نقلا عن صحيفة الصحافة "توقف اطباء مستشفى الخرطوم أمس عن العمل عدة ساعات،قبل ان يعودوا لاستئناف نشاطهم ،احتجاجاً على تعرض عدد من الاطباء للاعتداء بالضرب من «زوج» غاضب. وبحسب شهود عيان تحدثوا لـ»الصحافة،» فإن رجلاً برفقة زوجته،جاء للمستشفى في الرابعة من فجر أمس،طالباً عون الاطباء لان زوجته في حالة «وضوع»،ووجهه الاطباء للذهاب إلى العنبر،لكن الرجل الح عليهم بأنها على وشك الولادة،فما كان من احد الاطباء الا ان رد بقوله،» أنت بتعرف أكثر مننا؟» ،واستجاب الرجل لحديث الطبيب وحمل زوجته للعنبر،حيث جاءها المخاض وبالفعل وضعت مولودها داخل العنبر دون مساعدة طبيب، مما أدى لغضب الرجل ومهاجمة الأطباء ضرباً بالكراسي واشتبك معهم بالأيادي ،وقرر الأطباء الدخول في اضراب عن العمل صباح امس مطالبين بتوفير الحماية لهم واستجابت الشرطة بتوفير الحماية الكاملة."
يحكي لي صديق وزميل عمل وهو من نبهني لهذه الحادثة التي تتحدث عنها الصحافة توفي له ثلاثة توام قبل 10 ايام بعد وضوع امهم لهم وخلال 24 ساعة على التوالي
قال لي بعد وفاة احدهم تاخروا في استخراج التقرير لاستخراج شهادة الوفاة له ما يقارب الساعة .. وزوجتي والطفلين الاخرين في حالة حرجة
فاحتديت معهم ولماذا هذا التاخر .. قال اعطوه التقرير على مضض وبصورة جافة وغير كريمة وقال لما اتيت لاحمل طفلي لادفنه قالت لي احداهن .. اترك الفوطة الموضوع فيها الطفل فنحن نحاسب بها .. قال .. نظرت اليها .. ثم خلعت جلبابي ونقلت حاجياتي التي فيه الى العراقي وقلت ليها ختى الولد في الجلابية دي وقال لي ناولتها الجلابية وانا غامت يدي التانية ومستني منها اي تعليق قلت ليه : كنت عاوز تديها كف ؟؟؟
قال لا : كنت حا اديها بونية في عينها اقدها ليها ثم اردف : المشكلة ما في الرفض وممكن فعلا يكون بحاسبوهم بيها .. لو لو شوفت الطريقة البتتكلم بيها .. تقول الواقف قدامها ده ما جاي يشيل جنازة ولدو .. التقول جاي يسوق ولدو من التصوير لي حفلت عرسو
10-03-2012, 11:29 PM
امينة عيسى امينة عيسى
تاريخ التسجيل: 11-20-2010
مجموع المشاركات: 619
إذا كان فعلاً هو السيناريو الذي حدث و تفضلت الصحيفة بنشره يعني أن هؤلاء الأطباء تنقصهم مهارات التواصل مع المرضي وهي مادة تدرس ويمتحن فيها، بل أصبحت أساسية لتأهيل الأطباء.
كليات الطب في السودان معنية و مسؤولة عن التأهيل الكامل للأطباء.
تقديري
10-03-2012, 11:56 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
أكيد يا وليد دور الطبيب ليس هو التشخيص و العلاج للمرض فقط بل هو إحترام و تواصل مع المرضي و سماع لشكواهم ومناقشة المرضي عن المرض و مضاعفاته والأثار السلبية للعلاج ... إلخ
تسلم
10-04-2012, 00:50 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
والله سوا الزين جلدهم من يحمي المواطن من صلف وقسوة الاطباء وقلة.ادبهم وجلافتهم وتفاهتهم السبب الاساسي بالنسبة للخروج من السودان هو الاطباء من سنة 1990 الى.1993 عند خروجي تمنيت ان اقتل عدد منهم لمواقفهم غير الانسانية لاحظ قتل موش جلد ساي الى ان يتعلموا الادب فاليستمر المواطنين في تأديبهم بالضرب عشان نوعيتهم دي بتخاف ما بتختشي قال عايزين حماية قال جاتكم البلاوي
10-04-2012, 01:11 AM
امينة عيسى امينة عيسى
تاريخ التسجيل: 11-20-2010
مجموع المشاركات: 619
تعرف فن التعامل مع المريض ومع اهل المريض كما ذكر احد ضيوفك هى مادة تدرس تسمى هنا فى النرويج مثلا etikk og kommunikasjon واهم فرع فيها تجهيزك كممرض او طبيب او حتى موظف فى الحقل الصحى ويجب عليك ان تترك ما يخصك فى بيتك وتاتى وراسك خالى من مشاكلك وبما اننا بشر وربما تكون عندنا من المشاكل الخاصة ما يؤثر فى مواقفنا الا انه عند مهنة كمهنة الطب او التمريض التعاطف والانسانية والتى يجب توفرها في من يختار هذه المهنة تتطغى على كل مشكلة ما استغرب له هو هذه النوعية التى نرى ونسمع عنها فى مستشفياتنا كل يوم نسمع بمصيبة جديدة سببها الاطباء او العاملين فى الحقل الصحى المشكلة دى زى ما قلت انت تنتهى متين ووين وكيف ربك اسمو الكريم
10-04-2012, 02:38 AM
Rawia Rawia
تاريخ التسجيل: 11-23-2002
مجموع المشاركات: 8396
والدي الله يرحمه توفي بجرعة من دوا زيادة وقالوا غلطة الممرضين لانه وصية الدكتور (من بيته) انه يدوهو نص حبة كل أربعة وعشرين ساعة والدكتور كان حاضن في بيته لانه عندو نزلة وما إهتم بالحضور مع العلم والدي كان نزيل بالمستشفى بكمية توصيات من مسؤولين وناس كبار اوي في البلد صراحة ماقصروا بعد داك الاطبا كلهم جو البكا وعزوا فيهو
____
Quote: etikk og kommunikasjon
وحاة الغايب دي إتيكيت أوف كميونكيشن من بكرة بضيف اللغة النرويجية في السي في حقي
10-04-2012, 03:10 AM
Rawia Rawia
تاريخ التسجيل: 11-23-2002
مجموع المشاركات: 8396
كل يوم ياوليد بكون عاوزة أكتب عن تجربة مرض أمي ورحلة علاجها للعبرة والمقارنة والمعرفة والاستفادة
وهاك موقف واحد من مليون موقف مروا بينا كأثر جانبي لكمية الادوية الاخدتها حجوج ظهرت ليها أعراض خوفتني... بل رعبتني بجد حضرت لغرفتنا سيدة كبيرة ومعاها إتنين أول حاجة عملتها حضنتني شديد وخلتني أخدت بكيتي على كتفها وبعدين قدمت روحها وطلعت رئيسة قسم المرض الاعراضه ظهرت لي حجوج وقالت لي أهم علاج لامي إني أبقى جنبها وكلمت القسم يحضروا كرسي كبير (شيزلونج) عشان أبيت مع أمي في الغرفة مع إنه مافي بيتان مع المريض ولا مرفقة حتى وطلبت ناس الفيزيكال ثيربي يعملوا جلسات لامي ويقعدوها ويحركوها وغيروا كل الادوية وظلت تتابع وتتصل وتزورنا عدد من المرات في اليوم وعملت لي نسخ من النت عن المرض وتاريخه واعراضة والتعامل معاهو وادتني عناوين في النت لويب سايتس بتتكلم عنه والممرضة كانت خير عون حكت لي بالتفصيل الممل المراحل الحتمر بيها والدتي لغاية ماتشفى وفعلا كانها كانت بتقراها من كتاب والله عمرها 24سنة لاني بعد ما إنبهرت بيها سألتها عن إسمها وعمرها المهم إنه دي كانت من أصعب ستة يوم مرت علي في حياتي وبسبب ناس مدربة وواعية وعارفة شغلها اولا وكمية من الانسانية والعطف والحنان مرت بسلام وتركت جميل أثر
____ بعد شهرين من الكلام دا لما ظهرت نفس الاعراض وقلت نستشير الدكتورة نفسها هبشت الكروت الادوني ليها كل الاطبا في المستشفى وكنت مستعجلة مسكت اول كرت واتصلت بالمستشفى والزول الرد قعدت حكيت ليهو قصة حياتنا كلها بالتفصيل ووصفت ليهو شكل الدكتورة طويلة قاصة شعرها كذا كذا قعد سمع كلامي كله وقال لي إنتظري دقيقة في الخط حا اوصلك بيها واتمنى لي امي سرعة الشفاء ووصلني بالدكتورة وساعدتني تاني لما رقت شوية ورفعت الكرت وقريت الاسم طلع الدكتور الكبير أوي أوي في المستشفى
10-04-2012, 07:57 AM
داليا حافظ داليا حافظ
تاريخ التسجيل: 06-06-2008
مجموع المشاركات: 5055
للاسف الشديد يا وليد والزول ما داير يقع في فخ التنميط ..
المشكلة مافي في مهنة الطب المشكلة في ثقافتنا نحن ..وفكرتنا عن الانسانية ..فرق شاسع بين الاطباء السودانيين ـ ما كلهم ـ وبين بقية الجنسيات خاصة الأوربيين والامريكان ..او القروا في الدول الثقافتها الانسانية عالية ..
والله انا لمن ولدت بتي حسيت اني عايشة في حلم جميل ما داير أفوق منو دكتورتي كانت سورية بريطانية ..والاستطاف كلو كان ما بين اوربي واوربي بالتجنيس ..، أمي الكانت مرافقاني قالت لي مرة أول أعرف يعني شنو "ملائكة رحمة" ..، الناس ديل كان بفكروا معاي في عز المعمعمة ديك أنو كيف تكون تجربة الولادة أحلى ذكرى في حياتي ..وقد كان ..
في حاجة بالجد محيراني ..غالبا أي دكتور تمشي ليهو في السودن وانت بتتكلم معاهو وبتشكي بتلقاهو دايما بيكتب في الورقة ..وما بعاين ليك ..وغالبا مابشرح ليك عندك شنو بالضبط ..، في زول مشى لدكتور في السودان اداهو رقم التلفون بتاعوا ..أو وصلوا وهو مارق لحدي الباب سؤال جادي والله ؟لانو أمكن القصة دي معاي انا بس..
10-04-2012, 08:18 AM
المكاشفي الخضر الطاهر المكاشفي الخضر الطاهر
تاريخ التسجيل: 08-08-2004
مجموع المشاركات: 5644
مرحب داليا فعلا هي مشكلة مجتمع لكن بافتراض وهو افتراض ليس صحيح على مطلقه الافتراض ده بقول انو الطباء ديل زبدة المجتمع وهم خلاصة الخلاص لو مشينا بالافتراض ده
المتعلمين بالتاكيد وليس على المطلق مفروض يكونوا احسن من الجهلة في امر التعامل الحسن مع العباد ده والاطباء بالنسبة للمتعلمين على الاقل ممكن نقول عليهم هم خلاصة اصحاب الافضل تحصيل من المتعلمين ، ده من واقع نتائج الشهادة السودانية والقبول في مؤسسات التعليم العالي
عليه بنتوقع منهم تصرف مختلف شوية من باقي الناس فان خلاصة الخلاصة تتصرف هكذا ... وتبحث عن الاعذار فالاحراى ان نجد كل العذر لالجلهة والفاقد التربوي من اصحاب الظروف المجبرة او الخيارات الشخصية من الذين لم ينالوا نذر يسير من التعليم او الذين يكملوا تعليمهم ان كان تصرف الطبيب الذي يدخل كليته باعلى من 90% ويدرس 6 سنوات جامعية ثم يجري دراسات فوق جامعية وتتاح لعدد مقدر منهم فرصة السفر والاحتكاك مع الشعوب الاخرى يكون كذلك فعلاما ولماذا نستهجن تصرف العسكري صاحب التحصيل المتدني والتربية العسكرية الجلفة الموجهة
!!!!!!!!!!!!!!!!!!!!!
