حزني عليك عظيم أمي محاسن والدة صديقتي زينب التجاني

Quote: أسأل الله تعالى السميع المجيب أن يتغمد الفقيدة العزيزة بواسع رحمته و عظيم مغفرته و أن يتقبلها قبولاً حسناً و يسكنها الفراديس العلى من الجنان و أن يجعل البركة في ذريتها و أسرتها و أن يجيرهم في مصابهم و يجبر كسرهم و يجعلهم من الصابرين المبشرين.. صادق التعازي لأختنا و زميلتنا زينب التجاني و لزوجها و كافة أفراد الأسرة و جميع الأهل و لا حول و لا قوة الا بالله ..

Quote: الزم المرض امى السرير ارتبكت حياتى اتاخبط يومى اتشوشت افكارى ممكن يكون المرض ما خطير بس حسيت بانو كتير عليها دايما واقفة ذى تبلدية كردفانية دايما باسمة ايديها ممدودة للغاشى والماشى عصيدتها كل جمعة لكل بيوت الشويحات حينا فى الابيض بدون فرز الرز بللبن مافى مرة بتعملو بطعما ودة قدح بياضا لكل مناسبة خير لك الصبر يا زينب وهذه هي الدنيا رايها سديد بشاورا القريب والبعيد مصحفا ملازم ايدا كانو جزء منها بتدعو للكل لانها ام الكل ادعو معاى ربنا يرفع ماما محاسن بت عزيزة ويشفيها ويعفيها

Quote: ماما محاسن ربنا حباها بلقبول وحب الناس كل البتعاشرو بينتمى ليها معانا فى البيت صبية كانت لما جات تشتغل معانا عمرها سبعة سنوات اختها كانت معانا فى يوم جات تبكى لما سالتا امى مالك قالت الزولة الشغالة معاها منعتا المدرسة قالت ليها امى تعالى اقعدى معاى واترسلى وامشى المدرسة فكانت بتهتم هى وابوى بسارة بشكل ما عادى وكانت سارة مهذبة مرتبة نظيفة هى لحدى اليوم فاتحة بيتنا وامتحنت للجامهة ودخلت معهد كمبيوتر ولحدى الليلة بقول سارة اختى اما علاقة ناس بيتنا بصديقاتى فدى كانت قوية شديد يعنى نجاة وبطة وسناء ديل كانو جو الابيض لحضور زواجى وما حانساكم يا بسكو ورشاوعمرمجزوب زوج سناء طبعا كان عندهم وضع خاص امى تجى تقول لى الناسدى اكلو اقول ليها يا ماما انا عروس خليهم ياكلونىهم بس والله سلمى احمد البشرى ست البلد والبيت ما قصرت سناء انتظرت بعد ما سافرنا عشان تعيد ترتيب البيت مع اهلى وكان ابنها ناظم صغير دايما بتوصينى على انى اتواصل مع كل البعرفهم