|
|
 Re: أغاني الحماسة والسيرة .. محاولة للتوثيق (Re: إبراهيم عبد الحليم)
|
Quote: ضرغـــــام الاســود
شعر : يوسف حمد أبوزيد
الفى الاسود ضرغام عاجبنى النتر
الفارس الشجاع حاشاهو ما بنضام
***
ياحر الهجير اللى الخصيم كواى
ياراجح العقل معروف سليم الرأى
سناد للضعيف ... ولليتيم رباى
ولضيف الهجيع وكتين يجيك عشاى
بتخلى الرعاع .. يتضارو منك جاى
***
ود عز الرجال فخر الفريق من جم
ضرغام الاسود ... ما بذكروك بنم
معروف ود رجال أصيل وكامل تم
براد للحشا .... شوفتك تزيل الهم
حراس القبيلة ... وستار بنات العم
***
ود عز الرجال فخر الفريق من جم
ضرغام الاسود ... ما بشكروك بكم
معروف ود رجال تمسح حمار الدم
براد للحشا .... شوفتك تزيل الهم
حراس القبيلة ... وستار بنات العم |
الاخ العزيز المبدع / ابراهيم عبدالحليم
اعجبتنى كثيرا كلمات الاغنية ومعانيها لانها مواكبة لهذا العصر وتتحدث عن الكرم والشهامة والشجاعة بصورة جميلة ومعبرة والقصيدة ذات ايقاع وجرس وموسيقى شعرية التحية للشاعر يوسف حمد ابو زيد لهذه الكلمات المعبرة والتحية لك لاختيارك الموفق ... الموقع لم يفتح معى اليوم واظن ان المشكلة من الشبكة ولكنى حريص على الاستماع لهذه الاغنية وبقية اعمالك ..
لك كل الشكر والتقدير
| |
 
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الفى الاسود ضرغام عاجبنى النتر
الفارس الشجاع حاشاهو ما بنضام
***
ياحر الهجير اللى الخصيم كواى
ياراجح العقل معروف سليم الرأى
سناد للضعيف ... ولليتيم رباى
ولضيف الهجيع وكتين يجيك عشاى
بتخلى الرعاع .. يتضارو منك جاى
***
ود عز الرجال فخر الفريق من جم
ضرغام الاسود ... ما بذكروك بنم
معروف ود رجال أصيل وكامل تم
براد للحشا .... شوفتك تزيل الهم
حراس القبيلة ... وستار بنات العم
***
ود عز الرجال فخر الفريق من جم
ضرغام الاسود ... ما بشكروك بكم
معروف ود رجال تمسح حمار الدم
براد للحشا .... شوفتك تزيل الهم
حراس القبيلة ... وستار بنات العم
الله يخليك يا احمد اخوي كلام ممتع
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: الطيب شيقوق)
|
نحن أولاد أبو فركه
كلمات الشاعر/ احمد محمد الشيخ الجاغريو
غناء الفنان / خلف الله حمد
نحن أولاد أبو فركه *نقعد نقوم على كيفنا
في لقى في عدم دايما مخرف صيفنا
نحن الخرس* بنملاه وبنكرم ضيفنا
نحن الفوق أعدانا دائما مجرب سيفنا
*********
نحن جدودنا اظهر من علم بينين
نحن قلوبنا من فولاذ حديد ما بلين
نحن العن عروضنا لؤام وجبارين
بعرفنا الصبر يا الملكه صبارين
*******
نحن أهل كُتال كل الدول عارفانا
ما بنهاب من الموت ولا الجبخانه
عدونا نضربه لا من ينقلب عُطرانه*
والضاق إيدنا كان دخل القبر بطرانه
**********
نحن المابنكن الزاد ونتحشربو
ونحن المابندى عطانا نتفرشبو*
يوم الموت نريده ونتباشربو
نحن هنية الولد البنتعاشربو*
أبو فركه : الشيخ إدريس ود الأرباب
الخرس : القدح الكبير وكان يصنع من الخشب
عطرانه : رائحة حريق اللحم
نتفشربو : نفخر به
البنتعاشربو : الذي نعاشره
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
حماس وكرم
كلمات الشاعر / احمد محمد الشيخ الجاغريو
غناء الفنان / خلف الله حمد
نحن صغيرنا عنده حياته ما هميه
وفى زمن الحروب الواحد يزن الميه
نحن أرواحنا يفدن ناس سعاد وصفيه
ونحن اللي وطنا وعودنا ديمه وفيه
*********
نحن فرحنا يوم الكتله والمكيه
يوم حر النهار ويبقى الكتال باركيه*
الموت هيلنا قُبال تظهر التركيه
والعادانا كُله خلفنا ليه الكيه
********
لو بقت الشجاعه من النفوس ممحيه
ما بتفوتنا حارسه قلوبنا دائما حيه
نهاجم الموت نخش وكره ونجيه ضحيه *
نهز في الحي والميت نعده ضحيه
*******
صوت المستغيث نقمز* نجيه سويه
وننحر خرزه الشايل* لضيفنا هويه
نطرب لي قنابل الطائره الجويه
ما فينا البمد إيده وتصد ملويه
********
يوم الحاره يوم تبقى الحروب دوليه
والفارس أب زنود قدامنا يبقى وليه
ما بنخت نقيصه إن متنا بالكليه
بنخاف من ملام ست السُوار أب ليه
* باركيه : يقاتلون بالدرقه وهم قعود
* ضحيه : وقت الضحى
* نقمز : ى نهب ونثب
* الشايل : البهيمه على وشك الولادة
مصادر الاغانى : عندليب الجاغريو إعداد وتحقيق الأستاذ / على محمد عثمان الفكي
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: الطيب شيقوق)
|
الخيل في جنح الدباس
كلمات احمد محمد الشيخ الجاغريو قالها في عبد الله ود دفع الله
غناء ثنائي الدبيبه
الخيل في جنح الدباس* ..... نادوا ليهم العباس*
*********
في الهيجات ما بخشى باس
بالسيف بهاجم أم ترباس*
تلت الليل تلقاه حاس
ما بحمل صوت النحاس*
*******
طرفـــــه ما بتلقاه لاج
ضربه ما بداويه العلاج
بحـــــمل يوم اللجــــاج
والدم مخلوط بالعجاج
********
ود على قشاش الورم
يا قشاش دموع الحُرم
قاصع مو عتيد* برم
جامع فراسه وكرم
* جنح الدباس : الليل البهيم
* أم ترباس : البندقية
* النحاس : طبل الحرب
* عتيد : تصغير عتود وهو صغير الغنم
| |
|
|
|
|
|
|
|
|
 Re: أغاني الحماسة والسيرة .. محاولة للتوثيق (Re: Ahmed al Qurashi)
|
أخى د. احمد
ايقاع اغنية السيرة كمان قصة براه ضمنها اغنية لابراهيم عوض
افتكر بيقول:
انت يا السكسوكة يا الما بحدثوك
نقرشى الدلوكة
المهم انو نقرشة الدلوكة لها علاقة وطيدة با اغنية السيره منبعها البطانة!!
عندما لحنت اغنية درغام الاسود وضعت الايقاع بتاعها مستلهم ايقاع السيرة بتاع ناس الغرب وهو بامبو تيك تيكك بامبو الخ ولكننى وبسرعة اكتشفت وبمساعدة اخى شهاب شرحبيل أحمد ان ايقاعات السيرة متعددة جدا
اسمع الاغنية وبجيك راجع لاكمال الحديث
www.ibrahimsud.net
إبراهيم عبد الحليم
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: إبراهيم عبد الحليم)
|
الأخ العزيز الأستاذ / إبراهيم عبدالحليم
وجودك ومشاركتك تسعدني كثيرا وخاصة وأنت من أهل الفن والمبدعين في هذا المجال فأتمنى أن تسهم معنا في هذا البوست بفكرك وإبداعك ..
الأغنية التي يتغنى بها الفنان إبراهيم عوض هي أغنية الوافر ضراعو ، ولقد تحدثت عنها في بداية البوست و شاعرة الأغنية هي الهويدة وهى من مناطق سنار ، وذكر لي الأستاذ خالد الشيخ حاج محمود إن الهويدة تسمى الرحمة أيضا . ولقد قالت الأغنية في الأمين ود مسمار ولقد سمته نمر العبدلاب ...والأمين ود مسمار أيضا قالت فيه أخته رقيه بنت مسمار الآلاف درجن والتي تحدثنا عنها سابقا ، ولقد تغنت بهذه الأغنية الرحمة مكي وكذلك مهله العبادية كما تغنى بها بادي محمد الطيب ومبارك حسن بركات والفنان الكبير إبراهيم عوض .
أما الإيقاع عزيزي إبراهيم فمعلوماتي عن أنواعه بسيطة جدا ومحدودة ولكن يقول البعض إن إيقاع السيرة سوداني خالص أتمنى أن تضيف لنا في هذا المجال ..
أشكرك كثيرا على الأغنية ولكن حاولت الدخول على هذا الرابط ولكنه لم يفتح معي .... لا اعرف السبب حتى الان ولكنى سأظل أحاول وأتمنى شاكرا أن ترسل لي الأغنية على الايميل ...
[email protected]
لك الشكر والتقدير
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الأخ العزيز الأستاذ / إبراهيم عبدالحليم
أشكرك كثيرا على إرسالك الأغنية والتي اعجيتنى كثيرا من كل النواحي اللحن والأداء والصوت الجميل وإيقاع السيرة .. اطربتنى كثيرا وداومت على سماعها عدة مرات ، إضافة حقيقية وملموسة للأغنية السودانية ، أتمنى لك التوفيق ومواصلة هذا الابداع .
