل على حوار متمدد في منبر فاتحينو اصلاً للحوار ،عشان تعترض على البوستات الاتفتحت!؟
اجي!؟ ونحنا الجايبنا هنا نصاقر مطعم الباشا دا شنو طيب؟
-----------
عضو البرلمان الذكري قال الزواج هو الحل .. وفي الحقيقة حلو بائس ومشكلتو ذااااتا ابأس!! عايز يقرب شجرة الذرية لا بقصد النماء واعمار الارض .. كتكليف أي انسان كوني .. عاقل* بل لمزيد من الحروب والعبث .. وكأننا نحن ناقصين؟
لاجولالالالا ولاقوة الا بالله 11 صفحة والنضم لسه (مسرسب )؟ ختفتها من بوست ود الباوقة .. كدى ارحكم نزح شوية من محسن بعد إذنك يا عادل .. فتح الرحمن سيبو بجي لاحقنا برا .. مرات لما السما تكون صافية بشوف قدامو عشرة كيبوردات مرصوصة ـ أمال إيه .. يافتح الرحمن (الخبر الأخير ) أنا بقيت مهندس .. ما مصدق مش ؟ خلاص جيب الجماعة ديل ؤ تعالو كلكم شوفو المثلث المطنقر تحت دا فكرو كويس وقولو إنتو . إنتو فاكرين الدنيا مطلوقه ؟ مافي زول يجي يقول لي حمدي العالمية ـ هههه.
القضية يا قيقراوي لو ما قادر تشوفا ؛ انو وانتم (المؤمنون ) تحرمون محسن من حق اساسي هو حرية الضمير ؛ وتوصموه بالخرافة وانتم ترمنون بالخرافات ؛ وتمارسون هوسا (علمانيا/ اسلاميا) جديدا ما انزل الله به من سلطان.
بل:
ان القضية ان توازي ما علمت بما تمارس من سلوك وان تبقى مع صوت الحقيقة اينما اتجهت .. وان تبقى دليلاً للحياة
د.تاج السر جعفر
-------
والله شغل الكورجة دا انا ما بخارج معاي ... ولا راسمالو اسي انا اورجغ ورجغتي دي كلها عن الفردية .. والحساب الفردي وتجوا تكروتوني بالجملة .. وقيل هوادة ساي فوق البيعة
فيما يليني، فوق ثبتا حق اي زول في الاعتقاد/اللاعتفاد.. ان شاء يعبد الحجر ... ماااا شغلتي لكن ما يفلق بيو الناس!! ول شنو يا الركاب؟
بخصوص طاقية (الهوس اللاديني) يا عادل كدي ارجع لمطنها الاول وشوف انها ما مفصلة fit لي راس مكودس محدد؟ :) براااك اتدرعتها .. مع انو فرزناك ان نيم!! اعراض الهوس الااديني زي -وبدضها تمايز الاشياء- تعرف بمقلوب اعراض الهوس الديني... ماذا يضير الله لو كفر اهل الارض جميعاً؟ وبماذا يضير اي زول ايمان المؤمنين بالخرافة(لو التزمت حدها الشخصاني)؟
بروف جون ناش في رده لصديقه عما اذا كانت (الاوهام) اختفت، رد بالنفي .. واسترك: لكني استطيع التعايش معها .. كل دول عندو اوهام ... وطاااخ : انت ما عندك؟ انا شخصيلً عندي اوهام وخرافات وكوابيس صغرى ساحولها لاحلام كبرى يا عملات البرغوثي.. وقادر اتعايش معاها بسلام والحمد لله المتفرد بالثناء على المكاره!
ناضلوا من اجل تثبيت حق الزول في انو يخلوهو في نعيمو ضمن الاعلان العالم لحقوق الانسان جاردو المواد الموجود .. بتلقوا فرق لاضافتها للمادة 18 المافي شنو!؟
06-13-2013, 02:20 PM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
Quote: من جانب آخر : هجومكم وسـخريتكم من تدين العلمانيين يخدم نفس الطرح السلفي الذي يربط قسرا بين العلمانية والإلحاد .
وهذا خطأ كبييير يضر ضررا بالغا بسياسة (إصلاح الخطأ في العمل بين الجماهير)..
