|
|
|
 Re: في عرين الغجر ( أنا وترينا وليلة شتوية بنكهه البارود) من مذكراتي (Re: عمار محمد ادريس)
|
مع صياح الشايب قمت بقفل التلفون في وش ود كرار للمرة الثانية والشايب في
هياجة كم يستغرق من الزمن حتي يشرفنا
قدوم أصدقائك ؟ زكرت له أصدقائي شبعانين نوم . يعني أفهم شنو ؟ ياسيد عبدالقادر
أصحابي في نوم عميق مافي واحد
صاحي الا ود كرار دا لوعاوز نمشي نجيبوا الي هنا أنا موافق ، في هذة اللحظة بالتحديد
كنت عاوز أدخل خلعة في ود كرار زي خلعتي دي ماتطلع منو عمروا كلو وأنا أتحدث الي الشايب
ونظري كله ناحية موزوا وال ك ل ب سيزر . علي ما أعتقد قد حسا بي الشايب والتفت لموزوا
آمرا له بأرجاع سيزر الي مكانه فبدأت أتنفس بشكل شبه طبيعي ، وما أن غاب سيزر عن نظري رجعت
مخاطبا الشايب ذو التجاعيد ياسيد الان هل لي أن أنصرف ؟ قد سري الي جسدي الجوع والنعاس كسريان
النار في القصب والشهادة لله لمن أجوع أو يداهمني النعاس بفقد تركيزي تماما . تزكرت في هذة
اللحظات جدي لامي علية رحمة الله قد كنا نعاونة أنا وشقيقي الاكبر في موسم الاجازات في
المزارع من شتل البصل و جمع محصول
الفاصوليا والبطيخ والبامية وكان شديد في تعامله ، ليست قسوة قلب ولكن كان يريد لنا
أن نخشوشن فالنعم لا تدوم فكان
يآخر تناول وجبة الافطار مخصوص . شقيقي الاكبر بيعدي يوموا خنق أما انا كنت بدق ليهوا جرس
وأبطل أعمل وأقول
ليهوا ياجدي والله لو مافطرت يدي دي ما أدخلا في حاجة تاني فقد كان يستجيب في نهاية الامر
ولكنه يكرر لجدتي الله يصرفوا الحلبي دا جنوا بطنوا لوجأت مجاعة أول زول حيموت . ما أن
زكرت للشايب عبارة هل لي أن أنصرف رمقني بنظرة وبدأ في الحديث معي بلغة عربية وبلكنه جزائرية
( يبدو نظرية تتوب الرقاصة ولكنها لا تنسي التحزيمه صاح برغم غياب أربعين سنه بين الشايب واللغة العربية خاطبني )
علاش تكتر الهدرة بزاف ؟ قدر ماعصرت راسي ماعرفت البشر دا قاصد شنو . بعد شد وجذب عرفت
أنة يقصد لي لماذا تحكي كثير .رددت علية ياسيد عبدالقادر منذ المغرب وانا بينكم ما
الذي جنيته وانا الذي أتيت لكم زائرا وليس غائر ، أتيت مع ترينا لنظافة الحشائش التي
تنمو بين الطوب فقابلتوني بالسلاح ومن ثم أتهمتوني بان ترينا حبلي مني وبعد أن تأكدتم
من حسن نوايايا لماذا لا تتركوني وحالي هل من الرجولة تركي بدون أكل أوشرب طيلة اليوم
أم من الرجولة أن يجتمع ثمانية أشخاص علي شخص واحد ، قاطعني اللعين وهل من الرجولة
الغدر بسولي ولكمة في وجهه؟ أدركت حينها أن أسلوب الدهنسة لايجدي نفع مع هذا الشايب
أذن فاليأتي الي الواحد تلو الآخر
وليس مجتمعين وبدون سلاح وبعدها نشوف شغل الذندية ، بعد جهد جهيد فهمني عبد القادر وأشار
برأسة بعدم الموافقة . طيب ماذا تريد ردد ببرودة اعصاب يحسد عليها نريدك أن تعمل معنا وسنزوج ترينا .