طبعا كلامي ده ما على المطلق
10-04-2012, 08:14 AM
بدر الدين اسحاق احمد بدر الدين اسحاق احمد
تاريخ التسجيل: 03-29-2008
مجموع المشاركات: 17127
ياخ قصة الاطباء في السودان دي عايزة قعدة عديل كدة!
عندي تلاتة قصص و هي تجاربي الشخصية مع الاطباء في السودان
الاولي: و انا في الثانوي, مشيت وزارة الداخلية اعمل تأشيرة لزوجة اخوي و كان واحد من بوابات الحديد في الوزارة مفكوك و متكوك و مافي زول جايب خبر, و نحن قاعدين في الصف من الدغش جاء واحد دفر الباب و الباب وقع فوق رأسي و فلقني و دمي سال ملأ القميص. مشيت حوادث الخرطوم و بعد اللطعة دخلت على دكتور سألني الفلقك شنو? قلت ليهو وقع فوق رأسي باب حديد في وزارة الداخلية. الراجل اتجنن و قام طاردني من المكتب, و في نص العيادة وقف يقول لي شوفوا بالله قال وقع فوقه باب وزارة الداخلية, انت راسك دبابة يللا اطلع من هنا! رجعت امدرمان و اول دكتور شافني و عالج الجرح كان بعد الساعة تمانية مساء!
القصة التانية: امي الله يرحمها, اصيبت بدوخة و مشت مستشفى امدرمان و مسكوها و كلموا ناس البيت انها اصيبت بصدمة سكري كنت في الداخلية في الجامعة جوا كلموني و مشينا المستشفى اليوم الاول و اليوم التاني لاحظت ان لونها تغير لأخضر زي صفق الشجر, فمشيت بحبة العلم الدرسناهو في الزراعة كلمت الممرضة; اني شاكي ان امي مصابة بتسمم. تجاهلتني عدة مرات و في النهاية قالت لي امشي كلم الدكتور. مشيت لقيت الدكتور و معاهو اتنين تانين بتونسوا و بشربوا شاي فكلمته فقال لي امشي حا اجي اشوفه.ا انتظرت مدة من الزمن و مشيت تاني برضو قال لي امشي حا اجي, و الحكاية بقت اكثر من ساعة و حاجة في المرة التالتة كنت عايز اعمل زي الزول الانت فتحت البوست دا بقصته, فنادوا البوليس و طردوني من المستشفى و بعد داك مشى شاف امي و كلم اختي انه محتاجين قسطرة لانها مصابة بحبس بول! جبنا القسطرة و ماتت امي في تلك الليلة!
القصة التالتة: تعرض اخي الاكبر مني مباشرة لحادثة حركة في امبدة-نوفمبر القادم يتم سنتين- و نقله ناس البوليس للمستشفى و ادخلوه الحوادث و هو ينزف, تركه طاقم المستشفى و الاطباء ملقى على ارضية الحوادث الي ان طلب هو نفسه من احد الحضور في المستشفى ان يتصل باخر رقم في تلفونه, و تم الاتصال بابن خالي في سنار (تخيل!), بدوره اتصل باخوتي في امدرمان و جاءوا و وجدوا محمد الله يرحمه عايم في دمه, ايضا عملوا مشكلة, و في النهاية ادخلوه العملية و توفى!
واضح جدا يا وليد, ان اقصر طريق في السودان لتنال عناية من طبيب هو ان تنهزره او تخوفه عديل كدة. و الاحسن انه اي انسان يمشي المستشفى يسوق معاه عصابة عشان يقوم انصاف الالهة الاطباء بدورهم الذي يأخذون عليه اجر و تقدير غير مستحق من الناس!
10-04-2012, 10:00 AM
محمد أبوالعزائم أبوالريش محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
سلام يا أهلنا ..... أتفق وأتعاطف مع كل الأمثلة أعلاه. بس عندي سؤالين ... الأول: بخصوص زوج المريضة الضرب الأطباء وطلبوا حماية الشرطة .... ذُكر إنو الشرطة فعلاً وفرت للأطباء الحماية. أذكر قبل يومين قريت شئ مشابه، فيهو إعتداء من أهل مريض على الأطباء في مستشفى الشرطة .... لما الأطباء طلبوا الحماية، ما لقوا تجاوب .... لاحظوا هنا المرضى أو ذويهم منسوبي شرطة والأطباء منسوبي شرطة.
السؤال التاني: هؤلاء الأطباء منزوعي الرحمة هم سودانيين (طبعاً ما عندنا أطباء أجانب) ... نفس الأطباء السودانيين بيطلعوا من السودان وبيعملوا في أوروبا والخليج، فيشهد لهم الكل بالكفاءة والإنسانية (يمكنني عكس تجربتي في الخليج) ..... ما السبب في هذه الإزدواجية؟
10-04-2012, 11:34 AM
امينة عيسى امينة عيسى
تاريخ التسجيل: 11-20-2010
مجموع المشاركات: 619
اخى العزيز بدرالدين احمد موسى يؤسفنى جدا ما حصل لك رحم الله والدتكم واخيكم واسكنهم عالى الجنان ياخ والله دى ماساة ما بعدها وجعة انا لله وانا اليه راجعون حسبى الله ونعم الوكيل
انا فى رايى انه المواطن لازم يلعب دور ما بقول يضرب الطبيب لكن لازم يكون واعى لحقوقه فى مرة من مرات زياراتى السريعة للسودان لزيارة الوالدة ربى يديها العافية ..كانت بنت ود اختى ضربتها ركشة قدام الباب وقبل ان يكتشف اهل البيت الحاصل نبهنى صاحب الدكان جارنا فحملتها ومعى صاحب الركشة وجرينا على مستشفى امدرمان الطفلة كانت تبدو سليمة ولكنها تصرخ من الخوف حملنها وبعد الاجراءت العقيمة من اورنيك تمانية وخلافه وصلنا لمكان الاشعة وكانت فنية الاشعة وانا واقفة امامها فى الشباك وفى ايدى الاوراق كانت مشغولة بالحديث فى الموبايل والونسة خاصة جدا ومعاها غرويد عيون طبعا انا ستين عفريت فى راسى بس توقعتها بمجرد وقوفى امامها تنهى مكالمتها ولكنها لم تفعل. طبعا لم اتمالك نفسى وصرخت فيها باعلى صوتى(الموبايل والونسة وغرويد العيون دا فى وقت راحتك انت قاعدة هنا لخدمة المرضى البتاخدى عليها قروش استحى من نفسك واقفلى الزفت دا) واردفت انا فى مستشفى ولا زريبة هوامل؟؟؟؟ كان هذا باعلى صوتى ..صمت جميع من فى الصالة حتى هى وجمت ولمدة دقيقة تقريبا لم ترد على كل الذى رايته قفلت التلفون وسالتنى المريض منو؟؟؟
انا فى رايى لو اى شخص عارف حقوقه وما بيسكت وما بيقول باركوها بينصلح الحال ولو تدريجيا
10-04-2012, 11:36 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
عليك الله يادكتور تخليني النشوف زولي حليل زمن الناس كان بتغني للدكاتره عارف ياولي والله والله الناس ديل طبعا عندنا معاهم تجارب شخصية قبل وفاة الوالده رحمة الله عليها ياخي ديل حقو لقب الدكتور دا يشيلوهو منهم يعني في المية ممكن تلاقي دكتور ملتزم بواجب مهنه وله اخلاق ياخي ديل لو قعدت احكي ليك عن اي موقف بتندهش حتى بقروشك مابتلاقي الادب والاحترام والتعامل الطيب غايتو ربنا يصلح الحال ولكن عندي سؤال ياجماعه الى ممكن نرجع لايام زمان ؟
10-04-2012, 12:14 PM
الفاتح سليمان الفاتح سليمان
تاريخ التسجيل: 09-14-2009
مجموع المشاركات: 1735
الحال لا يمكن فصله من واقع السودان ككل في اي زمان ومكان
اذا كانت كتير من الحاجات منهارة في خارج سور المستشفي في التعامل في التواصل في الدراسة في الامن في الشرطة فما نتوقع بمجرد انها مهنة انسانيةي زي ما بنردد انو
الوضع يكون بختلف ....
كتير من القصص دي واقعي جدا وصحيح والمفروض الاستجابة تكون بشكل تاني من الاطباء في التعامل مع المريض لكن السؤال
مين المسؤل من دا كلوا ؟؟
بس بكل تاكيد ما في حل بالعنف
يعني كان في مجموعة كانت اكتر عددا و اعتدوا علي اطباء بالضرب وجوطة ممكن نفس المجموعة في مستشفي تاني حتي لو مسحوا بيهم الارض ما يفتحوا خشمهم
اديكم مثال :
في قسم المسالك البولية اعتدي احد المرافقين علي طبيبة وكان تبريره انها لم توضح له حالة المريض بشكل جيد
بعد يوم حضر طبيب وهو علي علم بالمشكلة تدخل احد المرافقين بنفس الطريقة كان رد الطبيب قاسي جدا واكثر عنفا وعدم تهذيب مقارنة بتعامل
الطبيبة معهم ما كان منهم الا ان سكتووووووا وعملوا نايمين ما فتحوا خشمهم وللاسف وانا بكتب في القصة دي ظهر انو القصة دايما بتكون حسب
الجو العام يعني كثير من المرافقين واصحاب البطاقات العسكرية الواحد ما بفتح خشموا لو كانت المستشفي عسكرية او الطبيب ضابط او غيروا ... مممكن يقتلوا عديل
يعني ميزان العنف ا ما بحل مشكلة تعامل اومشاكل كانت ادراية او غيروا الخلل كبير في نظام كامل في الصحة او في غيرها ...
عملت في السلاح الطبي في جوبا ونعامل كضباط في القوات المسلحة فترة الخدمة
لم يتجرا في يوم اي مجند او ضابط من التدخل او الحديث مع طبيب رغم انو في مليون تقصير في الادوية ومعينات العمل وغيرها
ومثال ليها علاج الكينين الكان بشتروها العساكر من جيبهم اتخيل في منطقة عمليات انو الدواء ما يتم توفيره للمجندين وبعد دا كلوا الواحد فيهم
من سكات يمشي من جيبوا يشتري الدواء والاسواء انهم كان مخصوم منهم رسوم تأمين صحي عسكري من مرتباتهم ,,
لكن نفس الموقف دا لو حصل في مستشفي حكومي ح يعتدوا علي الاطباء والناس تكتب في الجرايد الخ
بالنسبة لقصة انو الاطباء ديل من وين
الاطباء ديل من السودان وبركبوا المواصلات وبصرفوا في مرتب زيهم وزي باقي الناس ومرات بشتغلوا بدون مرتب
وهم جزء من منظومة كبيرة بتاعت صحة فاشلة فيها سياسات من فترة عشرات السنين فاشلة جدا لانو الصحة ما اولوية في السودان .
