الأستاذ محمود محمد طه: أزرعوهم في أرض الحوار يموتوا موت طبيعي

Quote: هاتفني الأخ د. مهدي عبدالله عبدالكريم من أرض النبي ... أذن لي بتصرف في نقل قصته وعم فضل .. قال لي حسنا أنك أشرت لـ "كرم" عم فضل... أحاول بتصرف هنا نقل ما خصني به د. مهدي، ثم أذن لي في نشره قائلا ما معناه دة قليل من حق عم فضل علينا كنت طبيب أمتياز جدييييد، كنا خمسة ستة شغالين مع بروفسير داؤود... يوم الساعة زي اتنين الا ربع كدة قررت "أزوغ"... جاني عامل قال لي بروفسير داؤود قال ليك تجي... سألتو قلت ليهو قال ليك مهدي ولا قاليك ليك نادي لي أي واحد؟ قال لي قال مهدي... مشيت ... لقيت عملو admission لي واحد وقال لي الزول دة دايرك تتابعو أصلك ما تفوتو ... وحصل كدة ... يوم والحالة مستقرة، والوكت داك أنا بدّخن، طلعت أدّخن... رجعت لقيت بروفسير داؤود وبروفسير عبدالرحمن أدريس معاهم زول لابس جلابية وعمة... بروفسير داؤود وبروفسير عبدالرحمن زي مدنقرين كدة وصامتين... أنزعجت بديت أقول في شنو؟! في شنو؟! .. مافي زول جاوبني .. طوالي مشيت على الـ patient وتحسست النبض لقيتو كويس .. رفعت رأسي عيوني وقعت في عيون الزول أبو جلابية وعمة دة.. نظر لي نظرة غرييييييبة!! دخلت جوووووة!! ... مرقت.. بروفسير داؤود وبروفسير عبدالرحمن لحقوني برة قالوا لي ياخ دايرنا نتكلم قدام الأستاذ!! قلت ليهم هو بالله دة الأستاذ!! بعده بأيام صرفت ومشيت لأصحابي القدام في الجامعة قلت "أنغنغ" عليهم شوية.. قعدنا في النشاط نتكلم .. زمان علاقتي بالأركان بس كنا بنمشي نضحك على الخوان المسلمين لما دالي "يبستفهم".. ما أكتر من كدة ... اليوم داك واحد في قعدتنا ديك قال ليهو كلام جميل خلاص.. هزاني شديد.. قلت ليهو أنتو الكلام السمح دة بتجيبوهو من وين؟ قال لي دة كلام الجمهوريين.. قلت ليهو بالله؟! هو الجمهوريين بيقولو كدة؟ قال لي نعم... أها من ديك مرقت دربي عديييييل على الفكرة... حكيت القصة دي لي قدام لي أستاذ عبداللطيف قال لي جابك عمك فضل