سودانيز وفن الكتابة باللغة المحكية **

Quote: سلامات يا منى ـ ـ وحشة السنيين ـ ـ Quote: نقرا معاكم.. تعالى هنا شنو نقرا معاكم دي!؟ بلأول انزلي من حمارك دا ـ ـ قايلانا ما عندنا قهوة والَ ما عندنا عدَة؟ بمناسبة القهوة ـوعدَتا ـ على أيام سنتي الأولى في كسلا ـ ـ يوم من الصباح قبال البس واطلع الشغل ـ ـ سمعت حركة عربية وقفت وزول دق الباب ـ ـ طلعت فتحت الباب لقيت شيخ سليمان بيتاي ( طاب ذكره حيا كان أم ميتا) ـ ـ - اتفضلو ـ ـ وكعادتو بوكسيه بكون مستف بالحيران ـ ـ دخلوا الصالون وقبال يقعدو شيخ سليمان قال ليَ لحقنا القوة ـ ـ المفارقة لا أنا ولا المدام في الوكت داك بنشرب قهوة ـ ـ قطعت المسافة بين الصالون والمطبخ ورجليي ما شايلاتني اتمتم براي ـ ـ هسه الناس ديل اجيب ليهم قهوة من وين ؟ أنا ما حصل جبت بن ـ ـ ولا في دكان قريب اختف رجلي اجيب بن ـ ـ انق بى جو نفسي وداخل لحد ما لقيت المدام قدامي بتسألني : في شنو مالك بتبرطم براك؟ والجو ديل منو؟ - سيبك من الجو هسع عندك بن ؟ أيوة ـ ـ تصدقي حضنتها من الفرحة ـ ـ يللا يا ستي الجماعة ديل دايرين قهوة سريع ـ ـ اقل من ساعة زمن وكانت ترامسي ملانه دخلت بيها الصالون ـ ـ الجماعة كل واحد شطف ليهو فنجان على السريع وقامو ـ ـ أنا طبعا على غباي افتكرتهم مقدرين إني بعد شوية مفروض اطلع للشغل ـ ـ عشان كدا استعجلوا القيام ـ ـ بعد وقفوا شيخ سليمان قال لي : تزقينا قهوة بايتة يا ملك؟ - أفو ـ ـ براي بي نفسي ـ ياربي الولية دي شيلتني قهوة ساواها من امبارح؟ نهايتو حلفت عليهم يقعدو ـ ـ شلت ترامسي ودخلت عايز اطق من الزعل ـ ـ كيييييف المره دي تسوي فوقي كده!!؟؟ ختيت الترامس وقلت ليها إنت جنيتي ؟ كيف تقدمي للناس قهوة بايتة !؟ الولية طيرت عيونا ـ ـ كيف بايتة !؟ - انا عارف الناس الشربوها قالو كدا ـ ـ صنت شوية وقالت لي خلاص أنا فهمت ـ ـ _ فهمتي شنو!؟ خليك هسه ـ ـ ناولني الكانون من المخزن سريع ـ ـ - حاضر ـ ـ ربع ساعة تاني هبت الكانون وملت القلاية بن وقلبتو شوية وقالت لي شيل الكانون ودي ليهم ـ ـ _ بي قلايتو !؟ أيوه ـ ـ - كيف يعني معقول ! الجماعه ديل بحرقوا السجاد ؟ خلي الحجة ـ خت الكانون مع قلاية البن برة تحت الشجرة وخش كلمهم بطلعوا براهم ـ ـ شلت كانوني وقلاية البن والشرقرق ـ ـ ختيتم برة قدام الصالون وخشيت قلت ليهم البن برة ياجماعة ـ ـ جو طالعين اول ما شافو العدة شيخ سليمان قال: أيوه كده يا ملك ـ ـ طوالي واحد من الحيران مسك الشغل ـ ـ دخان البن المحروق ملأ الحوش ـ ـ من ديك بقيت اشرب القوة مرة مرة ـ ـ اما المدام فاصبحت خبيرة ومن ديك ما سابت شراب القوة لحد صباح اليوم ـ ـ .

أها قولنا كده بسم الله..
نزلت من حمارتي .. (أراحكاكم) نتونس..
اولا (بالتبادي) سلام (يغشاكم) واحد واحد..
وياها دي محل الجبنه.إن (درتو) تقعدو فوق "ال وا طة" مرحب (تراها مقشوشة) ومرشوشة..
(والداير) يقعد في البنابر اليقعد..والداير (البرش) برضه ياهو ده مفرش..
..........
..........
القهوه وشيخ سليمان وآل بيتاي كلهم أهلنا الكريمين أهل الخلاوي وأصحابها في هامشكوريب محل الجبال ونخل الدوم..
تشرب البن عندهم وعند كل أهل الشرق تاني تحردوا في أي مكان تاني..
تقوم الفجر انت والمؤذن والديك والحمار (والزولة البتسوي) الجبنه وأدان الفجر الأول..
تسمع صوت دقات الفنادق في كل بيت بإيقاع مختلف والدنيا لسة (ضلومة)
تشم البن وهو بيتقلي..(تعاين) لكل الطقوس والفنجان البكري يشهيك القعادأكتر..
جنزبيل ولا فلفل أسود؟!

.......
.......
وإنتا بي صحك دايرتجيبلهم قهوه في سيرموس؟؟
والله أنا دي ما أقبلها خليك من ناس شيخ بيتاي أهلها (بالصح)
(كدي عاين) شوف زولتنا الحلوة دي في أديس وقعدة قهوتها(الما خمج.).



عليك الله ماحاجة تطول العمر؟؟