لسوال هل المواطن السوداني حريص علي الخدمات الصحية وبطالب بتحسينها وممكن يعتدي بالضرب علي المسؤليين الحقيقيين منها ؟
يعني المجموعة الضربت وكسرت في الحوادث دي ح تعمل نفس الحاجة في شكل احتجاج انشا الله سلمي من اجل تحسين وضع الصحة . وانو المعاملة سيئة ولا
القصة تبقي شغل عصابات ساكت دكتور براهو وشلة بتاعت مرافقين لقوا انو الجو مساعد انهم يعتدوا وانفعلوا وخلاس انتهت في محكمة ويدخل الاجاويد في اعفوا وخليهم وغيروا
الخ
سلام
10-05-2012, 08:51 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
لك التحية صاحب الخيط وضيوفه الأكارم أعتقد أن هناك نوع من الأطباء لا يحترم الناس مرضى كانو أو مرافقين ويتمتع بقدر عال من العنجهية وفتحة خشموا يقول لك ما توريني شغلي ، أو بتفهم أكتر مني زي صاحب القصة دي. وهناك نوع محترم جدا ومتواضع وتحس منه الرغبة للتواصل معك والحرص على سماع كل كلمة منك للأسف النوع الأول هو المسيطر على الساحة الآن خصة صغار السن وتكون سعيدا لو صادفت طبيبا طيباً
بعد عيد الفطر الماضي مرض قلبي أصاب قريب لي ورقد بالعناية المكثفة ببحري أياماً ولما تحسنت حالته نوعا ما سمح له بالخروج مع تعليمات صارمة بعدم الحركة وقلة الكلام وهكذا لم نذهب به إلى بيته بل إلى بيت ابن اخيه حتى نوفر له جو من الراحة دون أن نطلب من حد ألا يزوره وكل من يتصل لما يعرف مكانه يفهم سبب العدول عن بيته فيكتفي بالهاتف
لم تمض الأمور على ما يرام فجر اليوم التالي تعب الرجل وأتينا به مرة أخرى إلى حوادث بحري والزحمة شديدة وطبيبتين صغيرتين تستقبلان المرضى أجلسناه على كرسي وجاءت إحداهما بعد فترة قصيرة تسأله : ما لك يا أبوي؟ وهو في غاية التعب هم في بداية الشرح فقلت لها يا دكتورة الرجل تعبان اتكلم معك أنا قالت لا هو كويس اسمع منو قلت ليها الرجل ممنوع من الكلام وهو كان راقد هنا وانتظري قليلا نجيب لك الكرت حقو ومع هذا هي مصرة على مواصلة الأسئلة وهو يخشى إنفعالي وبدأ يتحدث قلت لها بلغة آمرة وبصوت غاضب لا تتحدثي معه والرجل قلبه تعبان هنا بالعناية المكثفة. فصرخت في وجهي أطلع بره عايزين مرافق واحد بس هنا أطلع بره واحد زهجان داير .... وهرطقت كثيرا وهزأتني والله بما لا يشير لاي قدر من الأدب !! ففارق السن بيني وبينها كبير أقله 10 سنوات. ولا أعرف كيف يكون طبيب وقليل أدب .. ويستطيع لسانه أن يسب الناس وهم على الحق!! وصاحبي يطلب مني أن أسكت ويطلب منها أن تسأله !!! ولولاه لكنت مكان صاحب القصة هذه ويبدأ مريضنا بالكلام كنت بالعناية المكثفة عندي قلب وعندي ضغط وعندي سكري هنا الكبكبة بدت طلبت منه أن يستريح ويسكت ويرقد على السرير الذي أشارت إليه وتجاوزنا المحنة بحمد الله كان الله في عون مرضى السودان ورعى الله الأطباء الذي يعرفون أن المريض وأهله يحتاجون قد عالي جدا من التعامل الراقي معونة لهم على مصيبتهم وتخفيفا لها.
10-04-2012, 12:04 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
سلامات يا وليد للاسف (بعض )من ينتمون الى الاطباء والصيادلة والممرضين وحتى بوابي المستشفيات يستحقون الجلد وأكثر من ذلك. لا اتعاطف مع هذا الطبيب فالسوداني بطبعه لا يصل الى هذه المرحلة الا اذا تعرض للاذلال الشديد ..منذ متى كان الطبيب يحتاج للحماية من مريضه ان كان يعامله بانسانية؟؟
10-05-2012, 09:45 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
الاخ وليد المبارك بوست موفق جدا و موضوع في غاية الاهمية لانه يمس حياة الناس مباشرة انا شاهد عيان على اكثر من واقعة و في كثير من المستشفيات فيها العام و الخاص و فيها تجارب شخصية ومنها تجربة الوالد التي كانت سبب مباشر في وفاته عليه رحمة الله لكن خليني احكي ليك اخر واقعة حدثت اثناء اجازتي الماضية و تحديدا شهر يوليو الماضي مسرحها طواريء يستبشرون كنت و زوجتي مرافقين للشغالة و اثناء وجودنا داخل الطواريء اتى شباب مصريين يحملون احد المصريين و هو يصرخ باعلى صوته من الالم و كانو متوترين جدا توجه احدهم نحو الطبيب ( كان موجود طبيب واحد فقط ) و طلب منه معاينة مريضهم فكان رد الطبيب صادم جدا و بحدة انت شايفني بلعب قمار !!!! جاء مره تانية و قال ليهو الراجل بموت فكان رده اكثر حدة هذه المره ما يموت لو مات ياخ الموت قالو وقفوهو !!!! الطبيب ليس من اطباء اخر الزمن كما يقولون طبيب كبير في العمر مع ملاحظة ان المستشفى مستشفى خاص يعني العلاج فيهو بالقروش طيب لو مستشفى حكومي عينة الطبيب ده ح يكون عندو عكاز عدييييل كده المشكلة بالجد عميقة و لكنها ليست حكرا على قطاع دون غيره منتشرة في كل مكان
10-06-2012, 06:55 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
اختنا نجلا كيفك ياخي قبل التدريب التربية التربيه عشان الناس تكون صالحه في المجتمع ياخي دكتور الحله دا زمان كان عالم ما كان عامل لكن كان في انسانية ودي اكثر مهنه تعتمد على الانسانيه وللاسف الشديد الكثيرون منهم حتى عديمي التربية اذا كان في ردهم للمريض او لي اهل المريض
10-06-2012, 07:34 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
يعلم الله انى ضد العنف والضرب ده لكن والله ووالله انى لاتعاطف مع الزوج
ياوليد ده وجع قللللللللللللللللللللللللللب شديد
انا مع داليا حافظ المشكلة اكبر المشكلة فى احساسنا ببعضنا نحن السودانيين ... يعنى زى ما قال ابوالريش الطبيب السودانى بره بلده وسام وتاج طب و فهم وشطارة وانضباط وانسانية فائقة كمان بس جوه البلد غير
الرئيس السودانى الناس بتموت بالجوع بتبرع لفريق مصرى وبيرسل لحم للمصريين وكمان بيدى ارض لمصريين والناس فى السودان تسكن العشوائى وبدون خدمات
المشكلة في حسسنا ببعض و تقديرنا لاهمية حيواتنا
السودانى مع الاجنبى غير السودانى مع السودانى
10-04-2012, 01:26 PM
الفاتح سليمان الفاتح سليمان
تاريخ التسجيل: 09-14-2009
مجموع المشاركات: 1735
والله كويس الجلدهم ياخ نحن عندنا دكاترة متكبرين بشكل مقرف.. والمشكلة الواحد فيهم تلقي راسو فاضي وعامل لنفسو قومه وقعده في الفارغة.
كنت في السودان السنة الفاتت قام لي طرس مشيت مركز صحي سمير عشان اقلعو، المهم " المتدكترة " قالت حتقوم بالعملية المهم اول ما ختت البنج وبعديها بشوية سالتني ان كنت اشعر بشي، قلت ليها بالحيل.. قالت لي خلاص انتظر شوية والبنج بشبك.. انتظرت شويتين ومافي جديد. المهم صارحتها باني بضرب ابو حمار الكان تراعي لحالتي شوية وتزيد جرعة البنج ، وحاتكم التقول ضربتها كف ووقعت ليك فيني مشروع هداية، قلت ليها يا بت الناس وحات الله انا ما جاي هنا لهداية انا هنا عشان اقلع ضرسي المعذبني دا، المهم رفضت واصرت انو تعمل العملية من غير زيادة البنج، المهم اتوكلت علي الله وسلمتها خشمي، عافر عافر كك كسرت الضرس.. طلعت نص وخلت النص التاني.. واتخيلو الالم. وشكلها ما قدرت تتحمل الدموم ولا شنو ما عارف، قالت لي بعد كدا انا ما بقدر اعمل اي حاجة تحتاج انك تمشي بيهو باكر لمستشفي الاسنان عشان يتمو ليك، والله بهذه البساطة. ا تخيلو زول يقعد بنص ضرس للصباح عشان يمشي بيهو مستشفي تاني يتمو ليهو. لا يحدث هذا الا في الخرطوم.
المهم لملمت بعضي ومشيت بيتنا بعديها بقليل باقي البنج داك فكا وداك يا الم والدم حلف ما يقيف، جاني صحبي وليد في البيت ولقاني في الحالة الصعبة دي. ولوليد صديق طبيب اسنان عندو عيادة في شارع الستين اتصل عليهو وهو كان في البيت، المهم حكي ليهو القصة وافق علي طول انو يشوفني ومشينا قابلناهو في العيادة، وكان ذلك حوالي الساعة العاشرة ونصف مساء، اداني بنج تاني وقلع باقي الطرس في اقل من دقيقتين. وقال لي بعد كدا امشي اضرب ابو حمارك ساكت. الحالة التانية دي كمان كانت مع فني النظارات البيقولو عليهو دكتور برضو،
المهم انا عندي نظارة نظر، المهم قلت امشي اعمل لي واحدي تانية ازبير، لانو النظارات في كندا هنا عندنا غالية، المهم طلعت النظارة اللابسة وقلت ليهو اعمل لي واحدى نفسيها كدا، يعني نفس مقاس النظر، المهم وافق ، دفعت ليهو القريشات ومشيت كي ارجع اليوم التاني للاستلام، المهم وحاتكم رجعت تاني يوم لقيت ليك الزول بشتن الشغلة بشتنة، عمل لي نظارة قعر كباية والعين الشمال مختلفة تماماً، قلت ليهو يا زول دا شنو السويتو دا قال لي لي انت عندك قرب نظر في العين اليمين وبعد نظر في العين الشمال، قلت ليهو كدي براحة كدا انت الكلام دا جبتو من وين؟ الكلام دا من نظارتك الاولي قلت ليهو طيب انا اسي نظارتك العملتها لي دي ما قادر اشوف بيها من خالص. المهم بقي يقنع فيني انو هو صاح وانا مفترض اشيل نظارتو دي وامشي بيها وطلع لي انو الدكاترة الكندين ما بعرفو اي شي. اتخيلو بالله. المهم في الاخر بعد جوطة رضي انو يرجع لي قريشاتي. ومشيت عملتها في محل اخر و احتمال تكون طلعت ميه الميه.
في الختام: المشكلة ما في الدكاترة المشكلة في المجتمع البخلق من السجم ديل دكاترة، يعني الواحد لو دخل جامعة الخرطوم ساكت تلقي الحله كلها تنادي فيهو دكتور دكتور، الدكتور جي الدكتور مشي الدكتور قعد الدكتور قام. فشوف زول ذي دا حيكون احساسو شنو لمن يتخرجلو من كلية طب. فكيف يقدر يتعامل مع المجتمع بشكل طبيعي لمن المجتمع يكون خالق منو كائن اخر، اتي من كوكب اخر، واطلق عليه اسم دكتور. تنبيه: انا هنا اتكلم عن بعضهم او الاغلبية لاني اعلم ان هنالك بعض الاكفاء المتواضعون الذين يعرفون معني شرف المهنة، فأسف ان كان لا بد لي ان اذكر "دكاترة" بشكل جمعي.
