الثنائي/ د.( محمد جعفر +الصادق حسن).. بجمهورية مصر في الثمانينيات...تجربة ثرة يجب أن لا ننساها

Quote: الأخ عاطف مكاوي سلامات هذه للنشر ** كلفت بتوزيع بيانات الحملة الإنتخابية في منطقة مدينة نصر التي تعج بالأخوان المسلمين، فدخلت في إحدى شقق مساكن عثمان (كانت مليانة كيزان) ، فدقيت على الباب ودخلت ولما وزعت ليهم البيانات، وكنت عاوز اتخارج سريع لانه شقق كثيرة جدا والوقت ضيق. فبدأوا في النقاش (بقصد تعطيلي من توزيع البيانات) وواحد قال لي انتو افكاركم مستوردة، فبتذكر رديت عليهو وقلت ليهو والله الشعب السودان شعب غير مقفول على نفسه يتأثر بالعالم وبما يحيط به. وقلت ليهو ما تنسى انه الأسلام ما نبع في الشكينيبة (قرية جنب مدني) جانا برضو من بره. فكلهم قعدوا يضحكوا ، وبتذكر انه لاقيت احدهم في السودان وكان ودود شديد (والله ياخي حتى كيزان مصر على المستوى الإجتماعي كانوا ظراف. ) ** بتذكر انه برضو.. قبل الأنتخابات . …كان عندنا ندوة عن مجانية التعليم ، فحضروا مجموعة من الكيزان وبدأوا في النقاش وكانوا عاوزين يحرفوا النقاش عن مجانية التعليم ، وكانوا بنادوا بي إسلامية التعليم، فبتذكر عضو الجبهة الديمقراطية الكان بيدير الندوة قال ليهم لما زهج منهم .. انتو يا جماعة انحنا التعليم بتاعنا فيهو حصص دين وحتى التاريخ بتاعنا بدرسونا الصحابة. ولا انتو دايرين حتى في الحساب استاذ الرياضيات يقول (خمسة زائد خمسة يساوي عشرة انشاء الله) . ** ود البيه : كان في الإنتخابات طالع ونازل مع بت ، فمره سألته انت يا ود البيه .. أنحنا علاقتنا دي نسميها شنو؟؟ قاصده ليهو حب ولا صداقه. فود البيه قال ليها نسميها داؤووووود. ** الطرائف التي حصلت خارج نطاق السياسة: بتذكر كان لامين فيني من الزملاء علاء محمد السيد (بربر) ومجدي المدني (واد مدني) شغالين لي شغل شديد، كرهوني العيشة وانا كنت مسكين ما بعرف لي كلام زي دا. فمره قلت أزهج ليك علاء محمد السيد ، قلت ليهو يا علاء والله بصراحة خطيبتك شينه. بعدها بي شهر كنا قاعدين انا وهو وخطيبته، في أثناء الونسة قال ليها انتي تعرفي يا إج….. حسن قال انتي شينه ، انا ما عرفت اودي وشي وين. ** كنا متلمين في شقة الجيزة ، فجمعنا القروش ثلاثون جنيه وقال لي تمشي تجيب العشاء والشراب ، وكان معاي أخوي حليم فمشينا اشترينا شراب بي تسعة وعشرين جنية ونص وعشاء بي نص جنيه. فلما جينا راجعين ختينا الشراب والفول والعيش في التربيزة ، فقام علاء الدين عبد الرحمن السيد من الكرسي وحك رأسه بيده اليمنى وقال دا شنوا دا ؟؟؟؟؟؟؟؟؟ انتو عملتوها كلها عشأ! ** بتذكر انه كنت ساكن مع السر محجوب ، فكان عنده اخواته زاروهو في البيت وكنا مفلسين ، فقام السر شال منهم عشرين جنيه، ماشي يشتري سندوتشات والعشرين جنيه وقعت منه جنب المطعم، وجاء راجع شكله كده يعني بيقول انه العشرين جنيه ضاعت …. من غير ما يتكلم…خاصة وانه جاء راجع خالي الوفاض من غير اي سندوتشات.. فقاموا اخواته الإثنين قالوا ليهو بصوت واحد ضيعت القروش !!!! حسن محمد سعيد