|
|
|
 Re: أنت غلطان (Re: Nader Abu Kadouk)
|
وانا يادرديرى غايتو ح اجى اشوف اخر مداخلة
لو لقيت فيها : وعاشوا فى تبات ونبات وخلفوا صبيان وبنات
وانتهت القصة
حأرجع اقراها من الاول
وكدا حاكون وفرت الشحتفة والزغللة
تحياتى
| |
  
|
|
|
|
|
|
|
|
Re: أنت غلطان (Re: ابراهيم عبدالناصر)
|
سلام يا نادر وابراهيم وصلاح .ز
قلت لي يا نادر قرض على كدا .. هو دليل على شئ واحد انه الدنيا ما بتمشي زي ما بنريد نحن نبحث عن البديل في القصص والسينما والنهايات السعيدة بالرغم من ان الواقع غير ذلك ..
كدي خلونا نجاري الدنيا شوية واتحملونا زي ما اتحملتوها ..
| |
|
|
|
|
|
|
|
|
|
Re: أنت غلطان (Re: درديري كباشي)
|
ضحكة نسمة تلفت نظر أمها واختها واللاتي كن يراقبنها تتحدث في التلفون ..
أم عمار : اها خير با بتي ما تفرحينا معاكم .. قال ليك شنو .؟
نسمة : كل شئ تمام يا أمي خلاص .. قالتها وهي تضع البطانية في راسها كأنها تريد ان تنام .. في الحقيقة هي تريد خلوة مع نفسها تستحلب فيها الكلمات الحلوة والحوار الجميل وتمني النفس باحلام وردية ..
م عمار لم يعجبها اختصارها : ليك نص ساعة تتكلمي في التلفون تجي تقولي لينا كل شئ تمام ؟؟
نسمة تفتح وجهها من جديد وهي تضحك : يعني معقولة يأمي عايزاني احكي ليك كل الكلام الكان داير بيناتنا ؟؟
أم عمار : يابت كلامكم نوديه وين نحن عايزين النجيضة .. وصلتو لشنو وناوين على شنو ؟
نسمة : يا أمي عصام و سلمى حا يجونا يوم الخميس عشان يحددوا مواعيد العرس والشيلة والحاجات دي ويتفقوا معاكم ..
أم عمار : ايوا دا الكلام مش تقولي لينا كل شئ تمام وعايزة تنومي ..
عصام بعد ما يقفل تلفونه مع نسمة يرجع لاخته يكلمها ..
سلمى : كيف يا عصام اها كلمتها ..؟
عصام : كلمتها جنس كلام انا لي نص ساعة بتحدث معاها ..
سلمى : شفت انت كنت ظالم البنت وعايز تضيعها من يدك .. المهم النتيجة شنو ؟
عصام : اتفقت معاهم انه انا وانتي نزورهم يوم الخميس عشان نحدد مواعيد الزواج والشيلة والحاجات دي .
سلمى : ايوا دا الكلام سيبك من السلبيات وخليك راجل عملي ما تتلفت لورا ..
عصام : خلاص الخميس انا اجي آخدك ونروح لعندهم من جديد ..
سلمى : هي الخطوة دي كان تكون تمنت من اسبوعين اكان ما حالة المرض المفاجئ ..
عصام : هو مرض لكن ؟؟
سلمى : المهم خلينا نمشي لفدام .
| |
|
|
|
|
|
|
|
|
|
Re: أنت غلطان (Re: درديري كباشي)
|
يوم الخميس مساءا كان عصام وشفيفته في طريقهم لشقة ابو زيد ..
وهم في سلم العمارة خفق قلب عصام بشدة تذكر آخر زيارة لهم والتي جعلته يضع في قرارة نفسه الا يعود مرة اخرى ابدا
فتح لهم الباب وقوبلوا باستقبل وفرح وبشاشة من الجميع ..
جلسوا جميعا في الصالة .. جلس عصام في الكنبة وجلس بجواره عمه ابو زيد وهو يحمل احد طفلي سلمى .. بينما كان الاصغر مع بسمة التي يبدوا انهما تعودا على بعض وتعلق بها الصغير ..
عصام كان أكثر جراة تخلص من الخجل اذ انه لم يرمش عن نسمه ابدا .. وهي كانت متـالقه ترتدي عباية ملونة وترسل شعرها طويلا في ظهرها .. كانت تنظر له وتبتستم .. كثيرا ما هزت رأسها وعضت على اسنانها حتى تصرفه عن النظر اليها لكنه كان قد سكن هكذا لا يسمع ولا يرى الا هي ..
فجأة ركز على اخته سلمى تكلمه : عصام هي انت وين عمك بيتكلم معاك ؟
عصام صحى من سرحته متلعثما : ايوا نعم معليش يا عمنا ..
ابو زيد : كنت بقول ليك والدتك أخبارها شنو ؟؟
عصام : الحمد لله هي كويسة ؟؟
ابو زيد : ما حاتجيبوها هنا زيارة ؟؟
عصام : طبعا طبعا بس منتظرين نحدد مواعيد العرس عشان نطلع ليها الزيارة ..
ابو زيد : العرس لازم يكون في الاجازة بعد ما تمتحن البنت وتخلص السنة الدراسية .
عصام : يالتأكيد عشان كدا انتا اقول انه المدارس باقي ليها شهرين ..أفضل شئ انه يكون في اول الاجازة ... عشان بعدين نفكر نسمة يكون عندها خيارات في قراية الجامعة كثيرة ..
أم عمار : قراية شنو كمان بعد العرس ؟؟
عصام : معقولة يعني حي تتوقف في الثانوي فقط ..؟؟
نسمة : لا انا عايزة أقرأ الجامعة ..
سلمى : صحيح لازم تقرأ الجامعة وما فيها شئ ناس كثيرين بيكونوا متزوجين وبيقروا الجامعة ..
ابو زيد : الله يبارك فيكم يا اولادي .. ويا عصام نسمة بعد شهرين حاتكون زوجتك انشاء الله وانتو حرين بعداك ماتسمعي كلام امك يا بتي ..
ام عمار : اها اها الغلط لزومه شنو ياراجل في زول يقول لبنت ما تسمعي كلام أمك ؟؟
ابو زيد : لا لا لا انا قاصد بس في الحتة دي ..
يضحك الجميع في الموقف الذي يبدأ فيه عم ابو زيد خاف من العين الحمرا ..
سلمى : نحن حانجي كل اسبوع ناخد معانا نسمة وبسمة عشان نبدأ نشتري الشيلة ..
أم عمار : ولزومه شنو أي شيلة حا تجيبوها نحن راح تعجبنا ما في داعي تشتريها العروس وبعدين نسمة ذاتها ما بتفهم في حاجات العرس والنسوان لسع صغيرة .
سلمى : ما نحن عارفنها لكن عايزنها هي تختار الملابس على ذوقها هي ومزاجها عشان ما تضطر تغير بعدين ..
ام عمار : هي حا تشتريها كلها لبسات بنات وموضة وبناطلين واسكيرتات زي هدوم الجامعة ..
سلمى : خليها هي تلبس اللبس اليناسب سنها حاليا ولامن تكبر تشتري لبس الناس الكبار ..
نسمة تبتسم بسعادة لهذا الفهم الراقي ..
عم ابو زيد يقرأ سعادة بنته ويشكر سلمى على هذا الفهم : الله يخليك يا بنتي ويكملك بعقلك ..
أم عمار لا يعجبها الكلام : البننت حا تبقى مرة بعد ما تتزوج حتى لو كان عمرها عشرة سنوات ياها راح تلبس لبس الحريم . يعني عايزين الشيلة يكون فيها بناطلين جينز وتي شيرتات وحاجات زي كدا انتو عايزين تضحكو فيناالناس ولا شنو ؟؟
عصام متدخلا شعر انه فكرة سلمى الرائعة هيجت ثورة أم عمار : لا لا لا يا خالتي اتنتي فهمتي غلط .. الشيلة التقليدية حاتكون زي ما هي تياب وطقوم وفساتين وشنط يد وكدا .. سلمى تتكلم عن الملابس الثانية ما بتكون معروضة في الشيلة زي الانتي قلتيهم ديل بناطلين الجينز والتي شيرتات ..
أم عمار : الحاجات دي انتو ما تشتروها بعد العرس ؟؟
عصام : بعد العرس ما بيكون في وقت المهم خلاص نحن راح نجي من بكرة الجمعة نبدأ نشتري التياب والشيلة التقليدية بعد تخلص نشتري الحاجات النحجن ذكرناها ..
ارتاحت سلمى لتبرير عصام اذ ان اقتراحها كاد ان يخلق لها مشكلة مع أم عمار ..
| |
|
|
|
|
|
|
|
|
|
Re: أنت غلطان (Re: درديري كباشي)
|
صادف اجازة الربيع مدة عشرة ايام ايام شراء الشيلة .
فكان عصام كل مساء يغشى أخته سلمى ويمر على بيت ابو زيد ويأخذ الاختين ويجوبون الاسواق ..
كانت ايام جميلة انطبعت في ذهن عصام كالحلم .. فهم يختارون الملابس وكان يتدخل في اختيار الفساتين ويقدمها لنسمة ويقول لها انا متخيلك في هذا لفستان .. وهي تخجل معقول انا البس هكذا ؟؟ ويضحكان ..
تم شراء الشيلة بحب كبير ( كما يقول الاعلان) وكانت كله قطعه فيها تحكي موقفا يتذكره عصام ونسمة .. انشغلت بسمة الصغرى بالطفلين ولا عبتهما .. وجلست سلمى من بعيد تراقب عصام ونسمة يشترون شيلتهم بحب اكثر
منه بذوق . وعندما يعودوا بحصيلة اليوم تعترض الام وتتذمر .. محتجة على الموضة تارة وتارات اخرى على ان اللبس ليس لبس عروس .. ولكنها ترضخ في النهاية وتستسلم لسعادة بنتها الغامرة ..
حتى العطور والمكياج وملابس النوم كلها تم اختيارها بذات الطريقة من مختلف الاسواق ..تعمد عصام ان يجوب كل اسواق الرياض الراقي منها والشعبي حتى يطيل الفترة ويطيل بقائه مع عروسته اطول فترة ممكنة ... تخلت
سلمى عن المقعد الامامي لنسمة لتجلس بجوار خطيبها .. كانت احلى ايام عمر عصام قالها في نفسه وهو يجاور من أحب طيلة تلك الفترة الحلم ..
حقيقة دكتورة سلمى انسانة عظيمة وناجحه في مجالها ... لماذا اصرت ان تروح العروس معهم لشراء الشيلة ؟؟ هكذا قالها عصام في نفسه .. لان شنطة ملابس وعطور اصبح يحفظهاا قطعة قطعة وكما اصبح لكل قطعة منها
قصة وموقف . وضحكات وخجل وحمرة في الخدين ..زادت من قربه لنسمه وتعلقه بها ..
عملية شراء ملابس العرس اي الشيلة كانت وسيلة لتقريب الحبيبين وتحصين لحبهما بصورة تصعب على اي ساحر او دجال ان يفرق بينهما مرة اخرى ..
| |
|
|
|
|
|
|
|
|
|
Re: أنت غلطان (Re: درديري كباشي)
|
كانت سلمى كل يوم بعد ما يعودوا من شراء قطع الشيلة تتصل بأمها وترفع لها التقرير حتى تعيشها معهم في نفس الاجواء وتشاورها في المشتريات والالوان .. شاركت الام معهم فرحتهم .. وكانت في كل مساء تنتظر التلفون
.. وتعطي تعليماتها بالخطوة التالية . وحتى شراء الذهب ونوعه قدمت لهم النصائح في نوع الوزن والحجم .. حتى اكتمل كل شئ ..
كان كل يوم اهل العمارة يسمعون ضجة عصام وسلمى والاختين في السلم وهم عائدون من احد عمليات الشراء يتضاحكون من مواقف حدثت معهم في الاسواق .. ويعطرون سلم العمارة بالمشتريات من العطور .. وينثرون الفرح كعبير الورد ..
جمعت الشيلة في الاول في بيت ابو زيد .. ومن ثم طلبت منهم أم عمار ان يأخذوها معهم .. باعتبار ان منن العادات ان تأتي الشيلة مجمعة في شنط من بيت العريس بعد دعوة الجيران والاقارب فيما يعرف بالسودان بسد المال
.. وهي اولى مراحل الزوج الرسمية .. وبعدها يكون قد خرج الاعلان من مرحلة الكتمان واصبحت الخطوبة اكثر علنا ..
فعلا ا نزل عصام شنط الشيلة وضعها في سياراته , وذهبوا هو وسلمى على انه يوم الخميس القادم ونهاية الاسبوع سيكون موعد سد المال واحضار الشيلة ..
اعترض عم ابو زيد في البداية بحجة ن يترك كل الامر حتى موعد اجازة المدارس .. لكن ام عمار اعترضت قائلة بأن هنالك امور تحتاج للتحضير كخياطة الفساتين ودق الريحة وغيرها يجب ان تعد قبل فترة من الزواج لذلك من الافضل ان تحضر الشيلة الآن ..
أمنت سلمى على كلامها ورضخ عم ابو زيد لاتفاق النسوة ..
ذهب عصام ونسمة الى بيتهما وفي الطريق بدأ الحوار من جديد .. نهاية الاسبوع سد المال هل سيدعون العمة سعاد من جديد ؟؟؟؟
سلمى اعترضت بشدة قائلة نحن كلمناها بالخطوبة فقط وحصل لنا ما حصل .. فما بالك لو جاءت بنفسها وشاهدت نسمة واهلها واكلت في بيتهم ماذا يمكن ان تفعل ؟؟
عصام : كان معترضا ويقول لنسمة انتو كنتو تهدوا فيني وتقولوا لي خلي عندك ايمان .. كيف نكلم ناس تانين لسد المال وعمتي معانا في البلد ما نكلمها ..؟
سلمى : بطريقتك لو عاوز تكلمها انا اكيد ما راح اطردها من بيتي . وانت وحدك راح تدفع الثمن ..
عصام : لا يمكن انا اطيع الله في صلة الرحم وتحصل لي مصيبة من الطاعة .. لن يصينا الا ما كتب الله لنا ..
سلمى : ونعم بالله انا قلت ليك ما عندي اعتراض .. لكن في الاول خلي نشاور أمي ..
| |
|
|
|
|
|
|
|
|
|
Re: أنت غلطان (Re: درديري كباشي)
|
عدت الايام مسرعة .. في يوم الخميس الموعود .. تحولت شقة سلمى الى بيت العريس .ز
دعت زميلاتها الطبيبات السودانيات .. بالاضافة الى جارتيها فكان من طرفها خمسة نسوة . مع اطفالهن ..