والله يكون في عونك يا بلد
10-05-2012, 08:09 AM
الفاتح سليمان الفاتح سليمان
تاريخ التسجيل: 09-14-2009
مجموع المشاركات: 1735
يا راني والله اعفي لينا ياخ ضحكت في القصة دي بس في حتت ابوحمار دي
لكن طبعا ما الالم بتاعك وانا اقول ليك انو احتمال كبير البنج ما فعال(ودا كلام عن المعينات بتاعت العمل الكانت ممكن تسبب مشكلة بينك وبين الطبيب )
لانو حتي لو بتضرب ابو حمار والبنج مزبوط ضرسك بنقلع وبهدو تام ومعاه شكرا جزيلا ليك انت ما للدكتور او الدكتورة الداعية دي ... ____________________________________________________________________
بالله الدكاترة ديل ادوهم في صنقورهم دا وقت عاملين نايمين والبوست دا ماشايفنوا الواحد يعافر هنا وهم ولا هماهم
لسان حال بعضهم يقول كلام منطقي زي :
انو الناس دا بتكورك في شنو
الموضوع نظام صحي متكامل في كل حاجة لانو كتير من الاحتكاكات بتكون نتيجة نظام صحي غير سليم ودا الفرق ,
انا اقول للناس البتسال انو هل الاطباء ح يخلوا العنجهية دي في نظام صحي تاني او لا بل العكس تمام الدكتور السوداني
برة فري بروفشنال بس ما انسانية منو طبعا اكيد العنجهية الشايفنها دي ما ح تكون في ,ودا ما خوف من زول
لا ابدا لانو دا النظام لانو هنا في السودان اصبحنا فوضي ونحن لمن نمرض بنكون في هامش الانسانية بتاعت الدكتور
ما في رحمة لانو ما في نظام متكامل من المركز الصحي والتحويل والحوادث المجهزة بعدد كافي من الكوادر
وما بكون في حوجة لمرافق زاتو وعدد من الاطباء والكوادر الصحية بمختلف التخصصات وتدرج في مراحل معاينة المريض ,,
هنا في السودان شغال مع المريض من جيبوا والله دي اغلبية ما اقلية من الزملاء في السودان ملايين الروشتات بتندفع من طبيب عادي انت تخش الحوادث تلقاهوا
عامل شكله مع مرافق ومع مريض تاني هو دافع ليه من جيبوا عديل ( دا السودان ),,,
لانو زي ما حاول البعض هنا يربطها ليكم بالتدريب وبيئة العمل وغيروا في السودان فما في مقارنة بين هنا وبين اي مكان برة تاني في موضوع الصحة دا ,,,
في مواقف كتيرة اتكتبت فوق لو صاحب القصة هو زاتو طبيب كان رد فعله في السودان دا ح يكون بنفس الطريقة لانو نفس الزول الاعترض علي تصرف
الطبيب وعمل معاه مشكلة ح تلقاه عامل مليون مشكلة مع نفس المواطن دا كان جاهوا في القسم او مكان عملوا او المدرسة او اي حتة تانية ,,,
فما نفتش عن التعامل الملائكي في مكان اصبح ضيق الاخلاق سمة مميزة ليهو للاسف دا الواقع ,
سوء الخدمات الصحية بما فيه التعامل البتتكلموا عنو هنا هو قمة جبل الجليد لانهيار تام لمنظومة المجتمع الادارات الامن الصحة التعليم الخ ,,في السودان
فالقسوة علي المواطن بدت من عدم توفر االمال الكافي عشان يصل الطبيب مرورا بغياب المختصين في اقرب مكان ليه الي روشتات باهظة الثمن
عشان كدا اظهر انو والنفق ح يكون مظلم في كتير من الحاجات وللاسف حتي في اضعف لحظات حياته وهي المرض ,
10-06-2012, 11:12 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
يديك العافية يا امينه واحول مداخلتك دي لاخونا الفاتح سليمان
(ويجب عليك ان تترك ما يخصك فى بيتك وتاتى وراسك خالى من مشاكلك وبما اننا بشر وربما تكون عندنا من المشاكل الخاصة ما يؤثر فى مواقفنا الا انه عند مهنة كمهنة الطب او التمريض التعاطف والانسانية والتى يجب توفرها في من يختار هذه المهنة تتطغى على كل مشكلة)
10-05-2012, 02:29 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
هذا موضوع مهم جدا .. علاقة المريض والطبيب المعالج و المستشفي .. في السودان لا يوجد نظام لمحاسبة الأطباء وتقييم الخدمات الصحية.هل يتجرأ هولاء الاطباء ان يجاهروا بعدم الاهتمام بمعاناة المريض ان كانوا خارج السودان!!!!! هنالك كثير من الابحاث والدراسات أنشأت لقياس ارتياح/رضا المرضى (Patients' satisfaction) للطبيب المعالج وارتياح/رضا المرضى للخدمات الصحية. هذه الابحاث والدراسات أنشأت لتطوير الرعاية الصحية الحديثة ومشاركة المريض والمرافقين في امور الرعاية السليمه والعلاج للمريض ومشاركتهم في القرار...... لتطوير الرعاية الصحية اوصي طلبة الماجستير والدكتوراة في مجالات الخدمات الصحية بأنشأابحاث ودراسات حول رضاالمرضى عن الرعاية الصحية بالمستشفيات العامة والخاصة.
هنالك قضية ثانية ومهمه جدا عندما اتذكرها اكون في هم حينما تذهب لتزور مريض في المستشفي ..عليك بتوفير مبلغ لدخول المستشفي لا احد يدخل مجانا الا منسوبي الاجهزه الامنية والشرطة والجيش .. عليك بدفع مبلغ وقدره حتي لو كنت معدم وابنك هو المريض... و لو كنت مرافق او ممارض للمريض وخرجت اكثر من مرة لتناول ادويه من صيدلية او شئ اخر عليك بالدفع ... ومع ذلك المستشفي لايجب ان يكون مستشفي ... دمار وفوضي في كل الاقسام ... اين تذهب هذه الاموال!!!!!!!! نحتاج لبوست منفصل عن ماهية هذه الاموال وطرح هذه القضية... في الخارج وهنا اتحدث عن بلاد عشت فيها امريكا والسعوديه الكل يدخل مجانا ومعاها ابتسامه... ومع ذلك المستشفي يكون مستشفي. والله المريض والزوار معنوياتهم ترتفع.
10-04-2012, 11:16 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
نخلي الاطباء في عنجهيتهم عشان ناس البوليس متعنجهين مثلا ؟؟!! او لحدي ما يتم تغير عمر البشير والانقاذ
ثم شنو علاقة نظام صحي متهالك مع تعامل محترم
ما تعالج الزول لكن كمان ما تقهرو وتنهرو وتتقندف فوقو
كلامك عن النظام المتكامل ده تقولوا للدكاتره قول ليهم المريض جايكم زهجان لانو البلد نظاما متهالك وزيادة على ده هو زاتو عيان يعني نظامو الداخلي متهالك فبالله عليكم الله يا دكاترة عاملوه معاملة خاصة لانو زول عيان في بلد عيانه
ما ممكن كل الناس الجات كتبت حكاياتها على مختلف مشاربهم واتجاهاتهم السياسية واثنياتهم وفيهم الفي السودان وفيهم الحاليا خارجه يكونوا اتفوقوا على النقطة دي على الفاضي
وطالما انو الموضوع ده طلع على السطع معناتا فات حدو وطفع نحن ما عاوزين من الدكاترة يعملوا لينا نظام صحي تمام لانو عارفين انو دي ما شغلتهم ولا عاوزنهم يغيروا لينا النظام الحاكم لانو دي برضو ما شغلتهم براهم
ولا حتى يعالجونا لانو المعالج الله ثم الامكانيات نحن عاوزين منهم يعاملوا الزول القداامهم وظرفوا خاصه ده بانسانية
دي عاوزه ليها سياسة وما اليه من تغير النظام والنظام الصحي مجرد معاملة الشخص الواقف قدام الطبيب بانسانية دي الا يغيروا ليها عمر البشير ؟! يعني الزول المريض ده لو ما غير عمر البشير
الدكتور ما حا يتعامل معاه بصورة انسانية !!!
10-05-2012, 12:15 PM
زياد جعفر عبدالله زياد جعفر عبدالله
تاريخ التسجيل: 11-15-2005
مجموع المشاركات: 2348
ولي يا حبيب كيفنك... تعرف يا ولي كل الكلام القلتو و القالوهو المشاركين صحيح عن الاطباء في السودان,,,و ممكن أحكي ليك قصة حصلت لي: كنت مرافق لشقيقتي قبل سنوات عديدة وهي مريضة في مستشفى بحري...جات واحدة جنوبية فارمة ليها رجلها عربية قندران حسب ما سمعنا...الطبيب سمعناه يصيح( ما بخت يدي فيها لو ما حميتوها)!!!! و الولية المسكينة تنزف بغزارة...فارقت الحياة في اليوم التالي!! ... بس يا وليد أحب اضيف حاجة: المشكلة مشكلتنا كشعب...بسبب الفقر و العوز..و في غياب النظام و القانون..و تحت ظل الجهل و التخلف..صرنا من بين شعوب الارض الاكثر جلافة!!! التعامل الفظ ليس حكراً على الاطباء رغم أن ذنبهم أكبر بطبيعة مهنتهم...ياخ الغفير في المستشفى عندنا مستبد و يضطهد من يقع تحته...العسكري عندنا فاكر نفسه سيد الناس و ال(ملكية) ديل ما بشر و إتخلقوا لي خدمته!! القاضي..الشرطي..المعلم..موظف الاراضي..موظف الضرائب..موظف الارانيك في جوازات المقرن...وريني منو من طبقات شعبنا المنكوب بتعامل بأحترام و أنسانية مع من يطلب خدمته!! ياخ السودان دا بقى من البلدان القليلة في العالم الشحيحة بعبارات: شكراً..لو سمحت...حاضر...عن إذنك... أنا شخصياً لا أرى الطبيب أستثناء من حالة ال(إفتراء) و العنجهية من قبل مخدمي الجمهور تجاه المواطن المغلوب على أمره... السودان دا لازمو كتير...كتييير يا صاحبي
مشلكة التواصل مع الاخر بصورة طيبة يبدو انها مشكلة عامة فى مجتمعنا و لهذا لابد من التفكير فى ايجاد حل شامل لها فالشغلانية يبدو ان لها علاقة بشخصية الانسان السودانى الاطباء فى الواجهة فقط لانهم يتعاملون مع الانسان فى اضعف حالاته و الدق مع دكاترة اليومين ديل عواقبو ما سليمة: فهم عند اللزوم يردون الصاع ثلاثة
خلونا من العيادات: حتى بتاع البقالة و انت جاييهو لتشترى منه و تفيده: يقابلك بعين مفتوحة و الاخرى مصرورة و ينتهرك اول ما وضعت قدمك: عايز شنو يا اخينا تعامل المعلمين مع الطلبة تعامل افندبة الكاتب مع المراجعين حتى فى منبرنا دا شوفو كميات العنف اللفظى و الفظاظة و 90% من العضوية لم ير اى منهم الاخر فى حياته لكن فى اقل خلاف يمكن ان يجرده من اى فضيلة و يلحقه بقوم لوط او حتى ينفى نسبه حسب ما ارى الفئة الوحيدة التى تقابل مراجعيها باريحية فى بلادنا هم السماسرة!!
الشغلانية دى كلنا لا نخلو منها و هى هنااااك فى (الهاردسك)
10-05-2012, 06:59 PM
Dr.Elsadig Abdalla Dr.Elsadig Abdalla
تاريخ التسجيل: 12-10-2005
مجموع المشاركات: 2198
سلامات ياوليد وكل المتداخلين أنا عملت مداخله طويله ماعارف راحت وين ... الموضوع ده طويل ومتشعب والكلام فيهو كتر ..عشان كده أنا ما حى أنظر كتير .. أولا :عندما كنت أعمل في السودان 94-98 كان هذا النوع من التعامل الذي نسمع به يكاد يكون معدوم ..وكانت مثل هذه الممارسات تجد إستهجان من الأطباء الزملاء قبل المريض واهله .. ثانيا :من وجهة نظري أي طبيب يصدر منه مثل هذه الأشياء ..مثلا (أنت عاوز تورينا شغلنا ..أنت عارف أحسن مننا ،،،أو الموت قالو وقف ..وكل هذه الألفاظ المستفزه )....ده يعتبر عدم تربيه وقلة أدب ليس إلا ...ومثل هذا الشخص أكيد بيعامل اهلو بنفس الشكل ..... ثالثا :المريض البجي في المستشفيات العامه دي مفروض يتشال فوق الراس عديل كده ..لانو ده هو فعلا مالاقي غير يجيكم في مستشفيات الدوله المتهالكه دي... رابعا واخيرا:ماشايف أي سبب لربط هذه السلوكيات بتدهور الخدمات الطبيه في السودان ...ده قلة أدب بس ..يعني لو أهل المريض قالوا لي ليه العنبر ده مانظيف واللا ليه الدواء الفلاني ماموجود يكونوا فعلا غلطانين ..لكن لمن يجي واحد بحسن نيه يسأل الطبيب عن قريبو المريض ..ويقوم الطبيب يتلائم عليهو،،يبقي يستاهل الضرب بكل ماهو متاح ..وانا لو حصل موقف زي ده برضو حا أرد بكل عنف..حكاية إنو ده طبع الشخصيه السودانيه ..ده كلام غير مقبول بالنسبه لي. تحياتي
10-05-2012, 08:04 PM
الفاتح سليمان الفاتح سليمان
تاريخ التسجيل: 09-14-2009
مجموع المشاركات: 1735
وزي ما قال ليكـ د. عوض أي جهة حكومية خدمية تمشي ليها براك (من غير واسطه) او معرفه تسمع من الموظفين كلام يسم البدن وتجاهل مقصود..