فأنتم طالما كنتم تقولون أن العلمانية ليست مرادفا للإلحاد ..إذا لما تكتب مثل هذا الكلام : ( القضية يا قيقراوي لو ما قادر تشوفا ؛ انو وانتم (المؤمنون ) تحرمون محسن من حق اساسي هو حرية الضمير ؛ وتوصموه بالخرافة وانتم ترمنون بالخرافات ؛ وتمارسون هوسا (علمانيا/ اسلاميا) جديدا ما انزل الله به من سلطان)
وألا يشابه كلامك هذا كلام محسن فى بوسته (مثار هذه العكة ) الذي يتبرأ فيه من العلمانية ويعلن فيه عودته إلى منهج الإسلام وشرعته !!
ما عندي مشكلة مع ايمان بعض العلمانيين ؛ ولا اربط بين العلمانية والالحاد ما اناقشه هو حرية التعبير وحرية الضمير .. هل يكون الانسان علمانيا حقيقيا اذا لم يقبل بحرية الضمير وحرية الاديان الاخرى ؟؟ هل يجب ان نترك لمشاعرنا الدينية - من نوع محسن اساء لي غقيدتي - الفرصة لتحجم من موقفنا العلماني ؟؟ هل نكون علمانيين وقتها ؟؟
الحاجة التانية حديث الخرافات دا انا ما جبتو في هذا النقاش .. جابو قيقراوي نقلا عن شخص اخر رافض لي قصة انو محسن يستخدم راس مالو الرمزي في تسويق الخرافة .. تسائلت هنا هل هذا الموقف حقيقي وصادق من الخرافة ؛ ام هو لمجرد تسجيل نقطة على محسن ؟؟ لو كان صادقا اذن يجب ان ينسحب على كل الخرافات ؛ ولو كان يقبل بخرافات ويرفض اخرى لكان لا متسقا ؛ وضربت مثلا ممن يسخر من محسن انو الشيطان غشاهو .. هل يؤمن هو بالشيطان ام لا ؟؟ اذا كان يؤمن بوجود الشيطان طيب ليه يسخر من انو الشيطان غشا محسن ؟؟ حاجة غريبة والله .
بعدين اطلاقا ما في شايف توافق بين منهجي او منهج هشام او منهج عامد موسى ؛ وما شايف وين وجه المقارنة بين حديثي وحديث محسن ..
لك الود
06-13-2013, 04:17 PM
تبارك شيخ الدين جبريل تبارك شيخ الدين جبريل
تاريخ التسجيل: 12-04-2006
مجموع المشاركات: 13936
Quote: ما اناقشه هو حرية التعبير وحرية الضمير .. هل يكون الانسان علمانيا حقيقيا اذا لم يقبل بحرية الضمير وحرية الاديان الاخرى ؟؟
يا عادل عبدالعاطي ... إذا كان الإلحاد نقيض الغيبية والإعتقاد الديني ... فالعلمانية نقيض الثيوقراطية (أو الطاغوت) والوصاية العقائدية ... وهي السمة الأساسية في الفكر السلفي ... سواء كانت سلفية إسلامية أو مسيحية أو يهودية أو غيرها ....
قد تجد هذه الأفكار السلفية مساحة حرية تعبير ومناقشة وما إلى ذلك ... ما لم تتحوّل لخطاب كراهية يصم الآخرين بالمناقص التي تشرعن وتبرر استخدام العنف ضدهم ... هنا تنتهي حدود حرية الضمير والتعبير ويدخل الخطاب السلفي في دائرة الإرهاب والعمل الإجرامي غير المقبول بتاتًا ... حتى ولو كان وراء هذا الخطاب الإجرامي سلسلة لا نهاية لها من السلف الصالح كابر عن كابر ... والخطاب السلفي يستخدم أساليب تجريمية مختلفة لفرض وصايته العقائدية والحيلولة دون تمظهر العلمانية في الواقع ... ومن هذه الأساليب ادعاء امتلاك ناصية الدين الإسلامي وطرد العلمانيين منه بالتكفير وإعادة التكفير ...
طبعًا اعتقادك بأن بعضنا الملتزم دينيًا يتبع الخرافة هو اعتقاد مقدّر لأنك تتمتع بحرية الضمير هذه ... ولأنك لا تدعو لحرق المشعوذين أو أي دعوة إرهابية أو خطاب وصاية عقائدية في رأيك هذا ... ولكن هذا ليس ما يفعله محسن ... فمحسن ليس "المعجّنو ربّو" فقط ... لأن عجن ربه له لا يكتمل إلاّ إذا وجّه فوهة "يشبته" الصفراء نحو صدورنا نحن حطب النار ... وهذه قلة أدب متجاوزة للمعقول ... ناهيك عن غباء إعادة تعريف العلمانية وسوء الكيلة في توصيف الماسونية وما إلى ذلك من حجج تبرير الإرهاب والكراهية ...