جاءت العمة بصحبة بناتها الثلاث ... يلبسن العبايات بوجوه مزينة سافرة تضج بالمكياج .. وحتى الام ..
تدخل الام تسلم على المعازيم وتتدخل المطبخ للتصدى لخدمة الضيوف باعتبار انها صاحبة بيت ..
سلمى ترفض تلك الخطوة لانها اصلا تشك في نواياها .. تلحق بها ناحية المطبخ وتقول لها يا عمتي انت خليك مع الضيوف انا بقدم لهم الحلوى والعصير ..
تصر العمة بحجة ان هؤلاء زميلات وصديقات سلمى الاولى ان تجلس هي معهن .. بالحاح من هنا واصرار من هناك .. تنسحب العمة ناحية الصالة مستسلمة ساخطة تتزمر ( هو انا غريبة يعني انا ما أمه؟ )
تتوتر سلمى وتتصل بعصام تقول له احضر معك سيارة ميني بص لانه الناس كثار السيارات ما بتكفي ..
يقول عصام ان صاحبيه عاطف وعماد سيحضرون بسيارتيهما لا يحتاج الامر لسيارة اجرة ..
اصبحت السيارات اربعة .. عصام عاطف عماد اضافة لدكتور علاء ..
وصلت السيارات .. انطلق زغروه مفاجئة من ليلى جارة سلمى .. وكانت أول زغرودة تخص المناسبة .. ليلى جارة سلمى انسانة مرحة تحب الفرخ والحياة .. والبهجة .. دائما ضاحكة .. احبتها سلمى ووثقت بها رغما عن انها انسانة غير متعلمة لكنها رقيقة طيبة القلب ائتمنتها سلمى على صغارها .. نظير راتب شهريا أعانها على دخل زوجها المتواضع ولم ينقص مكانتها كصديقة .. فكان الصغار يحبونها بل يكادوا لا يحضرون الى بيتهم ويفارقونها الا بعد جر والحاح كل يوم ... رعت اطفال سلمى مع اطفالها .. كانت ليلى تزغرد بفرح صادق وحب حقيقي لعصام كأنه شقيقها .. بصورة أزعجت العمة وبناتها .. فكانت كلما اطلقت ليلى زغرودة تلفتوا ناحيتها مقطبات الجبين يكاد يقلن لها ( اصمتي )
تصل السيارات يتوزع عليها النسوة ..
العمة سعاد وبناتها يهرعن ناحية سسيارة عاطف . باعتبار انه معروف لديهن مما اثار ضحكا شامتا ومكتوما من قبل عماد وعصام ..
عصام يحذر ليلى من الزغاريد بالطريق حتى لا يتعرضوا لمخالفة نظام البلد .. تتفهم سلمى الموقف ..
يصل فوج السيارات لحي آل ابو زيد ..
يدخل النسوة الشقة ..
عصام وصاحبيه يرفعون الشنط وينسحبون تاركين الامر للنساء وحدهن ..
يقترح عصام ان يذهبوا للجلوس في احد المقاهي حتى يخلص النساء ومن ثم يعودون ..
| |
|
|
|
|
|
|
|
|
|
Re: أنت غلطان (Re: درديري كباشي)
|
تعمدت أم عمار الا تذهب نسمة في ذلك اليوم الى كوافير او اي مشغل تزيين نسائي .. فهي تريدها ان تظهر على طبيعتها .. كخامة جميلة ليست في حاجة الى التزيين . ونجحت في ذلك . فتولت اختها تزيينها وتسريح شعرها وارتدت فستان بلون كبدي مخسر كشف جمال جسدها وعكس لون بشرتها فكانت آية من الجمال .
عرفت سلمى الحضور بام عمار عندما جاء دور عمتها لم تقل لهم اسمها سعاد حتى لا تقلب المواجع وتجعلهم يربطون بين الاسم والحادثة من اسبوعين بل قالت لهم عمتي ام سناء كما عرفتهم ببنات عمتها .
اما نسمة العروس ما أن رأتها سعاد وبناتها حتى جلسن مبهورات فاغرات افواههن ينظرن بأندهاش اخاف سلمى من عينهن على الصغيرة ... مماا حدا بسلمى ان تأخذها كأنها تريد ان تصلح لها فستانها ,أخذتها داخل الغرفة وبدأت تحصن فيها تقرأ وتمسح لها على جسمها .. لحقت بهما أم العروس وعندما شاهدت منظر سلمى تحصن في نسمة دمعت عينها وحضنتها اي سلمى وقالت لها الله يبارك فيك يا بتي ربنا بعثك ليهن أخت كبيرة ما حماة .. انا فعلا لاحظت كل الناس يعاينوا لنسمة بانبهار عايزين ياكلوها بس ما عرفت اعمل شنو .
توزعت الحلويات .. وليلى الضاحكة كل ما وقع نظرها على العروس اطلقت زغرودة .خلقت جو بهجة في المكان .. استخرجت سلمى كاميرت الفيديو من الشنطة وبدأت توثق في الجلسة لتعرضها على أمها الغائبة .. شرحت لبسمة طريقة التصوير وتولت بسمة الاخت الصغرى عملية التصوير بالفيديو ...
جلست العمة سعاد .. مع بناتها في رصة واحدة يتغامزن ويهمسن ... العروس قفلت لهن كل الثقرات فهن قضين طيلة النهار في الكوافير والتزيين ولا تحلم اي منهن في ان تكون ربع جمال العروسة الطبيعي .. لذلك يئسن من هذه الناحية .. بدأ تعليقهن منصب على الدكتورات المبشتنات وزوقهن غير اللائق .. وصحي القلم ما بيزيل بلم .. كما زعمن ..
سلمى لم يكن عندها مانع ان يقلن ما يقلن في صديقاتها الدكتورات بشرط ان يتركن عروسة عصام البريئة الرقيقة في حالها .. وقد كان ولله الحمد ..
العمة سعاد كأنها تريد ان تبرر للحضور لماذا لم يخطب عصام احدى بناتها فكان حديثها كله بصيغة ولدي عصام .. وقال لي يا امي .. كأنها تريد ان تقول ان عصام يرى بناتها كأخواته فلذلك لم يخطب واحدة منهن .. هي لم تنجح فيي مخططها بقدر ما فضحت نوايها فاشمتت بها النساء واضحكتهن على بؤسها ..
| |
|
|
|
|
|
|
|
|
|
Re: أنت غلطان (Re: درديري كباشي)
|
ده شنو ده يا درديري ..............ركز معانا و بطل حركات...........
نحن قاعدين و مجهزين الجلابية و العمة..............
| |
|
|
|
|
|
|
|
|
|
Re: أنت غلطان (Re: محمد بابكر محمد)
|
سلام يا درديري
والله البتعملو فينا ده اخير منو عمل العمة سعاد ....... ياخ جنس جرجرة
ههههههههههههههههههه
معليش متابع معاك من البداية بس كب الشغلة كلها
قمة الروعة في السرد و الحكي الجميل لكن ليس بغريب عليك فيكفيك فخرا انك ابن استاذي و معلمي الاستاذ كباشي ذلك الرجل الصامت الحكاي الف رحمة ونور تتنزل عليه من رب العباد آآاآآآمين
| |
|
|
|
|
|
|
|
|
|
Re: أنت غلطان (Re: اسامة محمد ابوبكر)
|
مشششششششج
غايتو عصام ده طيّب ومسكين وعوير عوارة!
يا ابو الدر الزول ده احسن تعقد ليهو سرعة
لانو انا بعد شوية حا اطبّو ليك كربون واقع بيهو الواطة وما اظن افكو تاني!
| |
|
|
|
|
|
|
|
|
|
Re: أنت غلطان (Re: خالد عبدالوهاب)
|
معليش يا جماعة والله ال
**** ديل كنت قاصد ارفع بيهم البوست لاني كنت طالع مشوار مع الاولاد خفت ارجع الاقيه وصل لفة الكلاكلة وانساه ... يعني نظام طوبات .ز
ونشكر الى من انضم للركب الاخ اسامة .. يعني بعد كدا نقدر نطبع الكروت وقت معارفنا بقوا كتار كدا .. والعاقبة عندكم في المسرات .. الكشف مع محمد بابكر .... لكن في الاول يسلمني اقامته قبل ما يستلم كراس الكشف .. الزمن دا المغترب ود امنك ما تضمنوا ..
| |
|
|
|
|
|
|
|
|
|
Re: أنت غلطان (Re: درديري كباشي)
|
من الجانب الاخر
دكنزر علاء استأذن واخذ طفلبيه الى مدينة الملاهي ..
أما عصام وصديقيه عاطف وعماد راح جلسوا في احد المقاهي الراقيه ..ركبوا كلهم مع عاطف وتركوا السيارتين امام بيت عم ابو زيد .
عماد : شايف يا عاطف العمة سعاد قفلت عليك وخلت عصام ..
عصام : صحي من دون العربات الواقفة ما ركبوا الا مع عاطف مع انهم كانوا اول من طلع على العربات يعني كان ممكن يركبوا معاي ولا مع عماد ..
عاطف : ياخي انت قايلني اهبل عاوز تزوغ من قدحك وتلبسني ليه انا ..
عماد: ياخي قدح شنو البنات ديل ما شاء الله جميلات ..
عصام : خاصة دكتورة سناء دي في السنة النهائية وطوالي تسألني منك اصلا ما كانت شغالة بي انا ..
عاطف يبدو انه الموضوع جاز له وسكت عليك الله تتكلم جد يا عصام ؟؟
عصام : يمين جد .. شوف لو تلاحظ هي كانت عاوزة تركب بقدام معاك بعدين خجلت وخلت امها هي تركب معاك بعد ما مسكت الباب ..
بعد ذلك في المقهى دارت ونسات كثيرة عن مواضيع كثيرة وعادة هي مواضيع المغتربين المعهودة .. نوع حديث الاراضي الوادي الاخضر نبته واشتريت في الحلفايا وبعت في الشجرة ..
يرن تلفون عصام من سلمى بعد ساعتين تقريبا ..
سلمى : خلاص تعالوا الحفلة انتهت ..
وتحركت سيارة عاطف من جديد تحمل الصديقين ..
عاطف كان صامتا يبدو ان حكاية سناء دارت في رأسه اصبح يقلب فيها ويعيد شريط الذكريات ويربط بين الاحداث والمواقف ..
الى ان وصلوا بيت العروسة .
| |
|
|
|
|
|
|
|
|
|
Re: أنت غلطان (Re: محمد بابكر محمد)
|
في بيت عم ابو زيد يبدا النسوة يخرجن نحو السيارات ..
وبما انه كل اناس اتجهوا ناحية السيارة التي احضرتهم .... سعاد وبناتها اتجهن ناحية سيارة عاطف ..
وابتدرته حاجة سعاد بطلب : فيها شئ يا عاطف ولدي تودينا بيتنا طوالي ؟؟ نحن ما ماشين بيت سلمى ماشين نلحق عمك علي داك نعشيه ..
عاطف بكل اريحية مع قليل من الاندلاق ( الكبكبة) جدا جدا يا خالتي اتفضلوا العربية عربيتكم ..والولد ولدكم ..
انتشرت اربعة ابتسامات اضاءت المكان شجع سناء هذه المرة ان تتجرأ وتفتح الباب القدام تركب تاركة امها لتركب مع اخواتها في المفعد الخلفي ..
تبسم عاطف مرحبا ومرتجفا من سناء وهي يسبقها عطرها الفواح قبل ما تجلس معه ..
عاطف : كيفك يا دكتورة وحمد لله على السلامة ؟؟
سناء : اهلا يا هندسة وانت كيف عامل ؟؟
عاطف : الحمد لله اهو في الحياة المملة دي بس سكن عمل تلفزيون ..
سناء : تفرج قريب بس انت اتحرك شوية واتلحلح الحياة ما بتتغير براها ..
الام واخواتها من الخلف ينظرن الى بعض ويبتسمن نتيجة لهذا الحوار الايحائي الخفي والمكشوف في ذات الوقت ..
يرن جرس الام مكالمة من السودان .
الام سعاد : الحمد لله دي أخلاص ..عملت لي مس كول من السودان ..
سعاد : الو اهلا يا اخلاص سبقتيني كنت ناوية اصل البيت ةاتصل عيك طوالي ..
أخلاص : خير يا خالتي سعاد في شنو ..؟؟
سعاد: عايزاك تروحي لشيخ مختار قولي ليه حاجة سعاد قالت ليك يانصاب رجع القروش الحولتها ليك .
أخلاص : ليه في شنو يا خالتي الموضوع ما ظبط ..؟؟
سعاد : ظبط شنو نحن هسع جايين من سد المال يسد حنكو ..
في هذه اللحظة كانت سناء تلتفت لاماه بهلع وبناتها يقرصون فيها محاوليين تغيير الموضوع لكن حاجة سعاد في حالة الغضب لاتعي لمن حولها ..
عاطف اختلطت عليه الامور .. لحسن الحظ او لسوءه فأن عصام لم يحكي لهم عن حكاية مرض عروسته وعلاجها بواسطة شيخ راقي .. والا كان فهم المغزى من هذه المكالمة .. ورغما عن ذلك ارتبك وهو يحاول ان يجمع
جاهدا بين النقاط .. علاقة الشيخ بسد المال وعرص عصام .. باموال حولتها لبنت اختها في السودان ودفعتها للشيخ وطالبت بارجاعها ..
سناء بذكاء حولت ان تطمر اثر محادثة امها المريبة في ذهن عاطف فابتكرت حجة : عاطف بكرة عازمنك معانا حفلة شاي ..؟؟
عاطف : المناسبة شنو ؟؟
سناء : مناسبتين الاولى عيد ميلادي والثانية تخرجي من الجامعة ..
عاطف : ما شاء الله المناسبتين عظيمات طيب رايك شنو ما تجي نقسمهم لمناسبتين ..
سناء طبعا هي سعيدة بنجاحها في لهو عاطف عن مكالمة امها الخطيرة : كيف يعني ؟؟
عاطف : نخلي حفلة عبيد الميلاد لحالها وحفلة التخريج لحالها نحن ناقصنا فرح كثير ليه تكمليه في يوم واحد ..
يفرح الجميع لهذه الروح من عاطف وتتبسم الام متناسية غضبها من الفكي قليلا ..
سناء : خلاص حفلة عيد الميلاد دي نخليها خاصة جدا .. انت بس تكون معزوم حتى عصام ولد خالي ما نعزمه معاك ..