لك حبي ومودتي
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Haitham Labib)
|
الفارس الجحجاح
كلمات الشاعر /..عمر الحسين
غناء الفنان / سيد خليفة
شدوا لك ركب ..فوق مهرك الجماح
ضرغام الرجال... الفارس الجحجاح
السم النقوع...للبدن نتٌاح
تمساح الدميرة ..الما بكتلو سلاح
عصار المفازة ..للعيون كتاح
المال ما بيهمو ...إن كتر وإن راح
***
أبواتك جبير بيسدوا للعوجات
مطمورتك تكيل للخالة والعمات
في الجود والكرم إيديك دوام بارزات
ويا أب قلباً حديد في الحوبة ما بتنفات
***
بطناً جابتك والله ما بتندم
أسد الكداد الفي خلاكَ رزم
ويا رعد الخريف الفوق سماك دمدم
بابك ما انقفل نارك تجيب اللم
ما بتعزم تقول غير استريح حرٌّم
***
عينيك يا الصقر في الحاره ما بتنوم
صدرك للصعاب دايماً بعرف العوم
في وسط الفريق في الفارغة ما بتحوم
لا بتتلام ولا بتعرف تجيب اللوم
ود ناساً عُزاز جمعوا المكارم كوم
تفخر بيك بنات البادية والخرطوم
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
فرتيقة ام لبوس
غناء / عبدالكريم الكابلى
فرتيقة ام لبوس لويعة الفرسان
الليل بابلي عنزه وقرونه سنان
*****
الكوراك ضرب مرقن جراقده أنداد
أندادة النصارى الكلهم بولاد
كرار علي كبر عليهم زاد
وسيفك في غضاريف الرجال صياد
*******
متين ياعلي تكبر تشيل حملي
إياك علي الخلاك أبوي دخري
للجار والعشير الكان أبوك بدي
للغني والفقير الكان أبوك حامي
يتسولب من العلج الحرير وأكسي
لا تعاين الوجود ضربك بي شر سوي
وسيفك في غضاريف الرجال أروي
******
جابولنا الكرامه وصبحنا فرحانين
ضربوا دنقرن جوني العيال مارقين
بسأل عن علي الفارس البقود تسعين
هو اللدر العلي ضهرو الخبوب والطين
ما بياكل الضعيف ومابسولب المسكين
الا سيبة الأسد أم قبضة هين
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
| Quote: أما بالنسبة للبلير ..فللأسف الصفحة مافتحت معاي نهائياً لكن حا أحاول أدبر ليها سكة |
الاخ العزيز / هيثم لبيب
لقد اكد الاخ المهندس محمد عثمان فى بوست الشلوخ فى اغانى الحقيبة عدم عمل الاكواد ..
وندعو العزيز بكرى ابوبكر بتفعيل عمل الاغانى حتى نزين هذا البوست بالاغانى التى نتناول نصوصها
لك التحية عزيزى هيثم لبيب
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
السيل بوبا
غناء / عبدالكريم الكابلى والفنان بادي محمد الطيب
غير خالد ماليك تنين....... عرش دود الأربعين
السيل بوبا ......يا الفوتك مو دحين
******
تغني ليك أم هاني
ويشهدو أهل المعاني
نضيفا خاتي ريحة الشاني
كتل ديلاك خبرو جاني
******
يا القمره الماك شهير
يا الرأسى الماك صغير
أبوك بساطى القبيل
تبراهو الشعبه والجنزير
خت كرسيه للعديل
وكورك قال يا غفير
سيفه بدلي الجفير
العاداك وين يطير
شقيا صادف نكير
******
شدلوا ليك في أم سبيب
كشفن ليك أمات وضيب
القاصدنو منك ما بخيب
والف الشمس قبال تغيب
******
تغنى ليك ظبية الحدر
ما بتبلع من اصلو مر
المكنه فوقو بتكاكى
والمدفع تحتو بيخر
لا بيخاف ولا بيتر
قدام العينهم خدر
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: saif khalil)
|
ذكر البعض إن شاعرة أغنية السيل بوبا اسمها آمنه قالتها في أخيها محمد ود بساطى وهو كان ضابطا في قوة دفاع السودان ولقد منحه الحكم الثنائي رتبة البيه ... واسم البساطى مذكور في الأغنية .....
أبوك بساطي القبيل
تبراهو الشعبه والجنزير
والبعض يغنيها ( أبوك الصافي القبيل ) ..
نواصل
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
القمره الماك شهير
يا الرأسى الماك صغير
أبوك بساطى القبيل
تبراهو الشعبه والجنزير
خت كرسيه للعديل
وكورك قال يا غفير
سيفه بدلي الجفير
العاداك وين يطير
شقيا صادف نكير
القمره الماك شهير : الشهير هو الهلال
تبراهو الشعبة والجنزير : كان المجرمون في ذلك الوقت توضع في رقابهم شعبة وتربط بحبل من الخلف بين ضلعي الشعبة وتربط اليد اليمين في عمود الشعبة بينما الطرف الأخر للشعبة يكون مربوطا في الحصان أو الحمار أو اى دابة أخرى ، وحتى القريب كان يفعلها شيوخ القبائل للمجرمين وكان الناس يقولون فلان شعبو.
