قصّة ثورة - كلمات الشاعر الفذ هاشم صديق موسيقى وأداء الموسيقار محمّد الأمين والمجموعة
Quote: لما الليل الظالم طوّل وفجر النور من عينّا أتحول قلنا نعيد الماضي الأول ماضي جدودنا الهَزَمُوا الباغي وهدّوا قلاع الظلم الطاغي
وفى ليله وكنا حُشود بِتصارع عهد الظلم الشبَّ حواجز شبَّ موانع
جانا هتاف من عِند الشارع قسماً قسماً - لن ننهار طريق الثورة هُدى الأحرار وغضب ألامه إتمدد نار والكل يا وطني حشود ثوار
وهزمنا الليل هزمنا الليل والنور في الآخر طل الدار والعزة إتهادت للأحرار
وطني أنحا سيوف أمجادك ونحنا مواكب تفدى تُرابك ولِسّه الشارع بِشهَد لينا في يوم الغضبة حصاد ماضينا مشينا نَعَطّر حقل الثورة بِالدَم نَفْدِيبُو بلادنا الحرة وكان أكتوبر فجر الغضبة كسرنا قيود الماضي الصَعَبة لما مشينا مواكب صَامدة تهدر وتغلي وتهتف راعده الرصاص لن يفنينا الرصاص لن يفنينا
وسال الدم في أرض الوادي فَدينا النور بالروح يا بلادي وكانت صفحة حكاها العالم وفجر أكتوبر طَلّ وسَالَم
كان في الجامعة موكب هادر صمَّم يجلى الليل السّادر وكان الليل السادر غادر فجّر غدره سموم دخان ورُصاص من صوته صِحَا السودان
وكان القرشي شهيدنا الأول وما إتراجَعنا حلفنا نقاوم ليلنا وسِرنَا نذرنا الروح ومَسَكْنَا دَرِبنَا للشمس النائرة قطعنا بحور حلفنا نموت أو نلقى النور
وكان في الخطوة بنلقى شهيد بِدمه بِيِرسُم فجر العيد
يا أكتوبر أنِحْنا العِشنا ليالي زمان في قيود ومظالم وويل وهوان كان في صدورنا غضب بركان وكنا بنقسم بالأوطان نَسَطَّر إسمك يا سودان
بدمانا السّالت راويه الساحة وحلفنا نسير ما نْضوق الراحة شهرنا سيوف عِصيانّا المدني وكانت وِحدة صف يا وطني
إيد في إيد حلفنا نقاوم ما بنِترْراَجع وما بِنسَاوم بينّا وبينك ثأر يا ظالم حلفنا ونحن جنود بتصصم زغرد صمت الفجر الحالم
وهزمنا الليل هزمنا الليل والعِزة الطلت صدر الدار خُطانا تسير في درب النصر هتافنا يدَوّى يهز القصر
كسرنا حواجز أزِلنا موانع
صفنا واحد
عامل وطالب زارع وصانع
وهزمنا الليل هزمنا الليل
والنور في الآخر طل الدار
والعِّزة أتهادت للأحرار
يا ساحة القصر ؛ يا حقل ويا واحهَ بتَحَضِن روح نَصّار روينا ورودك دم ثوار وشتَلنا فضاك هتاف أحرار خَطّينا ترابك أحرف نائرة بتحكي سطور أيامنا الثائرة
وشلنا الشهداء مشينا ونهتف وجرح النار في قلوبنا بينزف
سَجّينا الشُهداء وجينا نقاوم ما بنِتراجع وما بِنساوم
وفجأة ونحنا صفوف بتصمم زغرد فجر الثورة الحالم
والنور في الآخر طل الدار والعزة أتهادت للأحرار
قسماً قسماً يا أكتوبر نحمى شعارك ونجنى ثمارك ونرفع راية الثورة الغالية عاليه ترفرف فوق السارية عليها شعار الثورة الأكبر رسُمه النادر زاهي وأخضر ولِسّه بنقسم يا أكتوبر لما يطل في فجرنا ظالم نحمى شعار الثورة نقاوم
نبقى صفوف تمتدّ وتهتف لما يعود الفجر الحالم يا أكتوبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة