|
|
|
 Re: لماذا لا يتزوج بطوط زيزي ؟؟!! (Re: حمور زيادة)
|
يمتاز بطوط عن سائر شخصيات والت ديزني بانه شخصية لها عمق و ليست مسطحة كسائر شخصيات الكرتون او القصص عموما
فليس بطوط مجرد فأر ذكي محب للمغامرات ينتصر دوما كميكي
و لا هو غبي شارد البال كبندق
و لا مجرم غاضب كدنجل
ان في بطوط لمسه بشرية قوية
| |
 
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
بطوط يشبهنا ..
تماما ..
فهو كسول .. عصبي .. طيب القلب .. متقلب الحظ شأنه شأن الجميع .. يسعى دوما للبحث عن عمل ..
يعول اولاد اخيه الصغار ..
شجاع حينا و جبان احيان اخرى
يحب زيزي و يفعل لاجلها اي شئ
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
بطوط لم يكن من اختراع والت ديزني كما الفأر ميكي
بل الحقيقة ان اغلب شخصيات عالم ديزني التي تربى عليها الاطفال العرب في اصدارات دار الهلال و ماما لبنى كانت من اختراع رسامي كرتون امريكان مغمورين احسن ديزني ادارتهم و استغلالهم ..
والت ديزني الملاك لم يكن ملاكا تماما ..
كان بيزنس مان امريكا قحا ..
مثله مثل اديسون ..
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
اشهر الشخصيات التي ارتبطت ببطوط هم الاولاد
سوسو و توتو و لولو .. حسب الترجمة العربية المصرية
هم ثلاث بطات صغيرات في الكشافة
يمتلكون حكمة عالية و للمرة الاولى يكون الاطفال اعقل من الكبار
والاولاد يستمدون معلوماتهم من كتاب صغير كلي المعرفة اسمه دليل الكشافة
و هو شئ كدائرة المعارف البريطانية و شبكة الانترنت و قصة الحضارة لوول ديورنت اذا اجتمعت معا ..
في هذا الكتاب الصغير الحجم يجد الاولاد اي معلومة يحتاجونها ابتداءا من طريقة عقد الحبال انتهاءا بتخصيب اليورينوم
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
هناك ايضا العم دهب بمعطفه الاحمر و قبعته العالية و هو يمثل الشكل المجرد للثري ..
بطة غنية تحتفظ باموالها في بناء اسمنتي هو الاشهر و الاكبر في مدينة البط اسمه الخزانة ..
و العم دهب يمارس نشاطه الوحيد المعروف و هو السباحه وسط العملات ..
شخصية نمطية مجرده تمثل تخيلنا الطفولي للشخص الثري ..
و هو يذكرك بشخصيات البخلاء لدى الجاحظ
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
ظهرت زيزي في العام 1937 اي انها اصغر من بطوط بثلاث اعوام
و عمر علاقتهم 71 عاما ..
زيزي هي خطيبة بطوط الابدية في النسخة العربية ..
و صديقته في النسخ الاجنبية
و هو في حالة تنافس دائم عليها مع ابن عمه محظوظ كومة الحظ ذات الريش الذي يكفي ان ينحني ليجد نقودا على الرصيف و لا يشتري ورقة يناصيب الا ليربح
فلماذا لم يتزوج بطوط زيزي ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
ان شخصيات الكرتون و الكوميكس في امريكا لا يُنظر اليها بذات نظرة الاستخفاف في مجتمعاتنا العربية باعتبارها اعمال اطفال
انها تتعرض للنقد و التحليل كمؤثرات على السلوك و التربية
تعرضت شخصية الرجل الوطواط لنقد جارح و عنيف بعد ان انضم اليها الفتى روبين ..
كتب احد النقاد كتابا كاملا في تحليل شخصية الوطواط و اتهمه بالشذوذ الجنسي لانه لم يتزوج على حين يتخذ تابعا غلاما شابا حسن المظهر ..
هذا النقد ادى الى ظهور شخصية المرأه الوطواطه لتكون صديقة للوطواط و منافسة له لتدرأ عن الوطواط تهمة الشذوذ
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
علاقة بطوط بزيزي علاقة دائمة لا تنقطع ..
فهما يتنزهان سويا ..
يتزاوران في المنزل ..
يتعشيان سويا ( حين يمتلك بطوط ثمن الدعوه في مطعم )
تكلف زيزي بطوط بكل اعمالها الشاقة او اعمال نادي السيدات الذي تسعى دوما لرئاسته
كما ان غيرة بطوط من محظوظ و استغلال زيزي لهذه الغيرة تيمة دائمة في كثير من القصص
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
ان لم تكن العلاقة بوصفها السابق هي حبا فما هو الحب ؟
لكنها علاقة حب لا يُذكر اسمها لأسباب تربوية
تماما كما نلاحظ ان مدينة البط لا يوجد بها قتل رغم وجود مجرمين كعصابة القناع الاسود
ان القانون الصارم لمدينة البط ان لا احد يموت مقتولا
و القانون الثاني ان الحب يمارس و لا يذكر اسمه
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
اذا اعترفنا ان بطوط يحب زيزي بدون ان يتم التصريح بذلك للقراء ..
فان لنا ان تساءل لماذا لم يتزوجها حتى الان ؟
ما هي الرسالة التي تبعثها هذه العلاقة للطفل القارئ ؟
علاقة حب تستمر ل71 عاما ..
بها كل مقومات الصداقة الغربية المعروفة بين الرجل و المرأه ..الا ما كان لا يصلح قوله للاطفال
اقصى علاقة جسدية تمت بين بطوط و زيزي هي القبلة حيث تشتعل عينا بطوط باللون الاحمر و يصبح شكلهما بشكل القلب..
هل هناك شئ ما تقوله هذه العلاقة و تغرسه في الاذهان ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: طلحة عبدالله)
|
طلحه
اولا يا عزيزي بندق يتبع لمجموعة ميكي ماوس وهي شق اخر من اعمال والت ديزني العظيم
اما بطوط وزيزي ومحظوظ والجده بطه وعم دهب وتيك وتاك والبقية هم سكان مدينة البط
ثم ان بندق اساسا عاقد علي كوكا ولا يمكن ان يخطفها منه احد الا دنجل بعد ان يخرج من السجن لانه يقال والعهده علي الراوي
انه سده ماله لكن بأموال مسروقه
قناطير مودتي
| |
|
|
|
|
|
|
|
|
 Re: لماذا لا يتزوج بطوط زيزي ؟؟!! (Re: حمور زيادة)
|
لو بطوط اتزوج زيزي حتنتهي الحكاية
او حيتغير مجري القصة وما حتكون مترابطة ابدا
اولاد اخوة الصغار ايش حيكون مصيرهم
محظوظ وتنافسة مع بطوط في حب زيزي
عمي دهب ؟
غايتوا
احسن شي خليهم كدا
لاننا بنحبهم كدا كل واحد بشخصيتوا وطريقتوا
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Faisal Elrasheed)
|
أخ حمور
تعرف إنو لحدي اللحظه دي أنا بستمتع كثيراً بي الشخصيات دي ولاأخجل من تصفح مجلة ميكي أمام الجميع .
بالأمس قابلت حفيدة والت ديزني التي تزور السودان حالياً وهي على عكس جدها ليست لديها أية إهتمامات بهذا الفن بل تعتبر ناشطه في مجال السلام .
