صور زي دي يا دكتور بتخلينا نغير راينا ونتوقف عن هروبنا المستمر من هذه البلاد عارف كل مرة اجي مارة بشارع النيل اقول دي بلد تتفات و اتعمد ان امر بشارع النيل في غدوي ورواحي حتى ولو كان يطيل المسافة على في مشاويري امبارح مشيت بحري و جاية على امدرمان ومارة بشارع النيل فرايت انتشار الشباب يصادون في البرك المنفصلة من النيل في مرورنا السريع ذاك كنت ارى الاسماك تعلق بسناراتهم وتلمع في ضؤ الشمس ساعة الاصيل فتخرج بيضاء من غير سؤ بلطي ابيض وردي
سلام اخونا انور ادم. هناك فرق بين قيمة الاشياء وسعرها. مثلا لوحة لدافينشى لو حسبنا سعرها - الوان وخشب وتانى شنو ما عارف- لا تعدو بضع دراهم. لكن قيمة اللوحة تكمن فى اشياء اخرى كثيرة لذا قيمتها لا تقدر بثمن. نفس الشئ فنجان القهوة لادروب بتلك الطقوس قيمته عالية جدا ولا يمكن ان يستبدل تناول ذاك الفنجان ولو فى ستاربكس كافيه.
Gaafer Ali مرحب بيك فى البوست وبارائك وانتقاداتك. فى السودان تابهوات taboo من الصعب تصحيحها. مثلا وانا التقط الصور اعلاه كنت اتلفت كيلا يرانى احد من الصحاب او الاقارب. وكنت فى اى لحظة اتوقع ان ياتينى صوت ساخر يقول: يا زول جنيت؟ تصور فى البحر! خلاص يعنى الود رومانسى!
وانا انزل فى البوست دة برضو كنت بتلفت. :-(
والحكومة بنفس هذا الفهم تعمل على طمس معالم هذا الخالد- سليل الفراديس- دون ان تعى قيمته الجمالية.
الرسائل والمقالات و الآراء المنشورة في المنتدى بأسماء أصحابها أو بأسماء
مستعارة
لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
