|
Re: تعالو اسمعو مصطفى سيد احمد يغنى (العديل والزين) (Re: بدر الدين الأمير)
|
Quote: كتابة مصطفى لبنينة العديل والزين وتغنيهى بها هى واحدة من الذكريات المحفورة في النبض ومصطفى قام بتاليف البنية وسجلها بمناسبة زواج صديقنا نوح عبدالواحد الصادق ليسافر بها نوح للسودان كى يتم بها مراسيم زواجه بود حامد وبعدها وبعدها بشهرين رحل مصطفى .... |
التحية لك الاخ بدر الدين الامير اذكر هذه البنينة تماما وكيف قدمت في حفل ابن عمتي نوح عبد الواحد .. وحفظناها حينها عن ظهر قلب ... مشكور علي هذه الذكريات ان كان مصطفي محفور فينا الي الابد ...
| |
|
|
|
|
|
|
Re: تعالو اسمعو مصطفى سيد احمد يغنى (العديل والزين) (Re: saidahmed shami)
|
نص البنينة هي ليلة العديل والزين والليلة العديل يا عديلة الله بسم الله إبتديت زولي السمح والزين من قومة الجهل معروف ولد سترة بالفال والسماح لنوم اخو الاخوان مستور العروض نوارة الديوان لي الجار والبعيد قدحو دوام مليان ود جعل العزيز قيدومن الفرسان ياقسم الكريم ابشر بشارة الخير فال نوح العيال والتانية رزقة كتير رقصن في الفرح ديسن طويل وغزير أخوات الرجال لابسات دروع وحرير مصطفى في الخليج نظم كلام موزون ذكر فيك وصوف درراً خفي ومكنون عقبال يا محمد كل صعيبة تهون ويجمعنا الفرح في ديارنا زي مايكون الشايقي الفصيح فرحان لود عمو ركازة الصديق شرق العيال تمو بالزين والعديل يا أختو يا أمو واخوانو العزاز طعم الحلو ونمو
| |
|
|
|
|
|
|
Re: مصطفي سيد احمد (Re: Abureesh)
|
سلامات عوافي
رحم الله مصطفي سيد احمد والهم كل معجبيه الصبر والسلوان
انت يابدر الدين مالك بتشحتف فينا كده !! مدنا بالتسجيل ينولك الثواب فينا وتروي عطشنا للمصطفي
مع ودي واحترامي
| |
|
|
|
|
|
|
Re: مصطفي سيد احمد (Re: saidahmed shami)
|
استاذ بدر الدين والرائع سيد احمد شامي وكل من مر على هذا البوست الحنيين زيكم وكل عام وانتم بخير
لو لاكم ما كنا اتذكرنا اغاني حلوة زى دي ...
كونو بخير ..
| |
|
|
|
|
|
|
Re: مصطفي سيد احمد (Re: saidahmed shami)
|
يا سلاااااام ياخى
اليلة اليلة العديل والززززززززززين
الجعل العزاز قيدومة الفرساااااااان
اليلة العديل والزين
واليلة يا عديلة الله
رقصن فى الفرح ديسن كاااااااااااااابى طووووووويل وغزير
اخوات الرجال لابسات دروع وحرير
أيييييييييييييييييوى
حاجة تماااااااام
--------------------------------
انت يا بدر الدين مشتاق ليك لى جرتق ولا شنو بعد كده شوف ابريقك ومصليتك وين
| |
|
|
|
|
|
|
Re: مصطفي سيد احمد (Re: Adil Hamza)
|
Quote: سلامات عوافي
رحم الله مصطفي سيد احمد والهم كل معجبيه الصبر والسلوان
انت يابدر الدين مالك بتشحتف فينا كده !! مدنا بالتسجيل ينولك الثواب فينا وتروي عطشنا للمصطفي
|
ود عوض السيد والله انا جنى وجن الشحتفة بس قبيل جاتنى زنفة شغل فجأة فعذرا ياصاحب
| |
|
|
|
|
|
|
Re: مصطفي سيد احمد (Re: بدر الدين الأمير)
|
كان مصطفى يقول لنا : ان الملاحظ في العديل والزين دائماً النص يكون متفائل لكن اللحن حزين وذلك مرده إن الأم والأخوات بقدر فرحهن للأخ هن حزينات لأنه سوف يغادرهن و ينشئ أسرته الخاصة به فالحزن في اللحن مرده للفراق وكانت تلك واحدة من اشاراته العديدة لنا بأنه راحل ولوتأملنا في إختياراته لنصوص اعماله الأخيرة نجد هذا البعد بكثافة في النصوص والألحان حتى تلك الاعمال التي وضع لها أفكار الحان ولم تخرج للناس اذكر هنا مقاطع لبعضها
ما أشبه العشاق بالأنهار والأسرى للشاعر الراحل علي عبد القيوم في آخر الليل الذي أسرى دلف الجنود بجثتين الى الجـبانة الكبرى الجثة الاولى جسد نحيل خلته جسدي فوجدته بلدي لافرق يا مولاي بين النهر والمجرى! والجثة الاخرى جسد نحيل خلته ولدي فوجدته جسدي لا فرق يا مولاي بين الموت والميلاد والمسرى!