عاطف : معقولة دي لكن هو حا يقبل .كيفف ؟؟؟؟.
سعاد بغيظ : يطق راسه بالحيطة يقبل ولا ما يقبل هو عنده معانا شنو ؟؟
سناء تتغاظ من حدة امها وهي تعلم في النهاية انه عصام صديق عاطف وهو سبب هذه العلاقة في الاساس وتحاول تهدي : لا لا كيف نحن عارفين عصام هو صاحبك لكن ما تنسى هو ود خالنا قبل ما يبقى صاحبك ومكانته
محفوظه عندنا هو اخونا الكبير والوحيد ... بس لكن نحن عاوزين نحتفل معاك انت بس في مانع ؟؟
عاطف شعر بأن الام وبناتها صرن ينسجن حوله شبكة العنكبوت ويضعونه في الشرك . على كل حال هي ما فارقة وهو سعيد بهذا الشرك .. البنت جميلة ودكتورة واخت صاحبه ..
بس الله يكفينا شر الام .. قالها وهو يوقف سيارته امام بيت سناء واهلها ..
ويودعهم با بتسامة عريضة عرض فيها ضرس العقل للهواء لاول مرة يمكن في حياته ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وفي بيت سلمى وصل عصام وعماد وعلاء الدين
نزل الضيوف والجيران وزميلات سلمى
حضر ازواج الطبيبات واخذوهن .
فضى البيت الا من اهله
بقى غصام وعلاء وسلمى يتناقشون في احداث اليوم
عرضت لهم سلمى شريط الفيديو اي السي دي ..
تعلق عصام بالفلم بعد ما شاهد صورة عروسته الرائغة ..
بل كلد لايغمض عينيه من اللابتوب
واصر على اخته ان يأخذ معه التسجيل حتى يحمله على جهاز اللابتوب الخاص به ..
ذهب عصام الى بيته ..
ووجد اصدقائه سبقوه ..
حكوا للحظات عن هذا اليوم و سخروا في البداية عن عاطف وضحكوا ..
لكن عاطف يبدو انه غرق فعلا لانه لم يجاريهم في الضحك با استأذن ودخل في غرفته بحجة الصداع وحاجته الى النوم يفكر في حفل عيد الميلاد غدا .. يتنازعه ضميره بين اخبار عصام او تركه .. وهل لو يتركه الا يعد هذا
خيانة لصديفه ..
عصام دخل غرفته متشوقا لشريط الفيديو ..
غير ملابسه
رقد في سريره ووضع اللابتوب على صدره وشغل شريط الخطوبة .
قال في نفسه ان الجميل في الشريط كان كله عن نسمه وحولها .
صورتها اختها من جميع الزوايا قربت صورتها وابعدتها ..
كل التأملات والتدقيق في شكلها التي كان يمنعه منا الخجل الآن اصبحت ممكن ومباحة .
بل اصبح يوقف اللقطات يقربها ويبعدها ويكبرها ويتبسم في نسمة ..
اتصل عصام بنسمة وهو يقول لها : كيفك يا اهلى عروسة في الدنيا .
نسمة : منو القال ليك ..
عصام : تعرفي انا الان خاتي اللابتوب في صدري وبشاهد في شريط الفيديو بتاع احلى عروسة .
نسمة مازحة :خلاص تاني كفاك شريط الفيديو ما تجينا ناطي كل يومين خلينا نعرف نذاكر ..
عصام: هو شريط الفيديو يا داب هيجني وشايف الاجازة بعيدة عايز اعمل العرس الاسبوع الجايي ..
نسمة : يا سلام ؟؟ يا راجل اتصبر كلها شهرين .
عصام قصدك قرنين .
نسمة : صحي اتعرفنا على عمتك وبناتها حلاتن بس ما لحقنا اتونسنا معاهن ممكن تجي تآخذنا ليهم زيارة ؟؟
عصام بصوت منخفض : انشاء الله خير ياخ
نسمة : قلت شنو ؟؟
عصام : قلت خير بس انتي ركزي على قرايتك وخليها في وقت مناسب ..
| |
|
|
|
|
|
|
|
|
|
Re: أنت غلطان (Re: درديري كباشي)
|
: تثلاتة يوم ما تتصل بي بي وتسيبني عيانة
-------------------------------------------------------
ثلاثة(يوم) يا (حفتى ) عشان يعرفوك من كسلا كيف ...
بس صراحة منتهى الروعة يالله كمل ومتابعين معال .
| |
|
|
|
|
|
|
|
|
|
Re: أنت غلطان (Re: نور الدين عثمان)
|
Quote: : .ثلاثة(يوم) يا (حفتى ) عشان يعرفوك من كسلا كيف ...
بس صراحة منتهى الروعة يالله كمل ومتابعين معال |
لازم تفدحنا يعني ... يا ولد كسلا
| |
|
|
|
|
|
|
|
|
|
Re: أنت غلطان (Re: درديري كباشي)
|
عد اليوم واخير ا استطاع عصام النوم بعد ان أطفأ اللابتوب ..
في اليوم التالي ومن العصر دخل عاطف في دوامة صراع نفسي فهو معزوم حفلة شاي عند عمة عصام وفي ذات الوقت عصام نفسه صاحب الجلد والرأس غير معزوم .. يا له من موقف سخيف وجد نفسه فيه .. واقترب من
غرفة عصام يقرر ان يترك الباب لكنه يفقد المنطق والتعبير .. ينسحب يرجع لغرفته يفكر في صيغة مناسبة و يرجع من جديد ..
وأخيرا وهو قرب غرفة عصام .. يفتح عصام الباب .. عاطف مالك هنا كنت جاييني ..؟
عاطف : ايوا يا عصام والله دايرك في موضوع مهم ياخ ..
عصام : مستعجل ولا تنتظرني اروح استحمى وارجع ؟؟
عاطف : لا اقل من دقيقة ..
عصام : طيب اتفضل ؟؟ انشاء الله تكون عاوز تتقدم لي عشان تخطب سناء ؟؟
عاطف يسعد بهذه المقاطعة لانها قربت له الموضوع ويقول : يعني زي كده ..
عصام : زي كدا كيف اصله ما في شئ يشبه الخطوبة ..
عاطف : في الحقيقة الجماعة الليلة عاملين حفلة شاي بمناسبة عيد ميلاد سناء .. وعازمني انا بس ..
عصام : مقصود شنو بأنا بس دي ؟؟
عاطف : هم قالوا الحفلة خاصة جدا وفي اطار ضيق ..
عصام : يعني المكان الضيق دا ما فيه مساحة لينا نحن مثلا..
عاطف : عصام عليك الله ما تعقد الموضوع وتندمني انه انا وافقت ..
عصام : لا لا لا يا اخوي بالعكس انا مقدر جدا بس احب اناكفك ..
عصام ما صدق انه وجد واحد من اصحابه يصبح مانعة صواعق له ويكف عمته وبناته منه ومن عروسته..
عاطف سعد بمموافقة عصام .. لبس وتعطر وقرر ان يخرج مبكرا حتى يذهب ويشتري هدية مناسبة تليق بالمناسبة ولا ترهق جيبه .
ذهب الى أحد محلات بيع الهدايا وشاهد اشياء كثيرة اول مرة ينتبه لوجودها وحتى الآن لايعرف ما اهميتها او حتى مهمتها في حياتنا اليومية .. دببه وقلوب حمراء وشمع باشكال والوان ..
سأل البائع عن هدية مناسبة لعيد ميلاد محبوبته .. قالها هكذا بتلعثم ..وهو خجل من تلك الكلمىة اول مرة تخرج خارج اطار حواسه الخمسة ..
قدم له البائع دبا أحمرا له قلب في صدره .. استغرب عاطف وسأل في نفسه ما هي علاقة الدب بالحب ؟؟. المهم اخيرا أخذ الهدية دون اقتناع .. لكن طالما انه البائع المختص هو من اختار تلك الهدية فأكيد توجد علاقة قوية بين
الدب والحب ربما في نظر الجنس اللطيف ..
غلف له البائع الهدية بطريقة جميلة بكيس ملون وشفاف .. واشترى معها علبة شيكولاطة .. لباقي الاسرة .. وتحرك ناحية بيت المناسبة ..
| |
|
|
|
|
|
|
|
|
|
Re: أنت غلطان (Re: الطاهر عثمان)
|
يا درديري ياخ ما معقول تفتح لينا بوهية جديدة وانت ما حتيت الاتو بتاع عصام كلو
سناء البائسة بت البائسة قاعدة ما طايرة سيبك منها اسي و اعقد لينا للناس ديل, روحنا مرقت ياخ
| |
|
|
|
|
|
|
|
|
|
Re: أنت غلطان (Re: محمد البشرى الخضر)
|
Quote: ا درديري ياخ ما معقول تفتح لينا بوهية جديدة وانت ما حتيت الاتو بتاع عصام كلو
سناء البائسة بت البائسة قاعدة ما طايرة سيبك منها اسي و اعقد لينا للناس ديل, روحنا مرقت ياخ |
ما انت ما آآآآآآرف الخطة يا ود البشرى ياخ ..
عمت محمد بابكر حاجة سعاد دي اكان ما فكيت ليها واحد يشغلها مع بناتها ديل المرة الجاية راح تمرقها في ابو حراز ....
منور يا ود البشرى يا جميل
| |
|
|
|
|
|
|
|
|
|
Re: أنت غلطان (Re: درديري كباشي)
|
وصل عاطف بيت آل سعاد ان جازت التسمية ..
في الاول استقبله عم علي ابو سناء في الصالون ..
وبعد قليل تسلل البنات ناحية الصالون للتسليم .. آخر القادمين الى الصالون كانت سناء .. بشكل متغير جزريا كأنها عملت عملية تجميل اكثر من مجرد مكياج .. وقف عاطف في الاول كأنه يريد ان يتعرف عليها من جديد ..
جلس الجميع في الصالون في البدأ وبعد قليل قالوا تعالوا الحفلة في الصالة .. اعتذر الاب وقال انه ماله في الحفلات ..وقال انه يريد ان يحضر الاخبار في التلفزيون ..
ذهب عاطف بصحبة البنيات ناحية الصالة وكان الانبهار هنالك سلم هديته التي نالت الاعجاب والانبهار .. اضاءه خافتة حمراء وبالونات ملونة واشرطة لامعة مثل الاشياء التي يشاهدها في المسلسلات المصرية .. وموسيقى رومانسية تنطلق من جهاز التسجيل .. وكيكة مدورة مرصوصة عليها شمعات وكل الشمعات في شكل حرفين فقط .. كلها ألف وسين بالانجليزي ..( انا اخو الرجال المسألة بدأت اوضح من شمس الظهيرة .. امانا ما وقع راجل .. قالها عاطف في نفسه .... الله معاك يا الهام يا بت خالتي بعد كدا )
سناء : تعال يا توفي بيجاي عشان نتصور مع بعض ..
تلفت عاطف وتساءل بهبل : مين توفي دا ؟؟
سامية الاخت الصغرى : حايكون منو يعني ما أنت ..
اخيرا وجد عاطف انه لا مفر امامه سوى ان يستسلم لهذا الدلال والذي جعل جلده كأنه افرغ به جوال من النمل ..
رقص وغنى تلك الاغنية الرعناء ( سنة حلوة يا سناء ... هابي بيرث دي تو يو) بالله هم قعد يقولوا كدا .. انا طول عمري كنت فاكرهم بيقولوا حبيب الزيتون .. ماكنت عارف من هو حبيب الزيتون هذا ولا كان يهمني ان اعرف .. همس عاطف في نفسه وكثيرا ما فعل في هذا اليوم العجيب ..
هو حتى لم يعد يعرف يكيف مشاعره .. هل هو سعيد لايدري ؟؟ وشعر جسمه كله واقف . كحال القطة عندما تشاهد ######ا جاريا ,, هل هذه هي السعادة بعينها .. هل معنى ذلك انه لا يعرف معنى السعادة .. ام هو الشعور بالعيب والخجل ,,, طلب منه البنات ان يرقص مع سناء الاسلولي ويمسكها من خصرها .. اعترض هو صحى من غفوته رمى المنديل .. وقال الا كدا ..
قالت سناء .. كدا ازعل منك يا توفي ؟؟
عاطف : يا سناء عليك الله ارحميني انا الحاجات دي كلها اول مرة اشوفها .. صاح انا مهندس وخريج جامعة الخرطوم .. لكن الحاجات دي ما درسناها ولا شفناها الا في السينما ... نحن اولاد بلد ساي .. وانا لو كنت عاقد عليك ما راح اقدر ارقص الرفصة الانتي طالباها مني دي ..
هذه الجملة جعلت الصمت يعم .. وربما صحت البنات من هذه الغفوة الغبية .. لانه فجأة اضئ النور الكبير ..
نظروا جميعا لعاطف وهو واقف مقطب الجبين ..
حاول البنات ان يمتصن غضبه دون اعتذار مباشر حتى لا يثبتون الخطأ عليهن .
جاءت الام من الداخل تحمل صينية الشاي وتطلب من البنات يصبنن الشاي ويوزعن الكيك ..
سناء هزتها جملة عاطف : انا لو كنت عاقد عليك ما راح اقدر ارقص الرقصة الانتي طالباها مني دي .. كلام عميق يعني الكثير .. يا ترى ما هو رأي عاطف فيها الان وهي في نظره طلبت منه شئ لن يفعله حتى لو تزوج بها ..احتارت كيف تفتح الموضوع ؟؟ كيف تثبت له انها غير ما فهم خالص .. وهي حتى الآن لاتدري ما هو الذي فهمه ..جلست في كرسي بعيد تفكر في كل هذا الكلام واضعة فكها في كفها الايمن ..
عاطف كم مرة لاحظ لجلستها لكن موجة الغضب لازالت تضرب دواخله وتمنعه من ان يقترب منها .. يرقص اسلولي مثل الخواجات ويمسكها من وسطها أفو .. دي تربية شنو دي .. استغفر الله الشيطان شاطر كما يقولون بل الشيطان عبقري لانه افلح في ان يحول هذه الملاحظة البسيطة الى كارثة .. جعلت كل هدفه الآن ان يتخارج من هذا المكان ..
حاجة سعاد : عاطف مالك ما تشرب الشاي ؟؟ سناء انتي مالك قاعدة بعيد ما تشوفي ضيوفك ..؟؟
سناء تقترب محاولة ان تكون عادية : عاطف ما تشرب الشاي ؟؟ ولا عندك راي في شاي عمتك دا ..
عاطف محاولا تخفيف دمه : ايوا عندي فيه راي .. هو احلى شاي في الدنيا ..
حاجة سعاد : كتر خيرك يا ولدي الله يجبر بخاطرك ..
سناء : بختك يا اخوي الله يدينا نسيبة تحبك زيك كدا ..
عاطف اكل هذه المباشرة المتبرجة وابتلعها .. الله يدينا نسيبة زيك ؟؟
الجماعة ديل ما يكون عقدوا لي في طفية النور دي وانا ما عارف ..
قالها هامسا وهو يخرج من هذه الدار التي جعلت ليله سكر بلا خمر سكارى ..
| |
|
|
|
|
|
|
|
|
|
Re: أنت غلطان (Re: درديري كباشي)
|
بعد ما خرج عاطف شعرت الام بأن الجو مكهرب البنات يودعنه بنظرة فزع منها..كماا الشخص العامل عملة وخايف تنكشف ..
حاجة سعاد :في شنو يا بنات ومالو عاطف مرق صاري وشو كدا عملتن ليه شنو ؟؟
سامية :يا أمي عاطف زعل عشان سناء قالت ليه ترقص معاي اسلولي ..
سعاد :واسلولي دا شنو كمان يا كافي البلا الزعلو كدا ..
يعني كدا أخذت سامية توصف لها الرقصة وهي تمسك بخصر اختها الاصغر سوسن ..
حاجة سعاد تضرب يدهل في صدرها وتطلق العبارة النسوية السودانية الشهيرة : سجمي ...وووب ووب علي .. دا شنو يا بت يسل رقبتك انشاء الله ..
واصلت حاجة سعاد قائلة : يا تربية السجم الولد نحاحي فيه لينا شهر لقاية ما دخلناه القفص وقلنا خلاص استوى نشوف غيره تجي تطفشيه .. تطفشي ما ترجعي انشاء الله ..
سوسن مدافعة عن موقفها : وفيها شنو الاسلولي يا ماما رقصة عادية ومنتشرة بكثرة هو بس متخلف شويثة ..
ح سعاد : يا بت ما تفقعي مرارتي .. انتو صدقتو روحكم ؟؟ انا بعت نصيبي في ورثة ابوي عشان اقريكم في الجامعات الخاصة الغالية مع اولاد الاغنية عشان اتفاخر بيكم .. مش تمشو تتعلموا لي الاسلولي وتقلدوا لي في حفلات الاغنيا البتشوفوها هناك مع زملاكم .. ديلك ما ناس عرس ديك ناس سلولي وزواج عرفي وقلة ادب فارغة يخليك حامل ويفكك عكس الهوا يشوف واحدة غيرك يلعب معاها .. لكن ناس عاطف ديل هم اولاد الناس البيفتحوا البيوت ويتحملوا المسؤولية ويربوا عيالهم ما يشردوا يخلوهم .. دا البتقولي عليه متخلف دا يوزنك دهب .. ابقي فالحة وجيبي ليك عريس تاني من بتاعين الاسلولي ديلك ..
في هذه اللحظة يدخل عم علي ابو سناء بمسكنته المعهودة : في شنو يا جماعة امكم دي هايجة مالها ..؟؟
هي مواصلة في كلامها : اها ابوكم القدامكم دا العرضة بتاعة الرجال ديك ما بيعرف يرقصها ماتراه ماسك بيته وولدكم اكان ما انا ثبته كان ملا البيت دا شفع غيركم ..
ينسحب عم ابو علي خجلا بعد ما تلقى درابه في رأسه ..قائلا :..... هي هي هي....... والله أمكم دي ..
تدخل سناء في نوبة بكاء بعد ما تلقت هذا الدش على دماغها .. محاضرة قيمة قالتها الام في وقت متأخر جدا ..معنى الكلام دا يا بنات رامي ما زول عرس وتامر ما زول عرس وحسام مازول عرس وكلهم يرقصوا الاسلولي والفالص احسن من جون ترافلوتا .. كل واحدة من البنات لها مواضيع مشابه على ما يبدو لانه كل واحدة انزوت في ركن تفكر ..
لولا نهرتهن الام : تعالن لمن العدة دي اتشريتن كدا كان نلقى طريقة تانية نحل بيها المصيبة العملتوها دي ..
سناء تهمس لاخواتها : انا شفت الولد شايل دب احمر قلت خلاص دا مودرن جدا ومتفهم للحياة العصرية ..
سامية : تلاقيه سأل بتاع الهدايا قال ليه اشيل شنو ؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: ينسحب عم ابو علي خجلا بعد ما تلقى درابه في رأسه ..قائلا :..... هي هي هي....... والله أمكم دي |
خلي بالك يا درديري البائس عمّك ابو علي دا :)
| |
|
|
|
|
|
|
|
|
|
Re: أنت غلطان (Re: محمد البشرى الخضر)
|
Quote: e: ينسحب عم ابو علي خجلا بعد ما تلقى درابه في رأسه ..قائلا :..... هي هي هي....... والله أمكم دي
خلي بالك يا درديري البائس عمّك ابو علي دا :) |
في شنو يا عمك .. ما تقول لي بتعرفو ؟؟؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: في شنو يا عمك .. ما تقول لي بتعرفو ؟؟؟؟ |
لا ياخ اعرف ليه شنو عمّك ############ دا:)
قصدت ليك طلع هو البائس مش مرتو
| |
|
|
|
|
|
|
|
|
|
Re: أنت غلطان (Re: محمد البشرى الخضر)
|
Quote: لا ياخ اعرف ليه شنو عمّك ############ دا:)
قصدت ليك طلع هو البائس مش مرتو |
لا يا ود البشرى ياخ انا متعاطف معاه عمنا دا مسكين ... ذكور كثيرة في حياتنا دورها في الحياة ينتهي عند التلقيح ( ارجع لبوست ازواج تعساء )
أزواج تعساء
كدا انا اكون اكملت تعليمي في حركات واسلوب المنبر .. ولا ما كدا ..؟؟
| |
|
|
|
|
|
|
|
|
|
Re: أنت غلطان (Re: درديري كباشي)
|
في بيت العزاب فتح عاطف البيت وسلم على الحضور امام التلفزيون باختصار . وتوجه ناحية غرفته مباشرة ..
شعر عصام ان في الامر أن فلحقه على الغرفة قائلا محاولا الهزار : هابي بيرث داي تو يوم .. اها كيف عيد الميلاد ياعريس..
عاطف : ياخ انسى دي مكنة ما عندنا ليها جاز ..
عصام : دا كلام شنو يا شيخ ..
عاطف : يعني الموضوع ما ماشي لقدام ؟؟
عصام شعر بأن العريس اللقطة يريد ان يهرب ويتركه في مواجهة حرب جديدة مع عمته الشريرة : يا خي كدي روق المنقة واشرح لي في شنو ؟
عاطف محاولا ان يغلف الموضع : ياخ الناس ديل ما مستواي نحن ناس بسطاء وقرويين ساي ..
عصام : ياخ ما تحكي لي الفلم بعدين انا اعرف حكمك دا اتبنى على شنو .. شنو مستواي وما مستواي ؟.. دي عمتي انا ومستواها زي مستوانا .. صحيح انه البنات بيدرسن في جامعات خاصة وغالية لكن هم صرفوا ورثة امهم في التعليم هذا كل الحكاية ..لكن احكي لي ..
عاطف : طيب انا احكي لك .. وبدأ يحكي لعصام من حكاية الدب والحب حتى رقصة الاسلولي ..
في الاول لم يستطع عصام ان يمنع نفسه من الضحك ضحك بشدة حتى مسك بطنه .. ضحك عصام خفف حدة الغضب على عاطف وبعد قليل بدأ يجاريه في الضحك..وعصام عاد ليشرح .
عصام : شوف هنا يا عاطف اختيارك وزواجك ومشاعرك هو موضوع يخصك انت وحدك انا ما لي دخل فيه ولا استطيع ان اوجههك او اغصبك .. لكن من واجبي ان اصلح الصورة الشوهاء الخلفتها الرقصة في ذهنك عن بنات عمتي لانهن في النهاية هن اخواتي ما برضى حد يخت صورة شينة عنهن ..
اولا هن البنات صحيح درسن في جامعة خاصة مختلطة .. لكن كانن ساكنات مع عمنا في الخرطوم وعمنا رجل مرتاح خصص لهن سيارة وسواق مع بناته واولاده .. ممنوع اي واحدة فيهن تركب مواصلات عامة او مع اي شخص غريب زميل او استاذ .. واقولك شئ تاني ما بعيد انه رقص الاسلولي وعيد الميلاد والبارتي والحاجات الشفتها دي يكون سمعوا بها سمع عند زميلاتهن في الجامعة لانه عمي يستحيل يترك واحدة تروح لحفلة خاصة الا برفقة واحد من ابناء عمي وبعد الحاح شديد وشروط صعبة وموعد معين ولبس محدد ..
لو عاوز تتأكد من كلامي دا شيل التلفون واتصل بسناء وحلفها قول لها في حياتك هل رقصتي اسلولي مع اي شاب .. وانا واثق من انها ما حا تكون رقصت ..وزي ما قلت ليك يمكن هي تكون مرقت من نفسك .. انا ما بتدخل في شعورك .. لكن لازم تصحح الصورة الانت ختيتها في رأسك عنهن ..
عاطف : في الاول اخذ نفس طويل وقال لعصام شكرا كتر خيرك والله ريحتني جدا ..كدا اقدا انوم وتصبح على خير ..
| |
|
|
|
|
|
|
|
|
|
Re: أنت غلطان (Re: درديري كباشي)
|
في العصر التقى الاصدقاء في السكن بعد ان تناولوا وجبة الغداء
في ونسة عامة عن الكرة ومباراياتوالدوري الاروبي
يرن تلفون عصام يجدها اخته سلمى ..
وتقول له مش خلاص افضل تبدأ اجراءات الزيارة لامي
عصام: حاضر بكرة الصباح ..
| |
|
|
|
|
|
|
|
|
|
Re: أنت غلطان (Re: درديري كباشي)
|
وفي العصر ايضا يتصل عاطف بسناء ويتحدث معها واخواتها ويعتذر عن غضبه غير المبرر والناتج من سوء الفهم ..
وتقول له الام وهي تسلم عليه حصل خير ياولدي .. والغلط ما منك انت بس مننا كلنا .. نحنمالنا ومال اعياد الميلاد وحاجات الناس ما يشبهوا عاداتنا وتقاليدنا ..
وعاطف يقول انشاء الله يا خالتي سعاد ربنا يجعل لي قسمة معاكم ( على المكشوف كدا ) لانه انتي نعم الام و نعم البنات المتربيات .. ونعم الاب ( هو ما حاضر درابة العرضة)
ويقفل الخط تاركا نوع من السرور والرضا على اسرة سعاد ..
والاسرة مجنعة حول مائدة الغداء ..
تفتح سناء موضوعا خطيرا يبدو انه كان مؤرقها فترة طويلة ..
سناء : يا امي عايز اقول ليك كلام مهم وخايفك تزعلي مني .
سعاد : قولي يا بتي وما عندك شغله بزعلي .. بس انت ما تغلطي كمان ..
سناء : يا أمي نحن لازم نغير طريقتنا مع الناس ..
سعاد : طريقة شنو يا بتي ..
سناء : يا امي نحن قعد نعادي الناس ونكرههم بلا سبب
سعاد : يابت هاي كلام شنو بتقولي فيه دا عادينا منو وكرهناه ..
سناء : اول مثال سلمى بت خالي دي دكتورة ناجحة ومحترمة وجميلة واي زول يعرفها يحبها ويحترمها .. لكن انتي اول شئ مسمياها ام عيون مقلعات المعصعصة ..
سعاد : لكن هي ما بت امها ديك ام جضوم ما شفتي انا بكرها من يوم ما عرست حسن اخوي الله يرحمه اتسببت في موته بالقلب الله يقلعها ..
سناء : اها شفتي انا حتى ما جبت سيرة خالتي علوية انتي مريتي عليها واديتيها نصيبها من الشتيمة اليومية .. مع ان هي مرة مثالية ضحت بحياتها عشان تربي اولادها وتطلعهم احسن ناس في الدنيا خالي اتوفى خلى ليها ولد وبنت وهي ما حصلت التلاتين .. رفضت تتزوج واتفرغت لتربية اولادها ونجحت .. وهم اولاد اخوك مفروض تشكريها كل صباح ومساء مش تشتميها تكرهي بتها وعايزة نآخدي منها ولدها ..
عم علي : صدقتي يا بتي
سعاد : هوي ها انت انطم ( صدقتي يا بتي ) حاكته ..
غضب عم علي وانسحب من الجلسة ناحية الصالون ..
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: نسمة لازالت مواصلة في تلقين امها في هذا الدرس العصيب .. |
نسمة مين يا عم الحاج
نسيت الأتو كان شنو هههههههههههههه
| Quote: كدا انا اكون اكملت تعليمي في حركات واسلوب المنبر .. ولا ما كدا ..؟؟ |
تمام 
لقيتك متابع :)
| |
|
|
|
|
|
|
|
|
|
Re: أنت غلطان (Re: محمد البشرى الخضر)
|
Quote: Quote: نسمة لازالت مواصلة في تلقين امها في هذا الدرس العصيب ..
نسمة مين يا عم الحاج
نسيت الأتو كان شنو هههههههههههههه
Quote: كدا انا اكون اكملت تعليمي في حركات واسلوب المنبر .. ولا ما كدا ..؟؟
تمام
لقيتك متابع :) |
والله لكن انتو خطرين جد ..
كنت داير اشوفكم مركزين معاي ولا سرحانين ..
حركات مدرسين زمان ...
| |
|
|
|
|
|
|
|
|
|
Re: أنت غلطان (Re: درديري كباشي)
|
معليش يا درديري على المقاطعة
لكن حبيت اسجل اعجابي بالمشهد الأخير, مؤثر جدا - صدّق لا من دمّعت :)
و انزع صفة البؤس عن عمّك علي و حرمه
| |
|
|
|
|
|
|
|
|
|
Re: أنت غلطان (Re: محمد البشرى الخضر)
|
Quote: معليش يا درديري على المقاطعة
لكن حبيت اسجل اعجابي بالمشهد الأخير, مؤثر جدا - صدّق لا من دمّعت :)
و انزع صفة البؤس عن عمّك علي و حرمه |
تمام يا ود البشرى ومقارنة بملحمة حميد عليه الرحمة .عم عبد الرحيم ..تحس ان الفقر والغنا ليس لهما علاقة بالبؤس والسعادة .ز
عم عبد الرحيم ورزجته كانوا سعداء رغم فقرهم وعم وعلي واسرته تعساء رغم غناهم .
| |
|
|
|
|
|
|
|
|
|
Re: أنت غلطان (Re: درديري كباشي)
|
قالت سناء خلاص الجمعة بعد الجاية حا نعمل الكرامة بالاستراحة ..
