فيلم سودانى تقف وراءه سفارة النظام للإساءة الى السودانيين فى الخارج..

Quote: لم تترددايضا فى الذهاب الى السودان والتمثيل فى قاعة الصداقة رغم انها لاجئة سياسية ولكننا كنا واثقين من انها ستعرض مواقفها بجرأة حتى ولوعادت للسودان؟؟؟؟؟[/QUOTE حسة يا نور الدين منان الكذبة دي انا أعم معاها شنو؟؟؟ انا لما رجعت السودان مثلت في خيمة الصحفيين، قدمت (اسمي عواطف) وحاجات تانية ..بتعرف (اسمي عواطف)؟ دي ..تتذكر لما جيت كتبت هنا في المنبر ده أنه الترابي رسل لي مندوب وجا اعتذر لي عن العمايل الكانوا بعملوها لينا زمان؟؟؟ وانا لم أعد لاجئة سياسية، انا مواطنة أمريكية، وبحب السودان زي عيوني وبتمنى أرجع السودان كل يوم، وريحة أمي هناك واخواتي واخواني هناك وبتمنى أمشي أعمل عمل ضخم لي جمهوري هناك ، لكن أولادي هنا وقلبي مقسم عليهم كلهم ...يعني مشي السودان بقى جريمة؟؟ بالمرة أرد على كلام النذير الحجازي بيسألني البت لمن يتم عمرها واحد وعشرين سنة يعني شنو؟؟ وانا السؤال ده ما فهمتو...انا قلت شنو؟؟ النص قال في أمهات بيكونوا دايرين يرجعوا بي بناتهم السودان عشان أسباب كتيييييرة في دماغهم هم، في ناس كتيرييييين بشوفوها ما مشكلة وفي ناس كتيرييييين برضو بشوفها مشكلة ، الدراما دي بتعالج المشاكل ما بتتبناها في ناس كتيرين روحهم في الرجعة للسودان وده صراع داير وزي ما أنا أضفت في الفيلم من عندي وانا بشتغل في منظمة لا جئين، الصراع ده ما خاص بالسودانيين بس، كل الشعوب بتتوق للرجعة لبلادها وده حنين معروف ومشروع،البخليهو يكون سقوط شنو؟؟ يعني الناس الفي السودان ديل مجرمين ولا شنو؟؟ ونحن بس المناضلين عشان طلبنا لجوء؟؟؟ههههههههههههههه الفيلم ده حسب علمي ما مولتو السفارة، السفارة دي أفتكراحتفلت بحضور الناس الجو من السودان وهم على كيفهم، السفير ده صاحيهم قريبهم بعرفوه، ولا يمكن بشوف أنه ده واجب د\بلوماسي تجاه الفنانين أنت سفير كنت وبتعرف أحسن مني ، والله دي ما حاجة انا مفروض اهتم بيها ...انا جابني العمل الابداعي ده وشرحت الملابسات دي بالتفصيل فوق (في ناس فهموها ) قلت ليكم أكتر من مرة انا ما جيت لسفير ولا وزير ولا في زول عزمني من حكومة السودان ولا أنا مشيت لي زول منهم ..جابتني محبتي لفني مقطوع الطاري ده ..وجابني شوقي لجمهوري ...قبل ما أموت وتجوا تسودوا لي المنبر(!!) .وحاولت أخت فيه بصماتي.... هم بيشكروهم في الفيلم وطبعا يالنذير الحجازي أنا الشكر ده ما شفتو لغاية ما الفيلم اتبث في التلفزيون، اى منتج عندو الحق في شكر الجهة الداير يشكرها، البعرفو أنا أنا ما داخلة في القصة دي ولا ضروري بالنسبة لي أعرف هم عملوا ليهم شنو شان يشكروهم... اها يا منان المطاعنة؟؟ انا كتبت ليك في الخاص وخاطبتك كصديق، قلت ليك أضرب لي عشان أوريك في حاجة ما تمام ، السفارة ما أنتجت الفيلم، جيت هنا قلت ما معناه أن المشكلة دي ما بتتحسم بالايميلات والتلفونات...صاح؟؟؟ واللغة بتاعة سقوط دي انت بتستخدمها بالبساطة دي وبتلوم على كلمة (حل عني) ، ياخي سقوط دي أنا ممكن أوديك بيها المحكمة سقوط؟؟ انا يا منان؟؟ وبكري أبوبكر طبعا زاد الطين بلة ...وخت البوست في العلالي ..عشان أي زول يجي يتفرج على (السقوط) .... سؤال بسيط للمعارضة ...مشروعكم شنو للدراما ونحن الممثلين ديل نيتكم تسووا بينا شنو؟؟ نحن الممثلين المرابضين المعارضين الخلينا بلدنا وجينا معاكم ...بتجيبوا فنانين من السودان بخمة القروش عشان تحضروا حفلاتهم وما بتهتموا بأنكم تساعدونا ننتج عرض مسرحي واحد ولا فيلم واحد لما مثلت في (فيصل هاجي عرب) ده فيلم سوداني انتجو وأخرجواخواجة : بتنلي براون Faisal Goes West، ما شفتو النقد ليهو ولا الحماس ده ...ياربي ده من شنو؟؟ http://www.youtube.com/watch?v=oKj6sw8TCVc جاب شاب سوداني طالب وذكي ... اضطر يشتغل في مزرعة جداد ...وأبوه كان استاذ كبير اضطر انه يسوق تاكسي...مش ياها مشاكل المهاجرين؟؟ ده بتشوفوه سقوط؟؟ اساءة للسودانيين؟؟ المنتج شكر منو؟؟ والله ما علرفة ؟؟ ولا دايرة أعرف ... الفيلم شارك في مهرجان كان ...بالمناسبة .. ياخي أنا ندمانة الما بقيت ممثلة هندية ..... (عدل بواسطة Tumadir on 11-06-2012, 12:31 PM)