فقري وعاق وكل أصحابي شذاذ آفاق ... لـ/ د.عباس الرضي

Quote: فقري وعاق وكل الحولي شذاذ افاق ماتلوثنا بحق الماتو وحق البلد الناسو رقاق وماكضبنا وقلنا ياالله : غيث السكنو قصورك و أكلوا رقاق فقري وشايل من تمرات حميدة الزاد فقري وعارف دربي كويس لا بنغشى ولا بنقاد وكان لاقيت النهبو اولادي بحمر فيهم وفي كافورى وفي بنيانن وعهر لسانن واسرج فرح الثورة الجاي يسابق فرسي ويرخي حصانن وما بتراجع كان ادوني الزيت مجاني وعرضوا علي حريرن ومالن فقري وشايل بلدي قضية وهن شايلين الشين زي زادن وكان اجرسوا مرة وقالو : ( الكوع ولحسنا ) ما بنغشى واقول الحية بتعرف الله الله كبير ومخير فوقم ضمة يكسر زرعا سووا حرام وشقاق ومابتحير كان البحر الاحمر دفق مويتو المالحة وقال للثورة كتير مشتاق والله قضارف الخير انفجرت حرقت دار الحزب العاق والله عيال الديم كان سكوا العسكر القال حارسنا وبقى سراق فقري و حب الثورة في دمي بيجري وداير الثورة تعانق مدني وتمشي لبحري وما بحكمني اللص العصري ( الحلب الناقة في الشنقاقة ،، جانا ###### سنونو صفر ،، واحمد طالب شاف العايب يرقص مرة ويحلف مرة ومن الخوف ما بمرق برة !!! عشان اوكامبو بحمر فيهو وفاتو وراهو تزيد الصرة !!! والفات فات وفي كافوري سوى الفيلات وفي بيتو عامل غاللاط وفي الحفلة عاين لبنات ووزيرو شال حواشات ود أختوا عامل شغلات والعسكر واقف طابور والكوز عايز جلكوز و بلدنا سجمنا ،،، الفار قرما ) وكان سولنا ( موية السكر وصلو معانا يفضلو عسكر وفاجر كبر !!! ) ما بندورون ولا حا ندورون بدقناتن وباقي قصورن بأمانيهم وكل فجورن فقري و كل الحولي شذاذ افاق علا مدردر وعارف حقي و ( خط الهرجة ) حدود الهدرة وللتخريب كيفن انساق ؟؟؟ فقري وثوري وقايم بدري وبسمع امي تقول للثورة : محال تنقدري وما رضيان بحكومة تكضب ومن افعالن ضايق صدري فقري وما برجاهن يعدلوا حالي والله يردوا الزمن الفرتق وأصبح خالي وحالف حلفا جد و مغلظ ووصفو خيالي مش حتراجع لمن ادوس اللص بنعالي فقري وعاق وكل اصحابي شذاذ افاق علا مأدب وعارف الله وحق دفع الله وشارع الحلة ولفة بيتنا وأي زقاق !! تهنا زمان وهسع عرفنا الكتلو اخوانا وباقي حجانا وشرطوا الهدمة كان ساترانا تهنا زمان وهسع عرفنا وحتى اصحابي غشيمن فاق فقري وضايق صدري وكل اصحابي شذاذ آفاق