رحم الله الفنان أحمد رمزي فقد نقلت الأخبار أنه توفي يوم الجمعة 28 سبتمبر، عن عمر يناهز الـ82 عاماً في منزله بالساحل الشمالي بعد أن اختل توازنه بحمام منزله.
ولد أحمد رمزي في 23 مارس عام 1930 لطبيب مصري وأم اسكتلندية , والتحق رمزي بكلية التجارة ولكنه لم يكمل تعليمه بعد أن اكتشفته السينما والرياضة.
افلام زمان وغنا زمان وحياة زمان نبرة الاسى دى كنت قايلاها حقتنا برانا نحن الذين نبكى على الاطلال بقصائدنا وحكايانا فوجدت انها سمة غالبة ربما لكل ساكنى هذا الكوكب فالامريكان يبكون على ما كان من امر حياتهم بكاءا ممزوجا بالحنين تماما كما نفعل وحين عبرت الى بعض بلاد الدنيا وجدت ان المصريين يبكون على الزمن الجميل والعراقيين على كل ما كان لديهم من حياة
وجدت البكاء على ما كان سمة تمسحت بها الشعوب ترى لماذا نبكى على كل مامضى ونتمنى فى قرارة انفسنا ان يعود ؟ رغم استحالته لكنها الحياة الماضى يسيطر علينا لاننا لانجد فى الحاضر ما وجدناه فى الصبا احمدرمزى كان رمزا للشباب فى الخمسينات والستينات يدخلون الى افلامه وحافزهم الفتوة التى كان يمتلكها والجاذبية التى تفوح روحها من جسده "المفتول " لبس الشباب ثيابه وتمثلوا رقته وفتوته احببناه لانه كان رومانسيا رغم انه كان مفتونا بفتوته ويكثر من استغلالها رحمة الله عليه فلقد حببنا فى الحياة البسيطة بتلقائية ادائه وسماحة روحه
09-29-2012, 08:33 PM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
Quote: ترى لماذا نبكى على كل مامضى ونتمنى فى قرارة انفسنا ان يعود ؟ رغم استحالته لكنها الحياة
سلمى الشيخ سلامات معاك حق.. دايما الواحد بتذكر القديم كشيء حلو مفقود .. ذكرى مخلوطة بالحنين والفرح ومرات بالحزن.. مش برضو نعمة يا سلمى إن الانسان بمقدرته الفطرية على النسيان يقدر يتذكر الحلو في الماضي "بس"؟ تلاقيه أسقط أي مرارة فيه واكتفى بتذكر الحلو والحنين ليه.. امكن لانه الحاضر دائما فيه المر والحلو.. اسقاط أو تجاهل المر منه بكون صعب بل بالنسبة لبعض الناس مستحيل.. أو يجوز إن الانسان بقى ما قادر يستمتع بالحاضر كفاية مش بس لكترة السوء في الحاضر لكن لانه الأيام بقت قصيرة وايقاع الحياة بقى سريع شديد لدرجة انه الواحد ما بلقى فرصة يستمتع بالحاضر كما يحب ويتمنى .. احساسه بعدم الشبع من متعة حتى الحاجات البسيطة بيخليه يسترجع القديم ويتحسر على رحيله... أما ناس خالتو رمانة فمعذورين في اجترار القديم، لسان حالهم لا يكف عن قول: ألا ليت..!
أحمد رمزي وعمر الشريف ورشدي اباظة وأحمد مظهر وجيل الممثلين القدامي بنقلوك بافلامهم القديمة لعالم خيالي.. مرات يفرح ومرات بيضحك... وفي الحالتين بيسلي :) معظم أفلام زمان بتتميز برومانسية مفرطة لدرجة اني كنت بعاكس صحبتي المغرمة بالافلام القديمة بقول ليها انه الافلام القديمة كانوا بيصوروها عشان يضحكونا على سذاجة ناس زمان... أكتر شي بكيفني في أفلام ابيض وأسود هي فساتين الممثلات ..! كانوا جميلات جدا مريم فخر الدين شادية سعاد حسني نادية لطفي والأخريات... شكرا سلمى على خواطرك...
والدوام لله...