صحيح الأطباء لطبيعة عملهم المرتبط بالحالات الطارئة وصحة الإنسان بكون الأمر غير مقبول لأن المريض أو المرافق يأتي في حالة توتر (شديد) يفقد صوابه لأقل لفظ يصدر ..
وزي ما قال ليكـ د. الصادق .. الأمر في النهاية مرتبط بأخلاق الشخص نفسه وتربيته
ولكن ....
يجب غلى وزارة الصحة ( وأي وزارة تتعامل مع الجمهور) وضع أسس (لإتكيت التعامل من الجمهور) وأن يكون مراقب رقابة صارمة .. وأن تفتح وتفعل أقسام في المستشفيات تسمى (إدارة رعاية المرضى ) تستلم شكاوي المراجعين عن مستوى الخدمة المقدمة وتحل الإشكالات بسرعة.. وتقوم بمحاسبة الطبيب إن أخطأ .. أي عمل لا يجد المتابعة المستمره والرقابة اللصيقة من الإدارات العليا لن يستمر .. وهذا للأسف هو حال البلد كلها ..
_________________________________________________ كسرة : عندما أحضر المواطن زوجته في حالة وضوع (عاجل) كان يجب نقلها من الإستقبال للعنبر بواسطة الكادر الطبي وليس بواسطة زوجهالأنها بمجرد دخولها المستشفى أصبحت تحت مسئولية المستشفى ...
10-05-2012, 08:44 PM
الفاتح سليمان الفاتح سليمان
تاريخ التسجيل: 09-14-2009
مجموع المشاركات: 1735
سلامات يالفاتح... كلامي ده ماكلام ساكت ولاحاجه ... الموضوع ده اتناقش في المنبر ده مرات عديده ..والظاهره دي ماشيه في زياده .. أنا لسه مصر إنو المسأله مسألة تعامل ..مامسألة علاج ... الموضوع تعامل من الناحيتين..يعني مامكن نسكت على المرافقين الذين يتعدون على الطبيب بلا مبرر ...لكن للاسف الشديد كثير من الأطباء يسهلون ذلك على أهل المريض ويوفرون لهم كل المبررات .. أي زول عارف ماوصلت اليه الخدمات الصحيه في السودان وفعلا هي جزء من الانهيار الشامل في السودان ..لكن أبدا لايمكن أن يكون ده مبرر لتعامل الفظ مع العيانين واهلهم ...ياخ لاقدر الله إنت مثلا لو رقد ليك زول في المستشفى والد،،والده،،أخ..ومشيت سألت الطبيب المعالج وقام رد عليك بلؤم وعدم تهذيب وقال ليك عاوز تورينا شغلنا واللا قال ليك (كان مات مايموت أنا أعمل ليهو شنو )..ده دخلو شنو بتدهور الخدمات ؟...ده تدهور في الأخلاق والتربيه .... تحياتي
10-05-2012, 10:37 PM
Elmuiz Haggaz Elmuiz Haggaz
تاريخ التسجيل: 11-04-2009
مجموع المشاركات: 630
Quote: نحن عاوزين منهم يعاملوا الزول القداامهم وظرفوا خاصه ده بانسانية
دي عاوزه ليها سياسة وما اليه من تغير النظام والنظام الصحي مجرد معاملة الشخص الواقف قدام الطبيب بانسانية دي الا يغيروا ليها عمر البشير ؟! يعني الزول المريض ده لو ما غير عمر البشير
الدكتور ما حا يتعامل معاه بصورة انسانية !!!
سلامات وليد والأخوة المتداخلين ( أخص المؤذن في مالطة الأخ الفاتح سليمان). قبل الإجابة على سؤالك دا يا وليد عايز أقول انه ما زغنا من البوست زى ما لمحت ( شخصيا كانت عندي مداخلة في الصفحة الأولى كتبتها رد على صلاح عبدالله لما قال بيستاهلوا اكتر من الضرب لكن النت كان كعب وأنا حمدت الله انها طشت لانه كنت منفعل شديد في ردى).
الإجابة يا وليد هى نعم !!! إلا يغيروا ليها عمر البشير، لو ما غيروا عمر البشير أو ما جاء به من نظام صحي ، يجب علينا التوقف عن الحلم بالتمتع بصحة جيدة ، السياسات الصحية يا وليد ما بنختها نحن( نحن زينا زيك كدا لا نملك من هذا الأمر شيئا). في مقارنة من كثرة ما كتبتها لأمن اصحابى بقوا يدورونى بيها، السودان يصرف اقل من 2٪ من ميزانيته على الصحة قارن النسبة بي دولة زى أيرلندا ( دولة صغيرة لا يتجاوز عدد سكانها عدد سكان ولاية الخرطوم) أيرلندا بسكانها الأقل من خمسة مليون عارف الدولة بتصرف علي الصحة كم؟ 12 بليون يورو سنويا أو ما يفوق ال 22٪ من الميزانية. في كلام وللأسف لا يصح وصفه إلا بانه حديث فطير مليان امثلة ونمازج عن التعامل السيئ للأطباء (بي الضبط زى كلام الشوايقة بخلاء والجعليين شجعان والجنوبيين عبيد والحسانية شغالين بالفارغة، حديث مطلوق ساكت كانه الطبيب السودانى بيولد بي جينات دغالة وعدم إنسانية وجشع وانعدام مروءة) زي ما جات نمازج سيئة ممكن اقعد لي الصباح اضرب ليك نمازج عن أطباء بتصل إنسانيتهم لدرجة التبرع بالدم لمرضاهم (لو عايز اسامى بجيبها ليك) ومنهم من يتبرع بمرتبه للمرضي ومنهم من يقضي سحابة يومه بين العيادات ساع لصورة موجات أو أشعة مقطعية لاحد مرضاه.
10-06-2012, 00:31 AM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7210
الدكاترة ديل ما عصرت عليهم !! و بجيك راجع إن شاء الله
دكتور الصادق عبد الله
Quote: عندما كنت أعمل في السودان 94-98 كان هذا النوع من التعامل الذي نسمع به يكاد يكون معدوم
شكلك كدا يا دكتور ما قريت البوست دا كويس و جيت بفكرة إنك تخارج نفسك و بفكرة إنك تخم الناس إنكم كنتو أطباء تمام و عندكم أخلاق و إنو الأخلاق إنعدمت بعد ما إنت طلعت من السودان.. يا عزيزي الدكتور أرجع أقرأ البوست دا تاني لأنو فيهو كمية كبيرة من القصص عن صلف وقسوة الاطباء وقلة.ادبهم وجلافتهم وتفاهتهم في زمن يمكن يكون قبل ما إنت تخش كلية الطب ذاتا.. يعني الإتهام بقلة الأدب دا واصلك و واصل البوصات بتاعنك و اساتذتك ذاتم.. سنة 93 في واحدة طلعت خلت ليكم السودان عشان الأطباء الكعبين ديل و هي طالعة تمنت إنها تقتل عدد من الأطباء (قتل موش جلد ساي).. أها يا دكتور إنت سنة 93 دي كنت وين؟
10-06-2012, 05:53 AM
ولياب ولياب
تاريخ التسجيل: 02-14-2002
مجموع المشاركات: 3785
وليد كيفك ولعلك بخير ، هناك طبيب في غاية الأدب والأخلاق ، يداويك بإبتسامته وبشاشته قبل أن يشخص مرضك ويديك البرسكربشن ، وهناك أطباء متجهمين عبوسين يتكلمون معك من فوق النخرة تعالياً وتكبراً ، للأسف بعض الأطباء لدينا مغرورين ومتعالين ومتعجرفين فقط لأنه طبيب ولو كان درس ثقافة الطب والعلاج والتعامل مع المرضى ما وصل لهذه الدرجة من التعالي .
الطب اصبح تجارة في نظر الكثير ، قد لا يهمه العلاج والاهتمام بقدر ما يهمه العائد المادي ومن ثم أن يعيش مرفهاً هذه سيارتي وهذه شقتي والخ المباهج ,,,,,,
10-06-2012, 06:21 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
حكى لي خريج جديد من كلية الطب كان يعمل في الإمتياز بمستشفى الخرطوم ومهمته الجلوس في الحوادث لمعاجة الأمور الصغيرة في وجود لخصائي.. الساعة كانت 2 صباحا قال لي جابو لينا جنوبي سكران وفي نص راسو ساطور والدم نافورة.. الولد إتخلع ولأنو ما عرف يتصرف كيف مع الحالة مشى للأخصائي في مكتبه بس ما لقاهو .. فتشك فتشك فتشك في النهاية لقاها نايم في إستراحة الدكاترة .. قال ليهو يا دكتور أصحى أصحى ..في جنوبي جابوهو سكران و مضروب بي ساطور والحالة حرجة.. الأخصائي رد ليهو بي نهرة كده وقال ليهو : الساعة 2 صباحا..!! وجنوبي!! وكمان سكران!!!! إنت عايز تتعلم الطب بتين ؟؟؟ ..وواصل الدكتور في نومتو
10-06-2012, 09:24 AM
Dr.Elsadig Abdalla Dr.Elsadig Abdalla
تاريخ التسجيل: 12-10-2005
مجموع المشاركات: 2198
سلامات يا حافظ أنا قريت البوست ده وكل البوستات المتعلقه بمثل هذه المواضيع ....ارجو منك أن لاتشخصن الأمور ..أنا لمن ذكرت التاريخ ده ليس لهروب من أي شئ ولكن لانه فعلا هي كل خبرتي داخل السودان ..لكن هذا الكلام ينطبق على أي طبيب يعامل الناس بغير احترام ..منذ أن خلق هذا السودان حتي يوم القيامه ..لا إستثناء ....ويبدو انك لم تقرأ كلامي جيدا...يتفق الجميع هنا إنو ماكل الناس واحد وهناك كميه ،من الأطباء داخل السودان يعملون في صمت وبكامل التفاني وفي أسوأ الظروف ويعاملون الناس بمنتهي الاحترام ولكن لانسمع من يشيد بهم...واللا فعلا الشر يعم...في كل مداخلاتي ادين بأشد العبارات كل الأمثله المذكوره .. أنت ياحافظ لاتعرفني ولا أعرفك ...عشان كده أنا ليس في موضع اني أثبت ليك أني قليل أدب أو غير ذلك ..أنا وصفت كل من يقوم بمثل هذه السلوكيات بانه قليل أدب لانو الأدب يعلم في البيت وليس في الجامعه ...عشان كده أي طبيب أو ضيدلي أو ضابط شرطه أو موظف عام يعامل الناس بقلة أدب هو قليل الأدب منذ أن كان في منزلهم ... والطبيب هو على راس هذه القائمه لانو يتعامل مع ناس في أضعف حالاتهم ومرافقين متوترين وقلقين ..أما إذا إنت عاوز تقول انو كل الاطباء في السودان 100% كلهم واحد يبقى كلامك ده غير صحيح .. تحياتي ..
10-06-2012, 10:24 AM
nazar hussien nazar hussien
تاريخ التسجيل: 09-04-2002
مجموع المشاركات: 10409
تاريخي مع الاطباء من زمن التمرجية والشفخانات...البسخنوا فيها الحقن في بابور الجاز...والزمن داك...كانوا كويسين... إمكن سختهم المشروع الحضاري...