مؤونة عام من الود
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: محمد فرح)
|
محمد فرح ..
انا اقرأ ميكي كل اسبوع و افخر ان لدي مجموعة كبيرة منها
حتى لو نظر لي البائع شزرا و حتى لو اخذت اتحايل عليه بانو الاولاد جننونا ياخ بميكي دي
| Quote: بالأمس قابلت حفيدة والت ديزني التي تزور السودان حالياً |
ياخ حظك عديل كده .. الناس ديل بتلاقيهم وين ؟
لو الاجابة فيها سياسة استنى المسينجر يشتغل و رسلا لي
ما تكتبا هنا
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
صديقي حمور...
الصداقة في الدول الغريية تكفي عن الزواج ويمكنها أن تطور وتصبح شراكة مدنية ... أي أن لهما حقوق الشريكان في كل شئ ... الزواج يعتبره الكثيرون عبء يصعب التخلص منه خصوصاً بعد القسم الكنسي ( لا يفرقنا إلا الموت ) .... الطلاق سهل في الزواج المدني أو الشراكة المدنية ...... لذلك بطوط لم ولن يتزوج زيزي...يا عزيزي
مودتي
اسامة
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Osama Mohammed)
|
فيصل ..
Quote: يقال انه محظوظ واقف ليه في حلقه
والجده بطه قالت ليه ما عافية منك كان عرسته زيزي
وعم دهب حا يحرمه من الميراث |
مداقرة محظوظ مشكلة
و زعل حبوبة بطة ما بنرضاو ليو
لكن ارتهان الارادة لعم دهب ده حاااار
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Osama Mohammed)
|
اسامة
Quote: الصداقة في الدول الغريية تكفي عن الزواج ويمكنها أن تطور وتصبح شراكة مدنية ... أي أن لهما حقوق الشريكان في كل شئ ... الزواج يعتبره الكثيرون عبء يصعب التخلص منه خصوصاً بعد القسم الكنسي ( لا يفرقنا إلا الموت ) .... الطلاق سهل في الزواج المدني أو الشراكة المدنية ...... لذلك بطوط لم ولن يتزوج زيزي...يا عزيزي
|
وضعت قدمك معي على اول الطريق
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
في الصين في ابان الثورة الثقافية منعت بكين دخول مجلات و رسومات بطوط باعتباره عميلا للمخابرات الامريكية ..
لا اعتقد ان بكين كانت مغالية ..
ان الامبراطورية الامريكية تستعمل وسائل غزو مبتكره لم تستعملها الامبراطوريات من قبل
كان من السهل ان تكره روما و تثور عليها لأنك لا تعرف فلاسفتها و لا ادباءها ..
لكن الامبراطورية الامريكية اليوم تغزونا بالحب الناعم ..
انها اول امبراطورية في التاريخ يثور ضدها الناس في النهار ثم يسهرون ليستمتعوا بافلامها و ثقافتها ليلا ..
و بطوط و زيزي يقدمان ذات الخدمة الثقافية للحضارة الامريكية
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
فعلى حين لا تسمي لنا قصص بطوط امريكا قط و تتعامل مع مدينة خيالية اسمها مدينة البط سكانها بط و كلاب و خنازير في تنميط لطيف ..
حيث سائقو سيارات الاجرة دوما كلاب
و العمدة خنزير
و الموظفون ببغاوات
فهي تقدم لنا نمطية اخرى في علاقات الجنسين ..
الحب الابدي الذي لا ينتهي الى شئ
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
ما هي تأثيرات هذه العلاقة الجميلة الممتدة ل71 عاما على الطفل ؟
الطفل الذي يتأثر بعم بطوط ..
يضحك معه ..
يفرح معه ..
يغار من محظوظ على زيزي معه ..
يتمنى ان يتحصل بطوط على ثمن العشاء ليدعو زيزي الى مطعم فاخر ..
ثم ..
؟؟؟
لا شئ
ان الرسالة التي تقدم عبر هذه العلاقة واضحة جدا ..
تغرس في عقولنا بنعومة ..
كما الظل ..
الحب و العلاقة لا شأن لها بمؤسسة الزوجية
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
هذه الرسالة التي اقتحمتنا بها الافلام و المسلسلات الامريكية مؤخرا بعد ان تقرر ان يصبح العالم سريرا صغيرا في غرفة ضيقة كانت قد ترسخت في نفوس اجيال عديدة مع كل ضحكة و متعة مع ابطال مدينة البط ..
الذين يدينون الدش و الديجيتال اليوم لانه غير اخلاق و عادات الشباب العربي واهمون ..
هذا التغيير تم منذ زمن بعيد و بهدووووء و تحت اعين الجميع
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
ان العم بطوط الذي احب قصصه جدا و لا اخجل من ان اقول اني اقرأها حتى لحظة كتابة هذه الاحرف قد قدم لاجيال كثيرة اخلاقيات و عادات مختلفة تماما عن المجتمع العربي
تشربناها بلذة و تعاملنا معها باستخفاف ..
فقط حتى تشكل وجداننا اليوم
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الى البطه الثرثارة العصبية الكسولة بطوط صاحب قميص البحارة الازرق و السيارة الحمراء رقم 313 الساكن بالمنزل رقم 13 بمدينة البط ..
لقد تشربنا حبك في قلوبنا بذكاء صانعيك
اسمح لنا ان نحب ذكرياتنا معك ..
ونرفض الرمز الثقافي و الاخلاقي الذي تقدمه
عم بطوط ..
بحق حبنا لسنوات و سنوات ..
تزوج زيزي ..
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
حمور
الكرتون كما اسلفت مستمد من الحياة الطبيعيه التي نعيشها او يعيشها صانعوه سواء ان كانوا في الغرب او الشرق
كل ما يدور في حياتهم الطبيعية تجده من خلال تلك الرسوم
لم يكن هدفهم هو استهداف انسان الشرق بقدر الكسب المالي من وراء المشاهده
ثم... وجدوا ضالتهم فيه حين اصبح هناك من يترجم تلك الاعمال الي اللغات الاخري وذلك بدلا من ان يصنع لنا الجديد المتوافق مع ثقافتنا الوسط
عليه فاصبح من السهل توجيه الرسائل الي امة كاملة دون عناء فقط عبر الاعلام
الاعلام الذي ياتينا بكل ما في الغرب من قبيح وجيد ( وليس كله قبيح)(وليس كله جيد)
المهم ما اريد قوله ان افلام الكرتون بعالمها الغير خيالي تصلح ان تكون اداة تربويه ان تم توجيهها بطريقة تلائم مجتمعاتنا
دون النظره الرجعية لكل ما هو ات من الغرب
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
شخصيا : لا اري اي عيب في ان يشاهد اولادنا وبناتنا ما تقدمه (والت ديزني) الا ان كان في الامر جديد
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
Quote: فعلى حين لا تسمي لنا قصص بطوط امريكا قط و تتعامل مع مدينة خيالية اسمها مدينة البط سكانها بط و كلاب و خنازير في تنميط لطيف ..
حيث سائقو سيارات الاجرة دوما كلاب
و العمدة خنزير
و الموظفون ببغاوات
فهي تقدم لنا نمطية اخرى في علاقات الجنسين ..
الحب الابدي الذي لا ينتهي الى شئ |
الأخ حمور ... لم تكن تلك المرة الأولى التي يتم الترميز فيها بحيوانات ( معينة) لتوائم أنماط شخصية ( معينة) تم إستعمالها من قبل الكاتب المبدع = جورج أوريل = في كتابه مزرعة الحيوانات أو Animal Farm .....
لك التحية صديقي
مودتي
اسامة
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: عزاز شامي)
|
عزاز ..
| Quote: انت نسيت انو محظوظ راسم على زيزي يا حمور؟ |
ما نسيت يا عزاز ..
لكن المشكله هو راسم على شنو ؟
عرس وله عشا و رحلات برضو ؟
مافي شي قعدنا عزابه لامن صلعنا الا حركات البط المجكس سبعين سنه ده
جيل فاطمه السمحه و يوسف ود السلطان كلو اختار ست الحسن و عرف مصيرو .. و نحن لليلة في نمرتك كم ؟
ـــــــــــــ
بالمناسبة نمرتك كم ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
تعرف يا حيمور انا قعدت خمسة سنة مستني أتزوج (محسية) حبيتا أيام الجامعة وفي كل مرة كان ابوها يردني علي اعقابي بحجة انو أنا زول (غريب ما محسي ).. الكلام دا جبتو ليك بمناسبة كلام فيصل دا:| Quote: اولا يا عزيزي بندق يتبع لمجموعة ميكي ماوس وهي شق اخر من اعمال والت ديزني العظيم |
الناس ديل يا فيصل برضو ما بزوجوا الغريب واللا شنو ..؟
عموما ياحليل أيام ..
ميكي
سوبر ميكي
مبكي جيب
وكذلك المغامرون الخمسة تختخ ولوزة ونوسة ومحب وعاطف وكلبهم زنجر ومفتشهم سامي وشاويشم فرقع ..
والتلاتة عامر وعارف وعالية
والتلاتة التانين محسن وممدوح وهادية
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: طلحة عبدالله)
|
| Quote: أتزوج (محسية) حبيتا أيام الجامعة وفي كل مرة كان ابوها يردني علي اعقابي بحجة انو أنا زول (غريب ما محسي ). |
والله يا طلوح الناس ديل ما دايرين معاك بس ..
وقادروا يصارحوك ..
لكن حتة ما محسـي دي .. اسأل مجرب ..
..
..
يا حمـور ..
خليك من بطوطة .. انت عرسك متين ..
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: rosemen osman)
|
روزمين ..
تخيلي ما كانت مقالات
وكت جبتي الشمار من بوست معتز تعالي نتمو ليك
كان كتاب عن حرب الخليج الفو معتز زاااااتو
اسمو تاريخ الحرب الخاسرة
و ما يفوتك انا كنت المبدع الصمم الغلاف
ــــــــــــــــــ
تلجي وينو ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: طلحة عبدالله)
|
ما هو شوف يا طلحه يا اخوي
من ناحية الجماعة ديل يا حليلم فهو فعلا حليلم و حليل الشياطين التلتاشر و تان تان و لاكي لوك برضو
لكن من ناحية انو انا ما اسمي حيمور فانا فعلا ما اسمي حيمور
انا حمور زيادة
ح ..م .. و .. ر
و الله العظيم حمور
وحات كتاب الدين حمور
ليه ناس المنبر ديل ما عاوزين يصدقوني ؟
حرام عليكم
انا عملت ليكم شنو ؟
حمور يا ناس
حمور يا بشر
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
سلام حمور ..
Quote: اذا اعترفنا ان بطوط يحب زيزي بدون ان يتم التصريح بذلك للقراء ..
فان لنا ان تساءل لماذا لم يتزوجها حتى الان ؟
ما هي الرسالة التي تبعثها هذه العلاقة للطفل القارئ ؟
|
تذكرت أيضا قصة أدهم صبري ومنى توفيق في سلسلة رجل المستحيل ..
نتابع قصة حبهما منذ الإصدارات الأولى وحتى الان رغم تجاوز الأعداد المائة وخمسون عددا إلا أنهما لم يصلا ولا حتى لمرحلة الخطوبة !!
وفي سلسلة ملف المستقبل ..
تزوج رمزي من نشوى إبنة نور ..
ومحمود من مشيرة الصحفية الإعلامية ..
وفي مرحلة لاحقة تزوجها أكرم عضو فريق نور الجديد ..!!
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: ناذر محمد الخليفة)
|
فيصل ..
انا افرق دائما بين الفنان الذي صنع مثل هذه الاشياء و الرأسمالي الذي سوقها لنا و المدافع عنها الذي يعتقد انها جزء من ثقافة المنتصر و بين المتلقى الغلبان
بطوط و مدينة البط عالم ممتع ..
نستمتع به ..
لكن هل توافقني انه يقدم رسائل ضمنية خطيرة ؟؟
كم طفل اصبح الكريسماس بالنسبة له تيمة لازمة للاعياد متأثرا بهذه القصص ؟
كم طفل يتحسر ان بابا نويل لا يأتيه متأثرا بهذه القصص ؟
في لقاء تلفزيوني مع احد الجنود الامريكان لاحظ انهم لم يغزوا بلدا بها ماكدونالدز ..
هذه الملاحظة العابرة قادت الى دراسة علمية طويلة
كانت خلاصتها ان دول الشر لدى امريكا كلها هي الدول البعيدة عن الثقافة الامريكية
انا هنا لا اقدم فرضيات و لا اقترح حلولا ..
انا اقدم اسئلة لم يملك المقدرة ان يجيب عليها
بطوط الذي احبه رمز ثقافي حتى لو لم يقصد رسامه ذلك
هذا الرمز تغلب علينا و على جيلنا ..
ما هو الحل ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
اسامة ..
جورج اوريل كان رمزيا واضحا ان كان هناك شئ كهذا
في مزرعة الحيوانات تستطيع ان تقول هذا هو تروتسكي و هذا لينين و هذا ستالين
و المشهد الاخير حين يتبدل شكل الخنازير مباشر في دلالته بما لا يقاس
هذه هي الرمزية الفنية المفهومة
لكن ..
الامبراطورية الامريكية تقدم السم في الدسم في كل شئ
كلنا يعجب الان باتفاق ميرلاند الذي ينص على قرأة الحقوق للمتهم حين القبض عليه
يعجبنا لأن اسلوب الممثل في القائه مغري و جميل
دون ان نسأل هل يفقه هذا المسكين المقاد من عنقه ما يقال له ؟
امريكا تحسن غزونا ..
و هي الامبراطورية الانجح في الغزو
في منتديات الراكوبة قلت منبها ان الامبراطورية الرومانية كان من السهل ان تكرهها لأنها كانت معزولة و لا احد يعرف سقراط او غيره من فلاسفتها ..
لكن امريكا اليوم في كل بيت
باوبرا
و هوليوود
و بطوط
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
ناذر
بالنسبة لعمنا نبيل فاروق الذي فكت منو و راحت عليو فانا اظن انه معذور
كان المسكين يحاول ان يقدم لنا تيمه موازيه للاثارة لنتسمك بالسلسلة لنفكر هل سيتزوج ادهم منى ام لا ؟
ثم عقد الموضوع بزواج ادهم من سونيا
ثم فتح باب ادم ابنه
ثم قفز به الى العراق
لنحس بالاثارة
و الترقب
و القلق
يقترب
و يتقرب
و يقترب
و يتقرب
اما بالنسبة لفوضى ملف المستقبل فقد كتب الرائع احمد خالد توفيق ( لو كنت لم تقرأ له فانت مظلوم يا صاحبي ) كتب يقول عن العلاقات في السلسلة :
" يعرف قراء السلسلة العلاقات المعقدة بين الابطال ..