ما زلت عزائي ياوطني للشاعر النور عثمان ابكر ما بي من تيه الدنيا حكراً الاطماع في شئ بيديك لا احمل غلاً او املا أملي لقياك سعادة يومين كبيرين بين يديك لاتشكُ الحال من الابناء خرجوا للقاء ويعود العشاق والشرفاء مازلت قوياً يا وطني وفتيا ًمثل شراستنا وصفاء ليالي بهجتنا مازلت عزائي يا وطني
مفتتح الحريق للشاعر المصري احمد كامل هذا فضاء ميت والشمس تلهث في سباق الإنفلات نسيت أمومتها وباعت فرحُها للريح انكرت البراءة في عيون الفجر يتمت النهار الشمس تعطي فرصة اخرى لطير الليل كي يملى القرار وانا اسجل موقفي لا الليل قديس ولا القمر إنتصار.
وغيرهن العديد من النصوص بالإضافة لمختاراته من اغنيات الآخرين التي من العسير تحمل جماليات التطريب الحزين في أدائه لها وهي مشحونة بوخذات السفر والرحيل منها على سبيل المثال في سكون الليل – قلت ارحل - ماشقيتك وانت الشقيتني – بدر الحسن - مظاليم الهوى- في الأسى ضاعت سنيني- الرسائل عني مالوم صدو وتوارو والقائمة تطول. ومع انه كان في حالة تلحين دائمة كانت هناك العديد من جلسات الإستماع والعشرات من المنتديات الثقافية والفكرية الموثقة بالصوت التي حكى فيها عن نشأته وتكوينه ورؤاهو الفكرية والثقافة وذكرياته الحميمة. اذكر هنا وأنا متجه لتقديم حفله الأخير همس لي قائلاً اسمع نحن حانبدأ بعازة وحانختم بعازة وكانت عازة آخر أغنية غناها في حياته للجماهير في حفل عام . لقد كان يعلم تماماً أنه مغادر ولكنه كان يعي بعمق ان لديه كلمة يود ان يقولها قبل ان يغادر وقد قال كلمته غير منقوصة ومضى مبتسماً وساخراً من الموت .
مصطفى سيد أحمد وجدلية الموت والإبداع في نفس الوقت
| |
|
|
|
|
|
|
Re: مصطفي سيد احمد (Re: بدر الدين الأمير)
|
سلامات عوافي
يابدر ان شاءالله يوم شكرك مايجي لقد سبق وان خاطبني استاذي الجليل / التجاني قريب الله هاشم - المحامي بان بدر الدين الامير لديه تسجيلات لايمكن حصرها ولا عدها للراحل مصطفي سيد احمد وسألت منك بعدها ازهري محمد علي عله يكون علي اتصال معك .. واهو لمينا فيك هنا ..
وياريت القي عندك اغنية (القمير الاشرق) بالعود ؟ بتقول في بدايتها :
دا القمير الاشرق سناه عمره داب كم طاشر سنة طرفه كاحل ساعة رنا بيه ننسي الروح والجنا
فلدي لها تسجيل قديم بحفل اظنه في منتصف السبعينات
مع ودي واحترامي
| |
|
|
|
|
|
|
Re: مصطفي سيد احمد (Re: عمار محمد ادريس)
|
Quote: استاذ بدر الدين والرائع سيد احمد شامي وكل من مر على هذا البوست الحنيين زيكم وكل عام وانتم بخير
لو لاكم ما كنا اتذكرنا اغاني حلوة زى دي ...
