فيلم سودانى تقف وراءه سفارة النظام للإساءة الى السودانيين فى الخارج..

Quote: في ناس كتيرين روحهم في الرجعة للسودان وده صراع داير وزي ما أنا أضفت في الفيلم من عندي وانا بشتغل في منظمة لا جئين، الصراع ده ما خاص بالسودانيين بس، كل الشعوب بتتوق للرجعة لبلادها وده حنين معروف ومشروع،البخليهو يكون سقوط شنو؟؟ يعني الناس الفي السودان ديل مجرمين ولا شنو؟؟ ونحن بس المناضلين عشان طلبنا لجوء... >>>>>>>>>>>>>> عزيزتي تماضر الممثلة الرائعة.. والله الكلام القلتيه ده هو الكلام المنطقي .. وكلنا عاوزين نرجع السودان الليلة قبل بكره.. ومع كراهيتنا للنظام القائم في السودان بس ما ممكن الواحدة مننا تخلي السودان عشان خاطر نظام حكومي وإلا كان كل موظفين السودان تركوا العمل مع الحكومة وخرجو من السودان والماقدر يطلع يقعد عاطل في البيت .. يعني يعملوا عصيان مدني عام.. وطبعا دي الخطة النادى بها السيد الصادق المهدي, رئيس الوزراء الشرعي للبلاد عندما كان في الحكم وقال مفروض السودان يعلن العصيان المدني العام عند اذاعة البيان رقم واحد وعند سماع المارشات العسكرية في الاذاعة.. لكن زول جاب خبرو مافي.. وانا بفتكر وبعد الكلام المنطقي ده كله مفروض سعادة السفير منان يقدم ليكي اعتذار شخصي, وخاصة وهو يعترف بأنك ممثلة بارعة تعكسين وجه السودان الحسن.. والاعتذار دائما هو لغة الأقوياء.. فهى فعل السفير منان ذلك حتى تعود المياه إلى مجاريها..؟؟؟ وحتى لا تخرب السياسة العلاقات الأسرية وعلاقات الصداقة.. والله انا لمن اشوف اوباما ورومني المتنافسين على الرئاسة الأمريكية وهم يتبادلوا الضحكات والابتسامات والهظار اقول ديل اعز اصدقاء.. وياحليل تنافسنا السياسي... واود الاشارة هنا إلى ان 99% من السودانيين في امريكا وكندا واوروبا من طالبي اللجوء السياسي ويكتبون في المنتديات الاجتماعية كلام ضد حكومة الانقاذ ما لم يقله الامام مالك في الخمر ولكنهم كلهم يذهبون للسودان كل سنة في الاجازات ويدفعون الضرائب للحكومة لتجديد جوازات سفرهم او يدفعون رسوم التاشيرة اذا كانوا امريكان او كنديين او فرنسيين.. يعني السودان ده معلق فينا مهما فعلنا ومهما كنا ضد النظام البيحكمه... لأننا ، زي ما قلتي يا تماضر، بنحب السودان وبنعشق السودان .. ونقول في النهاية:" لقد اوحشنا السودان الحبيب الذي وان خشنت طبيعته فقد رق قلب أهله , صبح دمث يرضي الحواس الخمس ، لناظره ورد، ولذائقه شهد، وللامسه برد، ولسامعه غرد، ولشاممه ند. شعب سليم الفطرة، حسن النية، لا يستحق ما عاناه من شقاء اللهم إلا من باب المزايا في طي البلايا، واستحقاق كل ما لايقتلني يقويني ، فليكن البلاء مدرسة ولتكن الأزمة مفتاح الفرج" ( بتصرف من اقوال السيد الصادق المهدي).. والله يديكي العافية والصحة يا تماضر لترجعي للسودان لتشرعي في نهضة مسرحية كبيرة وتكوني شعلة في هذا المضمار يليق بالشعب السوداني التواق والعاشق للمسرح..