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الفينا مشهودة
كلمات الشاعر / محمد على ابوقطاطى
لحن الموسيقار / برعي محمد دفع الله
غناء الفنان / عبدالعزيز محمد داوؤد
الفينا مشهودة عارفانا المكارم أنحنا بنقودا
والحارة بنخوضا
******
الزول بفتخر يباهي بالعندو
نحن أسياد شهامة والكرم جندو
ما في وسطنا واحداً ما انكرب زندو
البعجز بيناتنا بنسندو
الليلة بنخوضا
******
ركابين عليهو الناصع أب غرة
نتباشر وقت نلقى الكلام حرة
ما بننفز يمين إن متنا فد مرة
الخواف ما حر منو نتبرا
الليلة بنخوضا
*****
للجار والصديق عشرتنا تتمنى
بنصون الأمانة السيدا أمنا
المغرور ندوسو ونعدموا الطنة
شافعنا بيرى الموت في الركاب سنة
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
Quote: سيفه بدلي الجفير
العاداك وين يطير
شقيا صادف نكير |
الحبيب القرشي
لك السلام مطبوق ولي الحلة التحت والفوق
نعم مقصرين لكن نلتمس منك العذر مازلنا على الأقدام واقفين
ولم نرمي بالعصا بعد
لكن لك منا الوعد والوعد دين لا يسقط
أول ما نستقر المشاركة الفعالة
فاتنا الكثير والجميل لكن سوف نعيد ونتابع من أول
سيفه بدلي الجفير
طويل النجاد
يدل على أن صاحبه كان طويل القد
ومن يعاديه فهو لا محال هالك
تحياتي ومودتي بنعود لكن لحين استقرار أصبر علينا
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: خالد علي محجوب المنسي)
|
الاخ العزيز الاستاذ / خالد المنسى
حقيقة وبكل صدق افتقدك هذا البوست فلقد اضافت اليه مشاركاتك الكثير من المعلومات والحقائق عن اغانى الحماسه... اننا نحتاجك اخى خالد لشرح كلمات الاغانى ... وما زلنا فى انتظار المزيد منك وخاصة اغانى منطقة الجعليين ...
سعيد جدا بحضورك ومداخلتك ..
طلب منى بعض المتابعين معلومات عن حميراء اب قلب ... اتمنى ان تكتب عنها قليلا .
لك الود عزيزى خالد
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
Quote: أسد الخشش الضريه
كابي فوق الوليه
يا ليلا
سيدي الشعبة القوية |
اخي وعزيزي القرشي
تحية طيبة
شكراً كتير على هذا الكلام الطيب في حقي
وأنا ليس أهل له وربنا يجلنا عند حسن
ظنك بنا يا طيب والطيب ما بقول إلا طيب
وتسلم يا أبوضراع
وفي قول أخر
أسد الخُشش الضريّة
كابي فوق الولية
يا ليلا
ود العز والبنيّة
الخُشش : هي قد تكون سوق الشجر او الشجر
نفسه عندما يكون متشابك غزير
فيكون وكر للحيوانات مثل الأسود وغيرها
ود العز معروفة وأما البنية هم أهل القبب أي الشيوخ
وتعني أنه كان ولد عز وفي نفس الوقت من بيت ديانة وأهله
يحلو المعقود ويربطوا المحلول
يقال هذا الشئ ضري اي يمكن أن تختبي فيه ( يضاري )
ومنها ضروة اي ترس وحاجز ( في الحروب )
تحياتي ومودتي
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: خالد علي محجوب المنسي)
|
الاخ العزيز / خالد المنسى
لك الود فطالما انت موجود فى هذا المنبر فانى اطمئن ان هنالك من يراقب ويصحح بعض الاخطاء فى هذا البوست التوثيقى ..
اتفق معك عزيزى خالد فى ان نهاية مطلع اغنية اسد الخشش كما اوردت انت فى مداخلتك ... وكل الفنانين يتغنون بها كذلك
(ود العز والبنية ) ... واننى وجدت هذا النص فى كتاب دوباى للاستاذ الطيب محمد الطيب ولقد اورد (سيدى الشعبة
القوية ).... ولقد تم التصحيح فى النص .
تسلم ايها الرائع
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
تمساح جزائر الكرد
تمساح جزاير الكرد
بتقضي الغرض
انت بتشيل بوقت
ما متلك ولد
*******
غني وشكريه يا أم وريداً حز
بحر الاتبراوي الساقي الرجال بالنز
العشاما بتجيك انت ليهن حد
غرضي إن ما انقضي خلي دار جعل تنهد
******
غني وشكريه يا أم ضميراً فوم
بحر الاتبراوي الشقق جبال الروم
من قومة الجهل ما قدل فوق لوم
في بربر هناك أبو البشير مفهوم
******
غني وشكريه يا شمعة القنديل
من قومة الجهل ماهو التليفه عوير
الأسد إن نتر طارد النمر والفيل
عرش يا أب كريق علي البماثلو قليل
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
يوم الملاحم
كلمات الشاعر / محمد ود الرضي
غناء الفنان / خلف الله حمد
يوم الملاحم لينا عيد .... ميتنا في الميدان شهيد
قد استلمنا الكان بعيد .... وصعيدنا أكرم من صعيد
**********
إنّا على النهج القبيل ..... كم خُضنا معركة يا نبيل
مأوانا للضيفان سبيل .... وخصوصا أبناء السبيل
********
جيشنا معدُوم المثيل ..... يقدم على الميدان كسيل
على هاوية منحدرا بسيل .... بذكر هناك خدا أسيل
*********
لنا البسالة والكرم ..... والغيرة نحترم الحُرم
جوارنا أبدا مُحـترم .... كأنه في حرم الحرم
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
نشيد الجيش
كلمات الشاعر / محمد ود الرضي
غناء الفنان / خلف الله حمد
ضُباطنا للأبطال تقود ..... فوق أم لهيب ذات الوقود
يحموا الوطن والناس رقود
********
نيلنا ازرق وأجسامنا سود ..... وجنودنا زى سرب الأسود
إيمان قوى وثبات تسود .... وكرمنا ما جحدوا الحسود
******
الخوف معانا ما بخيل ...... جندينا بالروح ما بخيل
نحمى الوطن أما الدّخيل ... يلقانا فوق ما يخيل
*********
سوداني جندي دا مستحيل ...... عن صدمة المدفع يحيل
تلقاه مضـــمّر نحــــيل ....... وبعزم يصرع اىّ حيل
********
النصر لنا لنا يا زميل ....... بالعزم والصبر الجميل
أفرادنا بالالالف تميل ...... فُرسان وغا وحُفاظ جميل
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الحسن صاقعة النجم
الحسن صاقعة النجم
البحمى الشهادة والنضم
هو الليلة من السوط ما بهم
*******
خرت صاقعة الصباح
دى الجلة البارودة فاح
علمت ليك الصلاح
الاصم يا تارك المزاح
هو الليله من الموت ما بهم
******
خرت صاقعة النهار
دى الجلة الباروده نار
علمت ليك القهار
يا تارك الهظار
هو الليله من الموت ما بهم
*******
حسن يا حسن السرور
يا ود ليلة القدر
إن شاء الله عمرك يطول
مثل مجارى البحور
هو الليله من السود ما بهم
*******
أنا غنيت أجدت النم
فوق عجل الدك الأصم
من الرصاص ما اتلخم
أبوك بموت تحت الزخم
هو الليله من الموت ما بهم
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
اجتمع الشاعر إبراهيم الفراش مع احد الشعراء الجعليين فقال الشاعر ....