Quote: عليك بتوفير مبلغ لدخول المستشفي لا احد يدخل مجانا الا منسوبي الاجهزه الامنية والشرطة والجيش
يا أنور شكلك زول مثالي وطيب انت من زمن الناس بدفعوا قروش لي دخول المستشفي؟...يا رجل لو انت شايل معاك شايب شيريا...بدخلك المستشفي... وكل المطلوب منك تجي علي البوابة ماشي دغري وترفع شايب الشيريا ...في عين العدو أو تجي لابس نضيف ساكت...وتقول طبيب
قريبات دي دخلت مستشفي أم درمان عبر البوابة الرئيسية...بي مكنة ...(يا دكتور عمر...يا دكتور عمر وتبقي داخل...بتجاهل تام للحارس) ويكون لا في دكتور عمر ولا شيْ...فالحارس اصلا بكون بعاين في اتجاهك وانت بتنادي لي دكتور عمر من خلف ظهره... لو اتلفت وما شاف دكتور عمر بفتكر دكتور عمر ما سمعك ولازم تحصلو بقوم بفتح ليك طوالي..
عندي زي عشرة مكنات مجربات في الدخول للمستشفيات حتي لو كان حارسا ######...
والقاسم المشترك في المكنات دي كلها قميص نضيف وحبة كلونيا
10-06-2012, 12:40 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
مرحب حافظ اخبارك (الإجابة يا وليد هى نعم !!! إلا يغيروا ليها عمر البشير، لو ما غيروا عمر البشير أو ما جاء به من نظام صحي ، يجب علينا التوقف عن الحلم بالتمتع بصحة جيدة ، السياسات الصحية يا وليد ما بنختها نحن( نحن زينا زيك كدا لا نملك من هذا الأمر شيئا). في مقارنة من كثرة ما كتبتها لأمن اصحابى بقوا يدورونى بيها، السودان يصرف اقل من 2٪ من ميزانيته على الصحة قارن النسبة بي دولة زى أيرلندا ( دولة صغيرة لا يتجاوز عدد سكانها عدد سكان ولاية الخرطوم) أيرلندا بسكانها الأقل من خمسة مليون عارف الدولة بتصرف علي الصحة كم؟ 12 بليون يورو سنويا أو ما يفوق ال 22٪ من الميزانية. في كلام وللأسف لا يصح وصفه إلا بانه حديث فطير مليان امثلة ونمازج عن التعامل السيئ للأطباء (بي الضبط زى كلام الشوايقة بخلاء والجعليين شجعان والجنوبيين عبيد والحسانية شغالين بالفارغة، حديث مطلوق ساكت كانه الطبيب السودانى بيولد بي جينات دغالة وعدم إنسانية وجشع وانعدام مروءة) زي ما جات نمازج سيئة ممكن اقعد لي الصباح اضرب ليك نمازج عن أطباء بتصل إنسانيتهم لدرجة التبرع بالدم لمرضاهم (لو عايز اسامى بجيبها ليك) ومنهم من يتبرع بمرتبه للمرضي ومنهم من يقضي سحابة يومه بين العيادات ساع لصورة موجات أو أشعة مقطعية لاحد مرضاه. )
ومنو الاتحدث عن التمتع بصحة جديه نحن نتحدث عن المعاملة الجيدة
العلاج خليه فنحن قنعنا من خيرا فيه من الاطباء ومن المسئولين بنتحد عن التهذيب والمعاملة الحسنة يعني حاجة زي اتفضل بي جا .. باتسامة ان شاء الله خير .. بابتسامه ابوك ده نحن ما بنقصر معاه وبنعمل كل الممكن .. والباقي على الله .. وبابتسامه او حتى من غير ابتسامه ذاتو بس بدون نهير وصرصرة وقندفة
دي برضو الا يشيلو ليها عمر البشير لو كانت الاجابة نعم ببقى قفلت البوست والامر ده حا يتطور تدريجيا وهو اساسا بدا لحدي ما يصل كل يوم دكتور ياخد ليه كف في اضنينو عشان يعرف يحترم الناس وصدقني الامر فعلا بدا ، وكل يوم تقريبا اصبح في حادث جديد
يا ريت لو تمدنا بالمواقف الجيده على الاقل توزن البوست وتدينا شوية امل بعد ان كدنا ان نقنع من خيرا في الاطباء شخصيا ما مر بي حادث زي ده .. حتى الان اغلب من قابلتهم دكاترة متقندفين متحجرين لا يجيدون التعامل مع الناس .. وطبعا حكاية انهم لايجيدون الطبباة دي خليها لانو الكلام فيها زاتو بقى ما جايب حقو والبكون كويس فيهم بكون في حالة وبادي مهنتو بالكاتلوج
افتكر انو البوست ده محتاج بوست ملحق يتحدث عن الاخطاء الطبية والاهمال عشان الناس تعرف نحن قاصدين شنو وشنو الفرق بين ما يلي الحكومة .. وما يلي الطبيب والتهذيب ده ما شغل حكومة
حا افتحو قريب وده ياهو البتكون مسئولة عنو الحكومة على الاغلب
لكن التعامل المتعالي والسخف والقندفة ورفع النخرة ده ما شغل حكومة ده شغل زول ما محترم وفعلا عاوز دق
10-06-2012, 12:45 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: وانا مصر انو حافظ يحكي النقاط المشرقة التي اشار اليها
سلامات تانى يا وليد، معععععععععز معز ياخ ما حافظ، طيب يا وليد نبدأ بكبيرنا الذى علمنا الطب بروف داوود مصطفي، في مسيرة تجاوزت النصف قرن من ممارسة الطب وتدريسه لم يعمل في عيادة خاصة وكان من اشد المعارضين لفكرة التصديق بالعيادات الخاصة عند طرحها للمرة الأولي، احد أخصائي النساء والتوليد نسيت اسمه للأسف كان عنده عيادة خاصة في أبو حمامة رسوم العيادة في نهاية التسعينات كانت خمسة ألف لما كان كشف عدد من الأخصائيين يفوق المائة وخمسين ألف جنيه، دكتور الطيب حميدة أخصائي التشخيص بالأشعة في شندى (قبل أن يهاجر في 2006) شهدت له من الموافق ما لا يحصى أمسك عن ذكرها لعلمى بعدم رغبته في الحديث عنها. ( عارف انه حا يجى واحد يقول لي النماذج دى استثناء، يعنى إلا اقعد لي الصباح اعد ليكم يعنى ، النماذج الجيدة يا وليد ما بنسمع ليها لانها في رائي اغلبية عشان كدا الشاذ دائماً بيظهر السبب التانى هو طبيعة التربية السودانية البتستحقر أي واحد بيتكلم عن الحاجات الكويسة البعملها.
لكن كدي خلي الكلام الفوق دا كله ولنفترض جدلا كدا انه الأطباء السودانيين بيخلعوا من قلوبهم الرحمة والإنسانية قبل ما يلبسوهم المعاطف البيضاء، هسا يا وليد بتفتكر بي الجد كدا انه في ظروف العمل دى ( مستشفيات متهالكة تفتقر لأبسط المعينات، أجهزة فحص ما موثوق بيها ولا معروف بتدخل البلد كيف والكلام دا بينطبق على الأدوية برضو) تفتكر في واقع زى دا مش لو الطبيب ابتسم في وشك لو قعد يلولى فيك عديل حا تبقي كويس يعنى؟ الناس حا تبطل تموت عشان الأطباء بيبتسموا ليهم؟. الناس مفروض تشوف الأسباب الحقيقية لتدهور الخدمات بدل تصوب سهامها لنفس ضحايا النظام الصحي.
الواقع مؤلم مؤلم بدون شك ( احكى ليك حاجة ممكن تضيفها للحكاوى بتاعت المتداخلين فوق، كنت مرة بجهز في برسنتيشن عن وفيات الأمهات في المملكة المتحدة بفتش في داتا في النت صادفت إحصائية لمعدل وفهات الأمهات في انجلترا من سنة 1880 وحتى اليوم ، عارف الحاجة الفظيعة كانت وين؟ معدل وفيات الأمهات في انجلترا سنة 1880 قبل اكتر من 130 سنة بيساوى معدل وفيات الأمهات في السودان الليلة دي!!! ياخ تقول لي الأطباء ما ببتسموا هسا دي المشكلة دى يعنى؟ اكتر من 60٪من الأطباء المسجلين بالمجلس الطبي تركوا السودان والباقين ما لقوا فرقة لسا ووزير الصحة بعد دا كله بيقول عندنا فائض أطباء!!! ضابط جهاز الأمن البعتقل الناس ويعذبهم الحكومة بتديهوا بيت وعربية ومرتب خمسة أضعاف مرتب طبيب الامتياز البيخليهو يبتسم ليك شنو عليك الله؟.
10-06-2012, 09:22 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7210
حبيبنا وليد أموت في القصر العيني و تنقذني الطبيبة.. دي بمناسبة برتكول العلاج عند المصريين الما بتدورهم
نرجع للموضوع الأصلى.. و أول حاجة بشكر د. الفاتح سليمان في إنو عبر عني تماماً و ما أظن كلامي بيختلف من كلامو.. لكين عندي تعليقات بسيطة ارجو إنها تساهم في دفع الحوار
أنا شايف عشان النقاش يكون مستعدل حقو نفصل بين أخلاق الطبيب الشخصية و أخلاقو المهنية.. أخلاقو الشخصية دي بتتحكم فيها تربيتو و ظروف نشأتو و البيئة و المجتمع ككل.. و تقويم أخلاقو الشخصية دا الأسرة مثلاً عندها فيهو دور كبير.. و لو في أطباء متقندفين و قليلين أدب في تعاملهم العام في الحلة و وسط الجيران فدا بيرجع ليهم هم شخصياً و دي خياراتهم زيهم و زي أي عسكري او صحفي او مهندس متقندف و عاجباهو روحو.. اخلاق الطبيب المهنية دي متعلقة بأداءو لوظيفتو في تشخيص و تطبيب المرضي.. و الأخلاق المهنية دي جزو من مهنتو بيكتسبها من خلال عملو.. و إكتساب الأخلاق المهنية دي بيشمل معرفة بالقواعد و الضوابط البتحكم ممارستو و بتتعدى المعرفة لممارسة سلوك مهني مستقيم على ضو الضوابط و القواعد البتحكم عملو كطبيب و علاقتو بالمرضى و علاقتو بالمرافقين و أقارب المرضى.. و السلوك دا مهارة زيها و زي المهارات الطبية الأخري بيتم إكتسابها من خلال التدريب ودي مسؤولية المؤسسات التعلمية و التدربية البمر من خلالها الطبيب.. يعني ببساطة كليات الطب بتقبل طلاب من مختلف المشارب و طلاب عندهم خلفيات و مرجعيات أخلاقية متباينة جداً.. المفروض لو عندنا نظام تعليمي و تدريبي جيد الناتج يكون طبيب بأخلاق مهنية ثابتة بغض النظر عن الخلفية الجا منها طالب الطب او الطبيب.