قال عم علي اول زول كلمي ولدنا عصام عشان نرتب انا هو مع بعض نمشي نحجز الاستراحة ونتفق مع المطبخ قبل ما نعزم الناس .
قررت حاجة سعاد ان تتفوه بكلمة هذه من الاشياء التي تعترض عليها في العادة .. ( عصام الدخلوا شنو في حياتنا كمان ) لكن هذه الجملة ماتت في طرف لسانها وخرجت بدلا عنها تنهيدة وزفرات حرى هي تقريبا آخر ما علق في صدرها من شر ..
سناء قالت فكرة حلوة .. انا بضرب ليه واديك انت تكلمه يا ابوي ..
عم علي قال : حاضر يا بتي ..
ظلت حاجة سعاد تراقب في تلك التحركات وداخلها المتمرد يغلي .. وكل ماهمت بالتدخل شعشع خدها بالم كف فذكرها بكبوتها .. لم يعد كل شئ كما كان .. الزمي الصمت يا سعاد تدخلتي ما فيه الكفاية .ىل الاوان لتكوني أم مسكينة مثل جارتك نفيسه .. تقول على زوجها ابونا الحاج .. وتظل طيلة اليوم تتحدث عنها .. عندما وصلت لهذا الهاجس انتفضت كانما مسها شيطان وهي تتعوذ .. لفتت نظر بنتها سناء ,..
سناء : امي امي خير في شنو ؟؟
سعاد لا يا بنتي خير ما في حاجة ..
اتصلت سعاد بعصام وقالت له : ابوي عاوز يتكلم معاك .
ردد غصام عبارتها باندهاش : ابوك عايز يتكلم معاي ؟؟؟؟؟؟؟
واعطت التلفون لابيها .
عصام : الو اهلا يا عم علي ..
عم علي : يا عصام يابني نحن عاوزين نعمل كرامة لبنتنا سناء بمناسبة تخريجها الجمعة البعد الجاية ..
عصام خير ما شاء الله مبروك مقدما ..
عم علي : عاوزك يا بني تمر لي عشان نمشي نحجز الاستراحة ونتفق مع بتاع مطعم ..
عصام نوع الاكل كبسة سعودية ولا اكل سوداني ؟؟
عم علي : لا عاوزين مطعم سوداني طبعا ..
عصام : وعمتي رايها شنو ؟؟
عم علي بنهره ادهشت عصام : مالك ومال عمتك انا بقول ليك نشوف مطعم سوداني كفاية ولا ما كفاية ..؟
عصام بفزع واندهاش : لا لالا لا كفاية جدا يا عم علي .. خلاص انا بكرة العصر بمرك .. ممكن ترجعني لسناء ..
سناء : نعم يا عصام ..
عصام : سناء هو الحاصل شنو ؟
سناء : كرامة ابوي ما قال ليك كرامة ..؟
| |
|
|
|
|
|
|
|
|
 Re: أنت غلطان (Re: درديري كباشي)
|
Quote:
كملت سناء درسها لامها رغما عن العبرة التي كادت خنقها وهي تشاهد خزلان وخزي واذلال والدها ..
سناء : حتى ابوي دا يا امي انتي ما بتحترميه شوف نهرتيه كيف قدامنا لا احترمتيه ولا راعيتي لمشاعرنا نحن هو في النهاية ابونا ..
سعاد : يا بتي دا كلام شنو دا كيف ما بحترم ابوكم دا ..؟
سناء : هسع يا امي زي النهره النهرتيها ليه دي لو سمعتيها من مرة تانية بترضيها ..ليه ؟
سعاد :ارضاها كيف عاد يمين اقدد لها عيونها ديل ..
سناء : طيب الفرق شنو بين تنهريه انت او تنهره غيرك في النهاية هو المضطهد والمذلول ..
سعاد تصمد وتضع يدها في رأسها وهي مخفضة الرأس اشعلت سناء الحقيقة في راسها واحرقتها مثل ما يحرق الهنود موتاهم ولم تكتفي بل واصلت .
ويا امي خليتينا زي الايتام ونحن ابونا حي .. ما يتدخل في حياتنا انتي واحد تختاري لبسنا وكلياتنا وزياراتنا وعلاقاتنا وهو يتفرج فقط لو ادلى برأيه مصيره نهره ما عنده حل غير ينسحب ويجلس في الصالون زي الضيف .. المصيبة الاكبر انتي عايزانا نكون زيك نجيب رجال ونلبسهم السرج ونسوقهم زي الحمير .. انا ما عايزة كدا انا عايزة راجل حمش ينهرني ويخوفني .. انا امس كنت عاوزة العب بعاطف لكن لامن نهرني ورفض يرقص معاي حبيته من جوة قلبي لاني حسيت انه هو دا الراجل الانا بحلم بيه .. تخيلوا بنت تقول انا ما عايزة راجل يشبه ابوي مع انه كل الناس متفقين انه كل فتاة بأبيها معجبة ..
في هذه اللحظة كانت سعاد قد انخرطت في البكاء دون توقف اما سناء فلم ترحمها بل حست انها بدأت تغسل أمها من الشر الذي تراكم عليها عبر السنين .. والام لازالت تبكي وتنتحب بينما سناء لازالت تصب عليها الدش الحار .
سناء : يا امي نحن لقينا نسمع الناس يتكلموا في ابونا وما نقدر نعترض نعترض نقول شنو ؟؟ هسع اقول ليك حاجة يا امي لو اي واحد عاوز يتقدم لينا ما راح يمشي لابونا حا يجيك انت وانا يا امي من هسع اقولها ليك وحتى لو اقعد بدون عرس اي زول يطلبني منك انتي ما راح اتزوجوا الا يمشي يطلبني من ابوي وابوي يوافق عليه ..
لازالت سعاد دافنة رأسها بين رجليها تبكي وتنتحب .
|
يا ريت الأشرار في الدنيا بيتعظوا من محاضرات أو من دروس :)
| |
|
|
|
|
|
|
|
|
|
Re: أنت غلطان (Re: درديري كباشي)
|
بعد قليل تهدا الامور وتتحول حاجة سعاد ناحية المطبخ وقبل ما تدخل تاتيها أوامر من عم علي : سوي الشاي يا سعاد ..
وقفت في الاول كانها غيرت رأيها اول مرة تدخل المطبخ لتعمل شئ بأوامر زوجها .. كانت الجملة تتردد في رأسها مثل ما يتردد الصدى في الجبال ( سوي الشاي يا سعاد) صوت بنبرة الاوامر وليس بنبرة الرجاء .. زمان علي اذا اشتاق لكباية شاي من يدها يقولها باسلوب تحايل ورجاء كأنه يتسول ( ممكن يا ام سناء نلاقي منك كباية شاي كدا ؟) قليلا ما كانت تستجيب ولكن كثيرا ما كان ردها من نوع ( عميان من المطبخ ولا ما بتعرف تسوي شاي ) لذلك كانت عبارة سوي الشاي يا سعاد كبيرة وغريبة جدا عليها .. تريد ان تتمرد لكن تحس ان شجاعتها خزلتها هذه المرة وصوت علي فيه نبره تهديده تخوف وتحس ان الامر له ما بعده .. بل حست انه مهيأ لرفضها اكثر من استجابتها .. وربما برد فعل عنيف وهاهو الآن يرفع يده عليها بعد زواج تجاوز الخمسة والعشرين عاما ..ويلطمها على وجهها وكان عنده استعداد يفعل المزيد ..كان الكف يجسد حصادا لمرارات متراكمة عبر السنين ..
وهي تدخل على المطبخ يرن تلفون ترفع لتجده بنت اختها اخلاص من السودان ..... ترجع وتتصل هي .
كان بناتها خلفها يردن ان يساعدنها في المطبخ .. لكن يسمعنها تتحدث مع بنت اختها .. هن يعرفن ان بنت اختها مندوبتها الدائمة بالسودان ووكيلة اعمالها الشريرة مع الفقراء والشيوخ والدجالين كن يتحاشينها عندما كن في السودان .. بنت عانس بايرة قاربت الاربعين من عمرها لم يتقدمم ناحيتها عريس .. بحثت عن العرسان في بيوت الدجالين .. عرفت سعاد هذه الهواية فيها فأستقلتها لتبادل المصالح .. هي تبحث عن الدجالين وتمول سعاد العمليات .. اي الاعمال الشريرة ..اتصال سعاد جعل الاخوات يراقبن رد فعل امهن .
تتصل سعاد : ايوا يا اخلاص في شنو ( لهجة خشنة بدون سلام كرد فعل لما حدث اليوم ..)
اخلاص : رحت لشيخ مختار يا خالتي وقلت ليه خالتي قالت ليك رجع القروش ..
سعاد : اها قال ليك شنو .؟
اخلاص : رجع لي القروش وقال لي قولي لخالتك كل اتفاقتنا ملغية واي حاجة عملتها ليك حا افكها ..
سعاد : آااا ي عملها فعلا النصاب الحرامي ..
أخلاص : عمل شنو ..؟
سعاد : ما في شي سلمي على امك واخوانك ..
تسمع الاخوات المكالمة وتتدخل سامية الوسطى : الكلام دا معناه شنو يا امي ؟؟ انت كنتي عاملة عمل لابوي ؟؟
سعاد مرتبكة : يا بت عمل شنو انتي كمان ؟؟
تدخل المطبخ متظاهرة بالانشغال .
سامية مخاطبة اخواتها .. بالله شوف اتاري الزمن دا كله امي كانت كاتبة ابوي ..
سناء بكل وعي : هوي يا بنات نحن ما عايزين نكبر الموضوع ونكبر الهوة بين ابوي وامي الحمد لله ابوي رجع لينا ونحن تاني ما راح نرضى بالوضع القديم حتى لو استعانت امي بسحرة فرعون كلهم ..
تقطع كلامهم نهره من الاب : الشاي طلع يا سعاد ..؟؟؟؟؟؟؟؟؟؟
سعاد : حاضر يا ابوي قرب شوية صبر بس ... بلهجة ناعمة انثوية . جعلت البنات بنظرن لبعض ويضحكن بسعادة صادقة وحقيقية ..
| |
|
|
|
|
|
|
|
|
|
Re: أنت غلطان (Re: درديري كباشي)
|
Quote: تحس بالضعف وانه هنالك احد من طرفها تريد ان تحتمي بها ..
تناديه عصام ولدي ؟؟ وترتمي في حضنه تبكي |
المهم
لو فى طريقة حت الأتو الفضّل
* عشان مايمشى الكلاكلة اللفة
| |
|
|
|
|
|
|
|
|
|
Re: أنت غلطان (Re: محمد بابكر محمد)
|
Quote: المهم
لو فى طريقة حت الأتو الفضّل
* عشان مايمشى الكلاكلة اللفة |
الكلاكلة فريبة شكلنا ماشينا لتوج
الربع الاول قرب يكفل القصة لسع باقيها كتير
انا كان اتزنقتا حااقفلها بعاشو في تبات ونبا ت وخلفو بنين وبنات
| |
|
|
|
|
|
|
|
|
|
Re: أنت غلطان (Re: درديري كباشي)
|
عندما كان عصام عند عمته في المطبخ وبطريق غير مباشر اتفقت سناء مع اخواتها بقول : نحن ما عندنا تفسير لاي زول شايف انه في شئ غريب في حياتنا .. خلو الناس تندهش وتنسى بطريقتهم ..
قال لها عم علي : الله يخليك يا بتي كلامك مظبوط ... لانه نحن الان نعيش في الوضع الطبيعي مثل باقي خلق الله ما في حد عنده حق يسألنا يقول ليه عايشين في الوضع الطبيعي ..
اول المندهشين طبعا كان عصام عاد من عمته ليسأل والجميع تصنع له الجهل حتى في فهم سؤاله .. لكنه في النهاية استسلم بالرغم من انه لم يستطيع ان يخفي استغرابه ..
عم علي مخاطبا عصام : تعال يا بني يا عصام ذكرني بالمعازيم .كدي اول اديني رقم دكتور علاء خليني اكلمه بنفسي ..
اخذ عم علي الرقم واتصل بالتلفون ..
د : علاء : الو ؟ منو معاي ..
عم علي : معاك عمك علي ..
د علاء : عم علي مين ..؟
د علاء : عمك علي عبد الرحمن ..
د علاء : ايوا عمي علي عبد الرحمن مين ..؟
عم :علي شعر بأنه لو ظل يرص في الاسماء حتى يوصلها ابونا آدم لن يتعرف عليه دكتور علاء هذا .. اخيرا استسلم مكرها وقال : ياخ عمك علي راجل سعاد عمة زوجتك سلمى ..
د علاء : اهلا اهلا اهلا يا عم علي والله انا آسف في الحقيقة ..
عم : لا لا خلاص ولا يهمك يا ابني اكيد ما جات مناسبة عشان تسمع فيه اسمي لوحده لاجيتك في عيادة ولا اتلاقينا في عقد .. اها اها اها ..
المهم يابني نحن عاملين كرامة لبتنا سناء في استراحة الحمعة بعد الجاية فممكن تعزم اصحابك الاطباء انت طبعا صاحب بيت ومن حقك ..
د علاء : متشكر جدا يا عم علي ودا من فضلك انشاء الله . بس وين الاستراحة .
.
عم علي : خلينا انا وعصام نروح نحجز الاستراحة بعدين نكلمكم محلها ..في الغالب في مخرج تمنتاشر ..
اخيرا يخرج عم علي مع عصام لحجز الاستراحة وفعلا وصلوا لمجمع استرحات مخرج تمنتاشر وحجزوا استراحة اسمها طيبة .. كبيرة ولها حوشين منفصلين للرجال والنساء .. ووصفها سهل ومعروفة للجميع .
| |
|
|
|
|
|
|
|
|
|
Re: أنت غلطان (Re: درديري كباشي)
|
عدت الاسبوعين وفي خلالها حصلت عدت تغيرات زرعت دهشة في ذهن كل من يحيط بعصام من اقارب ومعارف ..
واكثر شئ كان مدهشا ودار حوله لقطا كثيرا هو التغيير الجذري الذي طرأعلى سلوك وحياة العمة سعاد ..