| |
 
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
يا ربي من هذة الليلة المنحوسة خيار العمل معهم سوف يلقي بي في قاع السجن
طال الزمن أم قصر ، وخيار الزواج من ترينا أشبهه بالمستحيل كيف لي أن أتزوج بدون
أحم ولادستور ومن خضراء الدمن وأنا أبن العشرينات . يوم هكذا تنتظره أمي وخالاتي بفارق
الصبر منذ مولدي ، ماذا أقول لهم ؟ جبنت وخفت وزوجوني غصبا عني ؟ حينها سوف تقول لي أمي
كان أولي لك أن تموت وسوف أقطع ثديي وأفذفه لــــــ###### ضآل وبعيدا عن هذا وذاك كيف لي أن
أتنازل بكل سهولة ويسر عن أحلامي في الزواج من سودانية بنت قبائل تكرم الضيف في أنصاص الليالي
وهي حفيانة ، كنت أعرف بحكم غربتي المبكرة أن لا يستطيع أي شنب تقول له سوف أزورك الاسبوع المقبل
في بيتك أن يقول لك حبابك الف قبل أن يرجع الي المدام الا المتزوجين من سودانيات .فكان مناي أن أقترن
بنت أصول تعيش معاي بالفي والمافي ـ تقاسمني همومي وآلامي وأفراحي ، كيف لي أن أنسي عادات كالحنه و
الدلكه والخمره والكبرتا والدخان وأدفن نفسي حيا وأنا غارق في تفكيري تذكرت رائعة الفنان مصطفي مضوي
ما جني أخوات التقيل مسكن لايدي وحنن ، مابشروا الشبان علي وسط البنات البيرقصن ، ماجن بنات حلتنا
ما سون دلال ما سرحن ، وماجلسن جداتي في آخر الصفوف وأتبلمن . كنت أنتظر في يوم زواجي موسيقي القربه ،
وصوت العنج والبطان والدلوكة والزغروتة والضريرة والهلال الفوق الجبين . أذن بنحب من بلدنا ما برا البلد سودانية
تهوي عاشق ود بلد . وعشان عيون السودانية أنا أتغربت
( حديثي هذا ليس عتاب للمتزوجين من أجنبيات، كل أحترامي لهم فلكل أنسان ظروفه ، وقناعاتة )
وأنا سارح في تفكيري لكزني الشايب ماذا قلت؟
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
في هذا الوقت بالتحديد كان علي أن أبرد نفسي وأن لا أتعامل بحماقة تكلفني الكثير وعلي
أيضا مجارات الشايب حتي يذهب جزء من البغال من حيث اتوا ، لان رزق كل الكامب متوقف علي عملهم
في الامسيات في البارات والديسكوهات . وأنا صامت كرر لي الشايب ماذا قلت ؟ تململت بعض الوقت وقلت له
موضوع زواجي من ترينا يمكن ان ينظر ويفاد فيه أما
موضوع العمل ما ارفضة جملة وتفصيلا . رجع الشايب للحديث مع بقية البغال بلغتهم وعلي ما أعتقد قال لهم
يتزوج من ترينا وهذة نصف المهمة وبعدها رويدا رويدا يعمل معنا .وقبل أن يفكر عبدالقادر كثير قلت له
هل يمكنني الجلوس مع ترينا لوحدنا بخصوص بعض التفاصيل ؟ رأيت أرتياح علي وجهه الشايب وردد لما لا،
من حقك سوف تجلس مع ترينا والتفت علي
بقية الاوغاد عليكم بالذهاب الي عملكم فقط أتركوا معي وايروا وموزوا . أذن سوف يذهب سولي ذو البنية
الجسمانية الضعيفة تاركين معي وايروا وموزا والاثنين لهم أجساد كأجساد حصين السبق ، ليس لي مجال
للفرفره ولا للوهمات .
صعد البغال وأنطلقت سيارتهم خارج الكامب كسرعة البرق وأصبحت وجه لوجهه مع الشايب ووايروا
وموزوا ومع أختفاء آخر سيارة للأوغاد صاح الشايب ترينا ترينا . صدقوني منذ معرفتي بترينا كان أي يوم
التقي فيها به عندي عيد الا هذة اللحظة ، ندمت علي حظي العاثر الذي اوقعها في طريقي . أطلت ترينا فآمرها
عبد القادر بالجلوس معي لمناقشة بعض
الامور . وما أن دخلنا الي الكرفان حتي التفتت الي ترينا بحزم نعم ماذا تريد أن تقول ؟
ترينا ماذا دهاك لماذا هذة النبرة الحادة ؟ نبرتي حادة لانني أحببتك ونهاية أي حب الزواج لماذا
ترفض الاقتران بي .كانت عبارة ترينا صدمة جديدة
بالنسبة لي في هذة الامسية الكابوس ، نظرت لها وحتي أهتدي الي جواب شافي كافي ومزيدا من الوقت
قلت لها أرغب في كوب من القهوة . رمقتني بنظرة وأنصرفت لعمل القهوة وانا في سري الله لا كسبك
زواج شنو ، هو الزواج دا طالق دربو؟ أسع لو تم الفي مرادك دا خايف بعدين ولدي يجي طالع من بطنك
يحمل بيد مسدس وبيد مخدرات وأول ماينصب ويحتال ينصب علي الدايه .
