الأستاذ محمود محمد طه: هذا مغتسلٌ باردٌ وشراب

Quote: سلام يا (محمد) ود (عكاشة) يا خي كسر الخاطر اثم ما بعده اثم، اللهم لا تجعلنا من كاسري الخواطر... الحقيقة قصتي مع الاستاذ/ محمود ، عجيبة وغريبة شوية، ويمكن تكون اسطورة لأنها بدت برؤية وانا طفل صغير في (كوستي) سنة 1968وما كنت بعرفو، ولا شفتو، ولا سمعت بي قصتو، ولا دعوته، شفت رؤية عجيبة جدا،،، اشوف ليك انو انا قاعد في البلد (المناصير) وتحديدا في حلة (صليحة) من نواحي قرية (الكاب) تحت.. ومنطقة الكاب، او ما يعرف (بالمختة) بتاعت السكة حديد، وشاي الكاب يا ركاب، وقطر كان ماشي زي الساعة اسمو قطر كريمي،،، والبقول اخ يتلخ، والبقول ايخ نحسبها للجمل،، او كما كان يقول المرحوم (النجيض) وعشان تكون في الصورة يا محمد،، الكاب دي ومعاها مناطق المناصير الشرقية، عبارة عن مجمع هائل للمتناقضات، او ما يطلق عليه في البلاغة (طباق الايجاب) منطقة تجمع بين الساحل والصحراء، كما في السياسة (س ص) = (رمال+ صخور عملاقة+ خضرة+ ماء+ وجه حسن)، تقع عند منحني النيل في اتجاه (كريمة) علي الساحل الشرقي للنيل، وانا راقد في عنقريب بلا فرش يعني علي الحبال بس، زي منسند علي (كوعي اليمين) يعني زي ما بقولو (مكوع) وجامع كرعيني نص جمعة كدي، وانا مواجه القبلة، اشوف ليك ناس الحللي شايلين ليك زول في عنقريب، ويكبروا، الزول عربي ابيض، يشبه عما لينا ابيضاني كدي اسمو (كرار ود علي) وعرفت منهم كدي انو ده النبي ( عليه افضل الصلاة والسلام) وبيقولوا انو مات وماشين يدفنوه، مع انو الزول ده حي وبيتحرك، المهم اشوفم ليك يا سيد عمك زي حفرو ليهم حفيرة كدي في (هيالي) في قويز واقع بين حجرين كبار كدي، واحد اسمو (حجر الكلدوب) و حجير تاني كدي اسمو (حجر الرباعة) علي فكرة يا موحمد ، حجر يعني جبلا مو هين، فيها تقدر تطلعه وفيها ما تقدر، اها الجماعة ديل النبي حي وهم يهايلو في الرملة عليهو، وانا اقول ليهم الزول ده حي، وحاتك ما في زول اشتغل بي الشغلة، قلة خير يا زول جاني زولا اخضضضر وشعرو قرقد، ولابس منطلون اسود وقميص ابيض، وعندو قجيجة صغيرونة كدي، وشه واضح وضوح الشمس، لو بقي وسط الف زول، اطلعو ليك من وسطهم، من كترت ما كان واضح، جه قعد جنبي في العنقريب الليلي، اها يا زول قالوا لي ده النبي.. اها انا في رؤيتي ديك زي القلت ليهم لكن ده ما اسود والنبي ابيض، دابم دفنوه قدامي.. المهم قالو لي ده النبي.. اها قمت صحيت.. والوكت كان زي صلاة الصبح كدي، اها بعد ابوي (الله يديه طولة العمر والصحة يا رب) صلي قمت حكيت ليهو الرؤية .. قام قال لي في حديث صحيح عن النبي انو البي يشوفو في الرؤية شافو حقيقة، اها قمت قلت ليهو لكن يا ابوي ده اسود.. قال لي الحديث واضح، انت شفتو كان ابيض ولا اسود ده النبي (عليه افضل الصلاة والسلام) .. اها يا موحمد.. بعد اتناشر سنة من الرؤية دي.. مشيت لا ايديني لا كرعيني، جاريني هاتف عديل كدي.. (قوم امش للأستاذ/ محمود محمد طه) تصدق يا محمد، بلا اي سبب راسي ده طن طنين شديد قوم امش للأستاذ/ محمود.. هسع ده كلام شنو ده؟ الزول ده انا لا عارف جيهتو وين؟ بيألوا منو منو؟ يا زول اتوكلت علي الله وركبت الباص من امتداد الدرجة التالتة، المغيرب كدي، وعلي الحرتوم عدل، واتاريني انا المسكين ده، لا عرف ليك الحكايي في (تكفير) ولا يحزنون، قايل ليك الموضوع ده عادي، اها لمن وصلت ليك الموقف في السوق العربي، بقيت اسأل يا جماعة (محمود محمد طه القاه وين ؟ يا زول اي زول اسألوا ليك يا خد ليهو نطة، ويعاين لي بطريقة غريبي خلاص.. لكن اتضح انو معروف تب.. ها قالوا لي.. تمشي موقف امدرمان، وتركب بص الثورة بالنص، وتقول للسواق، نزلني الحارة الأولي، محطة الاجزخانة، هناك تسأل اي زول بيوريك البيت.. اها قمت سويت زي ما قالوا لي.. طق طق نزلت ليك الاجزخانة، طوالي سالت الزول الفي الاجزخانة : يا زول انا داير بيت محمود محمد طه (تصدق يا محمد شفت قلة ادبي كيف؟ محمود محمد طه كدي حاف) يا زول ما ني جديد في السلوك، ولا اقول سلوك زاته ماها في.. يازول زولك زول الاجزخانة ما قصر (عرفت بعدين انو من الأخوان الجمهوريين واسمو دكتور / عبد القيوم) الكلام ده كان في اخر سنة تمانين وتسعمية ومعاها الف.. قال لي شايف الحتي ديك.. غايتو ما شايف شي لكن قلت ليهو : كويس.. اها.. قال لي: تباري صف البيوت ده لحدت الفسحة ديك، الكورنر علي يمينك في بيت قدامو شجرتين، داك بيتو، بس اعمل حسابك دق الباب العلي يسارك،، ده باب الرجال.. اها يا زول باريت ليك صف البيوت لمن جيت عند الباب الوصفو لي.. - طق طق طق.. الباب فتح.. طل علي وجه انثي اخضضر ، ولابسة نضارة..(عرفت ورا انها - بتول مختار محمد طه) - السلام عليكم.. - وعليكم السلام... ده بيت : محمود محمد طه.. لسع سادر في غيي.. - ياهو زاتو.. - ممكن اقابلو.. - جدا.. بس هو هسع نايم.. - انا بي صراحة جايهو من حتة بعيدة.. ولا زم اقابلو.. اتفضل اجلي ودخلت جوه.. انا قعدت في كرسي ضهري في اتجاه الغرب علي الحيطة، ووشي مقابل القبلي، القمرة باقة نور، وصندوق السجاير البينسون في الجيب، وخالف رجل فوق رجل.. واخر عدم سلوك، ما داير اقول سوء ادب، عشان جديد وكده، .. شويتين يجي من تالا الاوضة زول لابس عراقي بلدي، ومتلفح ليهو توب، ومعاه كورجة اللت بنيات لا بسات ابيض في ابيض، قعد قصادي، والقمرا عامله خفلية مليئة بالقداسة، قلت خير اعاين لي زولي ... القاهو ليك زولي (النبي الاخضر) زاتو بي شليخاتو...نان زولك ما وقع .. كرب كرب.. ركبت الدرب..والقلب راح في شربة مية، وابتدأ المشوار، سكت الكلام المباح، انه الحب من اول رؤية.. اللي شفته قبل ما تشوفك عنيه عمر ضايع يحسبوه إزاي عليّ انت عمري اللي ابتدي بنورك صباحه قد ايه من عمري قبلك راح وعدّى يا حبيبي قد ايه من عمري راح ولا شاف القلب قبلك فرحة واحدة ولا داق في الدنيا غير طعم الجراح ابتديت دلوقت بس أحب عمري ابتديت دلوقت اخاف لا العمر يجري كل فرحه اشتاقها من قبلك خيالي التقاها في نور عنيك قلبي وفكري يا حياة قلبي يا أغلى من حياتي بعدين يا زول في بيت الاخوان (ب) القي ليك الصورة الشفتها في الرؤية بي نفس الهدوم... وللمحبة بقية من ال منصور وال غاندي ... ودي العجب زاتو!!!

(عدل بواسطة عبدالله عثمان on 12-17-2013, 07:37 AM)