نقطة تانية يا وليد فكرة الطب مهنة إنسانية دي أنا شايف إنو كتير جداً بيحصل ليها سؤ إستخدام.. صحيح الطب ككل مهنة إنسانية لكين الطبيب لما يكون بيمارس في مهنتو ما مطلوب منو إنو يمارسها بدوافع إنسانية.. ممارسة الطبيب لمهنتو بتحكمها قواعد و ضوابط مفصولة تماماً عن المشاعر و العواطف.. لأنو لو المسألة بقت عواطف بيبقى فيها خيار و فقوس.. يعني في مريض بيكسب تعاطف الطبيب و مريض و ما حيكسبو و الطبيب المفروض بيتعامل معاهم الإتنين بشكل متساوي بعيداً عن عواطفه و إنسانيته
الغريبة يا وليد أنا في مداخلتي الفاتت ما جبت ليك سيرة جوانب مشرقة لكين يبدو إنك قريت تفكيري من غير ما أنا اكتب.. شاهد و شوفت بعيوني دي يا وليد أطباء الإمتياز الما لاقين حق المواصلات شوفتهم و هم بجمعو في تبرعات من بعض للمساهمة في شراء دواء او عمل فحص لمريض و المشهد دا و الله شوفتو لا مرة و لا مرتين.. و الغريبة نفس الطبيب ممكن يكون دفع من جيبو لإنقاذ مريض و المريض و أهلو يكونو دعوا ليهو لجدو الرابع عشر بالخير و البركة.. نفس الطبيب بعد شوية ممكن تلقاهو في موقف تاني منشبك في مشكلة مع مريض او مرافق تاني و يتم وصفو بكل الصفات السيئة الإتقالت في البوست دا
يلا يا وليد و ربنا يديك الصحة و العافية و جميع من حولك و جميع المتداخلين في البوست دا و إن شاء الله ربنا ما يحوجكم لطبيب دي اطول مداخلة أكتبها في بورد بكري دا
10-08-2012, 05:35 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
سلامات وليد بوست صادم ومؤلم أنا متأكد أن 90% من المتابعين للبوست قد عايشوا تجارب مماثلة لما ذكر في متنه وحيث أنك يا وليد قد حددت بدقة فائقة محور بوستك في ( فن التواصل مع المريض وذويه ) فن التواصل مع الآخر أصبح علماً تدار له الندوات وورش العمل أصبح من المسلم به القاعدة التي تقول " إن لم تستطع أن تقدم للزبون كل ما يطلبه فلا بد أن تجعله يقتنع أنك قد عملت من أجله كل ما تستطيع أن تعمله وفقاً للصلاحيات المخولة لك أو وفقاً لإمكانيتك ، ولا بد أن تشعره أنك قد قمت بخدمته بكل إخلاص لا تكرماً منك بل لأن هذا هو واجبك وذلك هو حقه" كما ذكر الأخ د. عوض فإن المريض وذويه يأتون للطبيب وهم في أضعف حالاتهم الإنسانية وذلك لعمري أدعى بأن تكثف الجامعات من كورسات ( فن التواصل مع المريض وذويه ) وتلحقها بالتدريب العملي المكثف وجعلها مادة أساسية طيلة سنوات الدراسة ، حتى لو إستدعى ذلك الأمر إضافة سنة دراسية . المسألة في ظني مرتبطة ( تاريخياً ) بنظرة المجتمع للطبيب .. نظرة إبتدأت من زمن كانت جامعة الخرطوم تقبل عشرات يعدون على اليد الواحدة لكلية الطب ... رسم المجتمع حولهم هالة تقديس وعاش أكثرهم تحت ظلال تلك الهالة... تكون المفارقة في أنه ورغم إزدياد كليات وجامعات الطب فإن الأطباء لا يريدون تنازلاً عن تلك الهالة ( الحق المكتسب ) عبرنا ونحن طلاب هندسة مدنية في نهاية سبعينات القرن الماضي وأول ثمانيناته عن ذلك في جملة واحدة، حيث كنا نردد ساخرين
" أن أول ما يتعلمه طالب الطب هو القرضمة ، وأول ما يتعلمه طالب المعمار هو التشدد في Fees "
أقول للمتسائلين عن أن لماذا يؤدي الطبيب السوداني وهو خارج السودان مهنته بأرفع المعايير الإنسانية ؟؟؟ أقول بأن ( النظام ) العام في الخارج - على الأقل حيث أعمل - قد تجاوز محطة ( تلبية رغبات الزبون ) وأصبح شعار الخدمات هو ( إشباع رغبات الزبون ) لذلك فإن من يعمل وفق هذا النظام عليه أن يلتزم به وإلا سوف يجد نفسه خارج الخدمة
ليس ذلك فحسب فقد إبتدع النظام فكرة ( المتسوق السري ) والمتسوق السري هو ( كبسور ) يأتيك في شكل زبون لديه خدمة عندك ويمارس عليك كل ( السغالات ) الممكن تتخيلها ويرفع صوته عليك .. وربما يشتمك وكل ذلك مرصود ومسجل ليتأكد القائمون على الخدمة من لباقتك وحسن تصرفك وكيفية إمتصاصك لغضب الناشزين من الزبائن وفي النهاية توضع نتيجة ذلك في ملف خدمتك
كلمة زبون المستخدمة في مداخلتي أعلاه أصبحت هى الكلمة المعتمدة رسمياً لـ المستفيد من الخدمة - أى خدمة - وسر تسميتها كما ذكر لنا في ورش العمل الكثيرة "أن من مقاييس حسن الأداء أن يقصدك من أديت له الخدمة التي يطلبها مرةً ،أن يطلبك ( بالإسم ) مرة أخرى لتؤدي له خدمة ثانية إن هو إحتاجها أى بمعنى أن يصبح ( زبوناً ) عندك "
ايضا يجب ان نضيف لبنك هذا البوست ما تعرضت له المرحومة زوجة اخونا عمار ادم. تعرضت لحادث حركة و نقلوها للمستشفى و رفض الاطباء علاجها ما لم تسدد اسرتها مبلغ محدد. و ما بين تعنتهم و مساككة عمار ادم لتوفير المبلغ توفيت المرحومة. عمار فتح بوست بذلك هنا في سودانيزاونلاين, ارجو ممن له وقت ان يأتي به الي هنا. السبيل لاصلاح الحال هو فضح الحال المايل لسلوك الاطباء في السودانيين. يجب ان لا يخلط الناس بين عجرفة الاطباء و عجرفة ناس البوليس ضباط و عساكر او اغلب الموظفين في السودان, نركز على كل حالة على حدة و نفضحهم حتى يخجلوا على حالهم.
10-06-2012, 09:29 PM
Hafiz Bashir Hafiz Bashir
تاريخ التسجيل: 12-04-2004
مجموع المشاركات: 7210
Quote: أنا شايف عشان النقاش يكون مستعدل حقو نفصل بين أخلاق الطبيب الشخصية و أخلاقو المهنية.. أخلاقو الشخصية دي بتتحكم فيها تربيتو و ظروف نشأتو و البيئة و المجتمع ككل.. و تقويم أخلاقو الشخصية دا الأسرة مثلاً عندها فيهو دور كبير.. و لو في أطباء متقندفين و قليلين أدب في تعاملهم العام في الحلة و وسط الجيران فدا بيرجع ليهم هم شخصياً و دي خياراتهم زيهم و زي أي عسكري او صحفي او مهندس متقندف و عاجباهو روحو.. اخلاق الطبيب المهنية دي متعلقة بأداءو لوظيفتو في تشخيص و تطبيب المرضي.. و الأخلاق المهنية دي جزو من مهنتو بيكتسبها من خلال عملو.. و إكتساب الأخلاق المهنية دي بيشمل معرفة بالقواعد و الضوابط البتحكم ممارستو و بتتعدى المعرفة لممارسة سلوك مهني مستقيم على ضو الضوابط و القواعد البتحكم عملو كطبيب و علاقتو بالمرضى و علاقتو بالمرافقين و أقارب المرضى.. و السلوك دا مهارة زيها و زي المهارات الطبية الأخري بيتم إكتسابها من خلال التدريب ودي مسؤولية المؤسسات التعلمية و التدربية البمر من خلالها الطبيب.. يعني ببساطة كليات الطب بتقبل طلاب من مختلف المشارب و طلاب عندهم خلفيات و مرجعيات أخلاقية متباينة جداً.. المفروض لو عندنا نظام تعليمي و تدريبي جيد الناتج يكون طبيب بأخلاق مهنية ثابتة بغض النظر عن الخلفية الجا منها طالب الطب او الطبيب.
اعتقد ان ما ذكره الاخ حافظ في الفقرة اعلاه يمثل حقيقة غائبة عن الكثيرين من ذوي القدرة علي التحليل المنطقي..... الطبيب السوداني يعيش في ظل ظروف قاسية...فهو بحكم دراسته وعمله كطبيب يتحتم عليه مواصلة الدراسة بصورة مستمرة لان العلم في تطور...حتي يستطيع ممارسة المهنة بصورة سليمة ومرضية لضميره كطبيب, ولمريضه ايضا الذي يسعي للشفاء(والشافي الله في النهاية)....وفوق هذا هو انسان وزيو وزي اي زول عندو التزامات وماهيتو ما جايبا حقها....وبعد دا مطلوب منو انو يسمع شكوي اي زول لاقاهو في اي ملف ويعالجو طوالي بمجرد سماع الاعراض ويشخص التشخيص السليم طوالي ويدي العلاج الناجع...حتي لو الكلام دا تم في بيت عزاء او في الشارع او في العيادة.... طيب يا جماعة....تدريب زي الناس مافي....مرتب يكفي حق الهموم مافي....مواطن يفهم انو الطبيب دا ما عندو ذنب في انو يشتري حتي خيوط العملية والشاش والجونتيات مافي.....وفي النهاية الطبيب دا ما ملاك ....بشر..وبيزهج...وزي ما كل زول داير يفش غبينتو في سودان اليوم,برضو هو ح يفش غبينتو كمان.....خصوصا انو السلوك دا مهارة يتم اكتسابها من من خلال التدريب وتوفير الجو التعليمي المثالي لدارس المهن الصحية جميعها.....دا كللللللو مافي.....وبعد دا برضو تقولو السياسة ماليها دور؟؟؟؟؟
نسيت اسلم عليكم كللللللكم يا جماعة....ان شالله معافين من زيارات الاطباء والمستشفيات
10-08-2012, 10:46 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
لكن في البوست ده ابدا ما بنتحدث عن العلاج .. بنتحدث عن المعاملة اثناء وبعد وقبل العلاج
كل ما بمر بيه الطبيب ينطبق على اغلب افراد الشعب السوداني .. فعليه مفروض برضو الطبيب يخت ده في بالى زائد عليه انو الزول القدامو ده زيادة على الامور الكتيرة من ظروف معيشة وفلس وما اليه .. عيااااااااااااااااااااااااااااان
يديك العافية
10-06-2012, 09:50 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
(ضابط جهاز الأمن البعتقل الناس ويعذبهم الحكومة بتديهوا بيت وعربية ومرتب خمسة أضعاف مرتب طبيب الامتياز البيخليهو يبتسم ليك شنو عليك الله؟. )
قالت ليك اسمع القصة دي : غسال العربات والدكتور بتاع الغسيل بغسل في عربية الدكتور .. وقال للدكتور تدفع عشرة جنيه الدكتور قال ليه : انت بتغسل كم عربية في اليوم ؟ الغسال قال ليه : تقريبا عشرة عربات الدكتور قال ليه : يعني يومك بي 100 الف وشهرك بي 3 مليون ثم اردف : ياخ انا الدكتور ده باخد 400 الف قام غسال العربات رده ليه قال ليه : وانت القال ليك تضيع مستقبلك وتقرا طب منو ؟
قر قرررررررر ______________ بتقول ليك خلاصة الكلام ده شنو .. اي زول دخل طب في الغالب الاعم دخل رغبتو مباشرة لانو حسب نظامنا في السودان الطب بدخلوها اصحاب المجاميع العالية ودايما بدخلو رغبتهم الاولى عكس بيقة الدراسات يعني بكون في زول قرا اقتصاد ولا ترجمة ولا حتى هندسة وكانت رغبتو الاولى طب ومجموعو ما دخلو ليها فبالتالي اي زول دخل طب دخل عن رغبة .. وطبعا بكون عارف الحاصل في السودان وما اليه طيب بما انو رغبتو وهو عارف الظرف الحاصل بتتزمروا منو ليه .. ده ما ياهو حال الطب في السودان .. انتو تدخلوها برغباتكم .. ثم بعد داك تجو تتفشوا فينا نحن
انتهى حديث حرمنا المصون
انا بقول ليك ... الطبيب هو زاتو مواطن .. ما عاجبو الحال المايل يعمل على تغيرو .. يعني مهمة التغيير دي ما مهمة باقي الشعب والدكاترة بره الموضوع.. ولو فيها تقصير بكون حاصل من الجميع والدكاترة في نص الجميع ده .. عليه انا بحول ليك الكلام عن الحال المايل وبقول ليك يلا ورينا همتك في حلها ثم تانيا قبيل قلت لينا نوجه سهامنا لي الناس العاملين الحال المايل ده وما نوجها لللاطبا الكلام ده برضو محول لعناية السادة الاطباء ما هم يطلقوا سهامهم تجاه المتسببين في الحال المايل ده بدل ما يفكوها في وش المرضانين !!!!!
