موضوع العنصرية بالبورد . لماذا أتصدى لها ؟

Quote: شكرًا اخي دينق التقينا في نقاط هامه وهي انك تتحدث عن عنصرية الدوله او الحكومه هو وبال كبير لانه لو بدا بفقه الضرورة. حينتهي بدويلات صغيره اذا الهدف هو بناء امه والا كراسي لبناء امه حيكون وراءه كراسي شبه دائمه لانه منو البخسر ناس بنوه ووصلوا لمصافي الدول(اردوغان اوبوتين) .....لو الهدف الديمومه علي الكراسي مامحتاجه اتمها.....أنا معاك انه نكافح العنصريه بس ما تغلب علينا العواطف السالبة وهي عواطف المجروح من العنصريه بل العواطف الموجبة. المتاكده من عظمة الشعب السوداني وانه ارض خصبه لزراعة كل جميل بس حبة تعب وخصوصا مع انخفاض نسبة الاميه لانه العنصريه في السودان ما سلوك حياتي يومي بل موروثات تحاول الأجيال الجديدة الخروج من جلبابها والدليل على انه ما سلوك يومي انه الاخوه الجنويين كانو مابدفعوا في المواصلات يعني ماكان مخصص ليهم بصات براهم لأنهم جنوبين لا كان يركبوا بس مابدفعوا والله شوفة عيني وكثير من في المنبر بعرف دا كويس ..هل أخبرك مفاجأة. صغيره أنا من جماعة الهامش يعني مأمن الشماليه من شمال كردفان دار حامد بس مابهمني راي اي انسان عني لاني عارفه نفسي بنت اكرم العرب وانتا ابن ملوك النيل ردد دي في سرك مابهمني زول همي وطن أنا بحبوه اسمه السودان بس الغايه نحنا متفقين عليها وهي انتهاء العنصريه بس الوسيله نحنا المختلفين فيها يعني طولة البال وعدم الاساءه للآخرين خلينا نحنا نحكم عليهم من كلامهم ما من اساءتك ليهم لانها خصم عليك لأنك انت صاحب البوست والرساله في نفس الوقت بس لو تصديت للعنصريه في البورد أنا معاك بس في السودان الشمالي دون الجنوبي أنا مامعاك لازم تتناول الاتنين لوجود عنصرية الدوله في الاتنين.. وانت اختصرتا عنصرية دولة الجنوب بكلمتين وبشرتا بمستقبل باهر دون تبيين كيف ومتى وكأنك تقول لي هذا ليس موضوعنا وهو ما اختلف معك فيه .تعرف انه ليه ضربتا ليك مثال بمؤسس لانه رسالته وصلا بتعامله معانا خلانا نندم علي اي نظره عنصريه نظرناها للاخوه في الجنوب خدم مصالحنا جمعنا حوله بتواضعه وثقافته وحبه الصادق للسودان الكبير كان يحل كل مشاكل الناس ويجامل كل الناس وكان وكان يعني بافعاله علمنا ان الاصاله والنخوه والأخلاق الكريمه لاترتبط بالجغرافيا ولا الأشكال ولا الألوان ً......معا اننا كلنا نتشابه في الشكل الخارجي ...انت قلتا ان معاملة المعتقل السياسي تخضع الى اي مكان هو قادم منه ماهو دليلك? اذا ما يذكره كثير من المعارضين في المنبر من مالاقوه من معامله هو محض افتراء لأنهم من الشمال. هل ظهر اي حراك مسلح في الوسط لتحكم على دموية الرد على الهامش اذا كيف بنيت المقارنه هل تقول ان التنميه لاتجعلهم يثورون إليك تسال د.جون عندما زار الشماليه وقال الناس ديل ما عندهم غابه ..اذا مظلومين وساكتين كمان ...أنا قريت مره لواحد توعد قبيله بمصير مظلم لو لم تتبرا من الحكومه دا الراجي الناس من المعارضة ?هل تخدم هذه الأفكار المعارضة هل تزلزل عرش حكومات ام تزيد عدد المتحلقين حولها والخوف من مما وصل اليه الحال في ليبيا او مصر من الانتقام والذي حول الثورات الى وبال ولعنات يا اخي أنا بنظر لمستقبل البلد لو دي النظرة البديله حيكون اغلب الناس بين حلين أحلاهما مر..... يا اخي لنسعى لمبادئ تحكم دوله تغنينا عن التفاصيل الدقيقة يعني قانون وعقوبه لأنك قلتا انه السويدين مابرحلو المابعجبهم ودا لسبب واحد القانوووووووووووون .........اذا معا لبناء دولة القانون التي لا كبير عليها وأشكرك على افراد هذه المساحة للرد علي وتتواصل نقاشاتنا ان شاء الله