اذ انها اتصلت على الناس بنفسها .. كلمت ام عمار النسيبة المرتقبة لعصام .. دعتها سألتها عن بناتها ..
اخبرتها أم عمار بأن اولادها الذين يدرسون بالسدوان اي عمار وليلى قد حضروا للاجازة وسيكونا حضورا بالاستراحة ..
اتصلت على سلمى اكثر من مرة تسألها عن اخبار امها .
خرجت الزيارة زكانت ام عصام .. الاستاذة علوية حضورا بالرياض ..
الخال عثمان المهندس بالدمام حضر الى الرياض بمصاحبة اسرته ليسلم على اخته وصادف حضوره للاستراحة ..
عاطف الصديق وبتفويض من عصام ومباركة العمة سعاد دعا شقيقه الاكبر وزوجته بعاتبار انهم كباره في الغربة .. محاولا التمهيد\ لتعريف الاسر ببعض .
العم ابو زيد كان من ضمن المدعويين بالطبع مع اسرته ..
كانت الاستراحة احتفاءا بتخريج سناء من كلية الطب بمثابة تجربة ( بروفة) لدعوة عرس عصام بنسمة ..
سلمى وامها لم يأخذن تغيير العمة سعاد على محمل الجد بل اعتبرنها تمار نوعا جديدا من الخداع ..
قالت حاجة علوية مخاطبة بنتها وهي تشاهد باندهاش كيف كانت كيف وقف عم علي في الباب الفاصل بين قسم النساء والرجال ونادى بنهره على سعاد .. وكيف جرت هي نعم يا ابو سناء ..
قالت علوية : بري سعاد دي ما براها اصلا لايمكن تكون دي سعاد .. سعاد دي اول نهره نهرتها لعلي دا كانت في حفلة العرس .. هم قاعدين في الكوشة قاليها سعاد قومي نرقص .. قالت له اقعد يا راجل بلا مسخرة معاك .
. كمان رقيص شنو العليك عامل صلعتك دي .. الناس ما متخيلين انه زواج سعاد حايدوم شهر .. لكن من اليوم داك سعاد مركبة لجام في راجلها وسايقاه قدامها زي الحمار . هسع الشايفاه دا لا يمكن تكون دي سعاد البنعرفها ..
سلمى : يا امي يمكن الله هداها ..
حاجة علوية : انشاء الله يا بتي يكون الله هداها ..
| |
|
|
|
|
|
|
|
|
|
Re: أنت غلطان (Re: درديري كباشي)
|
الاستراحات التي يتخذها المغتربون مكان للترفيه ومركز اجتماعي يلتقون به ..هي بسبب انها تكاد تشبه بيوتناالعادية فيالسودان حيث البيت من دور واحد والحيشان الواسعة ..
تتكون الاستراحة غالبا من حوشين رجالا ونساءا بهما غرف على الاطراف وميدان منجل في الوسط بكل حوش وغالبا مسبح مقفول في غرفة لا يعنينا بشئ في الغالب ..
في استراحة سناء كان توجد قاعتين بكل حوش مفروشات بفرش ارضي فقط فيما يعرف بالفرش العربي .. واحدة تجمع بهاالرجال والثانية للنساء ..
في استراحة الرجال تجمع المعازيم .. ابو زيد وضيفه .. عم علي وزميله .. الخال عثمان من الدمام .. عصام وزملاؤه الخمس بالعمل والسكن .. وكالعادة يجلس الناس بدءا في حلقات تجمع كل حلقة الناس ذوي العلاقات
والقواسم المشتركة .. ومن ضمن الحضور كان عمار اخو نسمة خطيبة عصام ..
قد كان عمار من النوع المشاغب المهزار الذي لايستحي من كبير وصغير ولا حرمة ولا ذكر.. وكان بكل جرأه وكل ما تقابل مع عصام يناديه باعلى صوته ( اووو ابو النسب ) وكان من النوع الذي يضخم السين فينطقها اقرب للصاد .. فكان يقولها ( ابو النصب) مما اثار ضحك زملائه عليه .. مما اصاب عصام بالغيظ والضيق ( دا شنو الاهبل دا .. قالها في نفسه اكثر من مرة) ..
تعرف الخال عثمان بابو زيد صديق شقيقه سليمان .. واستعادوا الذكريات والشقاوة .. منذ كانوا في القرية ..
| |
|
|
|
|
|
|
|
|
|
Re: أنت غلطان (Re: درديري كباشي)
|
بسم الله الرحمن الرحيم
الاخ / درديرى
غايتو الحمدلله جيت فى الصفحة التاسعة
بدل الشحتفة العاشوها معاك المتابعين
ومتابع
كسلا ارض كل ماهو جميع
يديك الف عافية فما احوجنا لمثل هذه الواحة
والليلة رفع البوست على
ارتيقا
| |
|
|
|
|
|
|
|
|
|
Re: أنت غلطان (Re: درديري كباشي)
|
بسم الله الرحمن الرحيم
اخونا / درديرى كباشى
| Quote: طلتك ولتنا قبلة نرضاها قبل المشرق |
ومنها تشرق الشمس
ابداعاً ... وروعة
ترفدنا بالروائع
والالق ..
ولازال رحمها ينضح خصوبةً
‘على مر الزمان
فوق
فوق
فوق
ارتيقا
| |
|
|
|
|
|
|
|
|
|
Re: أنت غلطان (Re: درديري كباشي)
|
المشهد في قسم النساء بالاستراحة لا يختلف كثيرا عن مجلس الرجال ..
قاعة كبيرة مفروشة بالفرش العربي اي بالسجاد والمساند والمخدات ..
يجلس النساء في حلقات حسب السن والاهتمام والصداقة واحيانا القرابة ..
عوامل مختلفة تشكل حلقات جلوس النساء ..
جلست سلمى وحولها زميلاتها الطبيبات
جلست سناء في حلقة مع اختيها انضمت اليهن ليلى الاخت الكبرى لخطيبة عصام طالبة الطب ... ليلى كانت اكثر شبها بنسمة .. اي انها جميلة ممتلئة الجسم قليلا واطول بحكم السن ..
استطاعت سناء ان تمتص او تخفي حقد امها تماما بل .. حاجة سعاد كانت مندمجة في الونسة مع ام عمار .. وكانت تجاور حاجة علوية ام عصام في الجلوس بكل ود .. اثارت اريحيتها شك حاجة علوية وهي التي تعودت على التعامل معها بريبة على مدى اكثر من ثلاثين عاما الفترة التي جمعتهما معا فيها الحياة .. وسعاد لم تكن تخيب ظن هذه الريبة ابدا .. ولا تفوت اي فرصة للاذى تجدها ... كثيرا ما حرضت المرحوم ابو عصام على تطليقها .. لم تنسى لها حاجة علوية هذه التصرفات .. لكنها الان تحس بانها تجالس شخص مختلف يرتدي جسد سعاد الشريرة .. شاهدتها كيف حضنت خطيبة عصام وقبلتها في خديها وخاطبتها بعروستنا الحلوة ..
مشهد آخر من جلسة النساء كانت نسمة تجلس ملتصقة بحجة علوية بحب برئ جعل النسيبة تتعلق بها .. وهي تتكئ على كتفها كأنها تعرفها من زمن بعيد .. وحاجة علوية كانت تتداعبها وتلعب على شعرها الناعم وهي مندمجة مع النسوة في الحديث .. المنظر كان مؤثرا لكل من شاهده ..
بسمة البنت الصغيرة استلمت كاميرة سلمى وتولت التصوير والتوثيق كالعادة .. سناء سلمت كاميرتها لاختها الصغرى سامية للتوثيق ايضا .. جاء عمار الى حوش النساء اكثر من مرة .. ليسال عن شئ ما ويتحدث مع اخته .. اخذ الكاميرا من اخته وراح يسجل ويوثق ايضا لجلسة الرجال ..
سأله النسوة عن سبب هيجان الرجال قبل قليل .. وقال هذا صوت والده لانه عصام قال له انت الغلطان في حادثة السيارة .. ام عمار بضحك .. والله ابوك دا حيرنا .. انا لهسع ما عارفة عقدته من عبارة انت غلطان دي جاية من وين ..
...
اخيرا وصلت سيارة المطعم .. ووزعت السفر على الحوشين ..
احتفظت كل حلقة بنفس ناسها ..
تحلقوا حول الموائد .
اثنى الحضور على طبيخ المطعم السود\اني .. بل قال عثمان انه كان يتوقع الاكل ان يكون كبسة كالعادة في مثل هذه المناسبات لانها اسهل واسرع .. وهنا انبرى عم علي ليبرز دوره في انهم هنا ايضا في الرياض جرت العادة ان يكون الاكل كبسة .. لكنه قرر ان يكسر هذا الروتين واصر على ان يكون الاكل من المطعم السوداني ..
عبارة قرر واصر .. عند الناس كان ممكن ان تمر عادية لمن ليس لهم خلفية عن زوجته سعاد .. لكن بالتأكيد توقف فيها كل من عصام وعاطف وعلاء الدين وتبسموا مندهشين .. وحسوا في انفسهم ان العم علي الآن يعيش عهدا جديدا .. ويبدو انه عهدا ذهبيا ... ادامه الله ما في شك .
| |
|
|
|
|
|
|
|
|
|
Re: أنت غلطان (Re: درديري كباشي)
|
فترة العصر في الاستراحة وهي عادة اجمل اللحظات .. يكون الجو قد بدأ يبرد ... وخف لهيب شمس الرياض الحارقة ..
تفرش الفرشات في الحوش في النجيلة لجلسة العصر .. تبدأ بعض الشلة في الجلوس لحلقة الكتشينة لعبة الحريق .. لعبة الحريق هي التي تعيد تشكيل الجلسة لانها غير مرتبطة بسن معين ... عمنا ابو زيد وهو من مدمنيها .. عمنا علي كان من مدمنيها في زمن مضى قبل ان تطيرها له سعاد من رأسه .. كثيرا ما قررت ان تأخذه لمشوار ما اثناء اللعب .. غير مراعية للعبه ولا موقفه ولا موقف اللاعبين .. بل كانت تسبب له الحرج يامى سمع جمل من نوع : عم علي نوزع ليك ولا سعاد دايراك ؟؟ ... جمل يامى حرقت قلبه ,.. لكن كما يقول ناس الجيش .. الليلة يوم الرجال .. جلس وقال وزعولنا معاكم ... يمكن لي عشرين سنة ما لعبتها لكن الليلة بغلبكم تب ..
انضم الى الحلقة الخال عثمان بالاضافة لزميل عم علي وصديق ابو زيد ..
من شلة عصام كان عاطف من مدمنيها وكذلك عماد اما عصام وخالد لم يكونوا مشغولين بها فاكتفوا بمشاهدة التلفزيون بالداخل .. والونسة مندمجة .. في كل شلة ومكان ..
تعلوا صرخة تكاد تهز الاستراحة بعبارة : خمسين ...... من العم علي ضاربا الارض بكفه شعر كل شخص بأن عم علي وضع كل غله وتراكم السنين في هذه الضربة وعلى صوته ليسمع سعاد في أنه الآن يلعب الكتشينة ويغلب وينتصر غصبا عن جبروتها السابق .. وصلها صوته ووصلتها رسالته ولم تملك سوى ان تبلع ريقها وتكاد تمسك قلبها بيديها الاثنين خوفا من ان يسمع ضرباته الحضور فيفتضح خوفها ..
| |
|
|
|
|
|
|
|
|
|
Re: أنت غلطان (Re: ابراهيم عبدالناصر)
|
Quote: ابو الدر ياخ ما تتم
حلفتك بالنبي ايوب تم |
جابت لها كراتيه كمان يا ابو خليل هرشتنا عديل
بمناسبة الكراتيه دي عندي قصة قصيرة اسمها الحزام الاسود لليوم الابيض .. نخليها في الربع الجايي
والله انا اليومين ديل مجتهد وقايم سداري عشان اخلصها قبل نهاية الشهر .. رغم عن اني مشغول ومضيوف كمان ..
| |
|
|
|
|
|
|
|
|
|
Re: أنت غلطان (Re: درديري كباشي)
|
كراتيه برا حزام كمان 
انت بتقعد تكتبها من راسك لما تقعد في الكمبيوتر
والا حافظها في ملف ورود وبتنزل لينا بالسي سي امعاناً في زيادة الم القراء
على كلً ..
شد حيلك معانا ياخ
مودتي
| |
|
|
|
|
|
|
|
|
|
Re: أنت غلطان (Re: ابراهيم عبدالناصر)
|
Quote: كراتيه برا حزام كمان
انت بتقعد تكتبها من راسك لما تقعد في الكمبيوتر
والا حافظها في ملف ورود وبتنزل لينا بالسي سي امعاناً في زيادة الم القراء
على كلً ..
شد حيلك معانا ياخ
مودتي |
بصراحة يا ابراهيم انا كنت ناشر الجزء الاول منها فقط في المنتديات قبل سنتين وركنتها ما كملتها .. لكن حاليا بكمل فيها من الذاكرة فقط عشان كدا مع مطاردتكم وضيق الوقت والله ارهقتني كأني داخل امتحان تاريخ .. وعلى فكرة هي قصاصات من الواقع بمعنى هي لم تحدث بنفس التسلسل ونفس الشخصيات لكن كتبتها بتجميع حكاوي ومواقف ودمجها في قصة واحدة ... لدرجة انه واحد رد في احدى المنتديات قال والله يا درديري عمك ابو زيد زي العرفتو كدا وعرفت بيته كمان .. الطريف انا كمان شكيت في نفسي .. اليوم كنت في مشوار لغبيرة سوق التياب السودانية وجدت نفسي في نفس موقع البيت المذكور في القصة اتلفت قلت ما يقوم يطلع لينا ابو زيد كمان ..يقول لي دا شنو يا درديري الكتبتو فينا دا كمان...عشان كدا اقول اقسم بالله انه القصة خيالية يا اخوان ..
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: يدكممعانا نشطب قبل ما يرفعوا الفراش كمان |
اها من بدرى قاعد بى عدتى
شى نقط وشى نجمات وحاجات تانية
اشد 
جاهز ماعندى مشكلة
| |
|
|
|
|
|
|
|
|
يا سلام عليك يا ابو حميد .. ما بتقصر .. حجزت القاعة كمان ... .. علي باليمين ما بنفوتك بنت عمتك سعاد الوسطى .. حنكوشة رائعة راقية ... حتى كان تدبل بيها عمتك ما عندها مشكلة ..
بس بعد ام العيال من البوست دا لو امكن او على الاقل القصة دي .. ولا اكل نارك براك ..