|
ابراهيم يافاضل كن بخيرين وزيادة
| |
|
|
|
|
|
|
Re: مصطفي سيد احمد (Re: بدر الدين الأمير)
|
Quote: انت يا بدر الدين مشتاق ليك لى جرتق ولا شنو بعد كده شوف ابريقك ومصليتك وين |
وضاحة انا ابريقى اصلا مابفرط فيه ماسمعتى كابلى وهو يغنى والاباريق بتنا في اطراق كلن عندى تسجيل لاغنية وضاحة لواحدة من اجمل جلساتنا في الدوحة وكل ما افكر انزلو اتذكر وضاحة الملقوفة بتاعت سودانيز واقول ياخى دى كرهتنا وضاحة وزهرى زاتو ......
| |
|
|
|
|
|
|
Re: مصطفي سيد احمد (Re: وضاحة)
|
Quote: هسي بالله يا بدورة وشك الممسح دا وش ابريق |
وضاحة فعلا ملقوفة كدى افهمى معنى الابريق الانا قاصدو وبعداك تعالى ناكفى والتسجيل اسمك كان جا ازهرى محمد على زاتو
| |
|
|
|
|
|
|
Re: مصطفي سيد احمد (Re: بدر الدين الأمير)
|
Quote: والتسجيل اسمك كان جا ازهرى محمد على زاتو |
انت زول حاسد يا بدورة
المناديب دائما ظريفين وبعرفوا يعملوا ماركتن ومعاملات زينة
انت ليه متوحش كده
بالله مصطفى عندوا ولد فى الدوحة
انا افتكرت اولادوا بس الفى كندا اولاد بثينة
يا سلاااااام ياخى ان شاء الله ولدنا القطرى يكون فنان زى ابوا
| |
|
|
|
|
|
|
Re: مصطفي سيد احمد (Re: وضاحة)
|
Quote: بالله مصطفى عندوا ولد فى الدوحة
انا افتكرت اولادوا بس الفى كندا اولاد بثينة
يا سلاااااام ياخى ان شاء الله ولدنا القطرى يكون فنان زى ابوا |
ملقوفة وبليدة كمان قلنا نوح عندولد سماهو على مصطفى سيد احمد ونوح لمن اخد الجنسية القطرية ابنه مصطفى اصبح قطرى لذا قلنا بقى عندنا مصطفى سيد احمد قطرى فهمتى
| |
|
|
|
|
|
|
Re: مصطفي سيد احمد (Re: بدر الدين الأمير)
|
Quote: ملقوفة وبليدة كمان |
لا لا يا مندوب خليك مؤهذب شوى
كده ما حلو كلو كلو
ياخى انت زول المفروض تكون اتعلمت من تجربتك وخبرتك الاتوكيت
وتكون زول مودرن زول مندوب وبتاع تسويق ومعاملات وكده
الطاسة مالتك دى لزم يكون فيها طايوق شغال وبفهم وبعرف يتعامل مع الناس
والبدلة دى لزم يكون فيها زول يا زول
قلت لى نوح يا لوح
الله يرحم مصطفى سيد احمد كان رجل قامة وعندوا اخلاق
ويمثل شخصية الرجل السودانى المهذبة تماماً
ولن يتكرر ابداً
| |
|
|
|
|
|
|
Re: مصطفي سيد احمد (Re: بدر الدين الأمير)
|
يا سلام عليك يا بدر الدين
كم أنت جميل
رحم الله مصطفي بقدر ما أشجانا .
كامل الإمتنان علي التسجيل النادر
يا ريت تواصل فتح الكوات عن التسجيلات النادره لمصطفي يا بدر الدين وانا معاك لدي مكتبه ضخمه لأعمال مصطفي سيد أحمد
كامل الموده
| |
|
|
|
|
|
|
Re: مصطفي سيد احمد (Re: omer osman)
|
صورة من بنينة العديل والزين بخط الراحل المقيم مصطفي لنوح عبدالواحد
يظهر في الصوره الراحل المقيم مصطفي مع قسم عبد الواحد وهو الشقيق الاكبر لنوح المذكور في النص ومحمد ايضا ذكر وهو شقيقه الاصغر
المصــــــــدر
| |
|
|
|
|
|
|
Re: مصطفي سيد احمد (Re: saidahmed shami)
|
يا أمير لو كان للسعادة صكوكـ توزع وفقاً لمعاينات لكفتكـ صحبتكـ لهذا القديس بأن تكون ملازماً للمركز الأول ما حييت :) .. تحيرني نفسي وأنا أسمع مصطفى أقصد أن أغيب عنه وأعود كأني أسمعه لأول مرة في كل مرة يتكرر الشعور بالفرح به والحزن عليه .. بقناعة أقول حتى لو غنى القديس " راجل المرة " بعد ما قدَم نفسه بما قدَم كنت سأتمايل طرباً . يرحمكـ الله يا محبوب كل من جرى في دمه معنى بلدي
| |
|
|
|
|
|
|
Re: مصطفي سيد احمد (Re: عمران حسن صالح)
|
شكرا بدر الامير
اداء جميل وصوت شجى عبر بكل صدق عن الكلمات الجمليه المعبره للجرتق . يديك احساس وكأنك تسمعها لاول مره. له الرحمه والمغفره الفنان الخالد فى دواخلنا مصطفى سيد احمد.