حا اجيك راجع بتفصل لي باقي الكلام بس حبيت انقل كلام المدام
لا شئ شخصي أبداً.. قصدت أن أشير لك أن الموضوع المطروح هنا للنقاش موضوع غير شخصي أبداً و أن التناول هنا تناول عام لم تخصص به حقبة زمنية او فئة معينة من الأطباء كما لم تستثنى منه أي حقبة او فئة دون أخرى.. و ارجو أن تسمح لي بإقتباس جزء من ردك لي لتوضيح وجهة نظري
Quote: يتفق الجميع هنا إنو ماكل الناس واحد
طبعاً ما كل الناس واحد و التباين هو ضرورة حياتية.. و لكن فيما يتعلق بممارسة مهنة الطب يجب أن يكون كل الأطباء واحد في سلوكهم تجاه مرضاهم او على الأقل يجب أن يكون هنالك قاسم أدني مشترك لا ينخفض أي طبيب دونه في أخلاقه المهنية.. و إيجاد هذا الحد من الأخلاق هو مسؤولية الجهات التعليمية و التدريبية و ليس مسؤولية الأسرة و المجتمع العام.. فأخلاق الطبيب المهنية يجب أن تحكمها ضوابط و قواعد و يجب أن يقومها قانون و نظام رقابة و محاسبة صارم تحت ظل ظروف و بيئة عمل سليمة..
على الصعيد الشخصي معرفتي بك هنا في حدود ما تكتب و في الحقيقة تعجبني كثير من كتاباتك و آرائك.. و أذكر إن لم تخني الذاكرة أنك قد سبق أن تناولت في أحد بوستاتك شي عن عمل الأطباء في عياداته الخاصة أثناء الدوام.. و هو بوست ذو صلة و قد أعجبني تحليلك للظاهرة و مقترحاتك للحل
10-06-2012, 10:53 PM
Elmuiz Haggaz Elmuiz Haggaz
تاريخ التسجيل: 11-04-2009
مجموع المشاركات: 630
يا وليد انا ما بعرف اقعد الكلام زى حافظ بشير دا لكن كلامه دا منطقي شديد،
Quote: و لكن فيما يتعلق بممارسة مهنة الطب يجب أن يكون كل الأطباء واحد في سلوكهم تجاه مرضاهم او على الأقل يجب أن يكون هنالك قاسم أدني مشترك لا ينخفض أي طبيب دونه في أخلاقه المهنية.. و إيجاد هذا الحد من الأخلاق هو مسؤولية الجهات التعليمية و التدريبية و ليس مسؤولية الأسرة و المجتمع العام.. فأخلاق الطبيب المهنية يجب أن تحكمها ضوابط و قواعد و يجب أن يقومها قانون و نظام رقابة و محاسبة صارم تحت ظل ظروف و بيئة عمل سليمة..
في حد أدنى من التعامل بيحكم العلاقة دى، الحد الأدنى دا ذاته ما بنضعه نحن الأطباء بكون جزء من منظومة كاملة اسمها النظام الصحى ( مثلا انا شغال هنا في أيرلندا في مرات كتيرة بشوف الممرضة أو زميلى التانى بيكون صبور جداً مع المريض وما ممكن تحت أي ظرف ينهروا ليهم مريض مثلا لكن خلى المريض يقبل كدا تجيك طوالى لغة الشارع ديك وكمية من الألفاظ لا ترحم المريض لا ترحم امه، يلا دا بمقاييسنا هو نفاق لكن المعاملة الجيدة هنا ما فرضتها تربية الممرضة أو الطبيب فرضها النظام الصحي البيحاسب مش علي الخدمة العلاجية بس بل بيحاسب حتى على شكل التعامل).
اواصل
10-06-2012, 11:07 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
(موضوع الاطباء ده حقيقي عاوز مراجعة من المشغلين من التعليم العالي من المجتمع ومن العاملين في الحقل ده
في خلل مفروض تعالج بشنو ما بعرف بالتعليم ، بالتدريب ، بالتأهيل ، يضيفو كورسات فن التعامل للمنهج يعملوا ليهم دورات من قبل المجلس الطبي قبل الدخول المهنة
تحياتي يامعز وجميع المتداخلين لا اتفق معاك في إن التعامل بيفرضوا النظام القائم ،،،دكتور أحمد أمين ودكتور عوض علقوا على هذه المسأله ...إذا كانت الحكايه نقص في التدريب ..طيب ليه في أطباء بمنتهى الأدب والاخلاق وفي بعض على عكس ذلك تماما ....على سبيل المثال بدون ذكر أسماء كان معانا زمان زميلنا في مستشفي سوبا وطول الطريق من العيادات الخارجيه لداخل المستشفى يقابل أهل المرضي ويسلم عليهم واحد واحد ويسألهم عن أحوال الجميع واخوكم الفي ليبيا كيف وعمكم الفي السعوديه رجع واللا لسع ....وعيك ... الممرضه البتشتم المريض من خلفو دي أكيد هي غلطانه لانو لو المريض غلطان هنا برضو بيتحاسب وهي لو غلطانه هي برضو بتتحاسب عشان كده كل زول عارف حدودو لانو في قانون يحمي الجميع والعكس في السودان ...ولو كان في قانون واضح ورادع وكان في ناس بتحترم القانون ده من الطرفين ،،ده كلو ماكان حصل .. النقطه الأخيره مسألة الاحترام والادب دي ماعندها علاقه بالكليه ..معقوله بس الزول مايتعلم إحترام البشر إلا في الجامعه طبيب أو غير طبيب ؟طيب المادرس جامعه يعمل شنو ؟ مثلا :واحد يقولوا ليهو تعال شوف العيان ده تعبان ..يقول ليهم شايفني بلعب قمار؟..طيب دي اسمها شنو لو ماقلة أدب..موش كان ممكن يقول ليهم حاضر بس أخلص من العيان ده واجيكم .... أو واحد يقولوا ليهو العيان ده حايموت يقول ليهم الموت قالوا وقف ؟ده تسميه شنو ؟ أنا شخصيا حصلت لي مواقف زي دي كثيره ... صحيح من الجانب الآخر هناك كميه من القصص يكون فيها أهل المريض غلطانين ميه في الميه وفي الحاله دي أفضل حاجه تنادي ليهم البوليس بدل الدخول في مهاترات وشتم ونبذ ... المؤدب والمحترم لاتضيف له الجامعه أي شيء في هذا الاطار والذي لايحترم الناس في أسرته لايمكن أن يحترمهم في مكان عمله .. ومعظم الأمثله الدائما بيتم ذكرها هنا من وجهة نظري هي ليها علاقه قويه باخلاق الطبيب الشخصيه وليس المهنيه .قليل منها له علاقه باخلاق المهنه وده تم قتله بحثا في بوست سابق بعنوان (ارفعوا أيديكم عن أطباء بلادي وبوست آخر لناذر الخليفه بتاع مستوصف الكلاكله).. تحياتي .. ----------------------------------- التعديل لاضافة السطر الأخير
سُئِلَ " الخَوارِزمي" عالم الرياضيات عن الإنسان فأجاب
إذا كان الإنسان ذا أخلاق فهو = 1 إذا كان الإنسان ذا جمال فأضف إلى الواحد صفراً = 10 إذا كان ذا مال أيضاً فأضف صفراً آخر = 100 إذا كان ذا حَسَبٍ ونَسَبٍ فأضف صفراً آخر 1000 =
فإذا ذهب العدد “واحد ” وهو الأخلاق ذهبت قيمة الإنسان وبقيت الأصفار التي لا قيمة لها. ------------------------------------------------------------------------- الكلام ده منقول من الفيسبوك من صفحة الدكتور طلال بابكر
سلامات ياوليد مرة تانية لما التلفون كان ملح بعد نص الليل اصبت بتسمم ومشينا ابراهيم مالك لقيت لي دكتورة.بتتكلم في التلفون قالت للبتتكلم معاه دقيقة.وانا بحكي ليها هي مخلبة.التلفون في اضانا قبل اتم كلاميادتني ورقة للمعمل مشيت المعمل وجيت برضو.مستمرة تتكلم في التلفون وكتبت الروشتة ممكن يا دكتور الفاتح توريني سلوك ذي دا دخله شنو بالحالة الفي تلبلد فبالله شوفو المشكلة وين لانه لما حكومة.الانقاذ دي.تمشي النانس حتتوقع الدنيا كلها تكون بمبي قعدت فترة في امريكا وفترة.طويلة شديد في ماليزيا لم ار اي طبيبة ضاربة منكير وكلهن مقلمات اظافرهن للحد ولكن شوفتا في السودان الدكتورات محننات بالصبغة ومربيات ضفورهن مع انه دا ما عنده دخل بسوء معاملة المريض الا انه بوري نوعية الدكاترة في السودان
10-07-2012, 06:18 AM
مجدي عبدالله أبوحريبة مجدي عبدالله أبوحريبة
تاريخ التسجيل: 03-03-2010
مجموع المشاركات: 257
تحياتي مرة اخرى الاخ وليد د . معز انا كنت منتظر النمازج المشرقة من الاطباء الوعدت انك تذكرهم المهم كنت قايلك ح تذكر مئات او عشرات ياخي السودان ده فيهو مئات الالاف من الاطباء بالذات بعد التوسع الكبير الحصل في كليات الطب بعد سنة 90 فكونك تذكر 3 او اربعة اطباء انسانييين انا بعتبرهم شواذ القاعدة اما حكاية الراتب دي غريبة شوية يعني ما يعامل المرضى عشان راتبو شوية طيب ما كل المهن رواتبها شوية ما دام الواحد قبل يشتغل بالراتب ده يبقى مفروض يأدي عملو على اكمل
اما الامكانيات فما اعتقد لها علاقة بالمعاملة ..... شوف عيني دي في حوادث الخرطوم واحد بدردق في الارض من الالم و لمدة 45 دقيقة و دكتور و معاهو زميلاتو اتنين بقرو في الجرايد جنبو ما كلفو نفسهم يعاينو ليهو ... و وين في الحوادث دي علاقتها بالامكانيات شنو ابوي الله يرحمه عملنا ليهو عملية بروستات في مستوصف خاص اسمو مستوصف النور العمارات شارع 5 المعاهو طلعو بعد اسبوع ابوي جرح العملية ما قفل عارف الدكتور اول زيارة ليهو بعد العملية كانت بعد كم ؟ بعد 21 يوم و ما جاء مخصوص يشوفو جاء يعمل عملية لضحية جديدة .... ده بقروشنا بعمل كدة في الحكومي ح يعمل شنو ؟؟؟ ابوي بعدها لم يرى العافية الي ان توفى رحمه الله
شوف الفيديو ده ما فيش مستشفى و امكن ما فيش رواتب لكن توجد انسانية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
وليد محمد المبارك
كمال حسن
امينة عيسى
Abdelrahim Elamin
Rawia
داليا حافظ
المكاشفي الخضر الطاهر
بدر الدين اسحاق احمد
بدر الدين احمد موسى
محمد أبوالعزائم أبوالريش
وليد عبد اللطيف
الفاتح سليمان
محمد ميرغني عبد الحميد
نيازي مصطفى
مجدي عبدالله أبوحريبة
نجلاء سيد أحمد
Siham Elmugammar
الزبير صالح الزبير
rani
زياد جعفر عبدالله
Dr.Elsadig Abdalla
Elmuiz Haggaz
Hafiz Bashir
ولياب
عمر الفاروق
nazar hussien
عاطف عمر
فيس بوك
تويتر
انستقرام
يوتيوب
بنتيريست