لكننا نوجزها في ان رمزي زوجنشوى و نشوى ابنة نور و مشيرة مطلقة رمزي و مشيرة زوجة اكرم و سلوى تغار من مشيرة و غالبااكرم يغار من رمزي و غالبا نشوى تغار من مشيرة لان زوجها كان لها من قبل .. "
شفت كيف ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: عبد الواحد أبراهيم)
|
عبد الواحد
Quote: حـــــــــــمور زيادة
ســـــلامـات
عم دهـــــــــب بتاع القروش داك ياربى بى يكون جبهـــجى ؟
غيتو بيحب القروش جنس حب .
بيذكرنى ب عبدالرحيم حمدى |
يخرب بيتك داير توديني في داهية
غايتو بيني و بينك
بالغت مع عم دهب
الله خلقك شفت ليك كوز ظريف و دمو شربات زي عم دهب ؟
ياخ و كمان وفي و بيحب القرش الاول و مجتهد ..
بالغت غايتو
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: انعام عبد الحفيظ)
|
Quote: الله خلقك شفت ليك كوز ظريف و دمو شربات زي عم دهب ؟
ياخ و كمان وفي و بيحب القرش الاول و مجتهد ..
|
طبعا يا حمو رما فى كوز ظريف لكن فى كوز بيتظارف ( المتعافى ) مثلا .
طبعا لا وجود لكوز وفى هولاء الناس لا يوفون لزوجاتهم ولاصدقائهم ولاهليهم
انت عارف بقية الحكاوى .
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
حمور زياد آسف للخطأ المطبعي والجاتك في حمرتك سامحتك
+++++++
يا حميدة اخوي ابو المحسية دي آخر مرة مشيت ليهو فيها لقيتو طالع شايل سبحتو من المسجد ( المسجد جيران هيطة بالهيطة) وقال لي بعد أن ساقني جوة الجامع أنو طرح الامر علي اعمام البنت وندموه علي الكلمة دي ,, وأكد لي أنه لا يمانع في زواجنا لكنه يخشي علي مستقبل ابناءنا ومستقبل الأسرة ككل , وحلف باغلظ الأيمان أنو ام البت اللي هي زوجته بنت عمه وبقية بناته واولاده متزوحين من الأسرة ( دي حقيقة)..
وقد تأكدت بنفسي تاليا أن هذه الأسرة بالفعل لا تزوج بناتها (خاصة) من من خارج دائرة الأسرة .
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: طلحة عبدالله)
|
الاخ حمور انا من الموداومين على قراية قصص بطوط وزيزى ودنجل وكوكو الخ..
لو اتزوج بطوط زيزى حتروح كل الحاجات الجميله عد معاى
1- لافى عشاء
2- لاهديه
3- لا مجامله
4- لاونسه
4- لاريده ... الخ....
ماخلاص عرسه تانى فى شنو ( بى فهم السودانييين ) بس المسلسل امريكى الزواج عندهم ما مهم لانو كل المرغوب موجود ..
تحايا رائعه لكل المشاركين فى البوست .. ..
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Sara Mahgoub)
|
انعام ..
انشاالله يا يمة دنجل يجيكم و عصابة القناع تنشل شنطتك في الشارع
يا حاقده
عبد الواحد ..
الباقي ما بيشبه الحته دي
شي خلانا ندمن ميكي و بطوط غير كأبة الواقع شنو ؟
طلحة ..
ما بيناتنا يا زول
سارة ..
انتي معاي انو اجمل قصص بطوط هي قصص البحث عن عمل او قصص البحث عن كنز مع عم دهب ؟
بصراحة اي قصة فيها نادي السيدات و غيرة من محظوظ بتكون سمجه و بارده
ختي بالك
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
يا حمور انت فات عليك انو الأطفال ما بيظلو أطفال مدة طويلة للأسف الشديد، يعني جيلنا نحنا مثلاً قرا مجلة ميكي وحب بطوط واستاء شوية من زيزي البتستغلو وبتستغل حبو لكن مشينا بعد داك ونادراً ما كان في نموذج زي نموذجك في الاستمرار بانتظام في قراءة ميكي ولو أنني مثلاً أقرأها كلما توفر لي ذلك (كنت أشتر ميكي جيب لأبناء اختي أحيانا وأقرأها قبلهم) المهم أن تأثيرهم وتأثير علاقتهم الاسطورية سرعان ما ينحسر بمرور الوقت والتعرض لمؤثرات أخرى قد تكون في اتجاه مختلف، أي أننا ونحن أطفال لا نعي أزلية وسرمدية علاقة بطوط وزيزي ببساطة لأننا نكبر ويتشكل وعينا بمؤثرات مختلفة وثانياً لأننا لا نواصل قراءة مجلة ميكي
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Mohammed Elhaj)
|
محمد الحاج ..
انا احاول ان اشير الى رموز ثقافية تبعث رسائل ضمنية
الرسائل المغروسه لها تأثير اقوى من المحفوظات الواضحة
ربما ازعم لك ان شخصية بطوط و ما تحمله من ثقافة مؤثرة اكثر من الغراب الذكي و النملة الشفوقة و مريم الشجاعة ..
هل تذكر هذه الاسماء ؟
حفظونا لها بالسوط و ذهبنا نتعرض لمؤثرات الدنيا
بطوط لن يؤثر في شخص ناضج و بصلعه مثلي
لكنه ينشر ثقافته لدى الاطفال
راجع اسئلتي اعلاه لفيصل حول التأثيرات الثقافية لبطوط
و انظر موقف الصين منه ابان الثورة الثقافية
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الاخ حمور
شكرا لهذا البوست الجميل
حقيقي انا واحدة من الناس الذين لا زالت مجلة ميكي تشكل لديهم اهتمام كبير واحبها جدا وشكلت ملامح طفولتي
كل ما القى فرصة بشتريها وبستمتع جدا بتفاصيلهم وحكاياتهم وقصصهم العديدة
اول مرة في حياتي اشوف البيتزا كانت في قصة في مجلة ميكي وكوكا التي تعد البيتزا بيدها
فطيرة التفاح ما زال طريقة اعدادها من يد الجد بطة للوز فتى المزرعة الوفي
وقرش الحظ بتع عم دهب عصاية الساحرة سونيا لما تتنكر في دور المحبة لعم دهب
علاقة بطوط بزيزي الشي الاترسخ في ذهني منذ الطفولة انه زيزي شخصيتها في كثير من الانتهازية
تظهر حبها لبطوط فقط عندما تحتاج اليه لينجز ليها مهمة ما حينها بتتودد له بكميات كبيرة وطبعا التودد ده كان بيظهر في شكل رموش زيزي المرفوعة للاعلى مجسدة (غرويدة العيون) والقلوب الطايرة المرسومة حولها هي وبطوط
حتى احداث القصص كانت بتظهر ملامح الانتهازية هذه في العلاقة بينهم
بطوط طيب القلب يسعى كما قلت لفعل اي شيء من اجل زيزي
لكن زيزي ممكن تبيع بطوط في اقرب ملف لو شافت محظوظ وعزمها سينما
اعتقد انه ناس والت ديزني كانوا من الذكاء بحيث خلوا حب بطوط وحب زيزي المخلوط بانتهازية هم بهار قصصهم ولو تزوج بطوط بزيزي ما حيكون في صراع بين بطوط ومحظوظ
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: maia)
|
مي ..