(عدل بواسطة درديري كباشي on 03-27-2013, 05:32 PM)
(عدل بواسطة درديري كباشي on 03-27-2013, 05:34 PM)
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: (شنو يا ابو النصب اوعى تكون ظعلط من الوالد وكضا ) |
ههههههههههههههه
مبالغة .. الشخصية دي نكتها من وين يا درديري
زي البعرفو كدا
| |
|
|
|
|
|
|
|
|
|
Re: أنت غلطان (Re: محمد البشرى الخضر)
|
ههههههههههههههه
مبالغة .. الشخصية دي نكتها من وين يا درديري
زي البعرفو كدا
الظاهر عندو لحمية يا ود البشرى
لكن ما مشكلة ببتعالج عادي ....
| |
|
|
|
|
|
|
|
|
|
Re: أنت غلطان (Re: درديري كباشي)
|
| Quote: أبو النصـــــــــــــــــــــــــــــب ياخ |
والله يا درديري الزول ده متعة عديل كدة...........
الله يديك العافية...........
| |
|
|
|
|
|
|
|
|
|
Re: أنت غلطان (Re: درديري كباشي)
|
انتهت الوليمة انتهت العزومة وانتهت الكرامة بكل مسمياتها السودانية .. ذلك اليوما لجميل الذي احتفل فيه العم علي واسرته بتخريج ابنتهم سناء .. ودعا اليه كل المعارف والاقارب .. الهدف الظاهري كان نجاح البنت .. انما الهدف الباطني غير المعلن .. هو اعلان شخصية جديدة وحياة جديدة لعم علي يعلن فيه تمرده على سطوة زوجته المتسلطة .. سعاد وبنفس هذه الطريقة غير المباشرة ..
توزعت الاسر .. وكان رد الانطباع مختلفا في كل بيت من البيوت الاربعة .. سكن عصام مع زملاؤه .. بيت عم علي بيت ابو زيد وبيت دكتورة سلمى ... في كل بيت كان هنالك حكي وانطباع عن الوليمة يكفي لسهرة اليوم ..
في بيت عصام تأخر عصام في الدخول لانه غشى بيت ابو زيد لايصال خطيبته واخويها .. اول ما فتح الباب وجد اصحابه في الصالة متجمعين امام التلفزيون كالعادة وكالعادة ايضا بدأ السـخـرية عاطف قائلا ..
- أوووو ابو الناصاب ..
وانفجر الحضور ضاحكين ..
وعصام جلس مغطبا وجهه مبدئا تذمره من هذه السـخـرية ..
عماد : صحي انت دا شنو ابو النسب الظهر ليك دا .؟
عصام : والله ما عارفه جا من وين دا كمان المتخلف دا ..
عاطف : ياخ ما فيها حاجة الراجل معجب بيك ... ابو النصب يااخ ..
خالد : يعني انت ما كان عندك اي فكرة عن انه البنت عندها اخو في الجامعة بالسودان ..
عصام : عندي ياخ كيف ما عندي لكن ما في زول قال لي هو عبيط ..
عماد : منو الحايقول ليك ؟ معقولة عمك حيقول ليك عندي ولد اهبل ..
عاطف : ياخ ما تكبروا الموضوع الولد لو كان عنده مشكله في مخه ما كان دخل الجامعة .. بس هو كهربته زايدة شوية ..
عماد : طيب انت ما مهندس كهربا ما تظبطها ليه ..
خالد : يا اخوانا خلاص قفلوا على الموضوع باشمهندس عصام ما عجبه الموضوع .. وانت ذاتك شنو حكاية الحلا والحمار معاك ..؟
عاطف محاولا التمويه بعد ما قبض بالثابته ..
ياخي دا قدح عصام القديم ما تلصقوه لي ..
عماد : قدح عصام القديم ؟ قايلنا نحن داقسين ولا شنو .. كان ما متنا شقينا المقابر برضو ..
| |
|
|
|
|
|
|
|
|
|
Re: أنت غلطان (Re: درديري كباشي)
|
في بيت الدكتورة سلمى
نزلت امها وخالها باسرته ..
اجتمعوا في الصالة وكان التعليق بطبيعة الحال عن الاستراحة ..
بداها علاء قائلا انتوا لاحظتوا حاجة يا جماعة في عم علي ؟؟
الخالة علوية ام عصام : مالو هو كمان عم علي ما تقولي اتغير زي سعاد ..
د علاء : اول شئ بقى جرئ كدا صوته عالي ومستلم المجلس وكان زمان ما عنده علاقة بالكتشينة هسع لعب وغلب الناس ..زمان كان تلاقيه خجلان كدا ومنزوي بس يضحك ولو عاوز يعلق على موضوع تلاقيه يتمتم كدا
ويتلفت كأنه خايف حد حا يسمعه .
حاجة علوية : وسعاد زاتها ما ياها سعاد البنعرفها .. زمان في المناسبات دي تلاقيها صارة وشيها وما في شي عاجبها وتنهر في الناس .. هسع تحسي بيها طيبة تشيل وتبوس في خطيبة عصام .. انا حتى خفت على البنية ..
سلمى : اسكتي ساي يا امي انا خاصة وخاصة بعد الفلم الدخلت فيه نسمة كان ما الشيخ عالجها الا كان راحت فيها .. لكن فعلا خالتي سعاد كانت كريمة تستقبل في الضيوف وتعزم عليهم ..
وسأل الخال عثمان سلمى عن الفلم الذي دخلته خطيبة عصام .. حكت له سلمى عن الهلوسة والصريخ وسيرة سعاد .
قال الخال عثمان : معقولة للدرجة دي .. ياخ دا وسواس منكم .
تدخلت علوية قائلة : وسواس شنو .. سعاد\ دي عندها بت اختها بايرة في السودان اسمها اخلاص .. اها اخلاص دي طيلة النهار حايمة من فكي لشيخ لساحر .. ترسلها وتمولها خالتها سعاد .. وهي نفسها بتدور لها عن عريس بطريق الفقراء والدجالين .. الطريف في الموضوع انه العرسان طفشوا منها لنفس السبب .. يعني اي واحد يكون عنده رغبه يقولوا ليه ياخ دي بتاعة فقرا .. يمين الطشة الياها تاني ما يجي راجع ..
وضحكوا جميعا من حظ اخلاص العاثر الذي تسببت فيه بنفسها ..
كذلك دار الحديث عن خطيبة عصام واعجابهم بجمالها ورقتها .. كما تطرقوا لعصبية الاب وعقدته من عبارة انت غلطان .. ولم ينسوا ان يعلقوا على هبل الولد الوحيد عمار .. ورشاقته قدام البنات .. وضحكت الحاجة علوية وهي تقول شابكني ليك : أم النصب أم النصب .. تقول انا عاوزة اناسبه هو ..
| |
|
|
|
|
|
|
|
|
|
Re: أنت غلطان (Re: درديري كباشي)
|
ابو النصب يااا
ام النصب يااا
ياخ ده شخصية القصة زاتا
كشح الاتو لعصام وعاطف وعمتك سعاد شخشياً
واصل وخلي صباحنا اجمل
| |
|
|
|
|
|
|
|
|
|
Re: أنت غلطان (Re: درديري كباشي)
|
أخيرا
اجزت المدارس .. وبدأت المراسيم من بيت ابو زيد حيث قفلت نسمة وبدأت معها امها مشروع التسمين والدخان بحطب الطلح ..
منع عصام كما جرت العادة من مشاهدة العروس في معسكرها المقفول .. اتغاظ عصام من هذه العادة .. اصبح يأتي بامه واخوته الى بيت ابوزيد ويحرم من مشاهدة خطيبيه . يتململ ويتلفت وينهري بمناداة عمار بابي النصب ..
ولكن لا يحظى بشئ ..
تبدأ استعدادته ليقدم لتعديل عقده بالشركة حتى يستطيع من اجار الشقة طلب ان بستعجلوا له عقد الزواج ... بما انه السفارة لا تعمل يوم الجمعة اذا لابد ان يكون العقد في وسط الاسبوع .. دعى خاله ان يأتي بالطائرة يوم واحد
ليكون وكيله في الزواج ..
اجتمع نفر قليل وبصحبة عصام وصحبه .. تم العقد بسفارة السودان بالرياض ..
وزعت نسمة وسوسن اصغر البنتين في العائلتين الحلويات والكعك على الموجودين بالسفارة ..
ان تجد اطفال ونساء تزغرد بسفارة السودان بالرياض وبنات صغيرات يقدمن الحلوى .. امر اصبح مألوفا بسفارة السودان بالرياض ..
اصبح عصام بموجب الاوراق الرسمية يحمل الرخصة الدولية في الزواج .. واصبح في امكاله ان يستصحب نسمة في سيارته لوحدهما دون ان يتعرض له اي رجل امن او امر ..
بموجب قسيمة الزواج قدمها للشؤون الادارية بالشركة وعدلوا له راتبه .. وصرف بدل السكن والتأثيث .. وبدأ رحلة البحث عن شقة .. وجدها في نفس حيه قريبا من مكان عمله ..
ومع امه واخته .. وجولات ما كوكية في اسواق الفرش والاثاث والاجهزة الكهربائيىة كانت الشفة جاهزة ..رحل عصام الى شقته بعد ان ودع زملاؤه في السكن ببيت العزاب..
لازاالت العادات السودانية اقوى من اللوائح الرسمية اذ انها لازالت تحرمه من نسمة رغما عن انه اصبح زوجها رسميا .. اكتفى مغتاظا بالتلفون .. واصبح يقول لها بالتلفون وصفي لي شكلك كيف اتغير .. اوعى تكوني سمنتي اكثر من اللازم انتي شكلك كان جميل وعاجبتي .. تقول له ماتخاف انا حريصة على وزني .. رغما عن الحشو والمأكولات التي كانت تردمها لي امي .
عاطف لازال متواصلا بالتلفون مع سناء ويبدو ان موضوعه قد استوى وقد يتحول الى الجد ..
تمضي الايام يتحرك عصام علاء نحو مواقع قاعات الافراح ويحجزون قاعة بحي الشفاء.. ويتفقون مع صاحب المطعم السوداني ليجهز لهم حوالي ثلاثمائة صحن كوكتيل ..
يطبع عصام كروت الافراح ويوزعونها على المعارف والاهل
عاطف بحكم انه انسان شفت وشماشي وخبير في الحفلات يتولى امر الفنانين والفنانات والمكرفونات والذي منه .
وكان في يوم الخميس في الخامس عشر من ابريل يوم من ايام عصام ونسمة لا يتكرر ابدا واجمل يوم في حياة الحجة علوية التي بح صوتها بالزغاريد وجفت عيونها من الدموع ..
كلما تذكرت المرحوم ابو عصام .وفقدها له في هذا اليوم ..
وتحركت الوفود ناحية قاعة الافراح
بينما العروس واخواتها وصديقاتها ناحية الكوافير اي المشغل النسائي اولا
| |
|
|
|
|
|
|
|
|
|
Re: أنت غلطان (Re: درديري كباشي)
|
كانت القاعة وهي في الحقيقة مجمع لقاعات في حوش واحد مقسومة ايضا نساءا ورجالا توجد قاعات مخصصة للولائم والوجبات كما ان هنالك قاعة واحدة بها مسرح للفنانين والحفل..
في الاول توزع المعازيم ناحية قاعات الطعام .. حيث قاعة للرجال واخرى للنساء ..
..عصام كانت كل خليه في جسده ترقص طربا وسعادة .. وتكاد ترى بخار السعادة ينطلق من مسامه فيعطر المكان ..
وعبارات تتقاطع هنا وهناك من نوع .. مبروك ياعريس .. وابشر يا عريس .. هو يرد متجاوبا دون ان يركز في من هو قائلها .. بعضهم يعرفهم ومعظمهم لا يدري من يكون .. حيث في مثل هذه المناسبات تتم الدعوة عن
طريق ( العنعنه) بمعنى فلان تمت دعوته قد يدعو معه زملائه في العمل او حتى جيرانه في العمارة ..
مثال حاجة سعاد دعت جيرانها ممن الذين يحبون الحفلات والمناسبات قليلا وكانوا جاهزين وقفوا بسيارتهم امام بيتها يضغطون على بوق السيارة يقولون لها ولبناتها ( اخرتونا ياخ .. حركتكم تقيلة ) ..
بعد العشاء ركب عصام مع احد اصدقائه وتحركوا ناحية الكوافير لاحضار العروس وصويحباتها ..
تحرك عاطف ايضا معهم بسيارته لان سيارة واحدة لا تكفي .. ولان له هوى في نفسه ايضا ..
اذ ان سناء كانت من ضمن ملازمات العروس
بعد ساعة خلصت وجبات العشاء وتجمع الناس في قاعة الحفل ..
بدأت الفاصل المغنية والتي ابدعت في الاغاني الهابطة فيما يعرف بغنى ( الحت.. او الجبجبة) ومعظم غناها كان من شاكلة (: آي أي أي أي )
رقص الناس وهزوا اك########م وما تيسر من باقي اللحم والكروش وهم سعداء بهذه الزلازل التي كانوا يحدثونها ..
تسلل الشماشة الى مكان الحفل بعد ترجي وتحايل مع حراس القاعة وافلحوا في الدخول .. وكانوا من ذوي البشرة الداكنة .. لكن طريقة رقصهم تجعلك تجزم بأنهم لم يكونوا سودانيين .. بعضهم يربط الاشارب في رأسه وبعضهم
يلبس اقراط في اذنيه .. لكن تحس انهم اناس يفتقدون الى الاتنماء والهوية فتتعاطف معهم رغم حنقك عليهم ..
بعد شوية يتوقف الغناء وتتوقف الموسيقى بحجة ان العروسين وصلا ..
وفعلا بدأت تعزف لهم موسيقى الزفة
عصام كان يرتدي بدلة سوداء وقميص اسود وكرفتة بيضاء .. اما عروسته نسمة فارتدت بالطبع فستانا ابيضا عاري منطقة الكمين تغطي زراعيها طرحة شفافة من قماش الدانتيل الابيض .. وكان شعرها طويلا مسدلا في شكل خصل حلزونية يغطي ظهرها وخديها ..
وقد كانت جميلة بحق صابت الجميع بالوجوم والصمت ..
انطلق الوغاريد اللاارادية من كل الحضور من النساء ..
كن زميلات وصديقات واخت نسمة يمشين من خلفها فضلا عن اخواتها ..
لكن لم تستطع واحدة تطغى عليها جمالا وتخطف منها الاضواء ..