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
أثناء أنشغال ترينا بأعداد القهوة فكرت في طريقة تجعلها هي التي ترفض بالزواج
مني ومما لفت نظري الزغينر أكثر
شيء بيضايقهم درجة الحرارة أكثر من الاوربيين فما أن تصل درجة الحرارة الاثني عشر
درجة تجد كل رجالهم يرتدون
البنطال فقط وفوق لاشيء كما ولدتهم آمهاتهم ونساءهم يلبسن اشياء خفيفة وفوق للركوبة بمراحل
يعني شبهه أمفكوا ، تعرفي يا ترينا بعد الزواج سوف نذهب شهر عسل الي الخرطوم الايام دي درجة الحرارة معتدلة
.بدون ماتلتفت وهي مشغولة كم درجة الحرارة ؟ الايام دي معتدلة 47 درجة ، التفتت بسرعة كم ؟ 47 درجة ودي معتدلة
طيب لو مامعتدلة كم ؟ بتقرب تصل 70 درجة وهناك لا يستخدمون الغاز كثيرا ـ يطهون طعامهم علي درجة حرارة الشمس يعني
يضعون اللحم والخضار والبهار في حلا بما يسمي القطر قام ويضعونها في نص الحوش فوق منضدة ، كم ساعة يكون الاكل قد
أستوي علي مهله .دا لو ما أتي علي الحلا صاروخ عابر ودمر الحلا وناس المنزل آجمعيين .
أحضرت ترينا القهوة وجلست علي شمالي ورددت صاروخ ؟ يبدو أنك تمزج؟ لا حاشا لله أن أمزح الم
أقل لك بالسودان حرب بين الشمال والجنوب أقتربت في مدتها من حرب داحس والغبراء .
هل هذة الحرب دينية ؟ لا ليست بدينية هذة الحرب
من أجل أن يملاْ السياسين كروشهم بالمال والغلابة لا بواكي عليهم الم تشاهدي معي يوم جمعة في منزلي برنامج في ساحات
الفداء أها اليوم داك الكوماج الشوفتيهوا كان في نص الخرطوم
( كل محاولاتي أن تصرف أو تعدل ترينا فكرتها بالزواج مني )
رمقتني بنظرة حنينة طيب ما الذي يذهب بنا الي هناك ؟ أعمل شنو عاداتنا وتقاليدنا في حالة أن
نتزوج لابد أن مذهب الي هناك والا حرمتني العائلة من الميراث
( البيشوفني منفوخ وشابك ترينا بيحرموني من الميراث يقول عندنا أملاك آل مكتوم )
وفي سري لو جدي ورثني البيجبني هنا شنو .
وهل أملاك العائلة كفيلة بالتضحية عشانها بحياتنا ؟
عيييييييك
قروش وعقارات النار ما تأكلا .( سعيلي الله ماعندي ورث غير حمارة عرجا و مدبرة وجحش أتولد علي كبر)
وفوق كل هذا وذاك لازم نستغل فرصة شهر العسل هناك لعرضك علي عائشة فرج الله للختان ،
أعمل شنو دي عاداتنا كدة .
فتحت عينيها الداكنتين مين عائشة فرج الله دي وماهي مهمتها ؟
عائشة فرج الله دي داية قانونية قطعت ليك أحساس بنات الحله الجديدة عن بكرة أبيهن آآي والله ومرات بتشتغل أفور تايم
ممكن تعتبريها ترزي . طيب لو رفضت ؟ ليس لديك مفر من مقابلتها مادام تزوجتي سوداني سوف تقوم الاسرة بأستجار
أثنين من النساء لا يقلون ضخامة من الجحشين المرابطين بالخارح أخوتك وايروا وموزوا وبعدها تمارس
عائشة فرج الله مهمتها المحببة في قطع كل ما هو زائد .
لكن لكي نتحايل علي العادات والتقاليد يمكننا أن نعيش girlfriend and boyfriend وكفي المؤمنين
شر القتال وعليك أقناع الشايب وامك وأخوتك بذلك .