الحاجة التانية حديث الخرافات دا انا ما جبتو في هذا النقاش .. جابو قيقراوي نقلا عن شخص اخر رافض لي قصة انو محسن يستخدم راس مالو الرمزي في تسويق الخرافة .. تسائلت هنا هل هذا الموقف حقيقي وصادق من الخرافة ؛ ام هو لمجرد تسجيل نقطة على محسن ؟؟ لو كان صادقا اذن يجب ان ينسحب على كل الخرافات ؛ ولو كان يقبل بخرافات ويرفض اخرى لكان لا متسقا
عشان اقرب فكرتي ..
خلونا نبدل (خرافة) ب(مخدرات) ونستفيد من وجود الملك لتقليب الشغلة من وجهة القانون ...
في التعامل القانوني مع حيازة المخدرات بعتمدوا على الكمية لتحديد الهدف من الحيازة، لمتعاطي، مروج، وتاجر (مسوق) كمية قليلة كافية فقط للتعاطي الشخصي، يعني ضرر اقل على المجتمع والعكس بالعكس مع المسوق .. والمروج في منزلة بين المنزلتين وفي الحتة دي المايك معاك يا ملك .. لا يفتى في القانون في مطعم الباشا وفيه الملك
في فرق بين المروج والمسوق .. واللتنين بستغلوا راسمالم الرمزي في عملية تسليك المنتج في الاسواق المرتقبة اسالوا مجرب ولا تسالوا طبيب ... مهنياً .. والبضاعة ما افيون .. بل مياه غازية المروجين ديل يا بنات سمحات .. لعيبة كورة مشهورين
في البيبسي (نميري احمد سعيد، كومي، العجب حبيبم، جندي نميري) كانوا موظفين رسمي معانا في كشوفات الرواتب بقسم التسويق وما قاعدين نشوفم الا في دورة الصالة (الرابعية) لابسين شعار البيبسي .. وانا شفع الديم مسمني دعاية البيبسي عديل كدا!! قميص بيبسي، وموتر بيبسي .. وبعد دا كلو تاثيري (التسويقي) ما بلحق ابعد محيطي القريب .. لكن تعال شوف ظهور واااحد لايٍ من الاربعة الكرام اعلاه!!
اتمنى انو النقطة تكون وضحت وكان ما وضحت خير وبركة برضو .. المهم اني في المداخلة الجايية ح اعرش
----------
رغم اني زول ذمتي واااسعة .. تسع الجميع لكن ما رضيتا لهيثم (ساي)
يا عادل ياخي الزول الاقتبست منو هو حبيبنا د. هيثم طه وليهو مشاركتين في بوستك دا نفسو .. وفي التانية وضح فكرتو .. وابدى اتفاقو معاك في كتير من النقاط اتمنى ترجع ليهن .. وقد اكون انا سقت كلمو في غير ما قصدو تحديداً. ... وارد! كلو زول بونسو غرضو .. وقد ابنت غرضي اتمنى ما اكون اضريت بغرض هيثم وهو صديق مقرب لمحسن .. وآخر من التقاه .. بعد الازمة (يا ربي!؟)
تحياتي لكما
06-13-2013, 11:33 PM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
Quote: يا عادل ياخي الزول الاقتبست منو هو حبيبنا د. هيثم طه
للاخ الدكتور هيثم طه احترام خاص عندي ومحبة وموقفه من كل القضية متوازن جدا وفي الحقيقة ما عارف كيف فاتنني مداخلتو دي اللى لقيتها عندك ؛ فله العذر ؛ لكن تبقي فكرتي ثابتة انه لا يمكننا ان نرفض طلارح انسان الديني بسبب رفض الخرافة ؛ لأنه وقتها يجب رفض خرافات كل الاديان .
غايتو في قصة استبدال الخرافة بالمخدرات دي بالغتا قلتا لي ماركس قال الدين شنو للشعوب ؟؟
Quote: غايتو في قصة استبدال الخرافة بالمخدرات دي بالغتا قلتا لي ماركس قال الدين شنو للشعوب ؟؟
القالو المرحو شوية هو !؟ يورجغ سااااي .. في اي شيء ليو قول!!