09-30-2012, 09:40 AM
rummana rummana
تاريخ التسجيل: 02-05-2002
مجموع المشاركات: 3537
Quote: رمانة العسل ياخى يا ريت يرجع الزمان امى وابوى طوالى بزكرونا بى ايامن زمان وكيف الناس كانت نقية ود الجيران مسؤل من بنات الفريق وكيف الحب والقلوب كانت نقية وصادقة ورمانسية وفى الافلام ابوى بحب ليك فاتن حمامة ههههههه يا ريت لو اتولدنا فى الزم القديم على الاقل كنت لقيت راجل زى ابوى يستاهل يتزوجوا
وضاحة.. سمعت بالمثل البقول "كل فتاة بأبيها معجبة؟"* كل بنت شايفة والدها متفرد فيه كل الصفات الكويسة وما في حد بيشبهه بس الواحدة لما تجي تتزوج ما بتفتش على واحد بيشبه والدها .. بل على واحد بيناسب شخصيتها عشان تقل مساحات الخلاف ... الزواج ده فيه كمية ما هينة من النقة والشكل والمجابدة :) وأكيد حتلاقيه وتفرحي بيه وتسعدي معاه ويا حبذا لو كان حلفاوي عشان هو حيكون أكتر واحد بيستحمل (يتفهم) إنك تديه على دماغه على طول كده أما أهلك الجعليين فاختيهم.. لانه الصورة النمطية بتقول انهم في أقل كلمة بولعوا طوالي .. رأفة بالعيال :) أو زي ما قلت ليك قبل كده تتزوجي وبعدها ما تردي على زوجك إلا بــ "ان شاء الله"
ثم من بعد الزواج... لو ربنا رزقكم ببنت حتشوفه مكمل يشبه البيه ويزيد عليه... غض النظر عن رأيك فيه ...! المهم يا ستي .. الوالد والوالدة ربنا يخليهم ليك بتكلموا على حالة واحساس مش زمن ..حالة لما كانوا شباب .. كله شيء الناس بتحسوا بصورة مختلفة .. تلاقيهم وقتها ما كانوا فرحانين شديد بزمنهم وعندهم مية تحفظ عليه.. لكن لما يفوت الزمن وتبقى الذكرى حيتذكروا حلاوته بس... زمنكم حلو .. ما تحرديه..
أما فاتن حمامة فساهل الواحد يحبها... كانت فنانة محترمة جدا واستحقت لقب سيدة الشاشة العربية... مثلت أحلى الأفلام العربية دعاء الكروان وبين الأطلال .. ومن الافلام الاحدث، امبراطورية ميم وليلة القبض على فاطمة واريد حلا ولا عزاء للسيدات... فعلا مثلت أجمل ما قدمت السينما العربية.... عازماك يوم بعض افلام فاتن حمامة ... علي الفيلم وعليك البوب كورن واللب والتسالي ... ----- *كنت بفتش ليك في قصة المثل بس ما لقيتها في النت زي ما قريتها زمان
العزيزة رمانة كل ثانية وانتي وأحبابك طيبين والثانية الجاية زي ما عايزين وفوق البيعة مشتاقيييييين
صدقتي .. حليل أيام زمان .. زمن جوز الحمام أرررربعة وحليل حبوبتي ست البنات بت سيد أحمد .. حنانها كان يكفي سنجة وامدرمان ويدي الباقي لي بيكين حبوبة كانت بتحب الحلويات .. خاصة الداندرمة وحلاوة دربس بتشتريها بالصندوق وتخزنها في علبة وهاك يا عزومة للغاشي والماشي .. أموت ليك شيل الحلاوة .. تددددفني .. ولي واحدات .. يعتر ليك حجر فوق الدرب والله العظيم الآن كلما تعجبني حلاوة بتذكر حبوبة وبتحسر عليها الماضاقت الماكنتوش والاسنكرس والجلكسي وبسبوسة العبد المصرية وفطائر جااااد وكسرت سنيناتا بي قرمشة الدربس .. حليلك يا الما حضرتي الموبايل