( مالي ومال زوجتك أبنتي العاقل البالغ البكر في هذا العمر ، كدة بضمن أي لحظة عاوز أكبر اللفة
بكبرا ,انكرا حطب عديل كدة ، مش مافي مستند زواج طب (.........) ) .
ترينا غارقة وتفكير في ماقلت سمعت صوت البغل وايروا ينادي بأن الشايب عبدالقادر قد أتي ميعاد
نومه وعلينا أن نخلص في ظرف ربع ساعة .
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عمار محمد ادريس)
|
ردت علي ترينا متجهمة الوجه وتبعتها بتكشيره girlfriend شنو و boyfriend شنو
يا الدائش لو سمع مني او منك عبدالقادر هذا الحديث لذبحوني وذبحوك .
* في سري الدائش تطير عيشتو انا موجود في اوربا ولا في نجع حمادي في صعيد مصر ؟ كمان جابت
ليك ضبح ، أنعل أبو دي بوسه يعني لو كان هببت حاجة تانية كانو حيعلقوني في الحبل دا زي الشرموط ؟
أها والحلل شنو ياترينا؟
# نحن لا نتنازل عن عاداتنا في الزواج
* هي عاداتكم دي منزله ؟ أسمعيني طيب فلتنتظروني مدة من الزمن حتي اوفر تكاليف الزواج .
# زواجنا غير مكلف بالمره
* رددت عليها بأستهزاء زواج الكوره ولا شنو ؟
# ماذا تقصد؟
* لا عليك بكلامي لو قعدت أشرح ليك الي يوم القيامة ماحتفهمي بأن هناك زواج أقلهن مؤنة
أكثرهن بركة وزواج جماعي وانا لو كنت عاوز زواج زي دا ماكنت أتنيلت زمان. الجابني هنا شنو أسك في القروش ، كدي
خلينا في الورطة دي لانو الشايب عاوز ينوم وانا
عاوز أنوم وأنتي عاوزه تنومي لكن فرق شاسع ما بين نوم الشايب ونومي والنوم العاوزاهو أنتي.
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
زي ماقلت ليك زواجنا غير مكلف تعطيني لفافة عنقك وما أن ربطتها في عنقي معناها بأني
قد قبلت بالزواج منك ومن ثم توضع مكنسة ونقوم بالقفز عليها وبعد القفز تكسر قطعة من
الخبز نصفين يسكب في نصف قطرات دم من إبهامي والنصف الاخر قطرات دم من إبهامك ويأكل كل
منا النصف الذي به دم الاخر وماتبقي يكسر فوق رؤوسنا وبعدها نغادر المكان علي أن نعود
في اليوم الثاني لنشارك الجميع في الرقص والغناء وبعدها نتصل بالبلدية لتحديد وقت لاحقا
لتسجيل الزواج رسمي . وبما أني مجهد وكنت شبه مستيقظ ولكن بعد سماعي لعادة زواجهم أستيقظت تماما .
شنو قطرات من إبهامي وقطرات من إبهامك الشيء زواج ولا فحص ملاريا وخبز شنو الفيهو دم
الحأكلو ليك ، تأكلكم الارضه كلكم عن بكره أبيكم شوفي ياترينا زواج الضيوف مايحضرو قبل
أسبوع من الزواج دا مازواج ، زواج مافيهو دلوكة وزغروتا وهلال فوق الجبين ما تفكري فيهو ،
زواج مافيهو موسيقي القربه و سوط عنج وبطان أنسي ، زواج مافيهو ضبح وسلخ شوفي ليك دلدول غيري .
و عشان ما ننفخ في قربه مقدودة .وقبل أن تنبت شفاهها بأي كلمة مما قلت البطل كبس .
سمعنا صوت الشايب عبدالقادر ووايرو وموزو قادمون نحونا .