بى حبل المريد كتّف رميتك
وبى لبن العُشر كحّل عميتك
بى نار الجمُر حرّقت بيتك
وفى البحر الكبير تُلّب رميتك
فرد عليه إبراهيم الفراش ....
من حبل المريد بنتل ضُراعى
ومن لبن العُشر فتّحت واعى
من نار الجمُر قُت يالرفاعى
وفى البحر الكبير تُمساح تُساعى
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
ذكر لى البعض ان اغنيةالحسن صاقعة النجم قيلت فى الحسن ود ضبعة
عمدة الجوير وشيخ الخط والذى قات فيه حميراء اب قلب اغنية سيد
محكر الديوان ، لم يتسنى لى التأكد من هذه المعلومة ، اتمنى من المهتمين
المساهمة بالمعلومات والحقائق عن هذه الاغنية واغنيات اخرى
لكم مودتى
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
المدفع الرزام
كلمات الشاعر / عمر البنا
غناء / الفنان احمد يوسف والفنان بادي محمد الطيب
المدفع الرزام طلقاتو من صدرك
يا جبل الضرا المافى سيل حدرك
النار ولعا واتوطا فوق جمرك
**********
ألف بجيب شكرك
يا حاتم زمانك يا السديد فكرك
يا التلب اللزوم الشلت فوق دبرك
يا أب دربا زلق كضب البشق وكرك
*******
لزام التقيله والعاطله دراجه
وروني العدو واقعدوا فراجه
كان ما اشت شملهم واديهم الحاجه
ما برجع تانى للزندو عاجه
********
الأسد المربعن حارس جبال برى
نتراتو الفى بارا مسموعه في برى
ما بعرف كلام الهشكى والهبرى
وقت الصح يبين يا أم خد بجيك خبري
********
من عصرا كبير حس النحاس قحّ
الفارس برز والخايف اتنح
وقت الشوف بشوف اخوكى يا السمحه
فرتاك الصفوف أقلّ من لمحه
*******
يا فارس اللقا وعصار ضهور الخيل
يا الحقيت كلام أم سر وست الجيل
في يوم القتال سموك فشق الفيل
لميت في الفرسان بهدلتهم بهديل
********
غربلت الفراسه وأخدت صافيها
وان جاتنى الألوف غير شك بكفيها
تعرفني أم خدود وأنا بعرف الفيها
النار ولعت بى كفى بطفيها
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الجنيات يا بغاره
كلمات الشاعر / عمر البنا
غناء الفنان / عبدالله محمد
الجنيات يا بغاره شدو خيلهم للمغاره
********
أخوى ما برضى الحقاره
هزّ وعرض في النقاره
في العركه الحلقن صقاره
كتل القوم يتم صغاره
*******
يا الجنيات يا الربحتو
كيف امسيتو وصبحتو
سيف أخوى في لفحتو
بشيل الرأس بى صفحتو
*******
عاجبنى وشكره جبتو
ما بخون جارتو وقريبتو
يا ناس بوريكم عجيبتو
للضيفان بضبح وجيبتو
*******
داك كوراك في الحرازه
مرقو الناس للبرازه
أخوك يا جدية العزازه
سام الروح والشكره حازه
*******
يوم العركه الفى سماحه
اشتبكو سيوفها ورماحها
برز اخوك يا أم سماحه
والخيل صداهن قماحه
*******
أب قلبا فيه الحراره
أب عينا حمرا وشراره
يدخل الحاره ويطفئ ناره
ويشبع الصقار مراره
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
لا تنغشوا تنطربو
كلمات الشاعر / عمر البنا
غناء / أولاد شمبات
لا تنغشوا تنطربو
ولا تستعجلو للشينه تنكربو
أقصروه الحديث قبال يجى يخربو
********
أبعدو من دربو
الحجر الوراد من شرقو لى غربو
كم تلبا غليد عركو وكسر غاربو
شيلو قلبو في ايدو وبلعو شاربو
*******
قلنا ليكم قبيل اعملو حسابكم
وسيبوه الأسد ما دام سكت سابكم
وقت الشرك شالكم والقدر جابكم
أعصرو على الكراع كدى سلمو رقابكم