| |
|
|
|
|
|
|
Re: مصطفي سيد احمد (Re: بدرالدين الطائف)
|
Quote: مالك يابدر الدين علينا ارجعتنا الي ايام التسعينات ومصطفي سيد احمد واشرطة قعدات الدوحة حينما كانت طازجة ... ياخي ابكيتنا يمين ... |
اسامه امس كان سهران معى الشاعر قاسم ابوزيد وبعض الاصفياء وكنا في سيرة تلك الايام الخالدة
| |
|
|
|
|
|
|
Re: مصطفي سيد احمد (Re: بدرالدين الطائف)
|
Quote: لو كان للسعادة صكوكـ توزع وفقاً لمعاينات لكفتكـ صحبتكـ لهذا القديس |
عمران ياحسن وصالح لوتلاحظ القديس قال في البنينة (ياقسم ابشر بشارت الخير فال نوح العيال والتانية رزقو كتير) هل تصدق بعد رحيل مصطفى نوح منح الجنسية القطرية ونوح ابنه الكبير مصطفى الان في المرحلة الاعدادية يعنى بقى عندنا مصطفى سيد احمد قطرى
| |
|
|
|
|
|
|
Re: مصطفي سيد احمد (Re: mekki)
|
Quote: اسامه امس كان سهران معى الشاعر قاسم ابوزيد وبعض الاصفياء وكنا في سيرة تلك الايام الخالدة |
يالها من ايام لم نكن معكم ولكننا عايشناها معكم من علي البعد ... انا الان محتفظ بجميع الاشرطة بتاعت الجلسات وباشرطتها الاصلية ... ياخي تحايانا لنوح وقسم وباقي الشباب ...
| |
|
|
|
|
|
|
Re: مصطفي سيد احمد (Re: بدر الدين الأمير)
|
Quote: يالها من ايام لم نكن معكم ولكننا عايشناها معكم من علي البعد ... انا الان محتفظ بجميع الاشرطة بتاعت الجلسات وباشرطتها الاصلية ... ياخي تحايانا لنوح وقسم وباقي الشباب ... |
تسلم ياعثمان وتحياتك وصلت لقسم ونوح
| |
|
|
|
|
|
|
Re: تعالو اسمعو مصطفى سيد احمد يغنى (العديل والزين) (Re: بدر الدين الأمير)
|
نص البنينة هي ليلة العديل والزين والليلة العديل يا عديلة الله بسم الله إبتديت زولي السمح والزين من قومة الجهل معروف ولد سترة بالفال والسماح لنوم اخو الاخوان مستور العروض نوارة الديوان لي الجار والبعيد قدحو دوام مليان ود جعل العزيز قيدومن الفرسان ياقسم الكريم ابشر بشارة الخير فال نوح العيال والتانية رزقة كتير رقصن في الفرح ديسن طويل وغزير أخوات الرجال لابسات دروع وحرير مصطفى في الخليج نظم كلام موزون ذكر فيك وصوف درراً خفي ومكنون عقبال يا محمد كل صعيبة تهون ويجمعنا الفرح في ديارنا زي مايكون الشايقي الفصيح فرحان لود عمو ركازة الصديق شرق العيال تمو بالزين والعديل يا أختو يا أمو واخوانو العزاز طعم الحلو ونمو ......................... تسلموا علي هذة الاعمال الفريدة لقد هدمت اعمال الاستاذ الراحل ابو السيد لابد من رجوعها ... والتحية للجميع
| |
|
|
|
|
|
|
|