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
جلس وايرو علي مقعد القيادة وأمراني بأن أجلس في الامام وجلس موزو خلفي تماما
حاملا مسدس . مشهد لا تصدقة عين
أن يحمل أحد مسدس في اوربا وفي مملكة هولندا بالتحديد ولكن للغجر وضع خاص فكل المسئوليين
يعرفون نشاطاتهم المشبوهه ولكن يغضون الطرف عنهم . وما أن تحركنا بدأت أستعيد شريط هذة
الليلة أبتداء منذ أن وطت قدامي كامب الغجر وأرهابي بالسلاح والعجوز الجالسة علي كرسي
متحرك وأطلاق الرصاص المتبادل وضربي لسولي وأتصالي بود كرار وكيف خزلني وبينما أنا شارد
الذهن قاطعني موزو هل نجد عندك بالمنزل ويسكي ؟ في هذة اللحظة هداني شيطاني الي فكره جهنمية
وأضرب ثلاثة عصافير بحجر واحد اولها أن أرهب ود كرار حتي
لا أكون أضحوكة في أي مجلس يقعد فيه وثانيها أن أوصل له بأن الغجر أصدقائي والبينا عامرة
بالكذب وثالثها حتي أنتقم منه لعدم نجدتي وأنا الذي يجدني دائما في مشاكله فرددت علي موزو
أنا لا أشرب الخمر ولكن عندي صديقي سوداني يسكن بالقرب مني ومنزله عامر بكل أنواع
الخمور ( مع أنو ود كرار أيضا لا يتناول الخمر ) لكنه بخيل . أبتسم وايرو وأذا بخيل
كيف له أن يعطينا قليل من الخمر ؟ سوف يعطيكم مرغم ماعليكم الا أن تشهرو السلاح في وجهه
فقد أستدان مني مبلغ من المال ولم يقوم بأرجاعة منذ زمن ولعل هذا المبلغ يساعني في أمور الزواج
( لم يستدن ود كرار مني مبلغ لكن التبلي علي الناس صنعة ) وحينها يمكنكم مساومتة
بتقديم الخمر لكم رغما عن أنفه. ردد موزو وماذا اذا أتصل بالشرطة؟ في سري ود كرار
بالمزاح لمن أشهر السكين في وجهوا بيرقد مخلل، ناهيك لمن يشوف الابغال ديل نص الليل
وفي أياديهم مسدسات والله زي ماقال لي قبيل حيقعد ليهم علي ركبتيه ويغني اللول اللول يا لولية
بسحروك يا للا الحبشية . لا يستطيع ياموزو صديقي وأنا أعرفه لكن لا تستخدمون معه
العنف فجسده لا يستحمل لكن لابأس من لكزة لكزتين و كل شيء سوف يمر علي مايرام.
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
وصلنا الي منزل ود كرار وهو الذي يسكن في عمارة من ثلاثة
طوابق معظمهم من العجزة والمسنيين وينامون من الثامنة مساءا نصف عنده مشاكل
في السمع والنصف الاخر يعانون
من ضعف النظر يعني ود كرار لو ضرب الكوراك مافيه زول بيسمعو في العمارة كلها .
راجعت الخطة جيدا مع ويرو وموزو
وتقدمت وضغطت علي جرس الباب فآتاني صوته من أعلي آلو
مين ؟ أنا الدائش . ياود الباهي جأتك البلاوي طلعت بالسلامة
ماعارفك زي الكــلب بي سبعة أرواح . أتفضل أطلع تطلع روحك صحيتني من نومه
( أنا أتحليت مبدئيا لكن الليلة الله يحلك أنت) تسلقت السلالم وخلفي الابغال
ومن وطء قدمي علي باب الشقة ود كرار عين مغمضة وعين مفتحة شاف ليك الغجر في شنو ؟
تقدم وايرو ناحيتة ولكزه بقوة لماذا لم ترجع لي صديقنا المبلغ الذي أستدنتة؟هنا
ود كرار أستيقظ تماما والتفت ناحيتي ياود الباهي الله لا غزا فيك بركة يازول قروش شنو
الاستدنتها منك ؟ وانا كاتم ضحكتي وبحزم مبلغ الاف خلدن.
* أنت يازول شكلك كدة زره الليلة دي طيرت عقلك من تي شيرتيك المعفص دا
التقول لايكاهو بقرة متين أنا أدينت منك
قروش ؟
# قبل عام من الآن .
والله ود كرار في عز البرد عرق عرق التقول قائم أسع من حفرة الدخان ونطط عيونو ،
خلاص خارج الجماعة ديل وبنتفاهم، كيف عاد بنتفاهم ولعلمك المسدسات دي كاتم صوت
والناس ديل ماعندهم رحمة يعني قولة طاااخ دي لا في صوت بينسمع ولا يحزنون . تقدم
ناحيتة وايرو ولكزة للمرة الثانية لا تتحدث بلغة لا نفهمها تحدث بالهولندية
( ود كرار ضعيف في اللغة ) يا الدائش الزول دا بيقول في شنو ؟ قال ليك تحدث باللغة
الهولندية حتي نفهم ماذا تبرطم . يأخ قدر الهولندية في راسي والله طارت ترجم لي أنت.