بلا شك ان للرسام مقاصد انسانية عامة حتى لو اغضبت نساء الجندر
تنميط المرأه في المطبخ و الاهتمام بالزينة و الموضه ..
لا توجد في مدينة البط امرأه الا و هي عضوة في نادي السيدات و تستغل الرجال ..
لكن ..
انا اسئ الظن بمن حرصوا على نشر مدينة البط ..
من انفقوا ملايين الدولارات من اجل ان تصلنا ..
لاحظي انها نشرت في مصر في ايام الانغلاق اليساري لعبد الناصر ..
فهل كان لها دور في الانفتاح الساداتي ؟
الكوكاكولا كان لها دور مقارب اشار له صنع الله ابراهيم
فما هو الدور الثقافي الذي لعبه عم بطوط ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: omer osman)
|
عمر ..
تعرف انو شخصيات الاولاد فيها رسالة قوية جدا انو الاطفال ممكن يكونو اقوى شخصية و احسن فهما من الكبار الكسالى الاغبياء الذين لا يفعلون شيئا الا النوم امام التلفزيون
شخصية الاولاد نمطية امريكية قوية ..
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الاخ حمور
زيزي بشكل مستمر هي الاثنى الناعمة التي تسعى لان تكون محبوبة من قبل الاخر ومحور اهتمامه والاخر هذا يمثله بطوط احيانا ومحظوظ احيانا
بطوط شخصيته ليست بالشخصية القوية او المثقفة كثيرا فهو يميل الى السعي لعمل كل شيء يرضي زيزي مرات كثيرة فيها نوع من البلاهة وزي الكان مقصود اظهار بطوط بهذه الشخصية الطيبانة الغير قوية او الما عندها شدايد بكلامناكنموذج للمحب الما قادر يصل لمحبوبته المراوغة والمسيطرة في احيانا كيرة
شخصيات بطوط استمرت بعد ذلك حتى الان ، في كل المراحل دون ان يتغير نمط بطوط او زيزي
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: maia)
|
مايا ..
( اسف اذ ظننتها مي )
لاشك ان طباع البطلين مقصوده ..
بطوط المهزوم الابدي لكنه طيب القلب رغم عصبيته و كسله
من لا يحبه ؟
زيزي دورها ان تؤكد محبتنا و تعاطفنا مع بطوط
انها نجمة الظل التي تدفع البطل الى الضوء
الغريب ان الامريكان الذين ضايقوا الوطواط في تابعه روبين لم يحاولوا الثورة على شخصية زيزي !!
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
اولا يا حمور، بوست ممتع جدا جدا.. ودسم خالص.. يعني انا عجبني تحليلك للغزو الامريكي الناعم على حد تعبيرك... دي حاجه انا متابعها لي زمن... زمان في اشياء كتيره المجتمع ما بتقبل انه يسمعها... حتى لما الحاجه تتدبلج ولا تترجم كانوا بحوروها (girlfriend، boyfriend، علاقة خارج نطاق الزواج، علاقات شاذة...) الآن اصبح التلفاز مليء بمثل هذه الكلمات... والحاجه دي جديده.. يعني حاجه حصلت خلال الخمسة سنوات الفاتت، وتحديدا بعد الهجمة على العراق.. وللدقه، بعد هجوم سبتمبر.. الامريكان قرروا انهم محتاجين ينشروا افهاهم على العالم، ويخدروه.. والحاجه دي حصلت باستخدام الفضائيات ومحطات الراديو (راديو سوا).. وغيرها.. الفيديوكليبات انا متأكده انه حيكون في يد امريكية بتحركها في اتجاها الماشه فيه ده.. الامريكان نجحوا واخدوا 100/100.. ما اظنهم كانوا قاصدين قصة زيزي وبطوط دي.. على اعتبار انه فعلا العلاقة ممكن تكون علاقه بريئة.. لانه بطوط زاته من شكله كده ما معروف ليه عمر
بجي تاني
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: مريم بنت الحسين)
|
مريم ..
ربما كانت النوايا القديمة حسنة .. فانا لا احب نظرية المؤامرة
لكن بلا شك ان ما حدث في ما قدرته بالسنوات الخمس لم يكن وليد يومه
هو على الاقل انبني على الحال الذي سبقه
انظري الى حالنا اليوم
كثير من الاشياء التي كنا نرفضها قبلناها بلا جدال او صراع لانها تسربت بهدوء
عبر ميكي او عبر هوليوود او عبر الكوكا كولا
منتظرك تاني
| |
|
|
|
|
|
|
|
|
 Re: لماذا لا يتزوج بطوط زيزي ؟؟!! (Re: حمور زيادة)
|
ازيك يا حمور ,,
بوست عجيب , ورجعني لأيام الشقاوه والبرائه
يعني رجعني خمسه سنه كده لي ورا (على اساس انو الايام ديك كان عمري عشره سنه) !!
(وش مستهبل) !!
المهم ياسيدي , افتكر انو بطوط ما اتزوج زيزي لأنو عندو (فير اوف كومتمنت) يعني
بيخاف من الارتباط !! مش انت بتقول انو بيشبهنا نحن البشر ؟؟
يعني بيشبهكم انتم يا معشر الرجال , وانتوا ما بتتزوجوا عشان الخوف من الارتباط !!
اما صحيح رجاله ما لهاش امان
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الاخ حمور
موضوع ظريف ولطيف ويرجعنا لايام الطفوله. كتب د. عبدالله علي ابراهيم موضوع
في مطلع الثمانينات كما اعتقد اسمه " كيف تقرأ والت ديزني" لاحدي الصحف
السودانيه. حاول تلم في الموضوع.
مع ودي وتقديري
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Elmoiz Abunura)
|
| Quote: انت نسيت انو محظوظ راسم على زيزي يا حمور؟ |
في طفولتي كنت اتعاطف كمع بطوط واغتاظ من زيزي وكنت شايفاها مفترية وحقارة و بتدي بطوط شواكيش (شواكيش دي جات لاحقاً)
محظوظ كان غير محبوب لي البتة
كما ميكي لا ادري لماذا لم احب ميكي ابداً ابدأً كوكا و بنق كانو شخصيات محببة
عزراً لاني اخرجت الموضوع عن سياقه وحولته لاجترار زكريات لذيذة عن ميكي و ميكي جيب
اعملو حسابكم ما تدخلونا علي الشياطين ال13 او المغامرون الخمسة او الثلاثة
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
نازك ..
هناك عديد من الناس بالفطرة لا يحبون البطل الرئيسي الا بعد عناء و يحبون شخصيات اخرى ..