والنيو فايل والفيس بوك والاسكايب وبليتي شوقك لي حبايبك العبروا المالح لي بلاداً ما ليها حد . يا رمانة .. في موضوع الأفلام دا .. قد يكون الماضي حلواً .. إنما الحااااااااضر أحلى الأفلام العربية القديمة بالذات لما أشوفها الآن عوارة عديل كدا وبستغرب التهريج دا أنا كان بضحكني كيفن ويا خسارة دموعي الضيعتها في الأفلام الهندية . السينماء الآن صناعة ميزانيتها تعادل ميزانية دول ومنتجاتها تعتمد على أرقى التقنيات في التصوير وتفاصيل الصناعة لكن الموضوع موضوع حنين للماضي وعلاقتنا به .. يعني الحنين لحياتنا يومئذ ولمن سكن الديار لا للديار تحياتي
10-01-2012, 08:52 AM
عمار عبدالله عبدالرحمن عمار عبدالله عبدالرحمن
تاريخ التسجيل: 02-26-2005
مجموع المشاركات: 9162
:) تحياتي عمار عبد الله ... The Six Million Dollar Man وبعدها بشوية طلع مسلسل The Bionic Women وما فيش حد أحسن من حد...! :) والله تلفزيون السودان ما قصر معانا أبدا.. عرض عدد من المسلسلات الاميريكية المشهورة .. كانت أيام...
10-01-2012, 02:09 PM
rummana rummana
تاريخ التسجيل: 02-05-2002
مجموع المشاركات: 3537
Quote: الأفلام العربية القديمة بالذات لما أشوفها الآن عوارة عديل كدا وبستغرب التهريج دا أنا كان بضحكني كيفن ويا خسارة دموعي الضيعتها في الأفلام الهندية .
ياخ ما تحرجنا... أنا لسه ببكي في الأفلام ... :)
وينك يا سنجاوي انت ووين أراضيك...؟ مشتاقين كتير والله ليك مدة طويلة ما ظاهر...
ويااااا حليل حبوباتنا .. هسه تفتكر بعد ما نبقى حبوبات أحفادنا ح يتذكرونا بالحب والتعلق حقنا في حبوباتنا ديل...؟ ما ظنيت ..
Quote: لكن الموضوع موضوع حنين للماضي وعلاقتنا به .. يعني الحنين لحياتنا يومئذ ولمن سكن الديار لا للديار
بس ياهو ده ذاته العايزها أقوله... لكن بيني وبينك أفلام اليوم قليل منها البتقبل !
10-01-2012, 12:23 PM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 48811
نسأل الله الرحمة وواسع الغفران للممثل الفنان أحمد رمزي.
أما فاتن حمامة فنسأل الله أن يهبها الصحة والعافية فقد أسعدت الملايين على مر السنين. وبمناسبة فيلمها الاجتماعي المتميز "أريد حلا" يسعدني أن أضعه هنا لشباب هذا الجيل. http://www.youtube.com/watch?v=RbDHZ3ZN7kc
10-01-2012, 02:24 PM
rummana rummana
تاريخ التسجيل: 02-05-2002
مجموع المشاركات: 3537
هلا بياسر بالله عليك الله مش فيلم خطير... نحن كنا فرحانين بيه جدا ولعله كان آخر أفلام رشدي أباظة ، مش متأكدة... شكرا ليك ..غايتو الساعة الجاية أنا حأقضيها هنا ..
10-02-2012, 11:46 AM
Yasir Elsharif Yasir Elsharif
تاريخ التسجيل: 12-09-2002
مجموع المشاركات: 48811
عرفت أن الأستاذ محمود ومعه بعض الجمهوريات والجمهوريين ذهبوا سويا إلى إحدى دور السينما لمشاهدة الفيلم عندما عرض في السودان في السبعينات. هذه فرصة لي أيضا لمشاهدة الفيلم رغم "ضيق ذات الوقت".
ياسر
10-02-2012, 03:32 PM
حمد عبد الغفار عمر حمد عبد الغفار عمر
تاريخ التسجيل: 06-06-2008
مجموع المشاركات: 7662
دكتور ياسر: من فترة طويلة توقفت عن مشاهدة الأفلام العربية.. لا في تلفزيون ولا في سينما ولا في غيره ممتع جدا الواحد يتفرج مرة تانية على فيلم أريد حلا.. لا أذكر آخر مرة شاهدته كان متين... وأكيد أعاد لي ذكريات كتيرة.. الفيلم عبر عن مدى معاناة المرأة المسلمة اللي بيظلمها القانون قدر ظلم بعض الرجال ليها.. كانت مشاهدته مناسبة في فترة دراستنا لتشريعات الزواج والطلاق لانه بصراحة كان في حاجات كتيرة بتزعلنا كنساء في الاحكام والتشريعات ... وكنا بنفرح لما نقرأ عن حق المرأة في تطليق نفسها وانها ممكن تتفق مع زوجها على حصولها على العصمة.. لذلك عجبتنا بعض رؤى الفكر الجمهوري ..ولا زالت النساء إلى اليوم تشتكي من قوانين الاحوال الشخصية غير المنصفة...
فيلم "اريــد حــلا" من انتاج 1975 ومصنف حسب ما هو مذكور في ويكيبيديا رقم 21 من أفضل الأفلام العربية... طبعا ساعة واحدة ما كفاية لمشاهدة الفيلم لازمك ساعتين مع شاشة كمبيوتر كبيرة كرمال عيوننا التعبانات... أفلام أخرى من بطولة فاتن حمامة في التصنيف المذكور: الحرام مصنف رقم 5 دعاء الكروان مصنف رقم 14 صراع في الوادي رقم 25 ولديها أفلام أخرى في قائمة الـ 100 أفضل فيلم عربي
10-02-2012, 04:50 PM
rummana rummana
تاريخ التسجيل: 02-05-2002
مجموع المشاركات: 3537
Quote: أول فيلم شاهدته كان عاشقة نفسها بطولة نجلاء فتحي وشكري سرحان في سينما الخواجة بمدني ورغم إني كنت تقريبا طفل لكن متعة الفليم استمرت معاي لأيام عدة وبعدها استمر إدمان السينما لكن حاليا من الصعب إني أكمل فيلم وخصوصا في التلفزيون
حمد عبد الغفار حبابك .. يا سلام الجميلة نجلاء (فاطمة الزهراء) فتحي صاحبة اشهر بحة في تاريخ السينما العربية المعاصر.. برضو عندها أفلام قوية في نهاية السبعينات والتمنينات.. غايتو بتهيأ لي أنا من أوائل التسعينات تاني ما استمتعت بفيلم عربي مشي السينما كان من أمتع البرامج على الاطلاق بالنسبة لينا سواء في مرحلة الطفولة أو سنوات المراهقة.. فاهمين ما فاهمين الفيلم ما كان فارق معانا.. المهم الواحد يلبس ويقول ماشين السينماالليلة ... والله زمان
10-02-2012, 07:14 PM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
رمانة ازيك حكى اهل المسرح فى سابق العصر والاوان ان الفنان الكبير يوسف وهبى زار السودان فى الاربعينات يومها كان كمال الشناوى يشتغل فى البوستة فى احد مدن السودان ربما ملكال او عطبرة ما ماتاكدة ولمن عرف انه يوسف وهبى جا السودان ـ كان معاهو فاتن حمامة التى كتب لها الفنان عبد الرحمن الريح اغنية "ياحمامة مع السلامة "ـ جاء لزيارته هو والفنان محمد ابو سريع والفنان امين الهنيدى الذى كان يشتغل فى التدريس فى المدارس المصرية يومها وهو احد اساتذة الفنان الراحل الفاضل سعيد المهم ان يوسف وهبى كان قد احتاج لبعض "الكومبارس " فاشتغل هؤلاء المذكورين اعلاه ضمن الكومبارس ومن بعدها سافروا الى مصر ليقدموا اداورا مهمة فى السينما المصرية خاصة الدون جوان كمال الشناوى والكوميديان امين الهنيدى