أنت قبيل نجدتني عشان أنجدك
هسع ؟ ياودالباهي جأتك البلاوي قبيل أنت مشيت للمشاكل برجليك لكن أسع أنا المشاكل
جاتني قدام كراع سريري دا.خلاص ياود كرار أسع سريرك دا أنشاءالله تمشي فيهو لأمك
جنازة . عليك النبي تتف سيرة الموت دا من خشمك وأنا زول والله في مقام عمك لو بتهظر
زي عوايدك طلبتك بالنبي تبطل والله قلبي قرب يقيف وكرعيني ماقادرات يشيلني .
لكن لسع لسانك بينطق وانا عارفك ياود كرار أنت زول قليل أدب ، طويل لسان وقليل إحسان
أسع لو قلت لاصحابي ديل يخلوك بكره بتمسك تلفونك دا وتكسي بي العرايا .
يازول وحيات الملحوالملاح الاكلنا مع بعض سيرتك
دي مع نفسي مابجيبا تاني . التفت ناحية البغال خليكم معاهو أنا ذاهب للحمام ،
كأنت بداخلي ضحكة مجلجلة قربت للخروج وكانت سوف تبطل لي الحبكه كلها وأستدرت
ناحية الحمام وما أن قفلت الباب خلفي ضحكت حتي أدمعت عيناي كل ما
أتزكر منظر ود كرار وهو يرتعش بالخارج.
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
أكملت ضحكي وخرجت وجدت موزو بيتكلم في الموبايل وويرو ينصت للمكالمة ، تقدم
ود كرار ناحيتي وبصوت خافض يأخ أنا من الليلة ماعاوز أعرفك ولا عاوز أشوفك ، أنت زول كلك
بلاوي ومشاكل بتمشي تصيع وتجيب لينا الكفاوي في محلنا ونحن ناس ماشين تحت الحيطة وبنقول
ياهادي ولعلمك ماكان غالبني أضرب دا بي دا لكن الكثرة غلبت الشجاعة. طيب يا ود كرار المانعك
شنو ماتضرب دا بي دا . الدائش هووي والله انا ساكن في الشقة دي ثلاثة سنين مافي جار سمع صوتي ،
ولا حتي في زول عارف أسمي منو ، بلتقي مع الجيران في النزول والطلوع غير هاي هاي تاني كلمة
مابديها بشر فعليك الله تنهي المسرحية دي خلينا نمشي ننخمد ننوم دا لو جاني نوم تاني بكره
عندي مائة شغلا في راسي دا. قاطعتة لالا بكره بالذات عاوزك ضروري تفضي لي نفسك ، عاوز أسوقك
معاي الكامب
( وكنت جادي في طلبي) أحتمال أتزوج. وأنا مأذون ؟ يأخ ما مأذون شاهد ساي . يازول ورحمة
والدي كامبات الزغينر ( الغجر) ديل مابخت رجلي فيها الا تخدرني أو تبنجني وتشيلني وأنا فاقد
الوعي ، شوف ليك زول غيري يمشي معاك مالي ومالك ، نحن جينا البلد دي بجواز سفر واحد؟
أنهي موزو المكالمة والتفت ناحية ودكرار يلا عليك بأخراج المبلغ حتي ننصرف ، التفت ناحيتي
الزول دا بيقول في شنو ؟ ياودكرار قال ليك أديني قروشي عشان يشوفو أشغالهم . يا الدائش الله
يقرش كنكونك قروش شنو يازول أنت عاوز تلبسني تهمة والسلام . والله لو رميتني من السماء الي الارض
ما بتقع مني خمسين خلدن ناهيك عن الف. طيب يا ود كرار عشان ننهي القصة دي الناس ديل شاربين
ومنعنشين أنزل جيب ليهم من البار في بداية السنتر خمر قبل ما يقفل عشان يدونا عرض أك########م .
شنو ؟ وتبعها والله البار دا لقيت فيهو فرصة عمل تنظيف بس رفضت أشتغل فيهو عاوزني أمشي أجيب
خمره منو أنت ماجادي. خلاص أديهم حق الويسكي وخلينا نخلص قلت له هذة الجملة وكنت أتمني
أن لا يوافق ولكن خذلني خلاص عندي خمسة وعشرين خلدن تشيلوها وتدوني عرض أكتافكم ، الواحد
بيشتري راسو لكن تدخل عليكم بي أربعاء وعقاب شهر . وفي هذة اللحظة كنت عاوز أوصل
لود كرار بالكضب أنو الابغال ديل يمكنني أن أذهب بهم شمال وآتي بهم يمين تحت إمرتي وطوعي .