لم احب ميكي قط و احببت شخصيات اخرى في قصصه
لم احب كابتن ماجد قط و احببت شخصيات اخرى في المسلسل
لم احب احمد من مصر في الشياطين ال13 و احببت اخرين في السلسلة
لم احب هاري بوتر و احببت اخرين في السلسلة
لم احس في هذه الشخصيات الثراء الذي وجدته في الاخرين ..
احسست ان المؤلف يحاول فرض حبه علي ذوقي دون مبرر كافي
و وجدت المبررات لاتماهي مع شخوص اخر ..
بطوط ..
بسام ..
عثمان و بوعمير و فهد ..
سناب ..
لم تخرجي من الموضوع فهو محاولة لاثارة اسئلة حول الثقافة التي تقدمها مدينة البط ..
و لا نستطيع ان نستخرج الاسئله ما لم نتذكر
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
اقوي المغامرات في الشاطين ال13 وكنا نتخاطفها عندما ننظر من الخلف فنري ان
عثمان من السودان و رشيد من العراق و زبيدة من تونس او ريما من الاردن عراق فنعلم ان العدد يستحق القراءة
احمد دا كان محشور طوالي بسبب و بدون سبب امكن عشان كده ما حبيناه
بمناسبة كابتن ماجد كنت حاسة بسام مظلوم عل الاقل اخوانو صغار وكان مسئول عنهم
عمر في كابتن ماجد كان لذيذ
في مجلة ماجد موزة وفضولي كانوا الالطف بعد القصص التاريخية (نابليون وغيرهم)
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Nazik Eltayeb)
|
اقوى فريق بالنسبة لي كان عثمان و زبيدة و فهد او بوعمير و ريما ..
طبعا احمد السغيل كان القاسم المشترك الاكبر في اي عدد ..
و طبيعي طالما الكاتب مصري فليو عذرو ..
حبيت بطه كورة عثمان المقاتلة ..
و كرهت عصابة سادة العالم ..
الشياطين كان عندها فترتين ..
فترة لبنانية انتجت عدد قليل منه " اربعه يساوي واحد او المجهول "
و فترة دار الهلال التي امتدت الى القريب ..
فترة الدرفيل و جزر ساندويتش ..
المره دي طلعنا بره الموضوع بالجد
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Rawia)
|
Quote: بنسلفينا كنا مالين ايدنا منها لكن هسة الامور بقت ماواضحة
الصورة في اطار الدعم الكامل لاوباما |
راوية ..
مافي داعي ارد ليك في الموضوع ده هسه بزعلك مني ساي
غايتو بس عشان اطمنك انا ما مع العجوز الشايب داك ..
اسمو منو ..
ماكين
ربنا يوفقك يا زوله
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الاخ حمور سلامات
والله انا شدة ما بحب القصص دي
حتى كتابة هذه السطور
بقيت اخجل من الزملاء واشك
في اني اعاني من طفولة متاخرة
لكن الحمد لله كلنا في اللهم شرق
بالنسبة لزواج بطوط من زيزي
فمن قواعد التكتيك في الروايات
ان يستمر الابطال كما هم لا يكبرون
ودي دقسة عمكـ نبيل فاروق سرعة سرعة
طور شخصية ادهم وكبروا لمن بقى ما يقدر
يضارب زي زمان
يعني لو حصل 74 سنة زي بطوط
بكون ودوهو دار العجزة
ده لو ما خرف
اخي حمــــــور
شكرا لاثارة الذكريات
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: ابراهيم قناوي)
|
ابراهيم ..
دائما ما تفشل الشخصيات الروائية في السلاسل حين يحاول كتابها صبغها بصبغة بشرية عبر تعريفنا بحياتهم الخاصة او تطور شخصياتهم
جزء من جمال هذه الشخصيات ثباتهم ..
نبيل فاروق رغم سابقته ادخل نفسه و ادهم و ادخلنا بالتبعية في عنق زجاجه
هل لاحظت اختفاء عبارة : في الخامسة و الثلاثين من عمره ؟؟ تلك العبارة التي كانت ضمن التعريف بادهم صبري ..
يوم حذفها نبيل فاروق قضى على ادهم بالنهاية
شكرا للمرور
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الأخ حمور ....
فرضية .. أو المطالبة بزواج بطوط وزيزي بيودينا لحقائق وفرضيات حتنتهي لينا من الحدوتة ...
يعني ال 71 سنة دي لو تزوج فيها الجماعة ديل حتختنا في حتة التطور الطبيعي، ويكبر أولاد أخوهو ويعجّزوا، ويبقى عندهم أولاد لو هم زاتهم فضلوا قاعدين زي أبوالهول، وما عارف لحدي الوكت داك الجدة بطة والعم دهب يكونوا قاعدين كيف.
طبعاً الفكرة إنو الأطفال يتابعوا حكاياتم، وما ذنب والت ديزني إنو زيك إنت (والعبد لله) يكونوا متابعين من زمن بعيد ولي هسة الحكايات دي، والمفروض إنها بتتكتب لأجيال حتمشي وجيال حتجي و.......
أقول ليك حاجة؟ خليهم كده أحسن لينا كلنا ..
مودتي
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الاخ حمور والاخوة المشاركون
حقيقي البوست جميل ورائع جدا ، ما حاقول اعاد لي ذكريات لاني ما زلت اقرا ميكي بجدارة وبمشي المكتبة وبشتري الغاز المغامرين الخمسة والاربعة
معليش حاطلع ليكم شوية من خط البوست بمناسبة الشياطين ال13 ، ما عارفة ليه نهائي ما قدرت اقراهم او احبهم مضيقنها شديد ومصعبين الحياة على روحهم
الزعيم رقم صفر ( على وزن اللهو الخفي في مسرحية مدرسة المشاغبين) وزي ما قلتوا احمد من مصر ده كان غياظ شديد وعامل فيها ابو الفهم تماما مثل تختخ في المغامرين الخمسة ( ما غايظني الا المفتش سامي لما يجي يستشير تختخ في حل اللغز .. معقولة بس)
عودة لزيزي ، كانت في ملامح ثابتة ..شكل حذاء زيزي الذي يبدو وكأنه اكبر من قدمهاوشنطتها المستخدمة لضرب بطوط اذا زعلت منه ( شكل النجوم المرسومة فوق راس بطوط كدلالة على الدوخة ) ورموش زيزي المستخدمة كسلاح في (تنعيس العيون ) عشان تخلي بطوط ينفذ ليها طلباتها
غايتو صراحة شخصيتها انتهازية
محظوظ يمتلك قدر كبير من الخبث ويجيد تقديم نفسه كدنجوان رايق ما زي بطوط كاشت ساكت وبتعامل بطيبة، عشان كدا زيزي بتستفيد من كل صفة فيهم وبتستغلها تماما
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: maia)
|
حمور صباحك خير
زيزى عندها راى فى بطوط بس شكله اتعودت عليه عشان كده باقى ليها صعب تتنازل عنو
عندنا استاذ فى الاحفاد زمان اسمو مهدى شرفى بدرسنا كان ادارة اعمال فى نص الشرح قال لينا كان فى بت من بنات الحله سمحه شديد
وعاجبه الناس فى واحد من الاولاد قال بس دى لى بقه كل كل يوم بشاغله جمب العمود وين يا وانتى مالك قال تقبل تحمر ليو وتمشى , الشغلانه
تمت زى شهرين كده وصاحينا مباريهاليك بالمشاغله قام زهج وخله القصه لمن ماادتو ريق حلو وخله العمود والوقفه
جات صحبتنا الصباح ماره ماسمعت المشاغله اليوميه بقت تتلفت وينو بجى اسع بى سرها ماخلاص اتعودت لكن شايلاها التقله ,, كلم صاحبنا
بطوط يسوق عليها التقله
ونشوف النتيجة كيف وله ماكده ياحمور
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: maia)
|
مايا ..