*********
الخيل روقن مرقن بواديهن
الشوق للحرب والموت مناديهن
الولد البقودهن للمحاص يوديهن
يريدنو البنات واسمه يسليهن
********
غنى وشكري يا حايزة الشرفين
أب سيفا يقسم الزول على نصفين
وقت الشوف يشوف والفرسان تقيف صفين
أخوك يا أم عجن مأمون على الالفين
********
عارفانى انا من قمت يا أم برعه
الجار والصديق الفاهو بسرعه
في ساحتى الغريب يرتع يعيش يرعى
والفارس شوفتو لي قلبه يطير مرعه
*********
وقت الخيل يجن مارقات على العرضه
انا أخوك يا ام سماحه في البنات فرضه
كان ما الم في الفرسان واقرضهم قرضه
مستورة القناع علىّ ما بترضى
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
أخوان آمنه
كلمات / عمر البنا
نحاسهن اترزم
خيول المحاص الكرفن لي ريحة الدم
هن بتصاهلن وعقيدن اتقدم
******
قوم شوف الخيول يا خوى عدادهن كم
قودهن للحرابه وفيهن اتحكم
كم فارسا عنود من شوفتك أتبكم
اقطع دابرهم بى سيفك الأبكم
********
شدولو وركب فوق قارحه الأدهم
لحاق الصديق والجار في ساعة الهم
إن حمر في الزول غير شك يكتلو وهم
يتدردق تقول مضروب بألف سهم
**********
أسد الكرمت الفى عرينه يتنتر
اقدل يا جنا فوق عزك اتبختر
اهجم وأتذكر عيون عبله يا عنتر
ادخل العوق وخلى الصف ورا ينتر
********
وقت النحاس قح وقلب حربي
دا اليوم الفيه أم حداقه نفخر بى
تبراني الصقور وتتغدى من دربي
أكلى من القلوب ودم الرجال شربي
********
جينا منصورين أبشرى يا آمنه
جُرى النم علينا وارقدي متطامنه
مسكناك لسانا واسمعي كلامنا
إن حوتا الألوف ما بقيفوا قدامنا
********
عارفاكم تمام انتو فرساني
وما فيكم جبان في الحاره بنسانى
ترفعو راسي عالي وتطولو لساني
الرجاله حارساكم والسماحه حارسانى
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
انتدب الشاعر إبراهيم الفراش ومعه بعض الجنود لإلقاء القبض على قتلة شيخ البشاريين موسى ودقيلاوى ن فكان له ذلك بعد قتال مرير معهم ، فقال وهو راجع ببعضهم إلى بربر ....
كربتُوا يـــا عساكـــر لا تنقّو
نسارى الليل جبل عتباى نشقّو
متل خيط الحرير نمق ونرقّو
نروح بربر حديث أم زين نحقو
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
سيف الصاقعة
كلمات الشيخ / محمد ود الرضي
سيف الصاقعة البرق ..... أخُوك يا السمحه
*******
قشاش الدموع والعرق ..... أخُوك يا السمحه
البنشـــل من الغرق ...... أخوك يا السمحه
********
الماهل خاتى القلق ...... أخُوك يا السمحه
الماسك دربه إنزلق ..... أخوك يا السمحه
********
اصطنطوا يا سُماع ...... أخُوى غيث العشا اللّمّاع
لي قُول قالُوا مُو سمّاع .... يطمّع أخُوى حاشى مُو طمّاع
**********
أخوى الجبل الأشم ..... بيت العزّة والعشم
بيت السخا والكرم .... البعز الجّار والحُرم
أخوك يا السمحة ...... إن شاف الضيفان كشم
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
البحر السطيت
فيضان 1946 المشهور الذي دمر المنازل والمزارع ولقد كان تأثيره كبيرا في منطقة العيلفون فصور لنا الشاعر احمد محمد الشيخ الجاغريو هذا الحدث بقصيدته المشهورة فيضان النيل والتي سجلها للإذاعة الفنان خلف الله حمد كما تغنى الفنان مبارك حسن بركات ...
