الحكم على دجاجة بالحبس الإنفرادي ...

Quote: Quote: اها يا احمد بذكرك شنو كان عندنا قفص جداد في الحوش حق البيت كونا بندي الجداد باقي الاكل وبعض الحبوب كنت بشتريها ليهم من سوق اللفة ,وبالمقابل كونا من بنستفيد من البيض ومرات ومرات كده كونا بنضبحم لمن يزيد عدد الديوك اها في القفص ده كان في جدادة كده عكليتا زيك إنت كده .......... بالعصريات ومرات كِده بالضُهريات كونا بنفكهم في الحوش عشان يرتاحوا من الحبس ويتفسحو شوية ........ الجداد كُلو كان بيتوجه او حاجة "للزير" كانو بيشربوا الموية من الجردل التحت الزير وبعضهم كان بينوم تحت الزير لانه الجو بيكون عادةً بارد وخصوصا انه الزير حقنا تحت شدرة ليمون. اها الجدادة العكليتة و الشيطانة كانت بتمشي على المطبخ وتطلع فوق البوتوجاز وتخربط الحِلل و الملاحات وتبوظ الاكل حق الغداء , بعد ما تخرب ونطردها كانت بتتوجه لاسلاك الكهرباء و تخربط الشاحن حق الموباليل وتجرجر الوصلة حقت التلفزيون , وكانت بتحفر لينا الحوش برجلينا وتحفر حفرة كبيرة في محل الضيوف وترقد فيها وجنها تاخد حمام بالرملة يعني تدردق في الحفرة وتغطي نفسها بالتُراب , و أسوأ حاجة كانت بتخرب وتوسِخها الملايات وتطلع فوق السراير اها الخراب بتاع الجدادة دي كِتر شديد وناس البيت قرروا إنهم يضبحوها بالسكين عشان يرتاحو منها ومن الخراب البتسوي فيهو ده , انا اعترضت على قرار الضبح بشدة , وكانت مبرراتي لذلك انه الجدادة دي بالزات قاعد تبيض كل يوم ولو ضبحناها حنفقد هذه الثروة و إنه ممكن نحبسها في القفص ونأدبها كم يوم كده , المهم بي جاي و بي جاي ناس البيت رضوا بي الاقتراح بتاعي . اها انت بتذكريني بالجدادة دي , الحمام كلو طفش من المنبر إلا إنت مُصِرة تجازفي في البورد العجيب ده , ومرات البوست بيكون جادي جدا وفجأتن تجي داخلة إنت بالوش الاخضر بتاعك وتحولي البوست عن مجراهو ...... يا وضاحة وجودك عامل نكهة في البورد