الشياطين ال13 انا ما كنت قادر افهم حاجه واحده اساسية فيهم
جملة انهم فتية في مثل عمرك
انا كنت بقرا المغامرات دي و عمري 8 سنين ..
كيف يعني في مثل عمري ؟
الشي المحير التاني انهم بينجحو غالبا بمعونة عملاء رقم صفر ..
طيب ليه اجهزة المخابرات ما تحل الموضوع براها ؟
يعني دورم شنو ؟
الموضوع بيكون بسيط و ممكن الامن الزمبابوي يحلو
ليه منظمة سرية و قومة و قعدة ؟
اما تختخ و جماعتو فعلى عهدة محدثي انو في سنوات اغترابو في بريطانيا فوجئ بسلسلة مغامرات في السبعينيات لخمسة مغامرين و اول لغز ليهم اسمة الكوخ المحترق برضو
ديل كانو خواجات ما من المعادي
شكلو محمود سالم الله يسامحو عامل كوبي اند بيست
شكرا للمرور
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
و من اصعب الاشياء على النفس ان يعترف الانسان بأنه اخطأ..
و ها انا بصعوبة اقول اني اخطأت في عنوان البوست ..
فقد اوحى بشئ كثير من الخفة و انه مقصود الموضوع لذاته فتسبب ان كثيرين لم يقفوا على المعنى الذي قصدته
اعتذر عن غموضي بشدة ..
ما اردت ان اتساءل عنه ليس سبب عدم زواج زيزي و بطوط من داخل القصص ..
ما قصدت السؤال عنه هو :
هل تقدم شخصيات والت ديزني مفهوما ثقافيا معينا للاطفال ينشأون عليه ؟
عدم زواج بطوط و زيزي مثال لا اكثر ..
علاقة الحب المفتوحة
الاطفال الذين هم اذكى و حكم من الكبار الذين يرشون عمهم بالماء و يهربون من الشباك اذا حبسهم
عيد الكريسماس واهميته للجميع من بطوط المفلس الى عصابة القناع التي تسرق لتحتفل به
عيد الشكر و الديك الرومي
و غيرها و غيرها
هل هي رسائل و قصاصات ثقافية تشكل هوية و وجدان الطفل العربي ؟
لازلت اشير الى طريقة تعامل الامريكان نفسهم مع الشخصيات القصصية .. راجع حكاية الرجل الوطواط المذكورة سابقا
لاحظ الوان ثياب سوبر مان .. الوان العلم الامريكي ..
انه سؤال ضخم ..
هل كان بطوط جنديا في معركة ثقافية و غزو فكري خسرنا فيها دون ان ندري ؟
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
Quote: هل تقدم شخصيات والت ديزني مفهوما ثقافيا معينا للاطفال ينشأون عليه ؟
عدم زواج بطوط و زيزي مثال لا اكثر ..
هل هي رسائل و قصاصات ثقافية تشكل هوية و وجدان الطفل العربي ؟
لازلت اشير الى طريقة تعامل الامريكان نفسهم مع الشخصيات القصصية .. راجع حكاية الرجل الوطواط المذكورة سابقا
لاحظ الوان ثياب سوبر مان .. الوان العلم الامريكي ..
انه سؤال ضخم ..
هل كان بطوط جنديا في معركة ثقافية و غزو فكري خسرنا فيها دون ان ندري ؟ |
السؤال منطقى ، ومايحمله من شكوك غير مستبعدة ياحمور
اذا كان اليهود يفتخروا بانهم استطاعو غزو العرب والتأثير عليهم بالبيبسى والخبز الابيض ،
فلماذا لايحذو الامريكان حذوهم وهم كبيرهم الذى علمهم السحر بخلق نوع من التأثير على الأجيال
القادمة عبر دس قصاصات من معتقداتهم فى رسوم والت ديزنى وغرسها فى عقلية الطفل العربى،
نحن فى عصر أصبح الاعلام فيه اداة حرب ذات تأثيرات مدمرة
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: هند محمد)
|
هند ..
في ذهني الان ما كتبة الرائع صنع الله ابراهيم عن الكوكاكولا و علاقتها بالتحولات السياسية في الوطن العربي
ماكدونالدز رسول الامبراطورية الامريكية الذي يعتبر شهادة ضمان بالتبعية المطلقة
افلام هوليوود و مسلسلاتها التي تقدم لك الابطال الرائعين ..
من يكره امبراطورية ممتعة كهذه ؟
حين ثار هانيبال على روما لم يكن يعرف عنها اكثر من جنرالاتها و قياصرتها ..
لكننا اليوم نتحدث عن الفرق بين بوش السفاح و نيكولاس كيج الرائع
لقد غزلوا لنا برفق قيود حرير ..
هل نحس اليوم باختلاف بيننا و بينهم ؟
الشرط الاول الذي نفذناه هو احساس واحد .. متشابهون و لا فرق
ثم ..
هم متفوقون ..
علينا ان نلهث خلفهم لنصبح مثلهم
هل كان بطوط جنديا في هذه الحرب ؟
رغم لطفه و ظرفه و حبي له .. هل كان جاسوسا امريكيا ؟
احاول مراجعة المفاهيم التي نثرها لدى الشباب العربي من المحيط الى الخليج
و الاجابة تبدولي ..
نعم
لم يكن عم بطوط بريئا كما بدا لنا
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
الاخ حمور
اتمنى الا تكون اجاباتنا قد حملت ليك انه فهمنا عنوان البوست خطأ
بالعكس في راي انه البوست يحمل مضمون عميق جدا
بالاساس قصص والت ديزني ساهمت في تشكيل وجدانا وملامح طفولة من ادمنوها ومن خلالها كنابنتعلم حاجات جديدة
شخصيات والت ديزني وبطوط وحتى الشخصيات الاضافتها دار الهلال اكيد اضافت لكل قرائها الكثير جدا
قصص حب بطوط وزيزي على سبيل المثال ، مرت على اذهان الاطفال يمكن ما بنفس العمق بعد ما الطفل يكبر ويقراها لكن من خلالها كان بيفهم انه في استغلالية في العلاقة مثلا من وجهة نظري
حب المال الشديد عند العم دهب ، حنية الجدة بطة وانها زولة حقانية
طيبة بطوط وسذاجته في كثير من الاحيان التي تجعله يدخل في متاهات هو في غنى عنها
في المقابل ميكي العاقل في مواجهة شتارة بندق وكيفية التصرف في المواقف البيمروا بيها
ميمي وعلاقتها بميكي
كوكا وبندق
عبقرية عبقرينو
و...و...و تفاصيل وملامح كتيرة للعديد من القصص التي بالتاكيد في اعتقادي انها حملت الايجابيات اكثر من السلبيات والا ما كان البعض فينا بيقراها حتى الان
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: maia)
|
مايا ..
حاشايا ان اصف شخصا بعينه انه اساء الفهم ..