التفت ناحية وايرو وموزو وقلت لهم للأسف لم يحضر صديقي ويسكي هذة الليلة لعدم وجود
المال الكافي معه ويمكنكم الذهاب ونلتقي غدا مساءا بالكامب .
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
إستدار وايرو وموزو الي بابة الشقة مودعين وقبل أن ينزولوا من السلم
الاول خاطبني ود كرار يلا أنت زاتك حصلهم الموقفك شنو جأتك نيله تأخدك في ساعة زمن
واحده وتاني ماعاوز أشوف خلقتك دي ، التفت عليه باسما والله عارف لسانك طويل وقليل أدب
أها أسع أنا بنادي عليهم والمره دي أنشاءالله يقطعوك حته حته عالم تخاف ماتختشي ووقفت في
باب الشقة حتي لا يقفل الباب وصحت يا وايرو وما ان أتاني صوت وايرو من السلم التاني مجيب
وعاود الصعود مره اخري ،رجع ود كرار خلف ظهري هامسا يأخ أن بهظر معاك أنت مابتعرف الهظار
يأخ والله بهظر خليهم يمشو والله أعمل ليك شاي لبن حتي لو عاوزو من لبن الطير . وما أن وقف وايرو
أمامنا تماما قلت له اليوم مساءا موعدنا لكن كنت عاوز أعرف التوقيت المناسب لكم .
زكر لي السابعة مساءا وعاود راجعا .
وما أن قفلنا باب الشقة وضمن ود كرار مغادرة البغال للحي
التفت ناحيتي شاي شنو البعملو ليك وش الفجر تشرب السم الهاري شاحد ربي ومولاي ،
يازول ما تعقل متمني من كل قلبي يمر أسبوع ما تعمل ليك كفوه ، أنا زول أكبر منك
خذها مني بمقابضتك دي بترجع السودان في صندوق ، عليك النبي ما تجيب لينا مشاكل والله
الواحد الفيهو مكفيهو ، أنت قايل دا السودان ،نحن في غربه خليك عااااااااااااقل يأخ.
تركته الي أن أكمل حديثة والتفت علية ضاحكا ياود كرار أنت خواف والله اليلة أول مره أعرفك
خواف كده مالو قبل شوية صوتك ما طلع
وعرقك كابي في البرد دا التقول أخذتا ليك بوخة دخان . أبتسم وردد أنا ما خواف لكنني عاقل ،
أهلنا قالو الريح لو جاءت أحني ظهرك وبدأ في الاسئلة التعسفية، ديل أهل صاحبتك ديك ؟ وقبيل
قلت لي في التلفون أرهبوك تأني الرجعكم سمن علي عسل شنو ؟قالو ليك شنو وقلت ليهم شنو ؟
وأنت زاتك الوداك ليهم شنو في محلهم ، التي شيرت اللابسو دا مالو معفص كده ؟
وزواج شنو الحتتزوجو؟ سؤال يليه سؤال وأنا أنظر اليه مبتسما لم أرد عليه ولن أرد لانني
أعرف ود كرار علي ظهر قلب . زول قلبو أبيض وكريم وفيه كل الخصال الجميله ولكن عيبه
الوحيد جنو وجن المشاكل ولا تطمع في نجدتك يوماعلي يديه ولا تأتمنه علي سر فالفوله
لا تنبل في خشمه ، أي سر تسلمو ليهو بكره بيمليء البلد والبلدين وأنا قصدت بزيارة
الابغال له ليلا في منزله حتي أرهبه وأضمن أن لا يخرج ما دار بيني وبينه بالتلفون
عندما أتصلت به مستغيثا .
خاطبني أن بكلم في نفسي ما تولدني يأخ ، قول لي الحصل شنو؟ يا ود كرار أسئلتك
دي ماعندي أجابة ليها بس قبل ما أغادر خليك عارف حاجة واحدة لو مشيت فتحت خشمك
دا بما دار بيني وبينك في التلفون أنا زاتي سوف أحكي خوفك ورجفتك و عرقك
الكابي وبحلف علي المصحف كمان لكنك لا تستطيع أن تحلف علي حالتي وأنت لم تراني .
