الأستاذ محمود محمد طه: هذا مغتسلٌ باردٌ وشراب

Quote: قال الاستاذ ونحن معه فى الغرفة الصغيرة الكبيرة، وبعد ان انداح الثلث الاخير من ليل ذاك اليوم وقرب وقت الصبح ان يطل علينا بخيره، قال: (الما صلى الرغيبة يصلى، الوقت قرّب ... اين انت ياصاحب الوقت؟ ... وبدأ يردد قصيدة عوض الكريم بتاعت اخوان عطبرة نادي بك الخلق يا الله شوقا لكى تاتى يا الله حكى عن اعرابى درويش يقول: انت وين يا الله؟! مشيت ليك فى البر ما لقيتك وطلعت ليك الشجر ما لقيتك وقلبت ليك الحجر ما لقيتك انت وين يا الله؟! انت وين ياالله؟! وكرر انت وين ياالله مرات. طلعت ليك الشجر ما لقيتك !! وردد البيت من القصيدة بساط الانس مبسوط فأقبل وخذ اسباب عزك بانكسار ايضا كرر كلمة انكسار دي وقال: العز بالذل!! العز بالذل!! ... بعد داك قال امشو صلوا... الله يوصلكم صلة لاتنقطع ... بعد الصلاة عدنا ثانية وكان فى بعض الاخوات مالحقوا صلاة الجماعة , فقال الناس زمان كانوا بصروا على الصلاة فى جماعة... يعنى كان فى زول الصلاة فاتتو يقوم يصلى هو امام واحد الجالسين اى المصلين يكون ماموم يبقى على يمينه فبعد الثلاث ركعات اى اذا كان المغرب , الامام يسلم والماموم اى المصلى معه يصلى ركعة رابعة فتكون صلاته نافلة ففى الحالة دى يكون الامام وجد اجر صلاة الجماعة والآخر وجد اجر صلاة الجماعة وكان عنده اجر النافلة ودى يسموها صدقة.... قال شفتوا الناس بصروا على تلقيط الاجر كيف؟! الاجر تلاقيط!! .... ما شفتوا الجدادة بتلقط كيف من ما يصبح الصباح هى تلقط .. كان وجدت الحجر تكدمو وكان وجدت الحبة تاكلها... انتوا ايضا من الصباح تلقطوا فى الاجر ... الكلمة السمحة وتقديم الخير للناس يعنى كان لقيت شوكة ورميتها بعيد من الطريق او ماشابه ذلك . يعنى تكون شيختكم الجدادة لكن الجدادة الدافعها حاجة معدتها وانتوا الدافعكم قلبكم . لقطوا الاجر...