حركة حق: ما انتهكته الطائرات والصواريخ لم يكن السيادة الوطنية

Quote: (*) سلامات ياسارة .. طبعا علاقة ايران بالنظام السوداني والنظام السوري وحماس وحزب الله , دي علاقة اسلام سياسي بحت ماعندها علاقة بمبدأ الحرية والتأييد لنضال الشعب الفلسطيني المشروع اللي أصلا بدأ باليسار وحركة المقاومة الاسلامية المعروفة اختصارا بحماس اسست سنة 1986 , لكن نضال الشعب الفلسطيني كان رأس الرمح فيه حركات اليسار التقدمي جد مش اليسار بتاعنا الخاضع لابتزاز مثقفي الهامش والحركة الشعبية لمجرد عجزوا عن مواجهة النظام مواجهة حقيقية وانا عارف كلامي ده حايجيب انتقادات كتيرة وحا هايجموني مش اهل مشروع الهامش نفسهم , لأ حايهاجموني اهل اليسار الصالونجية الخاضعين لابتزاز مثقفي الحركات المسلحة من جهات البلد الاربعة ومثقفي الهامش , عشان يخارجوا رقبتهم من خانة الجلابي الذي هو بالضرورة (شيطان) ذو قرنين , ذات المثقفاتي اليساري الممكن في صالوناتو الخاصة يقول كلام عنصري جد عن اهل الهامش ديل و بس بتلفت كويس قبل مايطلع قرونو دي , أهل الهامش ديل منو ؟ علي الحاج مثلاً ؟ مالك عقار مثلاً ؟ د. خليل مثلاً ؟ ياخي اريتو تهميشي أنا الشمالي ده , أقرب مثال دكتور خليل زعيم اهل الهامش ده , اتخرج من الجامعة من هنا اتعين وزير طوالي , مهمش انا ده , بس الفرق بيني وبينهم جلد وطني مابجرا بيهو الشوك , مش على طريقة الصادق المهدي لما اتكلم عن البشير لا , على طريقتي أنا ده , بتكلم عن حجم المهانة الوصلنا ليها بيد الاتنين النظام والمعارضة الخاضعة للإبتزاز لعجزها عن انها تكون جسم معتبر ليهو احترامو قدام النظام , ماليها احترام لأنها عاجزة عن حمل السلاح والنظام من جا قال عديل الماعندو سلاح ماعندي معاهو كلام , برمي ليهم عضمة بس وبديهو فرصة في ديمقراطية (أرعى بي قيدك) وزارة مهمشة , عضوية في البرلمان بعدد النظام واضح .. وإسرائيل اوضح منها .. وإبتزاز مثقف الهامش لليسار الهتيفي واضح .. والمشروع الامبريالي الصهيوني الاستعماري ده واضح , بس عاوز شكلين من الانظمة في خارطة العم سايكس القسما مع العم بيكو نظام ممانعة ما عندو مانع زي نظام سوريا والسودان ..وده بحقق ليهو كتير .. ونظام إنبطاح زي نظام مبارك ماعندو مانع في إنو يعادي نظم الممانعة اللي اصلا ماعندها مانع دي و عشان يتجاذبوا اطراف الدويلات السايكسبيكية , لاإعادة تقسيما وتجزأتا تمهيداً لتحويلا لمستعمرات وفق نظام استعماري جديد مبني على التهام الثروات أنا لا أجد غضاضة في إني اقول وبوضوح .. سماح النظام للسودان ليكون مسرح تجاذبات الصراعات الاستعمارية والمشاريع الاقليمية والدولية ما بعفي اسرائيل من دم اتنين من المواطنين السودانين ومابعفيها من ترويع الامنين ومابعفيها من انتهاك سيادة وطني لمجرد انو النظام القائم اخطاؤا هي الاغرت اسرائيل بالتجرأ على ازهاق روح مواطنين سودانين .. والدفاع عن اسرائيل بحكم انو النظام قتل اهل الهامش وبالتالي لانو النظام قتل اهل الهامش وقتل منهم الاف مؤلفة من الارواح ده بخلي روحين يزهقوا على يد اسرائيل ماعندهم قيمة , طالب نايم في بيتهم , ذنبوا شنو تجيهو شظية تزهق روحه في عز شبابه البخلي اسرائيل بطلة شنو ؟ والنظام مجرم شنو ؟ ده المنطق الاتكلم بيهو البشير زاتو لما قال قتلى دارفو 10 الف بس , يعني قيمة الجرم بالعدد مش بمبدأ ازهاق الروح في حد زاتو .. لذلك مثقفي الهامش واصلوا ابتزازهم لليسار الهش حتى هلل لرحمة اسرائيل وحرصها على الارواح السودانية لدرجة انو ازهق منها اتنين بس ياسلام .. طيب لو كان الانفجار ده شظاياه وقعت في داخلية طلاب مثلا وقتلت منهم مئات ؟ ولا اسرائيل دي حريفة خلاص رسلت شظيتين بس من شظايا الانفجار عشان تزهق روح الاتنين ديل بس .. طيب بالله ما تنسوا تخلوا اسرائيل ترسل باقتين ورد لذوي الضحيتين ديل , عشان يكتمل اعجابنا بيها .. والماقدرين تستوعبوه ياقوم .. الهوة بين اليسار الخاضع للابتزاز ده وبين محمد احمد البسيط بتتسع كل يوم .. والحزب الشيوعي والصادق المهدي والاتحادي الديمقراطي بياناتهم كانت ذكية جدا وموجهة للشعب , مش للمثقفاتية وجماهير الصوالين القاعدين يتباروا في استرضاء مثقفي الحركات المسلحة ومثقفي الهامش بادعاء انو تهون الروحين ديل مادام راحو بيد الام الرؤوم اسرائيل وراحو من اجل ايقاف الة القتل البتقتل اهل اهل الهامش كل يوم وهم نايمين في قطاطيهم .. واحد فيكم يجرب يمشي بيوت العزاء بتاعة اهل المرحومين ديل ويقول كده يقوم يخطب فيهم ويقول ليهم ك ان ابنكم لم تضع روحه هباء نتيجة لاعتداء غاشم من دولة الكيان الصهيوني و بل دفع روحه فداء لاهل الهامش الذين يقتلون كل يوم بسلاح الكيزان الذي ينتجه هذا المصنع فهنيئا لكم وشكراً لاسرائيل لانها خصتكم بهذا الشرف .. وبعدها خلي يجي يقابلني .. ولا يتفاصح تاني في النت ده .. لأنو ببساطة حا يزهقوا روحو في نص صيوان العزاء وماحايكون عندو سكة لحدي مايلحق يلقى ليهو صفقة صفقتين من مثقفي الهامش