خرجت متوجها الي شقتي أقدم رجل واخر رجل وراسي به مليون فكره وفكره
هل أتزوج ترينا مساءا ، هل أعمل معهم في تجارة المخدرات والممنوعات ،
هل أرفض والبيحصل يحصل ، هل أقوم مسرعا بتجميع أغراض الضرورية وأرحل تاركا
منزلي الي جهه غير معلومة لديهم هاربا ، هل وهل وهل أفكار تراودني وأنا
في طريقي الي شقتي قطعت المسافة بيني وبين منزل ود كرار راجلا في ساعة
وعشر دقائق ولو تحت ظرف طبيعي المسافة لا تبعد سوي خمسة وعشرين دقيقة
وأكثرها نصف ساعة ، وما أن وصلت الي شقتي أرتميت علي كنبة الجلوس
في الصالة نائما بدون مقدمات كأنني لم أنم منذ قرن .
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
اخونا عادل الباهي،
سلامات
يأخي فاتت سنة وجات سنة، وقلنا هسه انت عرَّست ترينا دي ويمكن بقيتو تلاته كمان وممشي امورك مع نسابتك تمام التمام.
صحي قالو حبل المهله يربط ويفضل، لاكين يا اخوي حبل مهلتك دا، تراهو زي الحبل الفوق دا، ربط والفضل منو اكتر من الربطو بيهو.
بعدين دي عمله تعملا في ود كرار المسيكين دا، دا الظاهر عليهو زول داير يستر حالو في الغربه البطاله.
يلا كمل لينا القصه شحتفتنا.
لك الود
عثمان دُنقس
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: Osman Dongos)
|
Quote:
بسمع في الاغنية دي طوالي اتزكرت قصتك يا ود الباهي
الغجر ديل حبهم مؤلم |
حبيبنا الكونت
شكرا للأغنية الجميلة يأخ الغجريات لا يعلا عليهن جسم ووش مبتسم
عاداتهم أشبة بعادتنا وعادات الصعايدة فيما يختص بشرفهم
بس عيب الغجر اللف والدوران ( سرقة ،نصب ، احتيال ، قتل) ديل
الصفات دي جارية في دمهم ، يسكنون لوحدهم ويحبون العزلة وأول مادرجة
الحرارة تتعدي العشرة درجات تجدهم رجال ونساء داخل كامباتهم شبة أمفكو فاااااشنو
ديل حبهم بيودي التوج عديل كدة 
| |
|
|
|
|
|
|
|
|
|
Re: في عرين الغجر ( أنا وترينا وليلة شتوية بنكهه البارود) من مذكراتي (Re: عادل الباهي عبدالرازق)
|
العزيز عثمان دُنقس
حياك الله وطابت اوقاتك بكل خير
Quote: يأخي فاتت سنة وجات سنة، وقلنا هسه انت عرَّست ترينا دي ويمكن بقيتو تلاته
كمان وممشي امورك مع نسابتك تمام التمام. |
ياحبيب لو تزوجت ترينا أكان دا حالي ، الواحد كان بيع سلاح ساي
شبع قروش لكن الغجر ديل تتزوج منهم مشكلة تشتغل معاهم مشكلتين ههههههه
Quote:
صحي قالو حبل المهله يربط ويفضل، لاكين يا اخوي حبل مهلتك دا، تراهو زي الحبل الفوق
دا، ربط والفضل منو اكتر من الربطو بيهو.
|
والله عارف الشغلانية طولت لكن مابيد حيلة مع جري الدنيا المابيخلص
لكن وعد عما قريب سوف أنتهي منها بالكامل .
Quote:
بعدين دي عمله تعملا في ود كرار المسيكين دا، دا الظاهر عليهو زول
داير يستر حالو في الغربه البطاله. |
ياعثمان أخوي ودكرار دا زول سمح وكريم وكل الصفات الحلوة فيهو
بس عيبو لسانو. زول جمجار مابتتبلي في خشمو فولا وأصلا ماتعشم في يوم
يساعدك في مشكلة ، يكون ماشي معاك في الشارع تدور ليك مشكلة أول
ما البنية تدور بيأخد بعضو ويفك البيرق والله كأنو ما بيعرفك ولاشافك
قبل كدة وأنا عشان أسكتو وأخرس ليهو لسانو خليت الجماعة يسجلو ليهو
زيارة ليلية في عقر داره
| |
|
|
|
|
|
|
| |
محمد على طه الملك
عادل الباهي عبدالرازق
عمار محمد ادريس
Osman Dongos
أحمد عزالدين
فيس بوك
تويتر
انستقرام
يوتيوب
بنتيريست