علق اصحاب عصام مبهورين قائلين : عصام ليه حق يبيع القدح بتاعه .. اشارة الى تركه قريباته وخطوبته من غريبة ..
توجه العروسين ناحية المحراب الذي يخصص للعروسين والذي يعرف بالكوشة في السودان .. جلس عصام بجوار عروسته وهرع الناس لمباركة الزواج ..
كان من ضمن الحضور بعض السعوديين من زملاء عصام في العمل ومدرائه ..
كان عم ابو زيد يقف قرب بنته العروسه يتلقى المباركة . تقدم مدير عصام لمباركة العرس .. وعرفه عصام بعم ابو زيد قائلا له هو عمنا والد العروسة .. وقال هذا الباشمهندس صالح الغامدي مديرنا ..
رحب عم ابو زيد بالضيف . وقال الغامدي مخاطبا عصام : هذا هو صاحب الحادثة ؟؟ وهو يضحك وضحك الجميع ورمى الغامدي السؤال القنبلة .. بذمتك مين فيكم كان غلطان؟ .. عصام وللمرة الثانية هو سارح يضحك قال : طبعا عمنا هو الغلطان .. لكن الصورة كانت غير اذ تهيج عم ابو زيد من جديد : انا غلطان ؟.. تاني انت مصر على كلامك دا .. ياخ زي نا دخلنا بالمعروف نطلع ..
وبدأ االرجال يهدئون في عم ابو زيد والضيف السعودي يقول له : ايش فيك يا رجال ايش فيك ..
يوبخ عثمان الخال عصام قائلا : يا عصام انت ما بتتعظ ياخ .. اهو عمك مصر يفرتك العرس ..
عصام قال يفرتك مين انا عاقد وقسيمتي في جيبي ..
بدأت نسمة الدخول في نوبة بكاء اتلم فيها اخواتها وامها يهدون فيها ويحذرونها من انها راح تخرب المكياج ..
المهندس السعودي تحسس وخاف ان يكون اصبح سببا في تفريق العريس وعروسته .. الا ان الخال عثمان فهمه بان هذه عقدة نفسية فقط عصام لم يكن يعرفها وانه الموضوع انشاء الله ما راح يتطور اكثر من كدا ..
الى النهـــــــــــــــــــــــــــــــــاية
| |
|
|
|
|
|
|
|
|
|
Re: أنت غلطان (Re: درديري كباشي)
|
خطوة الى النهاية
هدأ الوضع قليلا سكتت العروسة من البكاء
استطاع الرجال ان يهدوا من غضب عم ابو زيد ..
انطلقت الحفلة من جديد .
جاء عمار ( ابو النصب) وجر العروسين نحو ساحة الرقيص
كانت لفتة بارعة منه حتى يخرجهم من هذا الجو الذي كاد ان يجرهم نحو التعاسة .
همس عمار في اذن عصام قائلا .. ما تظعل يا ابو النصب ..
ورد له عصام قائلا : ولا يهمك يا ابو النصب ما ظعلان.
ضحك الاثنان وتبسمت نسمة من جديد ..
سخنت الفنانة من وتيرة الغناء ونزل الجميع رقصا
هز المغتربون ما اكتنزوا من شحم ولحم كما لم يفعلوا من قبل ولسان حالهم يقول انهم لم يكتنزوا غيرهما ..
سعد الجميع زغرد النسوة .. جرت حاجة علوية الحاجة سعاد ناحية الرقيص عندما ادت الفنانة اغتية السيرة .. تمانعت حاجة سعاد بأنها كبرت على هذا الشئ .. لكنها رقصت ابدعت واجادت مما يدل على انها كانت ضليعة في الرقيص في صباها ..(مقدداها )
حام عمار حول سوسن كثيرا همس قربها تقرب لها قاومت متابعته بشدة اخيرا بدأت تبتسم له ورضخت لترقص امامه .. يبدو انه يدعي الهبل لكنه مفتح ( تفتيحة) واصبحت طيلة الحفل لا تفارقه .. ينزلوا الى ساحة الرقص سويا ويعودا الى الجلوس سويا الى الهمس وحديث طويل لا ينتهي ولا ينقطع الا بضحكة من ضحكات سوسن العالية ..
عم ابو زيد تعود له الابتسامة ويدخل معهم في ساحة الرقيص .. يلاحظ لابنه ويحده قد نجح في ترويض سوسن الجامحة فيرفع له الابهام مع قبضة اليد مهنئا .. يرد عمار بمثلها ..وهما سعيدان بكل شئ ..
على هامش الرقيص يقتحم خالد خصوصية عماد ويدخل في تعارف مع ليلى .. ويخوضوا في حديث جانب يبدو انه بداية موسم لشتلات الحب .. في ذاك اليوم .
خلصت الحفل قرابة الساعة الرابعة صباحا انفض الجمع ..
همست حاجة علوية موصية الاقارب والاهل من الجانبين الا يغادروا حتى يحضروا الجرتق وقطع الرحط ..
يدخل العريسين الى غرفة الملابس ليغيروا الزي الافرنجي بزي شعبي ..
تحضر البنات صينية مذهبه معباة بادوات الجرتق السودانية .. الحق والمباخر والمداهن والشمعدانات ..
يجلسون على الكنبة وتنطلق اغاني الجرتق من المغنية ..بعد ان يحضر العروسين ..
ارتدت العهروسة توبا احمر وعملت لها الجدله اي الطاقية التي تتتصمنع من شببكة الحرير وحلقات من الذهب او النحاس ويسدل شعرها على ظهرها ..
ويتمك تغطية العروسين بقطعوة قماش الحرير الذي يعرف بالقرمصيص ...
وتنطلق اغنيات الجرتق
الليل ليل العديل والزين .. الليلة العديلة ويا عديلة الله)
كلام موروث لا احد يعلم ماذا يعني لكن الكل يجزم بأنه ضروري .والا ستنكبس العروس .. واذا قلت كيف ستنكبس العروس ايضا لا يجيبك احد ولا يعرف احد لانهم ورثوها هكذا كابر عن كابر..
| |
|
|
|
|
|
|
|
|
|
Re: أنت غلطان (Re: درديري كباشي)
|
بسم الله الرحمن الرحيم
الرائع / درديرى
( انت غلطان ) .. لسه باقى
3 ايام وشكلك كده من وتيرة الفصول الاخيرة
بقيت تمشى بى نمرة اربعة ..
بس برضو سلمت يداك
ارتيقا
| |
|
|
|
|
|
|
|
|
|
Re: أنت غلطان (Re: Artiga Gilani)
|
Quote: بسم الله الرحمن الرحيم
الرائع / درديرى
( انت غلطان ) .. لسه باقى
3 ايام وشكلك كده من وتيرة الفصول الاخيرة
بقيت تمشى بى نمرة اربعة ..
بس برضو سلمت يداك
ارتيقا |
سلام حبيبنا
انا كمان عايز لي يومين قبل رفع الفراش .. عشان التوثيق والحفظ في الملفات تعرف القصة وبصورتها الحالية غير موجودة في مكان في الدنيا غير سودانيز اونلاين .. لان عندي الوندوز في اللابتوب ضارب فاضطريت انزلها من الراس للكراس عشان كدا كترت الاخطاء الاملائية وكثر التعديل فيها ..
| |
|
|
|
|
|
|
|
|
|
Re: أنت غلطان (Re: درديري كباشي)
|
بسم الله الرحمن الرحيم
الرائع / درديرى
حقيقة استمتعنا ايما متعة
برفقة شخوص هذه الرواية
ولولا خوفنا من الشلهتة لطالبناك
بجزء ثانى ( مسلسل تركى يعنى )
بص لو كنت اديت لنا عمار ده دوور
اكبر من كده كان ما قصرت معانا
ٍسلمت يداك مرة اخرى
ارتيقا
| |
|
|
|
|
|
|
|
|
|
Re: أنت غلطان (Re: Artiga Gilani)
|
مشكور ارتيقا
انا كدا خلاص الحمد لله قدرت احتفظ بنسخة توثيق والامور مشت ..
بعد كدا راح خت المدماك الاخير واختم الحكاية
مشكور للمتابعة .. ونتلاقى في فلم جديد واوعدك انه صاحبك عمار بقص خبره ولا من اتمكن من حكايته راح اجيب قصته بحالها .. على قولك هو شخص وراه حكي كثير الظاهر ..
| |
|
|
|
|
|
|
|
|
|
Re: أنت غلطان (Re: درديري كباشي)
|
النهايـــــــــــــــــــــــــــــــة
عادعصام وعروسته من شهر العسل بعد ما قضى الشهر داخل المملكة بدءا من مدن الجنوب أبها ومر على الخبر عند خاله في الشرقية كما قضى بضع ايام بكل من مكة والمدينة ونزل بشقته بالرياض بعد ان عاد ..
قرر اصدقاؤه ان يعلموا له رحلة خاصة تكريما له مع عروسته ..
وعملوا له دعوة باستراحة كسابقتاها
اشترك الاصدقاء عاطف وخالد وعماد .
ودعوا كل اقارب عصام ونسابته لهذا الحفل وزميلهم يودع بيت العزوبية وحياة العزوبية ويصبح صاحب بيت منفصل واسرة جديدة
تجمع الاهل والاصدقاء يوم الجمعة بالاستراحة ..
لا تختلف كثيرا عن سابقتها سوى في الاسم والموقع .
ولكنها نفس الحوشين ونفس القاعات والملعب ذو العشب الاخضر
وكالعادة بعد الحلقات التي يجمع بينها قاسم مشترك ..
يجتمع الجمع للعبة الكتشينة ..
وقبل ما تجتمع يقترب عاطف من عصام ويقول لهم مخاطبا شلة الاصدقاء تفتكروا يا اخوان لو جبنا سيرة الحادث وقلت لعم ابو زيد انت غلطان راح يتهيج ويعمل دراما زي المرات السابقة .؟.
قال خالد : ليه الفرق شنو اكيد راح يتهيج لانها هي عقدة في اللاوعي عنده ..
عاطف : بلا لا وعي بلا بطيخ انا متأكد لو عصام قال ابو زيد هو الغلطان المرة دي راح ياكلها ولا يتهيج ولا يحزنون ..
عماد : ليه متأكد كدا الفرق شنو ..؟
عاطف : زمان بنته كانت بنت يعني هو كان بيهدد ان يفرتق العرس عادي وعصام هو الخسران ..
خالد : طيب والآن ..
عاطف : الآن بنته اصبحت مرة وليست بنت .. راح يتناسى عقدته غصبا عنه ولا يعرض بنته لخراب البيوت والطلاق ..
عماد : يا راجل بلا نظريات معاك ..دا كلام ما صاح راح يهيج وتخرب علينا الاستراحة ..
عاطف : تجو نجرب ؟؟
خالد : نجرب نظرية عاطف لما لا .
عاطف : شرط انه عصام يشترك معانا ..
عصام : لا لا لا انا طلعوني من اللعبة دي ..المرة دي راح نتضارب انا وعمك ..
عاطف : لالالا كيف ؟ ياخ انت لاعب اساسي
وبعد تحنيس ومراهنات وافق عصام ان يلعب معهم في التجربة ..
قال عاطف خافضا صوته : خلاص كلنا نشترك انا راح افتح الموضوع ..
عاطف بعد ان رفع صوته: بالله سبحان الله تذكروا المناسبة السعيدة دي بدت بحادث مرور ؟؟
خالد : ايوا صاح الحادث بين عم ابو زيد وعصام قبل ثلاثة شهور ..
عماد : تفتكروا الكان غلطان منو في الحادث ؟.. معليا صوته ايضا ..
عصام باعلى صوته : طبعا كان غلطان عم ابو زيد ..
كل الانظار تركزت على عم ابو زيد ..اما عم ابو زيد أخذ جريدة ودفن رأسه فيها مدعيا عدم السمع ..
عاطف : قلت الغلطان منو في الحادث .؟
.
عصام : الكان غلطان عم ابو زيد .. هو دخل في باب عربيتي
وكذلك نظر الجميع ناحية العم والذي لازال يدعي عدم السمع ..
وعصام الظاهر انه نظرية عاطف في محلها وكرر حديثه للتأكيد : يا اخوان الحادث بيني وبين عم ابو زيد ابو زيد هو الكان غلطان .. ..
وفجأة انزل عم ابو زيد الجريدة من وجهه : ما خلاص يا بني سمعنا صحيح انا كنت غلطان .. لكن المسامح ما كريم ..
عاطف قال : ما قلت ليكم وانفجر الجمع ضاحكين ..
لكن عصام تأثر جدا من تصرفه وندم : وقال سبحان الله لكي يحمي اب بيت ابنته ممكن ان يتخلى حتى عن عقدته اللارادية من تحمل مسؤولية الغلط ... لكن والله لو كنت واثق من نظرية عاطف لما غامرت لاني الآن شعرت بحجم الذل الذي عاشه عم ابو زيد ليحمي بيت بنته .... يا له من أب ..يستحق ان يكون ابو النسب .. او ابو النصب كما يقول ابنه ..
************************************************************************************************************************
| |
|
|
|
|
|
|
|
|
 Re: أنت غلطان (Re: درديري كباشي)
|
وما يستفاد من القصة:
1- الشريعة احسن من العلمانية ...
2- الرياض احسن من السودان ...
3- الأكل السوداني أحسن من السعودي ...
4- شيخ القرآن احسن من الفكي اب فركة ...
5- الراجل احسن من المرا ...
6- الكاتب احسن من القارئ ...
7- الله احسن من ابليس ..
8- مشهد حوض السباحة احسن من السباحة ...
... المهم ... (احسن من صمة الخشم!)
| |
|
|
|
|
|
|
|
|
|
Re: أنت غلطان (Re: تبارك شيخ الدين جبريل)
|
شكراً يا الدرديري إذ جعلت الفرح
يتسلل إلى قلوبنا . بس خليتنا نفكر
في الزواج بعد 25 سنة زواج ( بمزح )
أنحنا من نوع عمك علي قبل الانتفاضة .
بصراحة . أبدعت .... يعطيك ألف عافية
موهبة تستحق التقدير والاحترام .
| |
|
|
|
|
|
|
|
Nader Abu Kadouk
ابراهيم عبدالناصر
محمد بابكر محمد
اسامة محمد ابوبكر
نور الدين عثمان
الطاهر عثمان
محمد البشرى الخضر
Hani Arabi Mohamed
Artiga Gilani
تبارك شيخ الدين جبريل
د.يوسف محمد طاهر
فيس بوك
تويتر
انستقرام
يوتيوب
بنتيريست