تواصل خريجي مدرسة المؤتمر الثانوية - المدرسة الوطن

Quote: والله يا ابراهيم محمد الحسن كتررر خيرك خففت علينا الغربة بالبوست دا ... يا محمد حيدر صدقني كنت ابحث عن أي معلومة عنك وانت شخص حبيب للكل ... يا اخي فصل اولى مهدي دا كان فصل عجيب وناسو عجيبين ... بتذكر بابكر دلدوم طلّع دعاية انه اخو اشرف شبو من امه ...والناس كلها مصدقة بقت ... واتذكر واحد اسمه خطاّب انتقل لمدرسة الأهلية وجاء بدلاً منه الشهيد الطيب ابراهيم شمو... وبتذكر محمد رافع المشاغب الخفي ..كل المدرسين يثنو عليه بادبه وهو مشاغب يخفي شغبه بذكاء ... مرة عملها فينا وعمل صوت في حصة استاذ عز الدين بتاع الفرنساوي ...واتهمونا انحنا شلة الخلف (شخصي ومحمد الفاتح ومحمد مصطفى كمتور وعمر الجزلي وطبعاً خليل محمد خليل كان هاديء وطلع منها) ...وينو محمد رافع يانااس؟؟؟ ... قايتو ايام ... بتذكر كنا اتهزمنا في مباراة كرة السلة من الفصل التاني وفيه عباس الحلبي ...هزمونا شر هزيمة ... وانا بعد المباراة رحت اشاغل الود العاتي ماشاء الله حسن موسى ...وعينيك ما تشوف الا النور اداني بنيه شفت النجوم ومغبشة كمااان ... المهم اشتبكنا فيها شبكة قامت المدرسة عليها ...ما حلانا الا حضور الوكيل وودونا للإدارة ...بس الحمد لله استاذ الأمين خضر الزين ما كان موجود .... اتذكر مرة استاذ سعيد الخدري طردني وقالي الا تجيب ولي امرك ...صحبك خاااف وتاني يوم جبت ليه كيس بلح رشوة بس المصري احرجني وامام المدرسين ...صاح انا مش عايز بلح انا عايز ولي امرك ... استاذ الجقر الله يطراه بالخير بتاع العربي ... استاذ بابكر ادريس وكلماته هلا باولاد ام بدة البيفطرو وما يتغدو ... اولاد ام بدة البيستحمو بموية العدا ... اولاد ام بدة لو شاتو الكورة تتقدا ... اولاد ام بدة لو ضربو الحيطة تتهدا ... استاذ عبد الرحمن بتااع التربية الاسلامية ... وايام لاتنسى ... اتذكر يا محمد حيدر كنا في امتحانات نهاية العام وعشان تدخل الامتحان لازم تسلم الكتاب ... اتذكر جيداً الان وانا داخل امتحان التاريخ واحد من التيمان (ناجي او نادر ابراهيم كامل أخذ كتابي وقالي لحظة اشوف حاجة ...المهم مالميت فيه بعد داك ولمن منعوني الدخول للامتحان اصريت ان كتابي مع التيمان والحكاية ولعت ، وكل واحد من التيمان مصرّ انه لم يأخذ كتابي ...والغريبة قابلتهم بجامعة السودان بعد سنين وكل واحد مازال مصرّ على ذلك ..ههههههههههه طبعا الجقر ياهو نفسه وما اتغيّر حتى الان ...وبقابله مرة مرة بالشارقة ... وبقابل عصام ابو عكر وتقريبا نفسه ... ومعاذ البشير موجود بس ما قابلته حتى الان ... تحياتي يا محمد حيدر وابراهيم ...