فيضان النيل
البحر السطيت غيرك ما في ذكره
كشفت العرائس العجوز والبكره
وهدمت القصور
********
الخولى * النشيط صار ما عنده فكره
وأصبح ساهي حاير وآلت عقله سكره
والأفكار تدور
ما هماك حالُن ما فيش ليك شكره
زملوا لى رحالن عرفوك ناوي مكره
خايضين للصدور
*********
ماكر جيتنا ساير ليلك كُله تسرى
دمرت البشاير * واتعوضنا حسره
وتيارك يفور
كلما تشوف زراعة عليها أخذت كسره
تنهض لصُراعه كاتل ليك مسره *
حُكمك كله جُور
********
تربالى * وزباينه يبكو العرق الشره
ربيت الغباين خورك ليه كَره
أصلك ما بتشور
ظُلمك جبته باين تهجم كِره كِره
تخلع للمباين * اتلقوك بره
زى يوم النشور
***********
الكـــــاســحــه * والمـــنــجـــــره
خافت من أمورك يا المنعت الدره*
ما بتدور أجُر
حايرين في جنايتك والأدهى وأمرّ
التيراب تلاشى وإنعدم بالمره
ما بنفع عُذر
**********
كسرت الطوارى البيك سوقها حرّه*
غفروا ليك سواري إنت قاصع الجرّه
محمر في الخدور
حليل شحن اللوارى من الشبكة ام غُره*
وأصوات البوارى * والخشب المغره
وميلان الحدور
*********
هددت الدواب لي درجة الدره*
حكمك ديكتاتورى في الكون كله شره
ما بحبسوك كجور
غايته بلغت غايتك بالإرادة الحره
وين يا نيل عنايتك مزارعيك فره
كايس للصبر
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
شرح معانى كلمات قصيدة فيضان النيل
*الخولى : رئيس المزارعين
*البشاير : أول ما يخرج من ثمار الزراعة
*المسره : هى الصف من الزرع
*تربالى : المزارع
*المباين : المبانى
*الكاسحه والمنجره : المراكب
*الدره : ادرار اللبن
*سوقها حره : صبحت الطوارى لكثرة احتياج الناس لها سوقها رائجا
*قاصع الجرة : اى أفرغت كل ما عندك من ماء
*الشبكة أم غره : كان البطيخ يرحل بالشباك وهناك البطيخه ذات اللون الأبيض توضع في الشبكة ولذلك تسمى الغرة
*اصوات البوارى : أصوات أبواق سيارات ترحيل الخضروات وأيضا معها أصوات خشب اللوري الذي يحدث صريرا عند سير العربه
الدره : اصغر أنواع النمل
المصدر : عندليب الجاغريو
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
Quote: سنصطحب معنا هذا البوست للربع الجديد...
وذلك للمزيد من التوثيق لاغانى السيرة والحماسة |
التحايا لك عزيزنا الدكتور احمد القرشي
والله لو عندي سلطه في المنبر اجر لك بوستاتك كلها في كل الارباع .... بل اثبتها
فلتبقي بوستات الدكتور احمد القرشي دوما عاليه
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الليله الزايط جاكــــــــــم حايم
صاحي مابتلـــــــــــــقوهوا نايم
ساكي الخيل امات لجــــــــــــايم
اسد الخشش اب قـــــــــــــــوايم
هاشك فوق أم تمــــــــــــــــايم
دا ما ال Halloween ذاتو يا أحمد،
تحايا ل (الحلاويين) اللي شالوا البوست كلو نقلوهو بي غادي،
في عملية ليلية نسميها (تتحمسون).
وتحية صيفية لأخي عبدالرحمن الحلاوي.
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: محمد المرتضى حامد)
|
Quote: الليله الزايط جاكــــــــــم حايم
صاحي مابتلـــــــــــــقوهوا نايم
ساكي الخيل امات لجــــــــــــايم
اسد الخشش اب قـــــــــــــــوايم
هاشك فوق أم تمــــــــــــــــايم
دا ما ال Halloween ذاتو يا أحمد،
تحايا ل (الحلاويين) اللي شالوا البوست كلو نقلوهو بي غادي،
في عملية ليلية نسميها (تتحمسون).
وتحية صيفية لأخي عبدالرحمن الحلاوي. |
البوست دا شحمان ومتورت ونقلنا اللحم وخلينا العضم ..وحتى اللحم داير فرز ويتقسم كيمان وعودك فيهو عود ( راجل ) أبشر ..ود القرشي ما قصر طب ..خليهو يجينا بي هناك ..خروفو موجب للضبح .
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: حمزه بابكر الكوبي)
|
Quote: الأخ العزيز / عبدالرحمن الحلاوى
شرف كبير لي أن تنقل هذا البوست إلى موقع الحلاويين ،
وأنت تعرف جيدا ما يربطني بمنطقة الحلاويين ومعزتي لها ولأهلها ...
لك ولأهل الحلاويين التحية والتجلة ورحم الله الفنان الكبير بادي محمد الطيب والذي اهدانى اهلا وعشيرة |
شكراً د . أحمد القرشي
وإنه لشرف لنا أن تكون عضواً في منتديات منطقة الحلاويين ولكم التحية والشكر على هذا التوثيق الثر .
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: عبدالرحمن الحلاوي)
|
سنعود لشرح معاني كلمات بعض الاغانى والبداية تكون لأغنية بدخل في المحاص والتي تحدثنا عنها سابقا ...
Quote: شدولو فوق تاتاى
مطلوق الجبين اللي عرضو مو نساى
عجل مشن أب قرون للساهله مو رعاى
لسه صغير وقتين يسوى كيفن الرأي |
تاتاى من يتاتى اى يمشى بخطوات ثابتة دلالة على الغرور والاعتزاز بالنفس والتاتاى ايضا مشى الهوينا والتمهل قال احدهم ...
إن وقفت عديلة وان مشت تاتاية .... سنك بيضة الفوق الفروع قوقاية
والشاعرة في أغنية بدخل في المحاص تقصد بها الفرس الأصيل قالت شاعرة أسد الخشش ...