ولعلى لن اغفل ان الفنانة سعاد حسنى كانت تعيش فى السودان لامد ليس بالطويل رفقة والدها الذى كان قد هاجر من فلسطين الى السودان ليفتتح قسم الخطوط فى كلية الفنون الجميلة فيما بعد ـ المعهد الفنى ـ وسعاد حسنى هى شقيقة نجاة الصغيرة ومن فلسطين ايضا جاءت نجوى فؤاد ومن المجر اعتقد كانت مريم فخر الدين ومن تركيا شادية اسمهان الاطرش من لبنان وشقيقها فريد الاطرش وهى عائلة كبيرة ما تزال لغاية الان فى لبنان
فى افلام زمان ظهر من الفنانين السودانيين ـ اسماعيل عبد المعين ، واحمد المصطفى حيث غنى مع صباح اللبنانية الاصل ـ رحماك ياملاك واعتقد سيد خليفة
وعلى ذكر سيد خليفة حكى لى استاذ مامون النجار وكان مديرا لاذاعة ركن السودان فى القاهرة ايام كنت اشتغل فى اذاعة جمهورية مصر العربية واذاعة وادى النيل فى التسعينات ان الفنان سيد خليفة كان يمثل بعبعا لعبد الحليم حافظ وفريد الاطرش حيث انه حين يغنى معناها ان الحفل انتهى لذلك كان فريد وحليم يطلبان ان يتم تقديمهم اولا قبل سيد خليفة فيما عرف حينهابحفل اضواء المدينة هذاوالله اعلم ومن قالالله اعلم فقد افتى
10-03-2012, 04:39 PM
rummana rummana
تاريخ التسجيل: 02-05-2002
مجموع المشاركات: 3537
سلام يا سلمى أنا عارفة انه كمال الشناوي كان في السودان.. أعتقد انه والده كان شغال في الري المصري واعتقد برضو انه اتولد أو عاش في ملكال لكن أول مرة أعرف أنه سعاد حسني عاشت في السودان وانها فلسطينية الأصل .. ما اجملها ياخ .. نفسي كان أكون بشبهها :) .. عندنا صاحبتنا بتشبهها أو على الأصح أنا شايفاها بتشبهها شديد..!
طبعا حبيبة ألبي شادية تركية الأصل الفيلم الجاي إن شاء الله حيكون لشادية..
10-15-2012, 07:03 AM
rummana rummana
تاريخ التسجيل: 02-05-2002
مجموع المشاركات: 3537
في ناس لو ما الفيلم هندي ح يمشوا ياكلو باسطة لعشاق الافلام الهندية فيلم من اجل ابنائي والاغنية المشهورة على ما اعتقد تم تلحين اغنية سودانية بي نفس اللحن ايام نميري لكوبري كوستي الجديد كوبري كوستي حديد يايات بالزلط ربط البلاد كما اظن
تحياتي
زاتوووو
10-16-2012, 03:55 PM
rummana rummana
تاريخ التسجيل: 02-05-2002
مجموع المشاركات: 3537
Quote: في ناس لو ما الفيلم هندي ح يمشوا ياكلو باسطة لعشاق الافلام الهندية فيلم من اجل ابنائي والاغنية المشهورة على ما اعتقد تم تلحين اغنية سودانية بي نفس اللحن ايام نميري لكوبري كوستي الجديد كوبري كوستي حديد يايات بالزلط ربط البلاد كما اظن
ALZOLZATOO سلام كتير ياخ ومشتاقون.. من أجل أبنائي فيلم قوي ولا يسقط من الذاكرة ... ده مش مشهور عندنا بس بل في كل الدول العربية...بيكون أشهر فيلم في آسيا وأفريقيا غايتو بتذكر أول مرة نشوفوا كنا أطفال .. مشينا سوا السينما- نحن والجيران كلهم (سينما أقاليم زمن الأقاليم سمحة ورخية) .. وبكينا مع الكبار زي ما بكوا .. بس غنية كبري كوستي دي ما سمعتها.. الفيلم موجود كامل في اليوتيوب - بدون ترجمة..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
rummana
سلمى الشيخ سلامة
الطيب شيقوق
وضاحة
عمار عبدالله عبدالرحمن
Yasir Elsharif
حمد عبد الغفار عمر
ALZOLZATOO
فيس بوك
تويتر
انستقرام
يوتيوب
بنتيريست