ذكرياتى فى جنوب السودان ... عندما يصبح القتل منهجا

Quote: هشام عباس تحياتي لك وان تعيدنا لايام اللعنة امتحنت الشهادة سنة ٩٥ من مدرسة نيالا الثانوية واحرزت نسبة جيدة تؤهلني لدراسة القانون الذي اعشقه ولكن عامل العناد وركوب الراس بالبسيط كدة عايز تقرا جامعة لازم تمر بمعسكر الدفاع الشعبي ومشيت المعسكر وامروني بالارتكاز وبدا واحد عسكري بحلاقة شعري بالموس من غير موية وطوالي دورت معاهو كاسوري وحبسوني لمدة ثلاثة ايام في كونتينة حديدىة ويتخلله كل انا الجزاءت العسكرية واللانسانية وبعدها طلب مني الذهاب للعنابر في عضر اليوم الثالث طلعت من المعسكر علي البيت طول وكرهت اي حاجة اسمها عسكرية وكاكي والي اليوم بكرهه وفي عام ٩٦ امتحنت للمرة الثانية واحرزت نسبة جيدة جدا وتحت اصرار الاسرة التحقت بمعسكر الدفاع الشعبي وانتهت بشرها وخيرها معرفة الاصدقاء وخلق الصداقات ولم يحالفني الحظ في تحقيق رغبتي ثم اتي العام ٩٧ عام النكبة ومعسكرات الخدمة الوطنية والتحقنا بها مع اصدقاء وشباب الحي وكانت اسوء من سابقاتها المهم في اواخرايامها سمعنا من اذاعة التجمع بكارثة العيلفون وغرق الطلاب وقتل بعضهم المعسكر الانضباط فيهو قل نسبة لتوتر الاعصاب والشك في اي تحرك جماعي في جكة الصباح يعني لو في جكة باتجاه المطار او القيادة والله الطلبة بقلبوهو جري عديل وتوش لاقرب بيت او زقاق المهم في امسية من الامسيات جانا واحد كان قد السلك للملكية وجاب لينا خبر طازج انو طلاب الفاشر رفعوهم الجنوب وبكرة الصباح حيرفعو معسكر من المعسكرات للجنوب وبمدينة نيالا ثلاثة معسكرات هي دوماية في غرب المدينة ومعسكر التجارية بمدرسة نيالاالفنية الثانوية ومعسكر كولكولايا ودي اكعب معسكر بعد الخبر دا طوال اتحركنا للتجمعات بتاع الطلاب المنتظرة محاضرة من احد الكيزان الدقانة وفكينا ليك الخبر مع زيادة بهارت من عندنا ساعة او اقل الطلاب كوولهم دقشوا الحلة اليوم التاني بالميكرفون والاذاعة بوعيد وترغيب عايزيننا نرجع للمعسكر لانو التخريج فاضل ليهو اقل من اسبوع وعيييييييك الحضرو التخريج اقل من نصف العدد وحضر كثير منا التخريج بالملابس المدنية وفي نصف الاحتفال اختلط الاسر بابناءها اي اسرة حضنو ولدهم وبقي في البقدر يفرقهم وهو ما دعا زبير محمد صالح الي مخاطبة الاسر بدلا من الطلاب وتخريج ما فيهو سلام سلاح زاتوووو ------------------------------- منسق المعسكر -كان علي مجوك انضم للحركات والان وزير اتحادي علي ما اعتقد ----------- عثمان شريف بوردو-فرنسا