في قول منسوب ليو اوساط الطائفة الشيوعية : اول من يخون الفكرة هو اكثر المتحمسين لها!!
وعني، فقد كان .. معاهو .. ومع محسن
وجوز لا يخسر
--------
ما عارفو لو حضر زمن الافيون الارتفيشيال من جنس (الساينتولجي) كان قال شنو!؟ شوف الادعاء ساي علمولوجيا!! علم (بالاغريقي) + علم (باليوناني) .. ولا علم هناك .. ولا دين محض رهان حول حوض سباحة لمغامرين ومقامرين!!
وشوف راس المال الرمزي الادفق عليهم (جون ترافولتا، توم كروس، كيت .. وقيل ساري بتهم ذاااتا!) راسالمال هو راس المال .. يميل للتركيز .. والتمركز .. والاستغلال
معليش يا شباب اتحمولني شوية .. مع وعد انها مداخلة البيم (القبل العرش مباشرةً)
Quote: : اول من يخون الفكرة هو اكثر المتحمسين لها!!
فعلها محسن همسلف .. مرتين على الاقل مما تعدون!
وسبقه عليها واصل بن عطاء واعتزل شيخه. واسس اروع جماعات الكلام والعقل ..لكن الحلو ما يكملش تورطوا في [السياسة] وغاصوا في وحلها .. افسدوا دينهم .. وسمموا اجواء السياسة (لحقت جلد الائمة والخصوم الفكريين بقامة الامام أحمد!) فخرج عليه تلميذه الاشعري .. وكان خروجاً دامياً ومؤلماً .. حاكى خروج الظفر عن اللحم!!
ما يستفاد من هذا الحديث؟
السياسة والدين ما بتلمن ... ولكل عصر رجال .. ولعصرنا هذا رجال ونساء .. وتحديات كبيرة اولها صيغة مقبولة للتعايش السلمي بين الناس ..كل الناس (اقرأ عقد اجتماعي معاصر)
الدين لله والوطن للجميع
-----------
لاحظت انو شفع اليومين (اقرأ عصر العلوم وتكنولوجيا المعلومات) ديل كل اسئلتم عن (الله)
فيا اهل الله .. اتركوا ما لله لله ارخو جعباتكم في ي ي واطة الله دي .. واقعدوا انحتوا راسكم وجاوبوا على اسئلة العصر (الديموقراطية، المرأة، حقوق الاقليات ... اللخ اللخ) ول ال(نهلة) لن تكون آخر من توصد ازرقها
انكربوا عاد المافي شنو !؟
عن العقل في الاسلام:
[في سنة 1992 اعتذر البابا جون بول الثاني عن الكنيسة الرومانية لحكمها على جاليليو. وفي سنة 1996 أعلن أن التطور هو جزء من خطة الله العظمى ...]
هل ستتبنى جهة ما يوماً ما مهمة اعادة الاعتبار للمفكرين والمعرفيين المسلمين التم اغتيالهم بغدر الايديلوجيا والسياسة؟
لعل قتلة الاستاذ محمود .. وقبلهم حارقي كتب ابن رشد يدركون في ذاك اليوم [انهم كانوا يشعلون النار في رؤسهم ذاتها][الخاتم عدلان]
وجيلاً جاى حلو الشهد صبايا وفتيه يمرحوا فى صباح الغد عيونهم برقهم لماع .. سؤالهم رد خفاف ولطاف .. وثابين اوان الجد دفاعا عن حياض السلم والانصاف
محجوب شريف
ح احاول هنا الايفاء بوعدين:
لـ[الحديقة ] آمنة مختار [حقوق النحت في "الحديقة" محفوظة لدكتور بشرى الفاضل] .. لو ما متذكرة يا امونة راجعي بوست مهدية الملا السيلفي محمد جمال الدين المفتشلة وآخر لـ[العديقة] العزيزة على ألبي د. نجاة محمود [ للضمان كدا الحقوق محفوظة لد. حسن موسى] .. والوعد بخصوص قراءة في كتاب "العقل في الاسلام- محمد سعيد عشماوي" كباكورة ؤ كدا
تقريباً هنا عملت كدا يا دكتورة ..