شدو ليك البتاتى
كريم الخيل العواتى
وكت الموت ساعتو تاتى
بذكر دهب البراتى
ويشق الزول ان جاهو خاتى
عجل مشن هو العجل النشيط ومشن من مشّانى اى نشط ومتحرك قال الكباشى ....
بدور ولدا كتل توبو واندرج مشانى
تصف الشاعرة أخوها بأنه كريم وشهم لاينسى عرضه وتقصد بعرضه أهله وأقربائه حيث انه يكرمهم ويمد يده إليهم ويكفيهم شر السؤال وأيضا تشبه الشاعرة أخوها بالعجل النشط الذي لا يرعى الساهله والهينة وإنما يتعب لكسب الرزق وهذه حالته وهو صغير فكيف يكون عندما يكبر ... وتشبيه الرجل القوى والكريم في السودان مطروق قال الجاغريو في أغنية مشيتم حفايا ....
عجل الهوسكى الماك ولادة صيف
أرفق بالضعاف وديك شبعهم كتيف
من قومة الجهل بعرف قدلة السيف
دفاع للطرز البمشن الحنيف
نواصل ....
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الليله العيال اتسامرو البارود
جاك يا من كان على صف الحرابه يقود
ود فايد حسن الفارس المأسود
كوفيتو أم عبل وسط المحاص بتخوض
كوفيتو ام عبل : الكوفية هي غطاء للرأس ، العبل شعر يلصق بالشعر الاصلى أو الورق المفتول غير المنبسط قال الجعلى ...
أم ديساً دون عبل يا ريله باقى مخدّة
المحاص : المعمعه والحرب أو ميدانها قال الشكرى ...
يا بطانة البسرّخ وفى المحاصه بقيف
استعنت في شرح القصيدة بكتاب البروفيسور عون الشريف قاسم القيم قاموس اللهجة العامية في السودان
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
Quote:
ياريت تعرج لينا على اغنية الباسل بابكر وياريت يكون في معلومات عنها |
الاخ العزيز / حمزة الكوبى
ان شاء الله ساحاول تجميع معلومات عن مناسبة هذه الاغنية وهنالك اغنيات
كثيرة احاول تجميع بعض الحقائق عنها مثل الجنزير فى النجوم،
وارجو من القراء والمهتمين
وكل من يملك معلومة عن اى اغنية للحماسة فى مناطق السودان المختلفة ان يراسلنى على الايميل [email protected]
حتى نستطيع توثيق اكبر عدد من الاغانى فى هذا ىالبوست لتكون مرجعا لكل المهتمين
شكرا حمزة على الحضور والمتابعة الدائمة
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: Ahmed al Qurashi)
|
الصاعدة فهيمة عبدالله من نجوم الغد
صاحبة صوت دافئ وجميل وفيه الكثير من التطريب والحنية
فى اغنية الظائط ما بنقدر للشاعر الجاغريو والتى تحدثت عنها سابقا
Quote: الظايط
أغنية الظايط شاعرها هو احمد محمد الشيخ الجاغريو ولقد قالها في العمدة بركات عبالقادر عمه وعمدة العيلفون في إحدى المواقف الشجاعة له ....
ولقد تغنى بها الفنان الكبير مبارك حسن بركات ....
الظايط ما بنقدر .... سيل الوادي المنحدر
***********
الليله الظايط جاكُم حايم
صاحي ما بتلقوه نايم
شادى الخيل أمات لجايم
أسد الخشش أب قوايم
هاشك فوق أم تمايم
********
النيل العم التراسه
البليغ من غير دراسه
خاتنلنوا النظاره وراسه
شدوا ليه على أب جراسه*
وقفل أبواب الفراسه
******
صُد يا عازل وإنقرع
ده الأصل والناس فرع
الوافر ما بنضرع
سيفه وكتين ينشرع
بياخد الزول والدرع
******
ما شفت أخوك يا أم سماحه
العاصيات كسر جماحه
عينه للبعيد لماحه
الخيل الشبكن رماحه
شافنه وصدن قماحه
******
مـــــا تهـــــمــــوك بنمــــــيمــــه
بتكفى ضيفـــــان الهـــــجـــيمه*
سيد بت فرج وسيد حليمه
القصدوا التار رضوا بالهزيمة
*أب جراسه : الخيل عندما تزحف بالأجراس
*ضيفان الهجيمه : ضيوف منتصف الليل |
| |
|
|
|
|
|
|
|
|
|
Re: أغاني الحماسة والسيرة .. محاولة للتوثيق (Re: محمد عثمان)
|
Quote:
و ان شاء الله نضيف ليك بعض الاغنياات التى تتماشى مع عنوان البوست
و حقيقة جهزنا مجموعة كبيرة منها... |
الاخ العزيز / محمد عثمان
لك التحية والود
وسعيد جدا بحضورك الانيق
وفى انتظار الروائع التى تتحفنا بها دائما
لك احترامى وتقديرى
| |
|
|
|
|
|
|
| |
Ahmed al Qurashi
الطيب شيقوق
saif khalil
إبراهيم عبد الحليم
خالد علي محجوب المنسي
حمزه بابكر الكوبي
عبدالرحمن الحلاوي
محمد المرتضى حامد
Osman Musa
فيس بوك
تويتر
انستقرام
يوتيوب
بنتيريست