لعنة الغــدر: النــُوبة من قرنق الى عرمان..

Quote: ثالثا: بالنسبة لحكاية لعب دور في المنطقة.. فهل يعني هذا انو اذا كان الواحد ما عمل حاجة في المنطقة هل دي بيعني انو يسكت و ما يتكلم؟ و هل الأدوار المهمة عندك هي مجرد تقارير عن الفساد؟..ماذا عن الأعمال الأخرى التي تلامس انسان المنطقة؟و لو الكتابة عندك هي العمل المهم.. اهو فتش كويس و شوف مساهماتنا و لو ما لقيتها بنجيبها ليك هنا..و هنا بعض من العمل الذي نظن انه افاد انسان المنطقة:..انا اشتغلت في المدارس الثانوية (بنين و بنات) في الدلنج كمتطوع لمدة اربع سنين..و سنة في مدارس ابوزبد الثانوية (بنين و بنات).. هل هذا عمل مهم أم لأ؟.. وفرت الحماية لبعض مناسيب الحركة الشعبية في الحرب الأولى و كان ممكن افقد روحي.. هل هذا عمل مهم أم لأ؟.. شاركت في رسم خارطة وعي..و ناس كتيرة انضمت للحركة الشعبية و اشتغلت معاها في ايام الإنتخابات.. هل هذا عمل مهم أم لأ؟..انطلقت الحرب ، و كنت ضد خيار الحرب ، و هنا اسألك: لماذا وقف الحوازمة و المسيرية على جانب الحياد في الحرب الحالية؟..مين القال ليهم ما تخوضوا حرب ضد النوبة؟ لأنو لو بمنطقك ده يا محمود فهم يا اما يخوضوا الحرب ضد النوبة و بالتالي هم مؤتمر وطني.. أو يخوضوا الحرب مع الحركة الشعبية و بالتالي هم حركة شعبية.. لكن الوقوف على الحياد ده جاي من وين؟..ومنو المستفيد من حياد هذه القبائل في الحرب الدائرة اليوم؟.. هل هذه اعمال مهمة أم لأ؟..ولا العمل المهم عندك لازم الناس تخش الحركة الشعبية عشان ترضى عنها انت شخصيا..! رابعا: حكاية الأختلاف مع الحركة الشعبية و اٍذاء القضية برمتها..ولا ادري من وين جبت الكلام ده؟.. الحركة الشعبية بنختلف معاها في بعض الأشياء و بنتفق معاها في اشياء..اما يظهر لك من اختلاف هنا.. فهي مسألة مختلفة تماما ووضحناها اكتر من كذا مرة.. انو اختلافنا مع مجموعة معينة و سميناها عشرومية مرة و ممكن نقولهم ليك هنا: خالد كودي ، دينق اخوان ، الباقر موسى ، احسان عبد العزيز ، حامد بدوي بشير..و المجموعة دي مش بنختلف معاها حبا في الإختلاف..و انما دفاعا عن ذاتنا.. لأنهم قاعدين يشتمونا عديل و لسنوات و مافي زول قال ليهم حاجة..و كنا نسكت باعتبار انهم يمكن يعقلوا.. أو تنظيمهم يعمل ليهم ان شاء الله لفت نظر ساكت..و هذا لم يحدث..نحن يا محمود ، صحيح قد نكون ما بنعني أي شئ للمجموعة دي و مش مهم ، و لكن عندنا اهل و تعبوا فينا و علمونا..و قاعدين يسمعوا كلامنا..و لمن يشوفوا ليهم ناس ما معروفة جاية من وين و تقعد تشتم في عيالهم .. الكلام ده ما بيعجبهم..حتى الآن لا ندري بالضبط فكرة الشتم و التعالي و الفرض على الناس انها غصبا عنها تبقى حركة شعبية.. الكلام ده ما عارف اساسو شنو؟.. مجرد الإختلاف مع المجموعة طلعون مراحيل و جنجويد و مؤتمر وطني و اشباه مثقفين.. يبقى باقي ليك يا اخوي نسكت ولا ندافع عن روحنا؟..و حتى الآن.. الناس ديل لو الحركة الشعبية شمال دايرة تأدبهم و تعلمهم يتعاملوا مع الناس باحترام.. فمافي مشكلة.. لا دايرة تفك ليهم القيد ..كلو بتمنو.. لأن القضية ليست هم هؤلاء النفر..لكن ممكن تخسر بسببهم كتير و كتير..المجموعة دي بسببها خسرت الحركة الشعبية تعاطف خلق كتيرة..فهل يدرون ماذا هم فاعلون؟..اها بتقدر تعمل حاجة في الموضوع ده؟.. عموما شاكر لك التعقيب..و لو عنك أي اسئلة تانية ممكن جدا..و دعنا نختلف باحترام..و خت في بالك ليس في نيتنا انو نمرقوا من خندقك..و يا ريت كمان تعامل بنفس الصورة..يعني حكاية تفرض علينا خندق معين ما بتنع معانا.. كبر