حيث جاء في الاستهلال ص 9 :
"لا يمكن لأحد أن يقدم صيغة جديدة للحقيقة الكونية ما لم يكن قد تلقى من الله" "يمكن لمن وُهب وحده أن يقدم رؤية كونية جديدة، مناسبة للعصر وموافقة للحقيقة" من التعاليم السرية لقدماء المصريين (!)
وفي الغلاف الخارجي من جهة النهاية وصفحة 141:
[ليس للعقل في الاسلام وحده شأن كبير، وانما يظهر ذلك جلياً في العقائد والشرائع عامة. به يعرف الانسان الله سبحانه وتعالى، ويصل الى الكونية الحقيقيةوالحيوية الدافقة، ويؤكد النظام الاخلاقي، والوضع القانوني، ومبدا المساءلة في الدنيا والآخرة. ويتوصل الانسان به الى التوافق مع نفسه، ومع المجتمع، ومع الكون كله. أما بغير العقل، فليس إلا التخليط والتخبيل، والمنطق الوجداني المتهافت، والاعتقاد العاطفي الخاطئ، الذي يجنح إلى عالم من الابالسة والشياطين، يفععلون ويحكمون ويعذبون، ثم يتركون الملامة للإنسان والحساب العسير ليثقل كاهله، وليس بعد ذلك الضياع ضياع.]
انتهى .. كتاب سغير هو 141 صفحة من الحجم المتوسط .. من دار الانتشار العربي بيروت- لبنان لا بغلط عليك .. لا ب###### يديك عزيزي القارئ
اها بالله تعتبروهو لينا باكورة ؤ كدي المافي شنو؟
---------
وانا ماشي قلت اعيد حكاية (مريم زخيرة/ذخيرة) من اساطير الاولين في الضهرة (مركز دائرة الوجود)
ومريم زخيرة حكامة -زي ريح عاطف خيري :) - شاءت المقادير انو شباب من قبيلة جارة، اغتالو شاب من القبيلة الهي مقيمة عندهم .. طوالي جلّدت يدها بالجلد، خلتا عنقريب قِد بس .. وحرّمت الأكل .. واتمنت منو إلا القبيلة تجيب تارا وترد الحقارة!! ونشبت الحرب، وقضت على الزرع والضرع، والاخدر واليابس .. بعد فترة اصاب رهق الحرب war fatigue الطرفين .. وقعدوا في نيفاشا تخصهم .. زي جماعتنا بالضبط اخيراً انجزوا CPA تخصهم [ايضاً] .. انقروا اول بند فيها شنو؟ آي .. اعدام بسوس القرن العشرين دي ذااااتا والله صحي (والعهدة على الراوي .. لا على قيقاراوي في القسم) لذا لزم التنويه
Quote: في التعامل القانوني مع حيازة المخدرات بعتمدوا على الكمية لتحديد الهدف من الحيازة، لمتعاطي، مروج، وتاجر (مسوق) كمية قليلة كافية فقط للتعاطي الشخصي، يعني ضرر اقل على المجتمع والعكس بالعكس مع المسوق ..
إذا عايزني أقراها مع ( العجب وجندي نميري ) يمكن خطورة المروج بتكون موازية لخطورة المسوق (كهاتين) .. بس الواقع ما بساوي بين شيخ عماد أو د. الركابي مع محمد عبد الكريم ولَ شيخ عبد الحي أو الكاروري .. لإنو التلاتة الأخيرين عندهم مساجد على الأرض .. يعني دكاكينم مفتوحة تبيع في سوق الله أكبر .. ؤ كمان هسة جابت لييها مخدرات بشرية .. تقولي شنو؟ :
Quote: "لا يمكن لأحد أن يقدم صيغة جديدة للحقيقة الكونية ما لم يكن قد تلقى من الله" "يمكن لمن وُهب وحده أن يقدم رؤية كونية جديدة، مناسبة للعصر وموافقة للحقيقة" من التعاليم السرية لقدماء المصريين (!) اها بالله تعتبروهو لينا باكورة ؤ كدي
الباكورة ما عندك لكين .. على كدا نبدأ من كتاب الموتى؟ ياخي استاذنا العشماوي دا عشمو كبير فينا فخليك قريب.. ولَ أقول ليك ـ خلينا مع الحب احسن.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abdel Aati
تبارك شيخ الدين جبريل
AMNA MUKHTAR
هشام آدم
جدو
HAYDER GASIM
النذير حجازي
محمد على طه الملك
فيس بوك
تويتر
انستقرام
يوتيوب
بنتيريست