ما قلت لي رغم الظروف حأسكنك جوة الحروف وسكنت في حرف البكى لون عيوني ضباب وخوف تاوقت مابين الرموش سدت ملامح الوجعة شوف ورجعت تاني اقول كفاي غير الحرق ما عندي جوف مالقينا بيت،،، مالقينا بيت لو حتى من الطينة طوف لا حتى حتة نسوره ومن حولها ندور نطوف ونلبي لامن ننكفي وفي وشنا نعيد الوقوف مالقينا بيت،،، مالقينا بيت يسترنا من عين القدر ما الدنيا ضاقت بالبشر فتشنا جحر النملة قصينا الاتر لمن دخلنا علي النمل قالينا خشو بلا زعل قرصنا ما قاصد هو شر عبر عن الفرح الغمر وبي قلبو لمن شافنا قال معقولة يتواضع بشر ويسيب في بيوت الدنيا يزهد في ترابها وفي البحر ويخلي كل مفاتنا وآمالها واحلام العمر ويعيش مع النمل البكد في الصخرة شان حبة امل جحرا مضلم مافي نور لا حتى طاقة ولا قمر لاموية لا جدول يكب لما الخريف يتكي المطر مالقينا بيت،،، مالقينا غير جحرا تبيت النملة فيهو وسكنا ما دافعين ايجار لما النمل ما هان عليهو تلقانا واقعين في الأرض ويدوسنا في سكة مشيهو وقال لينا في الصيف اسكنو ولما الشتا يزور الديار نفرح معاكم بي مجيهو مالقينا بيت،،، ما لقينا بيت نتكل عليو كل الهموم مالقينا غير ناسا تنوم شان تصحى تاني عشان تنوم واحلامنا ما بتقدر تقوم كيفن بتتقطر مطر قبال تكون اصلا غيوم مالقينا بيت،،، يا دنيا دست في حشاها مساحتا نكرت ولد انسانا قالت ماخلق آدم زمان من طينتا يا زايلة زالت من قليبا محنتا لا نحنا شاحدين حنها لا حتى دايرين سكنتا باكر على الجنة بنعيش والدنيا تعرف غلطتا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جلال جبريل
فيس بوك
تويتر
انستقرام
يوتيوب
بنتيريست