ملاح بت علوبة الفركتو وابتو

Quote: حلّـــــــــــــة ميرغنى حلَّة ميرغنى السواها / كان ما كَفْرة الجوع مافى زول بِدناها / يا عبد الله شور كيف الطريقه معاها / قال لَى إلا نِتشمَّر نِخوضْ فى ماها ) ودّر خِبرتو المشهوره / وقال يا أخوىْ أخير أعَصِــر ْ على الماسوره / جرِّبْ غيرها دى والله بارتْ بوره / وخوايس فيها رقدَت بى كُتــُرْ بنَضوره ) كان قال ليكا انا طباخ وشُغلى نضيفْ / تَحَـلـِف إنو كان مو شيف مساعِد شيف / يا عبدالله شور دى معاها نعمل كيف ؟ / قال دايرين زيادة ناس ولورى رغيفْ قبيل وكْتْ الحكايه كلام / قايلك خبره جَِدْ بتشْــرِّف الدمّام / الخاربه التقول مشدوده لى حمام / تاكُلْ مِنِّها وتــِتــْوضا كلٌّو تمامْ / الجبناها من الوَرقه / ساعتين غازها يكْتُل وماهو قاطِع فرَقه / شايل كُمْشَتِك سيف والغِطايه الدَرقه / ولوازمِك كُــلَّهن راحن شمار فى مرقه قبيل ما قلتَ لَىْ حدَّادى* / خبره طويله سبعه سنين وقيلَ زيادى / عان لى ها الخساره الروَّحــَتْ لى الوادى / ش...طه وتوم وبصلاً كوم وزيت أولاد الرواحله البى الكرم غمرونا / أريتك كان قبيل سويتلَهُنْ مكرونه */ طِرونا وجونا ضيفان من بعيد نَطَرونا / وبعَد غَدْوتنا ديكْ شهرينِ ما ذكرونا وكان ناديتنى لى ماها المَطنِبِج أغرفو / وحاتك كان ضيوفنا يصدقو ويعترفو / الكيف سمَك الخليج العوم بصلها بعرفو / وصِفها بجيكا فى الفرْخْ المختَّــم ظرفو . * المكرونه اشاره الى ليبيا وخبرة مير غنى بها 10 سنوات باعتبار ان المكرونه هى الطبق الرئيسى للشعب الليبى * اما الحدّداى مشتقه من النسوان حداديات وقد نجر المصطلح الامين قدوره وود الندام ومصطفى حاج الطيب فإن رفضت العشاء معهم ايام عزوبيتهم يغرونك بقولهم : كدى قول خير الرجال حداحيد )