بل تهمت نفسي و قلمي اني لم احسن توضيح ما اقصد ..
و فهمت من بعض مداخلات ان روحها لا نصها ظلت اسيرة البحث عن سبب لا البحث عن اثار للظاهرة ..
شكرا لتحليلك ..
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: Hatim Salih)
|
حاتم ..
شكرا لك على المرور و الفيديو
الفديو ممتع للغاية كما هي انتاجات ديزني دائما
و هو يعرض لنا شخصية اخرى لبطوط ..
غير بطوط المجلات ..
انه بطوط بطل الافلام ..
بطوط رشح تسع مرات لجائزة الاوسكار ونالها مرة ..
اما صوته العصبي المعبر عن الحالة البطوطية فهو من اداء الممثل كلارنس ناش ..
هذا الممثل هو اول من تكلم بصوت بطوط في اول افلامه حين خرج بطوط من البيضة و قال :
اشعر بالم في امعائي
ظل ناش يؤدي دور بطوط منذ الثلاثينيات حتى اليوم
و قد اصيب المسكين بعقدة نفسية من بطوط و اصابة نوع من الفصام
فهو يحاور نفسه دوما بصوت بطوط ايهما اهم ,, و احيانا يفاجئ مستمعية بالتحدث بصوت بطوط المبحوح العصبي في مناسبات محترمة كان احدها في البيت الابيض
| |
|
|
|
|
|
|
|
|
|
Re: لماذا لا يتزوج بطوط زيزي ؟؟!! (Re: حمور زيادة)
|
لماذ لا يعرس بطوط زيزي ؟؟
دي القصة
وتبدا من :
كلنا عارفين انوا بطوط عندوا ود خالوا اسموا محظوظ
محظوظ ده زول ثقيل جدا وبيحاول ياخز اي شي من بطوط وحتي زيزي
المهم انو محظوظ دعا جاه خبر انوا في شخص ترك ليه وصية بجزيرة مليانة ذهب والشرط الوحيد لاستلام الجزيرة انو محظوظ يكون معرس لاستلام الجزيرة
المهم زولك ما صدق ابدا وقام قعد يفكر بمين يعرس
فجاء جات في راسوا زيزي قال دي هي العروسة المطلوبة وقال في سروا يضرب عصفورين بحجر يكسب الجزيرة ويغيظ بطوط
المهم قام و اتصل بزيزي واوهما انوا هو جادي بالزواج
وانها لازم تسيب بطوط
زيزي ما صدقت لقيت ليها عريس جاهز وعندوا فلوس ومحظوظ كمان وما عندوا مشكلة ولا ارتباطات بابناء اخ ولا غيروا
بدون تفكير مشت مسرعة لي بطوط وقال ليه انها حتعرس محظوظ ورمت ليه الدبلة في وجهوا
المهم بطوط زعل شديد
وما عرف يقول ليها شنو
ومشي جري لي محظوظ عشان يتشاكل معاه 
بس لقي محظوظ مستنية ومعاه حراس عشان يهددوا بطوط وعشان بطوط ما يخرب العرس
فقاموا المجرمون ديل ضربوا بطوط ضرب شديد خلاص
نتفو ليه ريشوا ما خلوا فيه حاجة
غايتوا بطوط اخز علقة ساخنة شديد نستوا اسموا
ودي سبب الكدمة الموجودة في عينوا في الصورة وقام محظوظ اداهوا الكاس ده عشان يرفع من معنوياتوا شوية
في الوقت ده قامت زيزي بتجهزات العرس
حجزت الصالة وعزمت المعازيم واختارت الفستان والمصمم وبقت مشغولة ليل ونهار في الترتيبات
المهم محظوظ جاته جدة بطه وقالت ليه انت بجد عايز تعرس زيزي ؟
قال ليها اـــــــــــــــــــــــــــــــــــي
قالت ليه انت مستعد ان تتخلي عن حظك عشان زيزي
قال ليها بتقولي شنـــــــــــــــــو ؟؟زيزي شنو الي عشان اخلي ليها حظي ؟؟
قالت ليه يعني انت عايز تعرسها عشان شنو ؟ فقام حكي ليها القصة
قامت قالت ليه يا محظوظ انت لو عرست زيزي حتفقد حظك
لانوا حظك ده ما ساي ده هدية الساحرة الطيبة ليك يوم ولادتك
والطريقة الوحيدة لتبقي زول عادي بدون حظ هو زواجك
واظن في زول عرف الموضوع ده وعايزك تفقد حظك
قام محظوظ زعل شديد لمن قرب ينفجر
وقعد يفكر مين الي عايز منه الحظ بتاعوا مين ؟
فقال لي حبوبه بطه انوا ما حيعرس زيزي لانوا ما مستعد يبقي زول عادي
وده قراروا الاخير
فقامت ظهرت ليه الساحرة الشريرة وكلها شر وغضب
وقالت لي حبوبه بطه انتي خربتي علي الموضوع كلو
انا المفروض يكون عندي الحظ ده ما انت يا محظوظ
وقعدت تصرخ وتصرخ وتهدد محظوظ بانوا لو ما عرس زيزي حتقلب حياتوا جحيهم
بس اخونا ما ركز معاها وطلع وساب ليها المكان
في الوقت ده
الناس كلهم جو قاعة الاحتفال والعروس وصلت ومحظوظ ما جاء
الناس استغربت
وزيزي انحرجت شديد وقعدت تبكي وتقول ياريت ما خليت بطوط
ده كلوا بسبب طمعي يا بطوط
وتبكي وتنوح
لمن بقي لونها احمر
وبطوط المسكين مكسر قاعد في بيته يقول في نفسوا ان زيزي بعد العشرة دي كلها باعته عشان محظوظ
وقاعد يبكي علي حظوا العاسر
ويتخيل نفسوا مكان محظوظ في الكوشة
ذي ما شايفين في الصورة
بس جاتوا زيزي مسرعة بفستان الفرح ودموعها في عينيها
بطوط عاين ليها وسكت ما تكلم
ساعة ورا ساعه
وهي واقفه مستنية منوا كلمة
فقام قال ليها انوا البينهم انكسر
وانها كسرت قلبوا وجرحتوا جرح عميق
وما حيقدر يسامحها ابدا
لكن مع الزمن ممكن نكون اصحاب
ومر الزمن
وبقوا اصحاب
برغم حب بطوط الكبير ليها ما قدر يتنازل ويسامحها
فهوا بيطلع ويتونس معاها
يلبي ليها طلباتها
بجيب ليها زهور
ومرات نشوف الغيرة في عينيه
بس
برضوا مصر علي قراره بعدم الزواج منها
******
تحياتي
سالي
| |
|
|
|
|
|
|
| |
حمور زيادة
طلحة عبدالله
Faisal Elrasheed
salee
محمد فرح
Osama Mohammed
humida
rosemen osman
ناذر محمد الخليفة
عبد الواحد أبراهيم
انعام عبد الحفيظ
Mohammed Elhaj
omer osman
Rihab Khalifa
مريم بنت الحسين
Elmoiz Abunura
Rawia
Nazik Eltayeb
محمد عبد الماجد الصايم
ابراهيم قناوي
محمد أبوالعزائم أبوالريش
هند محمد
Hatim Salih
فيس بوك
تويتر
انستقرام
يوتيوب
بنتيريست