رسالة الي عمر البشير..

Quote: (رسالة الى رئيس الجمهورية) . . الحاج/عمر حسن احمد البشير رسالتي مليئة بالاسئلة الكثيرة في ذهني وحلمي ان اوجهها لك مباشرة بدون تدخل سياسة الدولة ..هذه محاولة مني لكتابة ارائي ومابداخلي موجه لسيادتك وانا لا انتمي لاي جهة او حزب بل انسانة بسيطة تتمني حال افضل لبلدها... رسالتي مليئة بتحسر الماضي وفوضي الحاضر وطموح المستقبل.. رسالتي هي من حقي ومن حق كل شخص توجيه رسالة مباشرة للرئيس.. . . احنا عارفين انك في حالة صحية صعبة الايام دي وبرغم اي حاجة بنتمني ليك الشفاء وذاتو كفاية عليك عذاب الاخرة..الغريب والمؤسف اني عملت استطلاع بسيط سألت فيهو ناس من(عامة الشعب) انهم يوجهوا ليك كلمة ويدعوا ليك بالشفاء نفسي كان كل العالم يقرا الكلام السمعتو انا...يعني ٩٠% من الناس مابيتمنوا ليك الشفاء وبعضهم قالوا ياخ احسن يموت ونرتاح منو ... وطبعا مافي شماته في الموت والمرض لكن ياها الناس بتطلع الجواها وعلى العموم بنتمني ليك الشفاء ... سيادتك قاعد في الكرسي ٢٣سنة والبلد اتطورت شوييييية يعني ماعملت حاجات مهمة ومفيده غير قروشنا رايحة في الفاضي ولسه العطالة والفساد منتشر وفي ازدياد والله يستر من الجاي علينا.. الجميع عارف انه البلد دي الرئيس حقها ماعندو رأي وشخصيته ماقوية..مع انه صفات الحاكم الناجح انه يكون شجاع وشخصيته قوية والرأي الاول والاخير عنده وليس عند مستشارينه والناس الحواليه.. ومن صفات القائد الناجح برضو عدم التمييز بين المواطنين وخاصه المقربين منه..والوضع الحالي انه كبارات البلد هما اهلك ونسايبك وجيرانك واحبابك واصحابك واصحابهم والناس اللي بيعرفوهم ..اما بقية الشعب هما الماعندهم واسطات وماشين بما يرضي الله .. ومن صفات القائد الناجح هي عدم التهاون في حسم القضايا وهي كل مايتعلق بالفساد المالي والاداري والتجاوزات بالنسبة للقياديين والوزراء والمسؤولين الكبار... . . بعض الاسئلة موجهة لسيادتك.:: -وين العدالة بين الناس والمناطق في السودان يعني في مناطق اسه لسه ماعندهم كهرباء وموية ومستلزمات الحياة الطبيعية واللي لازم يوفرها الحاكم لشعبه وليه عندنا في طبقات اجتماعية واقتصادية ..مع انه العدل بين الرعية هو اساس الحكم!! -ليه في عيد الضحية الفات ده الاسعار كانت فوق استطاعة الشعب والناس استلفوا وعملوا المستحيل وضحوا وغيرهم ماقدر ..والمسؤول عن الحصل ده منو وليه للان ما شلتو من منصبو وليه الشعب يتحمل فوق طاقتو مع انه ياريس للصبر حدووود والحاصل ده حرااام!! -ليه لما مصنع اليرموك اتضرب وحصلت الكارثة دي والمسؤولين كانوا ماعارفين حاجة يعني للدرجة دي بلدنا بقت ساهلة وغير آمنة وممكن غيرنا يضربنا عااادي وبقوة عين..وليه ليه ليه وزير الدفاع للان قاعد !!! -ليه كل الدول عندهم مجانية التعليم والعلاج والرعاية والعمل الا نحنا مع انه في عهد نميري كانوا الناس مرتاحين وانت في عهدك الشعب ماشاف راحة!!! . . والله عندي اسئلة وتعجبات كتييييرة نفسي القي ليها اجابات وحلول بس بديت اتشائم وفعلا احنا في مشكلة كبيرة والشعب مستحمل وساكت ماعارفه لحدي متين ..اسه الزول يكتب ويقول شنو من الحاصل حاجات تملا كتب وكتب من الفساد وعدم المصداقية والظلم الحاصل وحاجات في الدين الاسلامي مافي...!! نفسي اعرف ياريس انت لما تجي تنوم بتفكر في شنو هل بيجي في بالك انه في ناس بتدعي عليك وناس عايشة تحت الفقر ووووو حاجات مؤسفة والله وانت مرتاح وبتاكل وتشرب وبتصرف اخر الشهر اكبر مرتب وعايش انت واللي معاك على نفقة الدولة !! -نفسي اعرف هل المسؤولين بداية بالرئيس وهما بيسرقوا في البلد هل بيتذكروا يوم الحساب وانه ربنا مابينسي المظلوم وهل بيجي على بالكم انه سيدنا عمر بن الخطاب كان بيحكم كيف ولا انتو احسن منو ولا بتفكروا كيف !! ليه ياريس الناس بتخاف تكتب وتشتكي منك عشان عارفين انه اي زول بيشتكي او بيشتم الرئيس زي كانوا ارتد عن الدين..طيب وين الحرية ..مع انه ده من حق اي زول لانه ده العدل في الحكم المكتوب في الدين الاسلامي!! سؤاااال اخيييير هل من الممكن كلامي ده يصل ليك وياربي هل انت بتفكر في حال شعبك -على ما اظن الناس المعاك ديل بيقولوا ليك انه الشعب مرتاح وبيحبك كتير والله اعلم- والله تعبت من الكلام وده جزء بسيط من رسالتي للسيد الرئيس اللي من المفترض في وضع تاني وفي بلد تاني وفي حال تاني اكون برسل ليهو رسالة شكر كلها حب وفرح وامان بس ده الحااااال الحااااصل والله اعلم بحالك الان ولكل ظالم يوووم .. مع تمنياتي لك بالشفاء فقط.. . . تركت للجمييييييييييع حرية التعليق واضافة اي سؤال موجه للرئيس او الناس اللي معاه ... . , الجزء الاول من الرسالة.. تحياتي